1. Ib tug txiv neej Khixatias yuav tau ua li cas xwv nws thiaj paub tab?

 VAJ NTXWV Daviv nkaw lus rau Xalaumoos li no tias: “Koj cia li ua khov kho yam li ib tug txivneej yawg.” (1 Vajntxwv 2:1-3) Cov txiv neej Khixatias niaj hnub niam no yuav tau ua ib yam li ntawd thiab. Yuav kom lawv ua tau raws li cov lus nkaw no lawv yuav tau xyaum mloog Vajtswv tej kev cai thiab txawj siv tej hauv paus ntsiab lus ntawd hauv lawv lub neej txhua txhua fab. (Lukas 2:52) Vim li cas yuav tseem ceeb ua luaj li, rau cov kwv tij hluas loj hlob mus ua ib tug txiv neej Khixatias uas paub tab?

2-3. Vim li cas tseem ceeb rau ib tug kwv tij hluas loj hlob mus ua ib tug txiv neej Khixatias uas paub tab?

² Ib tug txiv neej Khixatias yeej muaj hauj lwm ntau heev ua, xws li rau nws lub cuab lub yig los sis lub koom txoos. Cov kwv tij hluas, nej yeej paub tias nej yuav tau leg hauj lwm li cas rau nej lub neej tom ntej. Tej zaum koj muaj lub hom phiaj xav ua ib tug tho kev, ua ib tug tub leg num, thiab tom qab ntawd ua ib tug txwj laus hauv lub koom txoos. Ntxiv ntawd tej zaum koj kuj xav yuav poj niam thiab muaj tub muaj ki. (Efexus 6:4; 1 Timautes 3:1) Kom koj ua tau tej no tiav huv si, koj cheem tsum ua ib tug Khixatias uas paub tab. b

³ Kom koj hlob tau mus ua ib tug txiv neej Khixatias uas paub tab, muaj ntau yam uas koj yuav tau rau siab xyaum kom txawj. Yog li ntawd koj yuav tau npaj li cas tam sim no xwv koj thiaj yuav tuav tau tej hauj lwm uas yuav los cuag koj yav tom ntej kom tiav huv si?

4. Koj yuav xyaum tau tej yam ntxwv zoo qhov twg? (Saib daim duab.)

⁴ Xyaum tej yam ntxwv zoo. Phau Vajlugkub muaj ntau tus yam ntxwv zoo rau cov tub hluas xyaum. Cov txiv neej uas  muaj kev ntseeg hauv phau Vajlugkub hlub Yehauvas thiab lawv leg tej hauj lwm ntau heev xwv lawv thiaj saib xyuas tau Yehauvas cov tib neeg. Tsis tas li ntawd, kuj muaj cov txiv neej Khixatias paub tab hauv koj tsev neeg thiab lub koom txoos rau koj xyaum lawv tej yam ntxwv zoo. (Henplais 13:7) Thiab koj kuj muaj ib tug hneev taw uas zoo tiav log rau koj xyaum taug. Tus ntawd yog Yexus Khetos. (1 Petus 2:21) Thaum koj kawm txog cov txiv neej Khixatias uas paub tab no, ua tib zoo xav seb koj nyiam lawv tej yam ntxwv zoo twg. (Henplais 12:1, 2) Ces xav seb koj yuav xyaum lawv li cas.

5. Yuav ua li cas koj thiaj txawj ntse thiab vim li cas tseem ceeb rau koj ua li no? (Phau Ntawv Nkauj 119:9)

⁵ “Cia li ceev . . . kev txawj ntse.” (Pajlug 3:21) Ib tug txiv neej uas txawj ntse yeej yuav ua tib zoo xav ua ntej nws nqis tes ua ib yam dab tsi. Cia li rau siab ntso kom koj txawj ntse thiab tuav rawv qhov ntawd mus li. Vim li cas? Vim lub qab ntuj no puv ntia cov tub hluas uas tsuas pom ua ywj siab xwb, thiab tsis paub tswj tus kheej hlo li. (Pajlug 7:7; 29:11) Ntxiv ntawd, tej uas koj saib hauv this vis, hauv yeeb yaj kiab, hauv Is Taws Nej, thiab hauv tej vej xaij zeem phooj ywg yuav coj koj mus yoog raws li tej ntawd. Ua li yuav ua li cas koj thiaj txawj ntse? Thawj yam yog, rau siab ntso kawm Vajtswv Txoj Lus seb Yehauvas xav li cas thiab tej twg haum nws siab. Ces xav seb thaum koj ua raws li Yehauvas hais yuav tsav tau koj lub neej li cas. Tom qab ntawd, muab tej hauv paus ntsiab lus ntawd coj los pab kom koj txawj txiav txim siab. (Nyeem Phau Ntawv Nkauj 119:9.) Yog tias koj ceev tau kev txawj ntse, ces yuav pab tau koj ua ib tug txiv neej Khixatias uas paub tab. (Pajlug 2:11, 12; Henplais 5:14) Cia peb kawm ntxiv seb kev txawj ntse yuav pab tau koj paub txiav txim siab li cas: (1) thaum nrog cov muam ua ke thiab (2) thaum xaiv ris tsho thiab tu cev.

6. Kev txawj ntse yuav pab tau ib tug kwv tij hluas saib taus cov muam li cas?

⁶ Tus txiv neej uas muaj Yehauvas txoj kev xav yeej saib taus poj niam. Yeej tsis txhaum rau ib tug kwv tij hluas nyiam ib tug muam Khixatias. Tiam sis tus kwv tij hluas uas muaj kev txawj ntse yuav tsis lam hais, lam sau ntawv, los sis lam ua ib yam dab tsi uas yuav  ua rau ib tug muam xav yuam kev tias nws nyiam tus muam, yog tias nws tsis xav nrog tus muam ntawd sib sau ua neej. (1 Timautes 5:1, 2) Yog nws tham ib tug muam twg, nws yuav tau tiv thaiv tus muam ntawd lub koob lub npe. Nws tsis txhob nrog tus muam nkawd nyob nkawd ob leeg xwb. Nkawd yuav tau coj ib tug nrog nkawd thaum nkawd ua ke.​—1 Kauleethaus 6:18.

7. Kev txawj ntse yuav pab ib tug tub hluas li cas thaum nws xaiv tsoos hnav thiab tu cev?

⁷ Ib yam ntxiv uas tus tub hluas qhia tias nws txawj ntse yog tej tsoos nws hnav thiab seb nws tu cev li cas. Cov neeg xaws ris xaws tsho feem coob yog cov uas tsis coj Yehauvas tej kev cai thiab nyiam ua nkauj ua nraug. Yog li ntawd tej ris tsho lawv xaws lawv thiaj xaws zawm zawm kom ua rau txiv neej zoo nkaus li poj niam. Tus tub hluas uas paub tab thaum xaiv tsoos, nws yuav xav txog tej hauv paus ntsiab lus hauv phau Vajlugkub thiab txog cov uas coj tau zoo hauv lub koom txoos. Nws yuav nug nws tus kheej li no: ‘Tej tsoos kuv xaiv, kuv puas xav txog lwm tus seb lawv xav li cas thaum lawv pom kuv hnav, thiab puas ua rau lawv xav tias ntshe kuv tsis yog ib tug teev tiam Vajtswv?’ (1 Kauleethaus 10:31-33; Titus 2:6) Tus tub hluas uas txawj ntse yuav xaiv tej tsoos uas ua rau lwm tus hwm thiab saib taus nws, thiab yuav ua rau nws leej txiv Yehauvas zoo siab.

8. Ib tug kwv tij hluas yuav ua li cas luag thiaj tso siab rau nws?

⁸ Ib tug luag tso siab rau. Tus tub hluas uas luag tso siab rau yeej rau siab ntso ua hauj lwm. (Lukas 16:10) Cia peb mus tham txog Yexus tus yam ntxwv. Thaum nws ua hauj lwm, nws yeej rau siab ntso ua, nws tsis ua dog ua dig. Tej hauj lwm Yehauvas txib nws mus ua, nws yeej muab siab ua tiag tiag txawm yuav hnyav npaum li cas. Nws hlub tib neeg heev, cov nws hlub tshaj yog nws cov thwj tim. Nws thiaj yeem muab nws txoj sia this lawv. (Yauhas 13:1) Cia li xyaum Yexus tus yam ntxwv es rau siab ntso ua tej hauj lwm uas koj tau txais. Yog koj tsis paub ua ib tes hauj lwm twg, cia li txo hwj chim es thov lwm tus kwv tij uas paub tab pab koj. Tsis txhob lam tau lam ua kom tag cai xwb. (Loos 12:11) Ua koj tes hauj lwm kom tiav. Nco ntsoov tias, ‘txhua yam uas koj ua, . . . koj ua rau Yehauvas, tsis yog koj ua rau neeg.’ (Kaulauxais 3:23) Vim koj tsis yog ib tug neeg zoo tiav tiav, tej zaud koj yeej yuav ua yuam kev. Thaum zoo li ntawd cia li txo hwj chim es lees koj lub txim.​—Pajlug 11:2.

9. Vim li cas ho zoo rau ib tug tub hluas paub ua neej?

⁹ Yuav kom koj ua tau ib tug txiv neej Khixatias paub tab, koj yuav tsum paub ua neej. Yog koj paub ua neej ces koj yeej yuav tuav tau tej hauj lwm hauv lub koom txoos thiab paub mus khwv noj khwv haus los yug koj tus kheej los sis koj lub cuab lub yig. Tsis tas li ntawd xwb yog koj paub ua neej ces koj yuav nrog lwm tus sib raug zoo dua. Cia peb mus tham txog ob peb yam uas yuav pab koj ua neej.

10-11. Yog ib tug kwv tij hluas txawj nyeem thiab sau ntawv ces yuav pab tau lub koom txoos li cas? (Phau Ntawv Nkauj 1:1-3) (Saib daim duab.)

 ¹⁰ Xyaum txawj nyeem thiab sau ntawv. Phau Vajlugkub hais tias tus txiv neej uas muaj kev zoo siab thiab ua neej vam meej ntxhias yog tus uas nyiam nyeem Vajtswv Txoj Lus txhua hnub thiab xav txog tej ntawd. (Nyeem Phau Ntawv Nkauj 1:1-3.) Yog nws nyeem Vajtswv Txoj Lus txhua hnub ces nws yuav muaj Vajtswv txoj kev xav. Qhov no yuav pab tau nws txawj xav thiab txawj muab Vajtswv Txoj Lus coj los siv ua neej. (Pajlug 1:3, 4) Lub koom txoos cheem tsum cov txiv neej uas zoo li no.

¹¹ Peb cov kwv tij nkauj muam yeej tos nrhw cov txiv neej uas paub tab los qhia lawv thiab muab tswv yim pab lawv. (Titus 1:9) Yog koj txawj nyeem thiab sau ntawv, ces koj yuav npaj tau tej zaj lus qhuab qhia zoo thiab txhawb zog heev. Tsis tas li ntawd xwb thaum koj tsa tes teb, koj cov lus teb yuav raug siab heev. Thiab thaum koj mloog cov lus qhuab qhia tom koom txoos, tom tej rooj sib txoos ib hnub thiab peb hnub, koj yuav muab sau tau cia rau koj rov saib dua kom tsav tau koj txoj kev ntseeg thiab txhawb tau lwm tus.

12. Dab tsi yuav pab tau koj txawj sib txuas lus?

¹² Xyaum txawj sib txuas lus. Ib tug txiv neej Khixatias yuav tsum txawj sib txuas lus. Tus txiv neej uas txawj sib txuas lus yeej ua tib zoo mloog thiab yeej paub lwm tus txoj kev xav. (Pajlug 20:5) Nws yuav paub tias luag xav li cas yog nws ua tib zoo mloog luag lub suab, saib luag lub ntsej muag, thiab saib luag tus cwj pwm. Yuav kom koj ua tau li no, koj yuav tau siv sij hawm nrog tib neeg tham. Yog koj tsuas ntaus ntawv mus nrog tib neeg tham hauv e-mail thiab hauv xov tooj xwb ces koj yuav tsis paub nrog tib neeg sib txuas lus thaum koj pom lawv tim ntseg tim muag. Yog li ntawd, txhuas lub sij hawm uas koj pom tib neeg tim ntsej tim muag, zoo rau koj nrog lawv sib txuas lus.​—2 Yauhas 12.

13. Ib tug tub hluas kawm tau dab tsi ntxiv? (1 Timautes 5:8) (Saib daim duab.)

¹³ Xyaum ua hauj lwm. Tus txiv neej Khixatias uas paub tab yuav tsum ua hauj lwm yug nws tus kheej thiab nws lub cuab lub yig. (Nyeem 1 Timautes 5:8.) Nyob rau tej lub teb chaws, cov tub hluas tsuas kawm hauj lwm ntawm lawv txiv los sis ib tug txheeb ze xwb. Hos nyob rau lwm lub teb chaws, tej txhia tub hluas kuj kawm hauj lwm thaum lawv tseem kawm ntawv es tsis tas mus kawm ntawv qib siab. Txawm koj yuav kawm hauj lwm qhov twg los xij, tsuav yog koj kawm kom tau ib txoj hauj lwm xwb ces yeej zoo heev. (Tes Haujlwm 18:2, 3; 20:34; Efexus 4:28) Cia kom luag pom  tias koj yog ib tug uas nquag ua hauj lwm thiab ua tes hauj lwm twg los yeej ua tiav. Yog koj yog ib tug uas zoo li no ces yuav yooj yim rau koj nrhiav hauj lwm thiab thaum koj nrhiav tau ib txoj lawd, koj yuav tuav tau txoj hauj lwm ntawd mus li. Tej yeeb yam thiab tej kev kawm uas hais tas los no yeej tseem ceeb heev rau ib tug txiv neej Khixatias vim tej ntawd yuav pab nws ua tau tej hauj lwm uas nws yuav tau txais tom ntej. Cia peb mus tham txog tej hauj lwm ntawd ib txhia.

14. Ib tug kwv tij hluas yuav npaj li cas thiaj mus ua tau ib teg hauj lwm puv ntoob?

¹⁴ Ua hauj lwm puv ntoob. Coob tus txiv neej Khixatias uas paub tab pib ua hauj lwm puv ntoob thaum lawv tseem hluas. Tes hauj lwm tho kev yeej pab tau ib tug tub hluas paub ua hauj lwm nrog txhua hom tib neeg thiab kuj pab tau nws txawj txuag nyiaj. (Filipis 4:11-13) Yog nws ua ib tug pab tho kev ua ntej ces yuav pab tau nws ua ib tug tho kev. Thaum nws ua ib tug tho kev lawd, ces yuav qhib kev rau nws mus ua ntau yam hauj lwm puv ntoob, xws li mus ua ib tug tub ua vaj ua tsev los sis mus Npe-ees.

15-16. Yuav ua li cas ib tug kwv tij hluas thiaj ua tau ib tug tub leg num los sis ib tug txwj laus?

¹⁵ Ua ib tug tub leg num los sis txwj laus. Cov txiv neej Khixatias yuav tsum muaj hom phiaj ua txwj laus los pab cov kwv tij nkauj muam. Phau Vajlugkub hais tias cov txiv neej uas xav ua txwj laus yog “xav ua tes haujlwm uas zoo kawg nkaus.” (1 Timautes 3:1) Ua ntej ib tug kwv tij ua tau ib tug txwj laus, nws yuav tau ua ib tug tub leg num ua ntej. Cov tub leg num pab cov txwj laus ua ntau yam hauj lwm hauv lub koom txoos. Cov txwj laus thiab cov tub leg num yeej ua siab mos siab muag pab cov kwv tij nkauj muam thiab yeej kub siab lug mus tshaj tawm txoj xov zoo. Cov kwv tij hluas kuj ua tau tub leg num thaum lawv muaj li 17 txog 19 xyoos. Thiab ib tug tub leg num uas paub tab kuj ua tau ib tug txwj laus thaum nws muaj 20 xyoo rov saud.

¹⁶ Koj yuav ua li cas koj thiaj ua tau ib tug tub leg num los sis ib tug txwj laus? Phau Vajlugkub yeej qhia tias koj yuav ua li cas koj thiaj ua tau. Tej yeeb yam uas koj yuav tsum muaj yeej qhia meej meej nyob rau hauv phau Vajlugkub lawm, thiab nyob ntawm seb koj hlub Yehauvas, koj tsev neeg, thiab lub koom txoos npaum li cas. (1 Timautes 3:1-13; Titus 1:6-9; 1 Petus 5:2, 3) Rau siab kawm kom koj paub cov yeeb yam ntawd zoo. Thov Yehauvas pab kom koj muaj cov yeeb yam ntawd. c

17. Ib tug kwv tij hluas yuav npaj li cas thiaj ua tau ib tug txiv thiab ib tug txiv tsev? (Saib daim daub.)

 ¹⁷ Ua ib tug txiv thiab txiv tsev. Yexus tau hais tias, ib co txiv neej Khixatias uas paub tab kuj txiav txim siab tsis yuav poj niam. (Mathais 19:12) Tiam sis yog koj txiav txim siab yuav poj niam, koj yuav yog ib tug txiv tsev lawm, ces koj yuav muaj hauj lwm ntau ntxiv. (1 Kauleethaus 11:3) Yehauvas xav kom tus txiv hlub nws tus poj niam thiab saib xyuas kom tus poj niam muaj noj muaj haus, muaj kev kaj siab, thiab muaj kev ntseeg. (Efexus 5:28, 29) Tej uas peb tau kawm tag los xws li kev txawj ntse, saib taus poj niam, thiab ua ib tug luag tso siab rau, yuav pab tau koj ua ib tug txiv zoo. Yog koj muaj tej no ces yuav pab tau koj ua ib tug zoo txiv thiab ib tug zoo txiv tsev.

18. Ib tug kwv tij hluas yuav npaj li cas thiaj ua tau ib leej txiv?

¹⁸ Ib leej txiv. Tom qab koj yuav poj niam lawd, ces tej zaum koj kuj yuav ua ib leej txiv. Yehauvas tus qauv uas ua ib leej txiv zoo pab tau koj li cas? Muaj ntau yam koj kawm tau ntawm Yehauvas. (Efexus 6:4) Yehauvas tsis ntshai qhia rau sawv daws paub tias nws hlub nws Leej Tub Yexus. Thiab nws Leej Tub los, kuj ua haum nws siab. (Mathais 3:17) Thaum koj yog ib leej txiv lawd, nco ntsoov qhia rau koj cov me nyuam tsis tseg tias koj hlub lawv. Thaum lawv ua tau ib yam zoo, cia li qhuas lawv. Cov txiv uas xyaum Yehauvas yeej pab tau lawv cov me nyuam loj hlob los ua ib co txiv neej thiab poj niam Khixatias uas paub tab. Yog koj pab lwm tus hauv koj tsev neeg thiab hauv lub koom txoos ces yuav pab tau koj ua ib tug zoo txiv. Thiab qhia rau lawv tias koj hlub lawv thiab lawv muaj nqis rau koj. (Yauhas 15:9) Yog koj ua li no ces yuav pab tau koj thaum koj yuav poj niam thiab ua ib tug txiv tsev. Txawm tam sim no koj tsis muaj poj niam thiab me nyuam los, koj yuav muaj nqi heev rau Yehauvas, koj tsev neeg, thiab koj lub koom txoos.

19-20. Cov kwv tij hluas yuav tau ua dab tsi thiaj los ua tau cov txiv neej Khixatias uas paub tab? (Saib daim duab ntawm lub khaum.)

¹⁹ Nej cov kwv tij uas tseem hluas, nej yuav tau siv zog nej thiaj ua tau ib tug Khixatias uas paub tab. Nej yuav tau xyaum cov uas coj zoo, muaj kev txawj ntse, ua ib tug uas luag tso siab rau, paub ua neej, thiab npaj rau yav tom ntej.

²⁰ Thaum koj xav txog tej uas koj yuav tau ua yav tom ntej, tej zaum koj yuav xav tias nyuaj heev. Tiam sis koj yeej ua tau xwb. Nco ntsoov tias Yehauvas yeej xav pab koj tiag tiag. (Yaxayas 41:10, 13) Koj cov kwv tij thiab nkauj muam hauv lub koom txoos los yeej xav pab koj thiab. Thaum koj loj hlob ua ib tug txiv neej Khixatias uas paub tab lawd, koj yuav zoo siab thiab txaus siab heev. Peb hlub nej heev kawg li cov kwv tij hluas! Peb thov Yehauvas foom koob hmoov rau qhov uas nej rau siab ntso npaj kom nej ua tau ib tug txiv neej Khixatias uas paub tab.​—Pajlug 22:4.