1. “Vajtswv txoj kev siab tus” yog li cas tiag thiab ho pab tau peb li cas? (Filipis 4:6, 7)

 MUAJ ib txoj kev siab tus uas neeg ntiaj teb paub tsis txog. Txoj no yog “Vajtswv txoj kev siab tus” uas thaum ib tug twg muaj kev sib raug zoo nrog Vajtswv, tus ntawd thiaj paub txog lub siab tus yees. Thaum Vajtswv pub peb muaj lub siab tus ces peb tsis nco txob tsis nco txhawj. (Nyeem Filipis 4:6, 7.) Peb nyiam nrog Vajtswv cov tib neeg ua ke. Tsis tas li ntawd, peb txaus siab uas peb los paub tus “Vajtswv uas pub txojkev siab tus.” (1 Thexalaunikes 5:23) Thaum peb paub, tso siab thiab mloog peb Leej Txiv Yehauvas lus, nws yuav pub kom peb muaj lub siab tus yees thev peb tej kev ntxhov siab thaum peb raug ib yam kev nyuaj siab ntxhov plawv twg.

2. Vim li cas peb ho paub tseeb tias peb yeej muaj taus Vajtswv txoj kev siab tus?

² Lub caij uas peb raug kab mob kis, muaj xwm txheej, teb chaws muaj kev kub ntxhov los sis raug tsim txom, peb puas muaj taus Vajtswv txoj kev siab tus tiag? Yog peb raug ib qho teeb meem raws li hais tas los no, yeej yuav ua rau peb ntshai tshee hnyo. Txawm li ntawd los Yexus ntuas nws cov thwj tim tias: “Nej tsis txhob txhawj, tsis txhob nyuaj siab thiab tsis txhob ntshai.” (Yauhas 14:27) Muaj coob leej ntau tus kwv tij nkauj muam ntseeg yeej coj raws li Yexus tej lus ntuas. Lawv muaj Yehauvas ua tus pab ces lawv yeej muaj lub siab tus yees thev dhau tej kev sim siab uas lawv raug.

3. Thaum muaj tej kab mob kis, ho ua rau peb lub siab nyob tsis tus li cas?

³ Thaum muaj kab mob kis qhov txhia qhov chaw, peb lub neej yeej hloov hlo lawm. Xws li thaum muaj tus kab mob khaus viv-19 (COVID-19) los raug sawv daws. Thaum tib neeg muab tej no los soj ntsuas mas qhia tau tias ib txhia tib neeg yeej tuaj tsis taus  dab ntub li. Ib txhia muaj kev nyuaj siab, ntxhov siab, quav dej quav cawv, haus yeeb haus tshuaj, txij nkawm sib ntaus, thiab tib neeg txo lawv txoj sia. Yog muaj kab mob kis rau ib cheeb tsam ntawm koj nyob, koj yuav tswj tej kev nyuaj siab li cas thiab muaj taus Vajtswv txoj kev siab tus li cas?

4. Vim li cas paub Yexus zaj lus faj lem txog lub sij hawm kawg ho ua rau peb lub siab tus?

⁴ Yexus faj lem tias nyob rau lub sij hawm kawg, yuav muaj kab mob kis “thoob plaws txhua qhov huv tibsi.” (Lukas 21:11) Qhov uas peb paub li no ho ua rau peb lub siab tus li cas? Peb tsis ceeb sob txog thaum muaj tej kab mob kis no tshwm tuaj. Peb paub tias yeej yuav muaj ua ntu zus raws li Yexus tau hais tseg. Yog li ntawd, peb thiaj nco ntsoov Yexus cov lus hais rau cov neeg nyob rau tiam kawg no tias: “Tsis txhob poob siab.”​—Mathais 24:6.

5. (1) Cov lus nyob hauv Filipis 4:8, 9 pab tau peb kom txawj thov txog tej yam twg thaum muaj tej kab mob kis? (2) Mloog cov lus uas kaw tseg cia txog phau Vajlugkub yuav pab tau koj li cas?

⁵ Thaum muaj kab mob kis, yeej ua rau peb ntshai thiab poob siab tag. Muaj ib tug muam npe hu ua Dawb ntshai kawg li thaum hnov txog kab mob kis. b Tom qab nws tus txiv ntxawm, tus txiv hlob tus tub, thiab nws tus kws tshuaj tag sim neej yeeb vim yog tim tus kab mob khaus viv-19, nws kuj ntshai nyob tsam nws ho kis tau tus kab mob ntawd ces ho muab kis rau nws niam. Tus kab mob no kuj ua rau nws txhawj nyob tsam nws poob hauj lwm ces ho yuav tsis tau zaub tau mov thiab them tsis tau nqi vaj nqi tsev. Tej kev txhawj xeeb no ua rau nws nyob tsheej tag hmo tsis tsaug zog. Vim li cas Dawb lub siab ho tus lawm? Nws thov Yehauvas pab kom nws ua siab txias txias thiab xav txog qhov zoo xwb. (Nyeem Filipis 4:8, 9.) Nws mloog cov lus uas kaw tseg cia txog phau Vajlugkub yam nkaus li Yehauvas “hais lus” rau nws. Nws hais tias, “Tus nyeem cov nqe Vajlugkub ntawd lub suab qhoob tau kuv lub siab kom nyob tus yees thiab ua rau kuv nco ntsoov tias Yehauvas yeej hlub tshua kuv.”​—Phau Ntawv Nkauj 94:19.

6. Kawm Vajlugkub thiab mus kev sib txoos yuav pab tau koj li cas?

⁶ Lub caij uas muaj kab mob kis, yeej tsis yooj yim rau peb ua tej uas peb ua yav tag los lawm tiam sis txhob cia tej ntawd los mus khuam cheem peb txoj kev kawm Vajlugkub thiab mus kev sib txoos. Thaum peb nyeem tej ntaub ntawv thiab saib tej yeeb yaj kiab txog tej uas cov kwv tij nkauj muam raug ib yam li peb ces peb yuav pom tias lawv haj tseem tuav rawv lawv txoj kev ntseeg. (1 Petus 5:9) Tej kev sib txoos yuav pab kom peb xav txog tej yam uas nyob hauv phau Vajlugkub los txhawb peb. Tsis tas li ntawd, kuj yuav pab kom peb ib leeg txhawb ib leeg lub zog. (Loos 1:11, 12) Thaum peb xav txog tej Yehauvas tau ua los pab cov  teev tiam nws xws li thaum lawv muaj mob, ntshai los sis nyob ib leeg, yuav tsav tau peb txoj kev ntseeg lawm hov ntau tuaj thiab peb yuav pom tau tias Yehauvas yeej txhawb nqa peb tib yam nkaus.

7. Koj khaws tau tus tub txib Yauhas tus yam ntxwv li cas?

⁷ Lauj sij hawm nrog cov kwv tij nkauj muam sib txuas lus. Thaum muaj tej kab mob kis, yeej zoo rau peb tsis txhob mus nrog cov ntseeg nyob ua ke ze ze. Tej ntwb ntu zoo li no, tej zaud koj yuav xav tib yam li tus tub txib Yauhas xav. Nws xav xav pom nws ib tug phooj ywg kwv luag npe hu ua Nkayus tim ntsej tim muag. (3 Yauhas 13, 14) Txawm li ntawd los Yauhas paub tias tsis yog caij nyoog zoo rau ob tug sib ntsib. Yauhas thiaj li sau ntawv mus cuag Nkayus. Yog hais tias tsis yog caij nyoog zoo rau cov kwv tij nkauj muam nej sib ntsib ua ke, los tsis txhob ua siab deb. Kav tsij hu xov tooj, ntaus ntawv hauv xov tooj los sis hu xov tooj kom pom duab. Yog koj yim nrog cov ntseeg sib txuas lus ces koj lub siab yim txias thiab koj tsis mluas. Hu mus cuag cov txwj laus yog koj lub siab ywj fab ywj fwj thiab mloog lawv tej lus txhawb zog.​—Yaxayas 32:1, 2.

8. Vim li cas thaum raug xwm txheej koj lub siab ho nyob tsis tus?

⁸ Yog tias koj tau raug dej nyab, av qeeg los sis hluav taws kub toj kub pes ces yuav ua rau koj ntxhov siab ntev loo tab txawm tej xwm txheej ntawd twb dua tag lawm. Yog koj tseem muaj ib tug hauv koj tsev neeg tag sim neej, koj vaj koj tsev thiab cuab txhiaj cuab tam raug puas tsuaj tas mas yuav ua rau koj lub kua muag ntws tsis so, tsis muaj kev vam kev cia siab los sis chim siab. Txawm koj coj li no los tsis tau hais tias koj yog ib tug neeg tsis muaj kev ntseeg los sis ntshaw yam ub yam no. Koj yeej raug ntau yam thiab tej zaum ib txhia yuav xav tias koj nyob mluas mlob. (Yauj 1:11) Txawm koj raug tej kev ceeb laj ntau npaum li no los koj tseem muaj taus lub siab tus. Vim li cas koj lub siab ho tus taus?

9. Yexus tau hais li cas los npaj peb lub siab thaum muaj xwm txheej?

⁹ Nco ntsoov Yexus cov lus faj lem. Muaj ib txhia tib neeg xav tias yeej yuav tsis muaj xwm txheej dab tsi los raug lawv li. Tiam sis peb paub hais tias yeej yuav muaj xwm txheej ntau zuj zus los raug sawv daws rau lub caij peb nyob no. Yexus hais rau nws cov thwj tim tias yuav muaj “av qeeg loj heev” thiab lwm yam xwm txheej ua ntej hnub kawg. (Lukas 21:11) Nws kuj hais ntxiv tias yuav muaj “kev phem loj zuj zus tuaj” xws li tub sab tub nyiag, sib ntaus sib tua, thiab tej neeg uas tua pej xeem hem teb chaws. (Mathais 24:12) Yexus tsis tau hais tias tej xwm txheej no tsuas los raug cov neeg uas Yehauvas tsis yuav xwb. Tej xwm txheej kuj los raug cov uas teev tiam Yehauvas thiab. (Yaxayas 57:1; 2 Kauleethaus 11:25) Yehauvas tsis ua txuj ci los mus tiv thaiv peb kom tsis txhob raug xwm txheej tiam sis nws yuav pub kom peb muaj lub siab tus.

10. Vim li cas qhov uas peb npaj tsam raug xwm txheej ho qhia tias peb muaj kev ntseeg? (Pajlug 22:3)

¹⁰ Yog peb npaj txhua yam txhij zog lawm ces thaum muaj ib yam xwm txheej twg los raug los peb lub siab yuav tus tus. Ua li npaj tej no puas qhia tias peb tsis muaj kev ntseeg rau Yehauvas ua tus pab peb? Tsis muaj tseeb li ntawd. Qhov uas peb npaj thiaj qhia hais tias peb yeej tso siab rau Yehauvas ua tus pab peb. Tos peb hais li no los yeeb vim yog Vajtswv Txoj Lus yeej cob qhia kom peb npaj ua ntej nyob tsam muaj xwm dab tsi los raug. (Nyeem Pajlug 22:3.) Nyob rau hauv tej ntaub ntawv uas Yehauvas lub koom haum luam tawm, tej kev sib txoos thiab tej lus tshaj tawm, yeej ceeb toom tas zaj tas zog kom peb npaj ua ntej muaj xwm los raug. c Yog peb tso siab rau Yehauvas tiag ces  peb yuav coj raws li tej lus ceeb toom ntawd tam sim no ua ntej muaj xwm txheej los raug.

11. Koj khaws tau dab tsi los ntawm Mab tus yam ntxwv?

¹¹ Muaj ib tug muam hu ua Mab. Cov nom tswv ntiab kom sawv daws cia li kav tsij khiav tawm ntawm lawv tej vaj tej tsev yeeb vim yog muaj hluav taws kub los ze ze lawm. Muaj coob leej ntau tus tib tsaug khiav tam sim ntawd ces ua rau kev ntsawm nkaus tsheb ntom nti. Mab yuav tau nyob twj ywm hauv nws lub tsheb tab txawm tej pa hluav taws ncho oov niab dub nciab. Tos nws dim los yeeb vim yog nws npaj kom muaj daim ntawv qhia kev xwv nws thiaj paub hais tias yuav mus qhov twg rau qhov twg. Thaum ua ntej tej xwm txheej no tsis tau los raug, nws twb yeej xub tsav tsheb ncig mus mus los los kom nws thiaj paub cov kev zoo zoo. Yog li ntawd, zoo kawg nkaus li uas Mab npaj ua ntej nws thiaj dim.

12. Vim li cas mloog tej lus uas Yehauvas lub koom haum qhia ho pab tau peb?

¹² Yuav kom peb thiab lwm tus dim, peb yuav tau mloog thaum cov nom tswv kom peb ua ib yam dab tsi twg xws li txhob nyob lig lig, khiav tawm los sis lwm yam uas lawv qhia kom peb ua. Ib txhia tib neeg tsis kam mloog yeeb vim yog lawv pheej tshua tej khoom uas lawv muaj nyob tom qab. Yog li ntawd ib tug ntseeg ho coj li cas? Nyob rau hauv phau Vajlugkub hais tias: “Nej yog cov uas ntseeg peb tus Tswv Yexus, yog li ntawd nej yuav tsum mloog nomtswv lus, thiab ua raws li tej kevcai uas nomtswv qhia. Nej yuav tsum mloog huabtais lus, rau qhov nws yog tus uas muaj hwjchim loj dua ntais tej nomtswv huv tibsi. Thiab nej yuav tsum mloog cov tswvxeev lus.” (1 Petus 2:13, 14) Yehauvas lub koom haum qhia kom peb coj li cas peb thiaj noj qab haus huv. Nco ntsoov muab peb tej chaw nyob los sis xov tooj rau cov txwj laus xwv lawv thiaj paub nrhiav peb thaum muaj xwm dab tsi. Tej zaum lawv kuj qhia kom peb nyob twj ywm hauv tsev, kom khiav tawm mus, thiab kom mus nqa khoom siv los sis mus pab lwm leej lwm tus li cas rau li cas. Yog peb tsis mloog lawv qhia ces tej zaum kuj yuav txov tau peb thiab cov txwj laus txoj sia. Nco ntsoov tias cov txwj laus yog cov uas saib xyuas peb. (Henplais 13:17) Mab tau hais tias, “Kuv ntseeg hais tias qhov uas kuv mloog cov txwj laus thiab lub koom haum lus pab cawm tau kuv txoj sia.”

13. Dab tsi pab tau cov ntseeg uas tau tso vaj tse tseg muaj kev kaj siab thiab muaj siab tus?

¹³ Cov kwv tij nkauj muam uas tau tso vaj tse tseg yeeb vim yog muaj xwm txheej, tsov rog los  sis teb chaws muaj kev kub ntxhov, yoog raws li qhov chaw tshiab lawv tau mus nyob ntawd thiab lawv tsis sej sij hawm tiam sis kub siab lug ua Yehauvas tes hauj lwm. Zoo ib yam li cov ntseeg nyob puag txheej thaum ub uas raug kev tsim txom, lawv mus txog qhov twg los lawv yeej “mus qhia Txojmoo Zoo.” (Tes Haujlwm 8:4) Qhov uas lawv mus qhia tib neeg pab kom lawv tsis txhob xav txog lawv tej teeb meem tiam sis xav txog lub Nceeg Vaj. Tej no pab kom lawv muaj kev kaj siab thiab muaj siab tus.

14. Vim li cas kev tsim txom ho ua rau peb lub siab nyob tsis tus?

¹⁴ Thaum peb raug kev tsim txom, ua rau peb lub siab ywj fab ywj fwj nyob tsis tus. Yav tas los, peb yeej nyob dhia rhees thaum peb mus kev sib txoos, mus qhia Vajlugkub, thiab niaj hnub ua ub ua no, tsis muaj kev txhawj ntshai nyob tsam yuav raug nom tswv ntes. Yog tias peb ua tsis tau tej no lawm ces peb lub siab ntxhov qas txoog thiab ntshai ruj rwg tias yuav muaj li cas los raug peb. Thaum raug ib tug twg lawm, tus twg los yeej muaj txoj kev txhawj ntshai no. Peb yuav tau ceev faj rau qhov Yexus twb tau hais tseg lawm tias kev tsim txom yuav ua rau ib txhia tso lawv txoj kev ntseeg tseg. (Yauhas 16:1, 2) Yuav ua li cas peb lub siab thiaj li tus thaum raug kev tsim txom?

15. Vim li cas peb yuav tau txhob ntshai kev tsim txom? (Yauhas 15:20; 16:33)

¹⁵ Vajtswv Txoj Lus hais tias: “Cov ntseeg Yexus Khetos txhua tus uas xav ua lub neej kom Vajtswv tau ntsejmuag, lawv yeej raug kev tsimtxom.” (2 Timautes 3:12) Muaj ib tug kwv tij npe hu ua Nruas ntseeg tsis taus li tias Yehauvas Cov Tim Khawv tes hauj lwm raug txwv hauv nws lub teb chaws lawm los haj tseem yuav raug tsim txom thiab. Nws hais tias: ‘Nyob hauv lub teb chaws no, Yehauvas Cov Tim Khawv coob heev. Lawv yuav ua li cas ntes peb tag?’ Qhov uas Nruas pheej xav mus xav los txog tej no ua rau nws lub siab nyob tsis tus. Lwm cov kwv tij paub ntsoov tias ib hnub twg lawv yeej yuav raug ntes ces lawv tso siab plhuav rau Yehauvas. Vim lawv xav li no, lawv thiaj tsis tshua ntxhov siab npaum li Nruas. Yog li ntawd, Nruas thiaj li pib xav ib yam li cov kwv tij no thiab tso siab plhuav rau Yehauvas. Ntev mus ntev tuaj, nws lub siab txawm tus thiab nws txawm rov kaj siab tab txawm lawv lub teb chaws ntxhov qas hnyo. Tsis hais peb los tej thaum kuj yuav raug ib yam li Nruas. Yexus  twb tau qhia tseg lawm tias peb yuav raug kev tsim txom tiam sis nws hais tias peb yeej muaj peev xwm tuav rawv tau peb txoj kev ntseeg.​—Nyeem Yauhas 15:20; 16:33.

16. Thaum raug kev tsim txom, peb yuav tau nco ntsoov tej lus qhia twg?

¹⁶ Thaum nom tswv txwv peb tes hauj lwm, tej zaum ceg Npe-ee thiab cov txwj laus yuav qhia kom peb coj li cas rau li cas. Tej lus lawv qhia tsuas yog los mus tiv thaiv peb, pab kom peb tau tej ub tej no los tsav peb txoj kev ntseeg, thiab pab kom peb qhia txoj xov zoo npaum li peb qhia tau. Nco ntsoov ua li peb ua tau los mloog tej lus lawv qhia tuaj tab txawm lawv hais qho yam ua rau peb tsis nkag siab. (Yakaunpaus 3:17) Tsis tas li ntawd, tsis txhob lam tau lam qhia li ub li no txog peb cov kwv tij nkauj muam thiab tes hauj lwm peb ua hauv lub koom txoos rau tej neeg uas tsis tsim nyog paub.​—Tej Lus Qhia 3:7.

17. Zoo ib yam li cov tub txib nyob thawj 100 xyoo, peb yuav tau peem tiag ua dab tsi?

¹⁷ Muaj ib yam uas Xatas tawm tsam Vajtswv cov tib neeg yog lawv ua tim khawv qhia txog Yexus. (Tshwmsim 12:17) Tsis txhob cia Xatas los sis Xatas lub qab ntuj neeg hem kom peb ntshai. Tab txawm muaj neeg yuav tawm tsam peb los, mus tshaj tawm txoj xov zoo thiab cob qhia tib neeg yuav pab kom peb muaj kev kaj siab thiab muaj lub siab tus. Nyob rau thawj 100 xyoo, thaum cov Yudais tej nom tswv txwv tsis pub cov tub txib qhia txoj xov zoo, cov tub txib yeem mloog Vajtswv lus dua. Qhov uas lawv qhia tsis tseg tsis tu ua rau lawv muaj kev zoo siab heev. (Tes Haujlwm 5:27-29, 41, 42) Thaum peb tes hauj lwm raug txwv, peb yuav tau xyuam xim thaum mus qhia txoj xov zoo. (Mathais 10:16) Yog peb ua npaum li peb ua tau ces peb yuav muaj lub siab tus yees vim yog peb ua haum Yehauvas siab thiab peb pab cawm lwm tus txoj sia.

18. Peb nrhiav tau lub siab tus los ntawm leej twg?

¹⁸ Cia li tso siab plhuav tias thaum peb raug ib yam kev ceeb laj twg, peb yeej muaj tau lub siab tus. Nco ntsoov tias lub siab tus ntawd yuav tsum yog Vajtswv txoj kev siab tus uas Vajtswv Yehauvas ib leeg thiaj muab tau. Cia li tso siab plhuav rau Yehauvas thaum muaj kab mob kis, muaj xwm txheej thiab raug tsim txom. Tsis txhob muab nws lub koom haum tso pov tseg. Xav txog lub neej tseem yuav los yav tom ntej. Yog peb ua li ntawd, “Vajtswv uas pub peb muaj lub siab tus yuav nrog nraim [peb].” (Filipis 4:9) Nyob rau zaj txuas ntxiv tom ntej no peb yuav kawm tias peb yuav pab cov ntseeg li cas thaum lawv muaj kev nyuaj siab ntxhov plawv xwv lawv thiaj muaj Vajtswv lub siab tus.