1. Yuav tsum ua li cas peb txoj kev ntseeg thiaj li yuav loj hlob?

 PEB xav tsis thoob tias cas me nyuam loj hlob ceev ua luaj. Ib sij huam xwb txawm siv tiav niam tiav txiv lawm. Tiam sis kev ntseeg tsis zoo li ntawd. Yuav kom peb loj hlob los ua ib tug ntseeg uas paub tab, peb yuav tsum muaj kev sib raug zoo nrog Yehauvas. b (1 Kauleethaus 13:11; Henplais 6:1) Tsis tas li ntawd xwb, peb yuav tsum muaj lub hwj huam dawb huv pab, peb thiaj muaj tej yeeb yam uas ntxim Yehauvas siab, paub ua neej, thiab txawj npaj rau yav tom ntej.​—Pajlug 1:5.

2. Chivkeeb 1:27 qhia peb li cas, thiab zaj no peb yuav kawm txog dab tsi?

² Yehauvas tsim tib neeg kom muaj txiv neej thiab poj niam. (Nyeem Chivkeeb 1:27.) Tus txiv neej thiab tus poj niam nyias yeej txawv nyias. Xws li Yehauvas tsim kom txiv neej thiab poj niam nyias muaj nyias tes hauj lwm. Yog li ntawd, lawv nyias muaj nyias lub peev xwm kom nyias thiaj ua tau nyias tes hauj lwm. (Chivkeeb 2:18) Nyob rau hauv zaj no peb yuav kawm seb ib tug muam uas tseem hluas yuav tau ua li cas es nws thiaj loj hlob los ua ib tug ntseeg uas paub tab. Zaj tom ntej peb mam li kawm txog cov kwv tij uas tseem hluas seb lawv yuav tau ua li cas thiab.

3-4. Cov muam uas tseem hluas xyaum tau leej twg? (Saib daim duab.)

³ Phau Vajlugkub tham txog coob tus poj niam uas hlub thiab teev tiam Yehauvas. Lawv yog “cov uas xyuam xim”  thiab “txhua yam uas lawv ua lawv ua ncaj.” Tsis tas li ntawd xwb, muaj cov muam paub tab uas hlub Yehauvas nyob hauv lub koom txoos rau cov muam uas tseem hluas xyaum.

⁴ Nej cov muam uas tseem hluas, puas muaj tej tug muam uas paub tab hauv lub koom txoos uas nej xyaum tau? Ua tib zoo saib lawv tej yeeb yam es xyaum raws li lawv. Peb yuav kawm txog peb tug yeeb yam uas zoo rau cov muam coj.

5. Vim li cas kev txo hwj chim ho tseem ceeb heev rau tus poj niam Khixatias uas paub tab?

⁵ Yuav kom peb ua tau ib tug Khixatias zoo, peb yuav tsum txo hwj chim. Tus poj niam uas txo hwj chim yuav muaj ib txoj kev sib raug zoo nrog Yehauvas thiab lwm tus. (Yakaunpaus 4:6) Xws li tus poj niam uas hlub Yehauvas yeej zoo siab hlo ua raws li 1 Kauleethaus 11:3 uas qhia seb tus twg yog tus coj hauv lub koom txoos thiab hauv lub cuab lub yig. Cia peb mus kawm seb peb yuav siv lub hauv paus ntsiab lus no li cas hauv lub koom txoos thiab hauv lub cuab lub yig. c

6. Lenpekas tus yam ntxwv uas txo hwj chim pab tau cov muam uas tseem hluas li cas?

⁶ Cia peb mus kawm txog Lenpekas. Nws yog ib tug poj niam ntse thiab muaj siab loj siab tawv uas tsis ntshai hais thaum zoo hais thiab tsis ntshai ua thaum zoo ua. (Chivkeeb 24:58; 27:5-17) Tsis tas li ntawd xwb, nws kuj mloog lus thiab hwm lwm tus. (Chivkeeb 24:17, 18, 65) Yog koj txo hwj chim thiab hwm cov uas ua thawj li Lenpekas ces koj yuav tso tau ib tug yam ntxwv zoo rau koj tsev neeg thiab lub koom txoos xyaum.

7. Exethaws tus yam ntxwv uas tsis muab hlob pab tau cov muam uas tseem hluas li cas?

⁷ Yuav kom peb ua tau ib tug Khixatias zoo, peb yuav tsum tsis txhob muab hlob. Phau Vajlugkub hais tias “tswvyim yuav nrog nraim tus uas tsis muab hlob.” (Pajlug 11:2) Exethaws yog ib tug poj niam uas tsis muab hlob  thiab muaj kev ntseeg. Vim nws tsis muab hlob, thaum nws tau ua poj vaj, nws thiaj tsis khav theeb. Nws mloog thiab ua raws li Maudekhais qhia nws. (Exethaws 2:10, 20, 22) Koj kuj xyaum tau Exethaws es tsis txhob ua neeg muab hlob. Thaum kawg tswv yim lawd, koj kuj mus nug lwm tus kom pab koj thiab ua raws li tej lawv qhia.​—Titus 2:3-5.

8. Ua li 1 Timautes 2:9, 10 pab tau cov muam uas tseem hluas kom txawj xaiv tsoos thiab tu cev li cas?

⁸ Kuj muaj ib yam uas qhia tias Exethaws tsis yog neeg muab hlob. Exethaws yog ib tug ntxhais uas “zoo nkauj thiab ntxim nyiam kawg li.” Txawm li ntawd los nws tsis ua kom neeg qhuas nws. (Exethaws 2:7, 15) Cov muam xyaum tau Exethaws tus yam ntxwv li cas? Lawv kuj xyaum tau li hais hauv 1 Timautes 2:9, 10. (Nyeem.) Tus tub txib Povlauj ntuas kom cov poj niam Khixatias paub txo hwj chim thiab txawj xav. Povlauj tus nru lus yog kom cov poj niam paub txaj muag es tsis txhob hnav tej tsoos uas tsis tsim nyog hnav uas yuav ua rau lwm tus xav yuam kev. Peb qhuas nej cov muam uas hnav tej tsoos uas tsim nyog hnav xwb!

9. Anpinkayis tus yam ntxwv pab tau peb li cas?

⁹ Kev thoob tsib kuj yog ib qho yeeb yam uas cov muam yuav tsum muaj. Tus neeg thoob tsib zoo li cas? Tus neeg thoob tsib yog tus uas paub qhov zoo thiab tsis zoo, tiam sis yeem txiav txim siab ua qhov zoo. Anpinkayis yog ib tug uas zoo li ntawd. Thaum nws tus txiv tau txiav txim siab ua ib yam uas yuav ua rau nws lub cuab lub yig raug kev puas tsuaj, nws txawm nrhiav kiag kev los pab. Vim nws yog ib tug uas thoob tsib, nws thiaj cawm tau nws lub cuab lub yig. (1 Xamuyees 25:14-23, 32-35) Yog peb thoob tsib ces peb yuav paub tias thaum twg zoo rau peb hais lus thiab thaum twg tsis zoo. Thiab kuj yuav pab kom peb paub seb thaum twg zoo rau peb pab lwm tus thiab tsis zoo.​—1 Thexalaunikes 4:11.

10-11. Paub nyeem thiab sau ntawv yuav pab tau koj thiab lwm tus li cas? (Saib daim duab.)

¹⁰ Zoo rau ib tug muam Khixatias xyaum kam tiag kom paub ua neej. Tej yam uas nws kawm txij thaum me me los yeej yuav tsis tag dawb tag do thiab haj tseem yuav pab nws lub neej mus li. Cia peb mus kawm ntxiv kom meej txog tej no.

¹¹ Xyaum txawj nyeem thiab sau ntawv. Muaj tej haiv neeg suav tias tsis tseem ceeb ua luaj twg rau cov poj niam txawj nyeem thiab sau ntawv. Txawm li ntawd los txhua tus Khixatias yuav tau txawj nyeem thiab sau ntawv. (1 Timautes 4:13) Txhob cia ib yam dab tsi los tav tau koj txoj hau kev kom paub nyeem thiab paub sau ntawv. Txawj nyeem thiab sau ntawv yeej yuav pab tau koj lub neej xwb xwb li. Xws li yuav pab kom koj nrhiav tau hauj lwm los yug koj. Tsis tas li ntawd xwb, yuav yooj yim dua rau koj tshawb nrhiav Vajtswv Txoj Lus thiab  txawj qhia lwm tus. Tiam sis qhov uas tseem ceeb tshaj yog yuav pab koj txav ze rau Yehauvas tshaj li yav tag los vim koj txawj nyeem Nws txoj lus lawm, thiab ua tib zoo xav txog tej uas koj nyeem.​—Yausuas 1:8; 1 Timautes 4:15.

12. Piav seb Pajlug 31:26 yuav pab kom koj txawj sib txuas lus li cas.

¹² Xyaum txawj sib txuas lus. Cov Khixatias yuav tau txawj sib txuas lus. Yakaunpaus txhawb kom peb txawj sib txuas lus thaum nws hais tias: “Txhua tus yuav tsum kub siab lug mloog, tiamsis tsis txhob maj hais.” (Yakaunpaus 1:19) Thaum koj kub siab lug mloog ces twb yog koj “xam pom” txog luag lwm tus.” (1 Petus 3:8) Yog tias koj tsis nkag siab meej los sis tsis paub seb yog vim li cas nws hais li ntawd, zoo rau koj ua tib zoo nug nws. Ces “ua tib zoo xav ua ntej mam li teb.” (Pajlug 15:28) Nug koj tus kheej li no: ‘Tej uas kuv hais puas muaj tseeb thiab puas cuab zog? Tej lus uas kuv hais puas yog lus zoo thiab saib taus?’ Kawm los ntawm cov muam paub tab uas txawj sib txuas lus. (Nyeem Pajlug 31:26.) Ua tib zoo mloog seb lawv nrog lwm tus sib txuas lus li cas. Yog koj yim huab kawm kom txawj sib txuas lus ces koj yim huab yuav muaj kev sib raug zoo nrog lwm tus.

13. Koj xyaum tau los ntawm leej twg kom txawj leg tej hauj lwm hauv lub vaj lub tsev? (Saib daim duab.)

¹³ Xyaum leg tej hauj lwm hauv lub vaj lub tsev. Muaj ntau thaj tsam, poj niam yeej yog cov uas leg tej hauj lwm hauv lub vaj lub tsev. Koj yeej meem xyaum tau los ntawm koj niam los sis ib tug muam uas paub tab. Muaj ib tug muam npe hu ua Xee Dim (Cindy) tau hais tias: “Yam khoom pub uas zoo tshaj plaws uas yog los ntawm kuv niam yog qhov uas nws qhia kuv tias, thaum yus rau siab khwv mas yus yuav zoo siab tshaj plaws, vim yus yuav txaus siab rau yus tej hauj lwm. Vim kuv xyaum txawj ua zaub ua mov, txhuam vaj txhuam tsev, xaws ris tsho, thiab paub tawm kiab tawm khw kuv thiaj tu tau kuv tus kheej thiab yooj yim rau kuv ua Yehauvas tej hauj lwm ntau dua. Tsis tas li ntawd kuv niam kuj qhia kom kuv txawj tos txais qhua. Qhov no qhib kev rau kuv paub cov kwv tij viv ncaus coob tus uas hlub Yehauvas thiab ua rau kuv xav taug lawv tus hneev taw.” (Pajlug 31:15, 21, 22) Tus poj niam siab sib, txawj tos txais, thiab txawj leg tej hauj lwm hauv lub vaj lub tsev, yog ib txoj koob hmoov uas zoo heev uas nws tsev neeg thiab lub koom txoos tau vim nws ua tau sawv daws nyob sov siab so.​—Pajlug 31:13, 17, 27; Tes Haujlwm 16:15.

14. Peb kawm tau dab tsi los ntawm Khixataus tus yam ntxwv, thiab peb yuav tau nco ntsoov li cas?

¹⁴ Xyaum kom txawj ua neej. Ib tug Khixatias uas paub tab yuav tau xyaum kom txawj ua neej. (Filipis 4:11) Xws li tus muam npe hu ua Khixataus (Crystal) tau hais tias: “Kuv niam kuv txiv pab kuv xaiv tej chav kawm ntawv uas pab kom kuv xyaum ntau yam rau lub neej. Xws li kuv txiv txhawb kom kuv kawm kom txawj ceev nyiaj txiag. Qhov no yeej pab tau kuv  lawm hov ntau.” Tsis yog peb yuav tau xyaum kom txawj khwv noj khwv haus nkaus nkaus xwb tiam sis yuav tau xyaum paub txuag nyiaj txiag thiab. (Pajlug 31:16, 18) Yog hais tias koj txaus siab rau tej uas koj muaj ces koj yeej yuav tsis xav lob ub lob no ua nuj ua nqi, xwv tej ntawv thiaj tsis khuam kev rau koj tej hom phiaj ua Yehauvas tes hauj lwm.​—1 Timautes 6:8.

15-16. Vim li cas cov muam uas tsis muaj txiv muaj nqis? (Malakaus 10:29, 30)

¹⁵ Thaum koj muaj tej yeeb yam uas ntxim Yehauvas siab thiab paub ua neej lawd, ces twb yog koj npaj rau koj lub neej tom ntej. Peb yuav kawm ntxiv seb koj yuav siv tau tej uas koj tau xyaum li cas.

¹⁶ Txhob maj maj yuav txij nkawm. Raws li Yexus hais tseg, ib txhia txiav txim siab tsis maj yuav txij nkawm txawm tias lawv haiv neeg tsis coj li ntawd. (Mathais 19:10-12) Hos ib txhia tej zaum muaj dua lwm yam ua rau lawv txiav txim siab tsis yuav txij yuav nkawm. Txawm li cas los nco ntsoov tias Yehauvas thiab Yexus nkawd yeej tsis saib qhov uas yus tsis muaj txij nkawm yog ib yam uas tsis tsim txiaj. Nyob thoob plaws lub qab ntuj, cov muam uas tsis muaj txiv yeej ua tau ntau yam zoo hauv lub koom txoos. Lub koom txoos yeej saib lawv tam li niam, tam li viv ncaus, los sis tam li muam vim lawv hlub tshua thiab xam pom luag lwm tus.​—Nyeem Malakaus 10:29, 30; 1 Timautes 5:2.

17. Tus muam uas tseem hluas yuav npaj li cas tam sim no nws thiaj ua tau hauj lwm puv ntoob?

¹⁷ Koj kuj ua hauj lwm puv ntoob. Tes hauj lwm tshaj tawm txoj xov zoo thoob qab ntuj feem ntau yog cov poj niam Khixatias ua. (Phau Ntawv Nkauj 68:11) Koj puas kam npaj tam sim no kom koj ua tau tes hauj lwm puv ntoob? Koj kuj ua ib tug tho kev, ib tug ua vaj ua tsev, los sis mus Npe-ee. Koj kuj thov Vajtswv pab kom koj ncav cuag koj lub hom phiaj. Mus nrog cov uas twb tau ua tej hauj lwm no lawm tham seb yuav ua li cas koj thiaj ua tau. Cia li ua raws li koj tau npaj tseg kom koj ncav cuag koj lub hom phiaj. Thaum koj ncav cuag koj lub hom phiaj lawm ces yuav muaj ntau yam hauj lwm tos koj ua rau Yehauvas.

18. Vim li cas cov muam yuav tsum ua tib zoo xaiv txij xaiv nkawm? (Saib daim duab.)

¹⁸ Yog koj txiav txim siab yuav txij nkawm. Tej yeeb yam thiab tej kev ua neej uas peb tau kawm dhau los yuav pab koj ua tau ib tug zoo niam tsev. Yog koj xav tias koj yuav yuav txij yuav nkawm, koj yuav tau ua tib zoo xaiv  koj tus txij nkawm. Kev xaiv txij xaiv nkawm yog ib yam uas tseem ceeb heev, rau qhov zoo li Hmoob ib txwm hais: ‘ua qoob ua loo tsis zoo ces tsuas yog ib cim, tiam sis tau tus txij tus nkawm tsis zoo ces yuav tag ib sim.’ Thiab nco ntsoov tias tus txiv neej uas koj yuav yuav yog koj lub taub hau. (Loos 7:2; Efexus 5:23, 33) Yog li ntawd koj yuav tau nug li no: ‘Nws puas yog ib tug Khixatias uas paub tab ntawm sab kev ntseeg? Nws puas muab Yehauvas tso ua ntej hauv nws lub neej? Nws puas txawj txiav txim siab? Nws puas lees thaum nws ua yuam kev? Nws puas saib taus poj niam? Nws puas pab tau kuv teev tiam Yehauvas? Nws puas txawj khwv noj khwv haus? Thiab nws puas ua tau kuv ib tug zoo phooj ywg? Nws puas paub tuav hauj lwm? Xws li nws tuav tes hauj lwm twg hauv lub koom txoos thiab nws puas ua tau zoo?’ (Lukas 16:10; 1 Timautes 5:8) Qhov tseeb, yog koj xav tau ib tug zoo txiv, ces koj yuav tau ua ib tug zoo niam thiab.

19. Vim li cas tus poj niam tes hauj lwm ua “tus pab” yog ib tes zoo heev?

¹⁹ Phau Vajlugkub hais tias tus zoo niam tsev yeej “pab” nws tus txiv. (Chivkeeb 2:18) Puas yog phau Vajlugkub muab tus poj niam saib tsis rau nqi? Tsis yog! Tus poj niam tes hauj lwm pab tus txiv yeej yog ib tes tseem ceeb heev. Txawm Yehauvas los, phau Vajlugkub yeej muab nws hu ua “tus pab.” (Phau Ntawv Nkauj 54:4; Henplais 13:6) Ib yam uas tus poj niam qhia tias nws pab nws tus txiv yog txhawb tus txiv thaum tus txiv txiav txim siab ua ib yam dab tsi rau lub cuab lub yig. Vim nws hlub Yehauvas, nws yuav tau pab kom luag hwm thiab saib taus nws tus txiv. (Pajlug 31:11, 12; 1 Timautes 3:11) Yog koj rau siab ntso kom koj hlub Yehauvas thiab pab tau koj tsev neeg thiab lub koom txoos, ces koj yuav ua tau ib tug zoo niam tsev thaum koj muaj txij muaj nkawm.

20. Tus zoo niam tsev yuav tsav tau nws lub cuab lub yig li cas?

²⁰ Yog koj ua ib leej niam. Tom qab koj yuav txij nkawm lawd, tej zaum neb kuj yuav muaj tub muaj ki. (Phau Ntawv Nkauj 127:3) Yog li ntawd tam sim no cheem tseem muaj sij hawm, zoo rau koj xyaum kom ua tau ib tug zoo niam tsev. Cov yeeb yam thiab qhov uas koj paub ua neej raws li peb tau tham yuav pab tau koj ua ib tug zoo poj niam thiab zoo niam tsev. Qhov koj hlub tshua, ua siab dawb siab zoo, thiab ua siab ntev yuav tsav kev xyiv fab rau koj lub cuab lub yig, thiab koj cov me nyuam yuav loj hlob zoo, ua neej vam meej ntxhias.​—Pajlug 24:3.

21. Piav seb vim li cas peb ho txaus siab heev rau peb cov muam. (Saib daim duab ntawm lub khaum.)

²¹ Peb hlub nej heev, cov muam, vim nej ua tau ntau yam los pab Yehauvas thiab nws tsev neeg. (Henplais 6:10) Koj yeej khwv khwv heev kawg li kom los ua tau tej cwj pwm uas ntxim Yehauvas siab, paub ua neej xwv koj thiaj tsav tau koj lub neej thiab cov uas nyob ib ncig koj, thiab txawj npaj rau yav tom ntej. Nco ntsoov tias koj muaj nqis heev rau hauv Yehauvas lub koom haum!