Koj puas tau muab cov Phau Tsom Faj rau xyoo no coj los ua tib zoo nyeem? Sim seb koj teb puas tau cov lus nug hauv qab no:

“Hloov nej txoj kev xav” yog li cas tiag? (Loos 12:2)

Yog peb ua qho yam zoo xwb tsis tau qhia hais tias peb hloov peb txoj kev xav lawm. Yuav kom peb hloov tau peb txoj kev xav, peb yuav tau tshuaj peb lub siab lub ntsws. Yog yam twg tsim nyog hloov los peb yuav tau hloov kom thiaj coj tau raws li Yehauvas tej kev cai ntau npaum li ntau tau.​—w23.01, sab 8-9.

Peb yuav ceev faj thaum pom lub ntiaj teb ua voj ua viag li cas?

Kuj zoo rau peb paub txog tej yam hauv lub ntiaj teb no uas muaj tshwm sim raws li tej lus faj lem hauv phau Vajlugkub tiam sis nco ntsoov tsis txhob lam kwv yees tias yuav muaj li no rau li no. Peb tsis xav hais ib yam dab tsi kom ua rau lub koom txoos faib ua pab ua pawg tiam sis hais raws nkaus li tej ntaub ntawv lub koom haum luam tawm. (1 Kauleethaus 1:10)​—w23.02, sab 16.

Yexus thiab cov uas raws nws txoj kev cai raus dej ho sib txawv txav li cas?

Tsis tas Yexus yuav muab nws tus kheej cob rau Yehauvas, yeeb vim yog nws yeej yug los rau haiv neeg uas twb muab lawv tus kheej cob rau Yehauvas lawm. Tsis tas Yexus yuav lees nws tej kev txhaum los sis hais kom Vajtswv pab nws xav txog tej yam dawb huv rau qhov nws ib txwm tsis muaj kev txhaum thiab zoo tiav tiav.​—w23.03, sab 5.

Yuav ua li cas peb thiaj cia lwm tus tsa tes teb?

Peb cia tau lwm tus tsa tes teb yog peb tsis txhob teb ntev ntev thiab tsis hais ntau ntau lub ntsiab.​—w23.04, sab 23.

“Txojkev uas Dawbhuv” uas hais nyob hauv Yaxayas 35:8 yog hais txog dab tsi?

Txoj kev thaum thawj yog hais txog txoj kev uas mus ntawm lub nroog Npanpiloos mus rau teb chaws Ixayees. Tau ntau pua xyoo ua ntej xyoo 1919, Yehauvas siv cov txiv neej uas muaj kev ntseeg rau nws npaj tej yam xws li txhais tawm, luam tawm ntaub ntawv thiab lwm yam. Vajtswv cov tib neeg taug nraim “Txojkev uas Dawbhuv” xwv thiaj nyob hauv lub vaj kaj siab ntawm sab kev ntseeg.​—w23.05, sab 15-19.

Pajlug tshooj 9 hais txog ob tug poj niam twg?

Phau Pajlug hais tias cov uas mus nrog tus poj niam ruam ua ke yuav raug kev ploj kev tuag tiam sis cov uas kawm ntawm tus poj niam uas muaj tswv yim yuav “muaj sia nyob” mus ib txhis. (Pajlug 9:1, 6, 13, 18)​—w23.06, sab 22-24.

Yehauvas txo hwj chim thiab txawj yoog Lauj li cas?

Lauj thiaj thov kom Yehauvas cia nws thiab nws tsev neeg mus nkaum rau ntawm lub nroog Xau-as. Yehauvas ua li Lauj thov thiab tseg lub nroog ntawd cia.​—w23.07, sab 21.

Tus niam tsev yuav ua li cas yog tias nws tus txiv saib duab liab qab?

Tsis txhob pheej xav tias yog tim koj. Rau rau siab ua kom koj muaj kev sib raug zoo nrog Yehauvas, mus nyeem thiab ua zoo xav txog cov poj niam uas muaj kev nyuaj siab hauv phau Vajlugkub. Zam tej yam uas yuav ua rau koj tus txiv rov mus saib duab liab qab.​—w23.08, sab 14-17.

Peb yuav ua ib tug neeg thoob tsib li cas thaum raug luag hais lus thom?

Ua tib zoo xav txog tej lawv nug, peb thiaj li yuav pab tau lawv. Cia peb ua tib zoo teb lawv rov qab.​—w23.09, sab 17.

Peb khaws tau li cas los ntawm qhov uas Maivliag xav tau kev txhawb zog?

Maivliag xav tau kev txhawb zog thaum nws hnov tias nws yuav los mus tu tus me tub uas yog tus Mexiyas. Yehauvas siv Khali-ees thiab Elixanpe los txhawb nws. Peb kuj muaj cov kwv tij nkauj muam los txhawb peb lub zog.​—w23.10, sab 15.

Yehauvas teb peb tej lus thov li cas?

Yehauvas cog lus tias nws yuav mloog peb tej lus thov thiab seb puas mus raws li nws lub ntsiab. (Yelemis 29:12) Qho lub sij hawm, Yehauvas yuav tsis teb peb cov lus thov raws li peb lub siab nyiam. Txawm li ntawd los cia peb tso siab tias txhua yam uas Yehauvas ua yeej yog qhov zoo qhov yog rau peb nkaus nkaus xwb.​—w23.11, sab 21-22.

Loos 5:2 hais txog kev “cia siab,” tiam sis vim li cas ho hais txog kev cia siab dua ntawm nqe 4?

Thaum ib tug twg hnov txoj xov zoo, tej zaum nws yuav tau txoj kev vam kev cia siab uas yuav nyob tau mus ib txhis. Tiam sis thaum nws raug kev txom nyem, ua siab ntev thev, thiab pom tias Vajtswv txaus siab rau nws, yim huab ua rau nws txoj kev vam kev cia siab ruaj khov zuj zus tuaj.​—w23.12, sab 12-13.