KOJ yeej nyiam ntau yam uas Vajtswv muab pub rau koj thiab koj yeej ris txiaj ntsig tias Vajtswv cia koj siv ywj siab. Nyob hauv phau Vajlugkub, dej caw yog ib yam uas Vajtswv muab pub rau peb. Phau Vajlugkub hais tias: “Rooj noj rooj haus yuav ua rau koj zoo siab thiab cawv txiv hmab yuav ua rau koj kaj siab.” (Tej Lus Qhia 10:19; Phau Ntawv Nkauj 104:15) Tej zaum koj yeej pom tias ib txhia tsis txawj tswj lawv tus kheej thaum haus dej caw. Hos nyob rau txhua lub teb chaws, nyias muaj nyias ib txoj kev xav txog kev haus dej haus cawv. Yog li ntawd, yuav ua li cas ib tug ntseeg thiaj li yuav txawj txiav txim siab txog dej caw?

Txawm peb yuav nyob rau rooj teb twg los sis loj hlob li cas rau li cas los yog peb coj ib yam li Vajtswv qhia ces yuav pab tau peb lub neej thiab peb yuav muaj kev kaj siab heev.

Tej zaum koj yeej pom thiab paub tias coob leej ntau tus tib neeg uas tsis teev tiam Yehauvas yeej haus dej haus cawv ntau ntau thiab haus tsis tu ncua li. Ib txhia haus los ntaus sab lim. Ib txhia haus kom lawv tsis txhob nco qab txog lawv tej teeb meem lawm. Hos ib txhia haus rau luag tej qhuas.

Tiam sis cov uas teev tiam Yehauvas, lawv cia nws Txoj Lus los coj lawv txoj hau kev. Xws li nws qhia peb txog tej yam tshwm sim tom qab haus dej haus cawv ntau ntau. Nyob rau hauv Pajlug 23:29-35 piav tias tom qab ib tug neeg qaug cawv, nws ntsib tej teeb meem zoo li cas. a Nyob rau sab Yus Luv, muaj ib tug txwj laus npe hu ua Danyaus (Daniel) uas hais txog nws lub neej ua ntej nws los ntseeg Yehauvas tias, “Yav thaum ub kuv nyiam haus cawv heev mas ua rau kuv ua tau tej yam tsis zoo. Xav txog thaum twg mas ua rau kuv chim kawg nkaus rau kuv tus kheej vim kuv ntsib ntau yam kev nyuaj siab.”

Ua ntej yuav haus dej caw, yuav ua li cas peb thiaj txawj txiav txim siab seb yuav haus ntau los haus tsawg? Peb yuav tau ua zoo tshuaj seb Vajtswv xav li cas kom peb thiaj paub ua qhov zoo qhov yog.

Cia peb mus kawm seb phau Vajlugkub hais li cas txog dej caw thiab seb vim li cas ib txhia ho haus dej haus cawv.

Vajtswv Txoj Lus tsis txwv txiav qhov uas haus me ntsis dej caw. Nyob hauv Vajtswv Txoj Lus hais tias dej caw ua tau rau neeg muaj kev zoo siab. Peb nyeem li no tias: “Cia li noj koj tej zaub mov thiab zoo siab; cia li haus koj tej cawv txiv hmab thiab kaj siab lug.” (Tej Lus Qhia 9:7) Tsis tas li ntawd, Yexus thiab lwm cov ntseeg yav thaum ub los kuj tau haus qho me ntsis dej caw thiab.​—Mathais 26:27-29; Lukas 7:34; 1 Timautes 5:23.

Txawm Vajtswv Txoj Lus tsis txwv txiav haus me ntsis dej caw los nws Txoj lus txwv hlo kom tsis txhob qaug dej qaug cawv. Nyob rau hauv hais tias: “Nej tsis txhob haus cawv txiv hmab kom qaug.” (Efexus 5:18) Tsis tas li ntawd, cov “quav cawv . . . yuav tsis muaj feem mus nyob Vajtswv lub [Nceeg Vaj] li.” (1 Kauleethaus 6:10) Tej no qhia tias Yehauvas txiav tu nrho tsis pub haus dej caw kom ntau ntau thiab kom qaug dej qaug cawv. Cia peb tsis txhob xyaum ib yam li tej tib neeg uas nyob puag ncig peb tiam sis cia peb txiav txim siab kom raws li Vajtswv pom zoo.

Muaj ib txhia xav hais tias lawv haus tau dej caw ntau ntau thiab tsis ua rau lawv qaug. Txoj kev xav zoo li no phom sij heev. Nyob hauv Vajtswv Txoj Lus hais meej tseeb tias “ua neeg quav cawv” yuav ua rau nws ua tej yam txhaum loj thiab rhuav  nws txoj kev sib raug zoo nrog Yehauvas. (Titus 2:3; Pajlug 20:1) Yexus ceeb toom tias tus uas “quav dej quav cawv” yuav nyob tsis tau hauv lub qab ntuj tshiab. (Lukas 21:34-36) Ua li dab tsi thiaj pab tau ib tug ntseeg kom tsis txhob ua neeg quav dej quav cawv?

Thaum peb txiav txim siab haus dej haus cawv, tsis txhob mus xyaum haus li tej neeg zej zog haus. Cov ntseeg yeej txiav txim siab ua tej yam uas haum Yehauvas siab thaum hais txog kev noj kev haus. Nyob hauv phau Vajlugkub hais tias: “Nej yuav noj yuav haus lossis yuav ua ib yam dabtsi, nej yuav tsum ua kom Vajtswv tau ntsejmuag.” (1 Kauleethaus 10:31) Peb yuav mus tham seb ib txhia xav li cas thiab tej hauv paus ntsiab lus hauv phau Vajlugkub ho teb li cas rau li cas:

Puas yog kuv xav kom lwm tus nyiam kuv es kuv thiaj li haus dej haus cawv? Khiav Dim 23:2 hais tias: “Tsis txhob raws cov neeg feem coob.” Yehauvas ceeb toom cov neeg Ixayees kom tsis txhob mus xyaum cov neeg uas tsis kam ua haum nws siab. Cov lus no yeej zoo rau cov ntseeg niaj hnub nim no coj. Yog peb cia lwm leej lwm tus ntxias peb haus dej haus cawv li lawv ces ntev mus ntev tuaj peb yuav tsis xav coj Yehauvas tej kev cai lawm ces peb txoj kev sib raug zoo nrog Yehauvas yuav tu.​—Loos 12:2.

Puas yog kuv haus cawv rau luag qhuas? Muaj tej haiv neeg haus dej haus cawv ntau ntau los lawv tsis xav li cas. (1 Petus 4:3) Tiam sis nyob hauv 1 Kauleethaus 16:13 hais tias: “Nej yuav tsum ceevfaj, muab siab rau ntseeg, ua siab tawv qhawv thiab cuab zog khov kho.” Ua li dej caw puas ua tau kom peb ua ib tug tib neeg khov kho tiag? Nws ua tsis tau kom peb khov vim tsuas ua rau kom peb lub cev loog thiab feeb tsis meej. Yog li ntawd, dej caw tsis yog ua rau ib tug neeg khov kho tiam sis ua rau nws zoo yam li ib tug neeg ruam. Yaxayas 28:7 piav tias tus neeg quav cawv qaug puj poog thiab tsis paub txiav txim rau qhov zoo.

Yuav kom peb cuab tau zog khov kho tiag, peb yuav tsum muaj Yehauvas ua tus pab thiab peb yuav tau “ceev faj, muab siab rau ntseeg.” (Phau Ntawv Nkauj 18:32) Yog li ntawd, peb yuav tau ua tib zoo ceev faj tsis txhob ua tej yam uas yuav rhuav tau peb txoj kev sib raug zoo nrog Yehauvas. Yexus thiab Yehauvas txoj kev sib raug zoo loj  heev. Tib neeg feem coob yeej saib taus Yexus vim nws muaj lub siab tawv thiab txiav txim siab ua qhov zoo qhov yog xwb.

Puas yog kuv haus dej caw kom tsis txhob nco qab txog kuv tej teeb meem? Phau Ntawv Nkauj 94:19 hais tias: “Thaum kuv ntxhov siab thiab ua ywjfab ywjfwj, koj nplig kuv lub siab kom kuv rov muaj kev zoo siab.” Yog koj muaj kev nyuaj siab dab tsi, tsis txhob vam khom dej caw tiam sis cia Yehauvas ua tus pab koj. Muaj ib txhia xam pom tias thaum lawv nrog ib tug ntseeg paub tab hauv lawv lub koom txoos tham, pab tau lawv lawm hov ntau. Kuj muaj ib txhia xav hais tias haus dej caw pab daws tau lawv tej teeb meem tiam sis tsuas ua rau lawv tsis paub ua qhov zoo qhov yog xwb. (Hauxeyas 4:11) Danyaus hais ntxiv tias: “Kuv nyuaj siab tas mus li thiab kuv lub siab pheej nkaug kuv tas zaj tas zog. Kuv xav tias haus cawv yuav pab tau kom kuv tsis txhob ntxhov ntxhov siab tiam sis haj yam tsub kev nyuaj siab los rau kuv. Tsis muaj neeg xav txav ti kuv thiab luag saib tsis taus kuv. Kuv thiaj xam pom tias yam uas yuav pab tau kuv tiag tsis yog dej caw tiam sis yog Yehauvas. Thaum kuv cia Yehauvas pab kuv mas pab tau kom kuv nyiaj taus kuv tej teeb meem.” Tej no qhia tau tias txawm peb xav tias peb lub neej liam txwv tag lawm los Yehauvas haj tseem cev tes pab tau peb.​—Filipis 4:6, 7; 1 Petus 5:7

Ua zoo tshuaj koj tus kheej li no yog tias qho lub sij hawm koj pheej haus dej caw: ‘Puas tau muaj ib tug hauv kuv tsev neeg los sis ib tug phooj ywg kwv luag twg uas cheem kom kuv tsis txhob haus cawv?’ Yog lawv tau cheem koj li no lawm ces ua tib zoo xav vim koj twb pib rais los mus ua ib tug neeg quav dej quav cawv lawm. ‘Kuv puas haus ntau tshaj li yav tas los?’ Txawm koj xav tias koj tsis tau quav cawv los tsis ntev xwb ces koj yuav quav zuj zus. ‘Puas nyuaj rau kuv tseg cawv ob peb hnub?’ Yog tias nyuaj tseg ces qhia tias koj twb quav cawv los sis tseg tsis taus cawv lawm. Tej zaum koj yuav tau mus cuag cov neeg pab koj txiav dej caw.

Muaj ib txhia ntseeg tsis kam haus dej caw vim lawv paub tias yog lawv haus yuav ntsib ntau yam teeb meem. Hos ib txhia kuj tsis haus vim lawv tsis nyiam tus ntxhiab. Yog ib tug koj paub tsis  xav haus dej caw los tsis txhob yuam thiab thuam nws.

Tej zaum koj xam pom tias thaum koj haus dej caw, koj yuav tau paub tswj koj tus kheej. Ib txhia kuj paub ntsuas seb lawv yuav haus ntau los sis tsawg, xws li tsuas haus ib zaug ib lub lim tiam los sis haus me ntsis ntxuag mov. Hos ib txhia xaiv seb lawv yuav haus hom cawv twg rau hom twg, xws li ib txhia tsuas nyiam haus npias (beer) thiab haus cawv xwb, lawv tsis kam haus cawv ntxwg. Thaum ib tus twg txawj ntsuas, nws kheev ua raws li ntawd. Yog li ntawd, thaum ib tug ntseeg paub tab haus cawv, nws tsis tas yuav txhawj tsam luag tej xav li cas vim nws txawj ua zoo luj.

Peb yuav tau xam pom lwm tus thaum yuav haus dej haus cawv. Nyob hauv Loos 14:21 hais tias: “Yog koj noj nqaig haus cawv, los sis ua ib yam dab tsi uas yuav txo tau koj tus kwv tij txoj kev ntseeg ces txhob noj, txhob ua zoo dua.” Yuav kom koj coj tau raws li hais no, koj yuav tau hlub cov kwv tij nkauj muam. Xws li yog koj mus koom ib txoj kev noj haus twg, yog tias qhov uas koj haus cawv yuav tub qaug ib tug twg ces yuav zoo dua rau koj tsis txhob haus rau lub caij ntawd. Yog koj ua li no qhia tias koj saib taus lwm tus thiab koj saib lawv rau nqi.​—1 Kauleethaus 10:24.

Tsis tas li ntawd, tej nom tswv los kuj tau tsa kev cai txog kev haus dej haus cawv. Ib tug ntseeg yuav tau coj raws li tej kev cai ntawd. Tej kev cai ntawd kuj yog tej yam xws li yuav tsum muaj hnub nyoog thiaj haus tau cawv los sis tsis pub haus dej caw es mus tsav tsheb los sis mus kov tej tshuab loj.​—Loos 13:1-5.

Yehauvas muab ntau yam rau peb thiab peb yeej ris txiaj ntsig tias nws cia peb siv ywj siab. Ib yam ntawd yog nws cia peb xaiv seb yuav noj yuav haus li cas rau li cas. Cia peb ua txhua yam kom haum peb Leej Txiv Yehauvas siab.