1. Ua ntej Yexus tuag, nws hais rau tus neeg raug txim ntawm nws ib sab li cas? (Lukas 23:39-43)

 YEXUS thiab ob tug uas dai nrog nws lub zog ntaug zuj zus vim lawv raug dai txom nyem ntsuav thiab lawv txoj sia yuav tu. (Lukas 23:32, 33) Ob tug neeg raug txim ntawm Yexus ib sab tsis yog Yexus cov thwj tim vim nkawd hais lus thuam nws. (Mathais 27:44; Malakaus 15:32) Muaj ib tug txawm hloov siab thiab hais tias: “Thaum koj . . . ua Vajntxwv, thov koj nco txog kuv thiab.” Yexus teb hais tias: “Kuv qhia tseeb rau koj hais tias, . . . koj yuav tau nrog kuv nyob [hauv lub Vaj Kaj Siab].” (Nyeem Lukas 23:39-43.) Tej zaum tus neeg raug txim uas hloov siab no kuj tau hnov Yexus piav txog “Vajtswv txoj kev kav,” tiam sis nws tsis tau ua Yexus ib tug thwj tim. Tsis tas li ntawd, Yexus tsis tau hais tias tus txiv neej no yuav tau mus nrog Yexus ua vaj ntxwv kav saum ntuj ceeb tsheej. (Mathais 4:17) Yexus tsuas hais txog yav tom ntej thaum yuav muab lub ntiaj teb kho ua ib lub Vaj Kaj Siab xwb. Vim li cas peb ho paub li ntawd?

2. Ua li cas peb ho paub tias tus neeg raug txim uas hloov siab ntawd ho yog ib tug neeg Yudais?

² Tej zaum tus neeg raug txim uas hloov siab ntawd kuj yog ib tug neeg Yudais. Tus neeg raug txim ntawd thiaj hais rau tus neeg raug txim sab tom ub tias: “Koj tsis ntshai Vajtswv los? Koj twb raug txim ib yam nkaus li nws thiab.” (Lukas 23:40) Cov neeg Yudais teev tiam ib tug Vajtswv xwb tiam sis tej pej kum neeg teev tiam ntau tus vaj tswv. (Khiav Dim 20:2, 3; 1 Kauleethaus 8:5, 6) Yog hais tias ob tug neeg raug txim no tsis yog neeg Yudais ces tej zaum tus neeg raug txim uas hloov siab yuav hais tias, “Koj tsis ntshai tej vaj tswv los?” Tsis tas li ntawd, Vajtswv tsis tau txib kom Yexus los mus qhia rau tej pej kum neeg tiam sis nws txib Yexus “los pab cov Ixayees xwb. Lawv zoo li pab yaj uas poob zoo lawm.” (Mathais 15:24) Vajtswv qhia rau cov Ixayees  tias Nws yuav tsa cov neeg uas tas sim neej lawm rov qab los. Tej zaum tus neeg raug txim uas hloov siab paub li no, nws thiaj cia siab ntsoov tias Vajtswv yuav tsa nws rov muaj sia dua. Tsis tas li ntawd, nws thiaj hais tias Yehauvas yuav tsa Yexus los ua Vaj Ntxwv kav Vajtswv lub Nceeg Vaj.

3. Piav seb thaum Yexus hais txog lub Vaj Kaj Siab, tus neeg raug txim uas hloov siab ntawd xav li cas. (Chivkeeb 2:15)

³ Vim tus neeg raug txim uas hloov siab ntawd yog ib tug neeg Yudais, nws thiaj li paub txog Adas thiab Evas thiab lub vaj zoo zoo nkauj uas Yehauvas tsim rau nkawd nyob. Yog li ntawd, nws thiaj ntseeg tias lub Vaj Kaj Siab uas Yexus hais ntawd yog thaum muab lub ntiaj teb no kho ua ib lub vaj zoo zoo nkauj.​—Nyeem Chivkeeb 2:15.

4. Yexus cov lus hais rau tus neeg raug txim ua tau rau peb zaum tsaws xav li cas?

⁴ Yexus cov lus hais rau tus neeg raug txim ntawd tshoj tau peb lub siab kom xav txog lub neej nyob hauv lub Vaj Kaj Siab. Thaum Xalaumoos tseem ua Vaj Ntxwv kav, kuj ua rau peb pom lub Vaj Kaj Siab zem zuag tias yuav thaj yeeb npaum li cas. Nyob rau hauv phau Vajlugkub hais tias Yexus muaj hwj chim loj dua Xalaumoos. Peb paub tias Yexus thiab cov nrog nws kav yuav txhim kho lub ntiaj teb kom zoo zoo nkauj. (Mathais 12:42) Yog li ntawd, cov uas yog lwm pab yaj yuav tau ua npaum li lawv ua tau kom lawv muaj feem nyob rau hauv lub Vaj Kaj Siab mus ib txhis.​—Yauhas 10:16.

5. Koj xav lub neej nyob hauv lub Vaj Kaj Siab yuav zoo li cas?

⁵ Thaum koj zaum tsaws xav txog lub Vaj Kaj Siab, tej zaum koj yuav pom ib qho chaw zoo zoo nkauj li lub vaj Edees. (Chivkeeb 2:7-9) Ntshe koj yuav ras txog zaj faj lem uas Mikhas sau tseg txog Vajtswv cov tib neeg tias “txhua tus yuav nyob kaj siab lug ntawm nyias tej vaj txiv hmab, txiv ncuavpias.” (Mikhas 4:3, 4) Tej zaum koj yuav nco txog cov nqe Vajlugkub uas hais tias yuav muaj zaub mov nplua mias. (Phau Ntawv Nkauj 72:16; Yaxayas 65:21, 22) Koj txawm zaum tsaws xav tias koj nyob rau hauv ib lub vaj zoo zoo nkauj, zaum ntawm ib lub rooj uas muaj zaub mov puv ntia. Tej cua hliv tsw qab ntxiag yam li tej paj ntoos. Koj hnov koj tsev neeg, tej phooj ywg kwv luag thiab cov sawv rov los muaj sia tej suab luag nrov zom zaws. Tej koj xav hauv nruab siab no tsis yog npau suav xwb tiam sis yeej yuav muaj tiag tiag nyob rau hauv lub ntiaj teb no. Tsis tas li ntawd nyob rau hauv lub Vaj Kaj Siab, peb yuav txaus siab rau tes hauj lwm peb niaj hnub ua.

6. Thaum txog lub Vaj Kaj Siab, peb yuav ua dab tsi? (Saib daim duab.)

⁶ Yehauvas tsim peb kom txaus siab rau tes hauj lwm peb ua. (Tej Lus Qhia 2:24) Peb yuav muaj hauj lwm ntau heev ua rau thaum Khetos  Kav 1,000 Xyoo. Cov uas dim lub sij hawm uas muaj kev txom nyem loj kawg nkaus thiab qas txhiab qas plhom leej uas yuav sawv rov los, yuav tau muaj khaub ncaws los hnav, zaub mov noj thiab chaw nyob. Yog li ntawd, peb yuav muaj hauj lwm ntau heev ua thiaj muaj khoom txaus noj txaus siv. Puag thaum ub Adas thiab Evas nkawd yuav tau tu lub vaj Edees li cas ces peb yuav tau tu lub ntiaj teb kom ua lub Vaj Kaj Siab ib yam li ntawd. Thaum txog lub caij ntawd, peb yuav tau cob qhia qas txhiab qas vam leej uas sawv rov los muaj txoj sia, tsis hais cov uas paub Yehauvas me ntsis los sis cov uas teev tiam Yehauvas ua ntej Yexus los yug hauv ntiaj teb no.

7. Peb tso siab tau li cas thiab vim li cas peb ho tso siab?

⁷ Peb tso siab tau tias thaum txog lub Vaj Kaj Siab, peb yuav nyob thaj yeeb, muaj txhua yam, thiab txhua yam yuav muaj chaw txawb chaw rau. Vim li cas peb ho tso siab tias yuav zoo li ntawd? Rau qhov Yehauvas twb qhia peb me ntsis tias thaum nws tus Tub kav, txhua yam yuav zoo li cas rau li cas rau lub caij uas Xalaumoos ua Vaj Ntxwv kav.

8. Cov lus nyob rau hauv Phau Ntawv Nkauj 37:10, 11, 29 xaus li cas tom qab Vaj Ntxwv Daviv sau tiav lawm? (Mus saib “Tej Uas Peb Xav Paub” hauv phau ntawv no.)

⁸ Vajtswv tshoov kom Vaj Ntxwv Daviv sau txog ib tug vaj ntxwv uas yuav kav yav tom ntej thiab seb thaum nws kav lawm, lub neej ho yuav zoo li cas. (Nyeem Phau Ntawv Nkauj 37:10, 11, 29.) Feem ntau peb yeej nyeem nqe Vajlugkub nyob rau hauv Phau Ntawv Nkauj 37:11 rau lwm tus mloog thaum peb qhia txog lub Vaj Kaj Siab. Tos peb nyeem nqe no yeeb vim yog Yexus piav txog nqe no thaum nws qhia rau saum roob rau tib neeg mloog thiab nws qhia tias tej no tseem yuav muaj los yav tom ntej. (Mathais 5:5) Tsis tas li ntawd, Daviv cov lus kuj qhia tias lub neej yuav zoo li cas rau thaum Xalaumoos kav. Lub caij Xalaumoos kav cov Ixayees, Vajtswv cov tib neeg nyob thaj yeeb thiab vam meej ntxhias hauv lub teb chaws “uas muaj kua mis thiab zib ntab ntws nto.” Vajtswv hais tias: “Yog nej ua neej raws li kuv tej kevcai . . . , kuv yuav pub kom nej lub tebchaws muaj kev thajyeeb, thiab nej yuav tau zoo pw tsaug zog tsis muaj leejtwg yuav ua rau  nej ntshai.” (Levis Kevcai 20:24; 26:3, 6) Cov lus no yeej muaj raws nkaus li ntawd thaum Xalaumoos sawv ua Vaj Ntxwv kav cov Ixayees. (1 Xwmtxheej Vajntxwv 22:9; 29:26-28) Yehauvas cog lus tias cov neeg phem “yuav puastsuaj mus.” (Phau Ntawv Nkauj 37:10) Yog li ntawd, cov lus uas nyob rau hauv Phau Ntawv Nkauj 37:10, 11, 29 yeej muaj xaus rau yav thaum ub thiab tseem yuav muaj rau yav tom ntej.

9. Tus poj vaj Senpas hais li cas txog Xalaumoos txoj kev kav?

⁹ Thaum Xalaumoos ua vaj ntxwv kav, muaj kev thaj yeeb thiab vam meej kawg li. Nws lub koob lub npe thiaj nrov ncha moo lug mus txog tus poj vaj Senpas. Tus poj vaj no thiaj li tuaj xyuas lub nroog Yeluxalees seb zoo npaum li cas tiag. (1 Vajntxwv 10:1) Thaum nws tuaj pom txhua yam tas, nws hais tias: “Muaj ib nrab kuv yeej tsis tau hnov hlo li. . . . Ua li cas koj cov [neeg] yuav muaj hmoo ua luaj! Thiab koj cov tub qhe los muaj hmoo kawg li, lawv niaj hnub nrog koj nyob thiab hnov tej lus txawj ntse uas koj hais.” (1 Vajntxwv 10:6-8) Xalaumoos txoj kev kav no piv txwv txog tej yam Yehauvas yuav ua yav tom ntej thaum nws tus Tub Yexus ua Vaj Ntxwv kav.

10. Ua li cas ho hais tias Yexus muaj hwj chim dua Xalaumoos?

¹⁰ Yexus muaj hwj chim dua Xalaumoos rau txhua fab. Xalaumoos yog noob txaug neeg txhaum ces tom qab no nws kuj ua tau ntau yam yuam kev raug rau Vajtswv cov tib neeg. Yexus tsis muaj kev txhaum, nws thiaj kav tau ncaj tau ncees rau txhua fab. (Lukas 1:32; Henplais 4:14, 15) Txawm Xatas yuav ua zaj ua ntxeev sim Yexus los Yexus yeej tsis tso Vajtswv tseg. Yexus Khetos yeej ua ntau yam qhia tias thaum nws kav, nws yuav tsis ua yuam kev thiab nws tej pej xeem yuav tsis raug xwm txheej dab tsi. Peb ris txiaj ntsig kawg nkaus li uas muaj nws los ua peb tus Vaj Ntxwv.

11. Leej twg yuav pab Yexus kav?

¹¹ Cov 144,000 leej yuav pab Yexus kav neeg ntiaj teb thiab lawv yuav ua txhua yam kom muaj tiav raws li Yehauvas lub ntsiab. (Tshwmsim 14:1-3) Cov uas pab Yexus no, thaum lawv tseem nyob hauv ntiaj teb, lawv raug sim ntau yam lawv thiaj paub hais tias tib neeg tiv kev txom nyem li cas rau li cas. Cov uas pab Yexus, lawv tes hauj lwm yog li cas rau li cas tiag?

12. Yehauvas yuav muab tes hauj lwm twg rau cov 144,000 leej?

¹² Yexus thiab cov uas pab nws, yuav muaj hauj lwm ntau dua Xalaumoos. Vaj Ntxwv Xalaumoos tsuas saib xyuas cov tib neeg coob coob nyob hauv nws lub teb chaws xwb. Hos cov uas kav ntawm Vajtswv lub Nceeg Vaj yuav saib xyuas qas txhiab qas vam leej tib neeg thoob plaws ntiaj teb. Yehauvas tau muab ib teg hauj lwm zoo kawg li rau cov 144,000 leej ua.

13. Cov uas nrog Yexus kav yuav muaj ib tes hauj lwm twg ntxiv?

¹³ Cov 144,000 leej yuav tau ua vaj ntxwv thiab cov pov thawj yam li Yexus. (Tshwmsim 5:10) Thaum cov Ixayees tseem coj raws li Mauxes Txoj Kev Cai, cov pov thawj pab ntshis kom cov Ixayees noj qab haus huv thiab nrog Yehauvas sib raug zoo. Mauxes Txoj Kev Cai “tsuas yog tej tseemceeb uas yuav los tom ntej no tus duab xwb,” yog li ntawd cov uas nrog Yexus kav yuav pab saib xyuas kom Vajtswv cov tib neeg noj qab haus huv thiab nrog Yehauvas sib raug zoo tib yam nkaus. (Henplais 10:1) Tam sim no peb tsis paub tias yav tom ntej xyov cov ua vaj ntxwv thiab ua pov thawj yuav nrog tau neeg sib txuas lus li cas rau li cas. Txawm Yehauvas tau npaj tseg li cas lawm los peb tso siab tias thaum txog lub Vaj Kaj Siab, cov uas nyob hauv lub ntiaj teb yeej yuav paub seb lawv yuav ua dab tsi rau dab tsi.​—Tshwmsim 21:3, 4.

14. Lwm pab yaj thiab Khetos cov kwv tij sib raug zoo li cas?

¹⁴ Yexus hais txog ob pab yaj uas sib koom siab. Nws hu thawj pab uas yuav nrog nws kav ua “cov menyuam yaj.” (Lukas 12:32) Pab ob, nws hu ua lwm paj yaj. (Yauhas 10:16) Niaj hnub niam no, ob pab no yeej sib koom siab ua hauj lwm ua ke thiab lawv haj tseem yuav ua hauj lwm ua ke thaum lub ntiaj teb ua lub vaj kaj siab lawm. Thaum txog lub sij hawm ntawd, “cov menyuam yaj” yuav nyob saum ntuj ceeb tsheej hos cov uas yog lwm pab yaj txoj kev cia siab yog nyob hauv lub ntiaj teb mus ib txhis. Muaj qho yam uas lwm pab yaj yuav tau ua tam sim no xwv lawv thiaj tau nyob hauv lub Vaj Kaj Siab.

15. (1) Lwm pab yaj ua hauj lwm li cas nrog Khetos cov kwv tij? (2) Koj xyaum tau tus kwv tij mus hauv khw tus yam ntxwv li cas? (Saib daim duab.)

¹⁵ Tus neeg raug txim uas hloov siab, tuag ua ntej nws muaj cij fim qhia tias nws ris txiaj ntsig npaum li cas rau tej Khetos tau ua rau nws. Niaj hnub niam no peb uas yog lwm pab yaj, muaj cij fim ntau heev los qhia tias peb ris txiaj ntsig rau Yexus. Xws li qhov uas peb qhia tias peb hlub tshua txog Yexus, yog peb saib taus Yexus cov kwv tij uas yog cov xaiv tseg. Yexus yuav txiav txim rau cov yaj raws li tej lawv tau ua rau nws cov kwv tij. (Mathais 25:31-40) Qhov uas peb txhawb nqa Yexus cov kwv tij yog kub siab lug mus tshaj tawm txoj xov zoo thiab coj tib neeg los ua Yexus cov thwj tim. (Mathais 28:18-20) Yog li ntawd peb yuav tau siv tej ntaub ntawv uas lawv tau muab rau peb, xws li phau ntawv Nyob Kaj Siab Lug Mus Ib Txhis. Tsis txhob ua siab deb, kav tsij nug seb puas muaj ib tug twg xav kawm Vajlugkub nrog koj, cheem koj tseem tsis tau muaj ib tug koj qhia rau.

16. Peb coj tau li cas tam sim no kom pab peb txawj ua pej xeem thaum Vajtswv lub Nceeg Vaj kav?

¹⁶ Txhob tos kom txog lub Vaj Kaj Siab es mam li hloov peb lub neej raws li Yehauvas lub siab nyiam. Kav tsij xyaum hais lus tseeb, ua qhov yog, thiab ua lub neej xyuam xim. Tsis tas li ntawd nrog Yehauvas, peb tus txij nkawm thiab cov ntseeg sib raug zoo. Yog peb yim mloog Yehauvas lus tam sim no ces yim yooj yim rau peb mloog Yehauvas lus hauv lub Vaj  Kaj Siab. Tseem tshuav ntau yam uas peb yuav tau xyaum tiag kom thiaj nyob tau rau hauv lub Vaj Kaj Siab. Mus saib zaj “Koj Puas Tau Npaj Siab Nyob Hauv Ntiaj Teb?” hauv phau ntawv no.

17. Piav seb puas tsim nyog peb cia tej kev txhaum peb ua tag los lawm txo peb lub zog.

¹⁷ Peb yuav tau tseg tsis txhob xav ntev xav ntau txog tej txhaum loj peb tau ua yav tag los. Tiam sis nco ntsoov tsis txhob siv Yexus tus nqe txhiv los npog ntsej muag es “txhob txwm ua txhaum.” (Henplais 10:26-31) Yog tias peb twb lees tej kev txhaum loj ntawd tuaj nruab siab lawm, thov Yehauvas pab, mus cuag cov txwj laus thiab hloov peb tus cwj pwm ces Yehauvas yuav zam peb lub txim huv tib si. (Yaxayas 55:7; Tes Haujlwm 3:19) Nco ntsoov Yexus cov lus nws hais rau cov Falixais tias: “Kuv tsis yog los nrhiav cov neeg ncaj ncees tiam sis kuv los nrhiav cov neeg muaj txim.” (Mathais 9:13) Yexus tus nqe txhiv yeej npog tau tag nrho peb tej kev txhaum.

18. Koj yuav nrog tus neeg raug txim uas hloov siab dai ntawm Yexus ib sab tham txog dab tsi?

¹⁸ Xav txog thaum koj nyob hauv lub Vaj Kaj Siab es koj mus nrog tus neeg raug txim uas hloov siab dai ntawm Yexus ib sab tham. Ntshe neb nyias yuav taus nyias hais tias neb ris txiaj ntsig kawg nkaus li rau Yexus tus nqe txhiv. Tej zaum koj yuav nug kom nws qhia rau koj seb muaj li cas ua ntej Yexus tuag thiab nws xav li cas thaum Yexus teb nws cov lus thov. Tej zaum nws kuj ho yuav tig los nug koj tias ua neej nyob rau tiam kawg hauv Xatas lub qab ntuj zoo li cas xwb. Yog tias ib tug twg muaj txiaj ntsig tau qhia Vajlugkub rau tej tug zoo li no, ntshe yuav zoo tiag tiag li.​—Efexus 4:22-24.

19. Vim li cas ua neej nyob hauv lub Vaj Kaj Siab yeej tsis muaj hnub yuav dhuav li? (Saib daim duab ntawm lub khaum.)

¹⁹ Lub neej nyob hauv lub Vaj Kaj Siab yeej tsis muaj hnub yuav dhuav li. Muaj ntau tus tib neeg peb yuav mus zeem thiab hauj lwm los yuav npau to. Tsis tas li ntawd, txhua hnub peb yuav paub peb Leej Txiv Yehauvas zoo zuj zus ntxiv thiab txaus siab rau txhua yam nws tau ua rau peb. Tshuav ntau ntau yam peb tseem yuav kawm txog nws thiab tej uas nws tau tsim. Peb yim nyob ntev ces peb txoj kev sib raug zoo nrog Yehauvas yim loj. Peb ris txiaj ntsig kawg li rau Yehauvas thiab Yexus nkawd vim nkawd yuav pub tau kom peb nyob tau mus ib txhis hauv lub Vaj Kaj Siab.