1. Thaum peb xav txog Anplahas txoj kev ntseeg, yuav ua rau peb xav li cas?

 TXAWM muaj coob leej ntau tus twb hnov txog Anplahas lawm los lawv twb tsis paub nws tiag tiag. Tiam sis koj yeej paub ntau yam txog nws. Xws li koj paub tias nws “yog txhua tus uas muaj kev ntseeg tus yawg koob.” (Loos 4:11) Tej zaum koj yuav xav tias, ‘Kuv puas yuav muaj kev ntseeg ib yam li Anplahas muaj rau Vajtswv?’ Nco ntsoov tias koj yeej muaj tau tib yam nkaus.

2. Vim li cas ho tseem ceeb rau peb kawm txog Anplahas tus yam ntxwv? (Yakaunpaus 2:22, 23)

² Ib yam uas pab tau kom peb muaj kev ntseeg ib yam li Anplahas yog ua tib zoo tshuaj nws tus yam ntxwv. Anplahas ib txwm ua raws li Vajtswv hais. Nws tsiv mus nyob ib qho chaw deb heev, nyob tsev ntaub tau ntau xyoo, thiab txaus siab hlo muab nws tus tub uas nws hlub Ixaj txi rau Vajtswv. Vim Anplahas muaj kev ntseeg heev, Vajtswv thiaj txaus siab rau nws thiab zeem nws ua phooj ywg. (Nyeem Yakaunpaus 2:22, 23.) Yehauvas txaus siab thiab xav zeem koj thiab txhua tus ua phooj ywg. Nws thiaj tshoov kom Povlauj thiab Yakaunpaus nkawd sau txog Anplahas tus yam ntxwv rau hauv phau Vajlugkub. Peb yuav mus tham cov lus nyob rau hauv Loos tshooj 4 thiab Yakaunpaus tshooj 2 seb nkawd tau hais li cas txog Anplahas.

3. Povlauj thiab Yakaunpaus nkawd siv nqe Vajlugkub twg?

³ Povlauj thiab Yakaunpaus nkawd puav leej siv cov lus uas hais nyob rau hauv Chivkeeb 15:6 uas hais tias: “Anplas thiaj cia siab ntsoov rau [Yehauvas] tej lus, vim nws muaj kev cia siab, [Yehauvas] thiaj txaus siab heev rau nws thiab suav  hais tias nws yog ib tug neeg ncaj ncees.” Thaum Yehauvas txaus siab rau ib tug twg ces nws hu tus neeg ntawd tias ncaj ncees. Zoo kawg nkaus li uas Vajtswv hu ib tug neeg uas yog noob txaug neeg txhaum tias nws ncaj ncees! Vajtswv kuj hu tau koj ib yam li ntawd thiab. Cia peb mus kawm seb vim li cas Vajtswv ho hu Anplahas tias nws yog ib tug ncaj ncees thiab peb yuav tau ua li cas Vajtswv thiaj suav peb tam li ib tug neeg ncaj ncees.

4. Vim li cas tib neeg ho ua tsis tau ncaj ncees?

⁴ Nyob rau tsab ntawv uas Povlauj xa mus rau cov ntseeg hauv Loos hais tias txhua tus puav leej yog neeg txhaum. (Loos 3:23) Yog li ntawd, Vajtswv puas yuav txaus siab rau peb tiag thiab suav tias peb yog neeg ncaj ncees? Povlauj thiaj li siv Anplahas tus yam ntxwv los pab peb nkag siab txog qhov no.

5. Vim li cas Yehauvas ho hu Anplahas tias nws ncaj ncees? (Loos 4:2-4)

⁵ Thaum Anplahas tseem nyob rau hauv teb chaws Kana-as, Yehauvas hu Anplahas tias nws ncaj ncees. Vim li cas Yehauvas ho muab Anplahas hu li ntawd? Puas yog vim Anplahas coj raws li Mauxes Txoj Kev Cai? Tsis muaj tseeb li ntawd vim Yehauvas twb xub hu Anplahas ncaj ncees tau 400 xyoo ua ntej nws muab Mauxes Txoj Kev Cai rau cov neeg Ixayees. (Loos 4:13) Vim li cas Yehauvas ho suav tias Anplahas ncaj ncees? Vim Anplahas muaj kev ntseeg rau Yehauvas, Yehauvas thiaj muaj kev hlub nplua mias rau nws thiab suav tias nws ncaj ncees.​—Nyeem Loos 4:2-4.

6. Vim li cas Yehauvas ho hu ib tug neeg txhaum ncaj ncees?

⁶ Povlauj hais tias thaum ib tug neeg twg muaj kev ntseeg rau Vajtswv, Vajtswv “suav tias nws ncaj ncees.” (Loos 4:5) Povlauj hais ntxiv li no tias: “Daviv kuj hais tias tus neeg uas Vajtswv suav tias ncaj ncees, nws yuav kaj siab rau qhov Vajtswv tsis saib rau nws tes hauj lwm. ‘Thaum Vajtswv zam txim thiab tsis cim ntsoov tus twg tej kev txhaum, tus ntawd yuav kaj siab. Thaum Vajtswv Yehauvas tsis suav txim rau tus twg, tus ntawd yuav nyob kaj siab lug.’” (Loos 4:6-8; Phau Ntawv Nkauj 32:1, 2) Vajtswv zam tus neeg uas muaj kev ntseeg rau Nws tej kev txhaum. Thaum Vajtswv zam ib tug neeg twg tej kev txhaum lawd, Nws yeej tsis rov qab tsub txim rau tus ntawd ntxiv. Yog li ntawd, tus uas muaj kev ntseeg, Vajtswv thiaj suav tias nws yog neeg ncaj ncees.

7. Vim li cas Vajtswv ho suav cov uas teev tiam nws yav thaum ub ncaj ncees?

⁷ Txawm tias Vajtswv hu Anplahas, Daviv, thiab lwm cov uas teev tiam nws ncaj ncees los lawv puav leej tseem yog noob txaug neeg txhaum. Vim lawv txoj kev ntseeg, Vajtswv thiaj suav tias lawv tsis muaj txim li cov uas tsis teev tiam nws. (Efexus 2:12) Nyob rau hauv Povlauj tsab ntawv rau cov ntseeg hauv Loos, nws piav tias yuav tau muaj kev ntseeg xwv thiaj muaj taus kev sib raug zoo nrog Vajtswv. Anplahas thiab Daviv muaj kev ntseeg nkawd thiaj li cog tau phooj ywg nrog Vajtswv. Peb los yuav tau muaj kev ntseeg peb thiaj cog tau phooj ywg nrog Vajtswv tib yam nkaus.

8-9. Muaj ib txhia xav yuam kev li cas txog tej uas Povlauj thiab Yakaunpaus sau thiab yog vim li cas?

⁸ Tau ntau pua xyoo dhau los lawm, cov thawj nyob rau hauv tej kev ntseeg yeej sib cam txog qhov uas muaj kev ntseeg thiab ua raws li tej yus ntseeg. Ib txhia thawj coj qhia tias tsuav lawv muaj kev ntseeg rau tus Tswv Yexus Khetos xwb ces cawm tau lawv dim lawm. Tej zaum koj kuj hnov lawv hais tias,  “Ntseeg Yexus koj thiaj dim.” Tej tug kuj siv Povlauj cov lus no: “Tus neeg uas Vajtswv suav tias ncaj ncees, nws yuav kaj siab rau qhov Vajtswv tsis saib rau nws tes hauj lwm.” (Loos 4:6) Hos muaj ib txhia qhia tias kom mus xyuas tej chaw uas lawv suav tias dawb huv thiab ua qhov zoo thiaj dim. Cov no lawv siv cov lus nyob rau hauv Yakaunpaus 2:24 tias: “Tus uas Vajtswv coj los nrog Vajtswv sib raug zoo, tus ntawd yeej ua haujlwm, nws tsis yog tus uas ntseeg xwb.”

⁹ Vim tej kev ntseeg nyias taus nyias hais lawm ib yam, muaj ib txhia uas tshawb fawb Vajlugkub thiaj li xav tias Povlauj thiab Yakaunpaus nkawd hais tsis sib haum txog qhov uas yuav ua li cas thiaj haum Vajtswv siab. Raws li ib co thawj coj ntawm tej kev ntseeg qhia mas Povlauj ntseeg tias muaj kev ntseeg xwb ces yeej haum Vajtswv siab lawm tiam sis Yakaunpaus ho ntseeg tias yuav tau ua raws li tej uas yus ntseeg thiaj haum Vajtswv siab. Ib tug xib hwb nyob hauv tsev kawm ntawv qib siab hais tias: “Yakaunpaus tsis nkag siab tias vim li cas Povlauj pheej hais tias ib tug neeg tsuas muaj kev ntseeg xwb ces twb ncaj ncees lawm, thiab Yakaunpaus tsis xav ib yam li Povlauj xav.” Tiam sis Yehauvas puav leej tshoov nkawd ob leeg sau cov lus no. (2 Timautes 3:16) Yog li ntawd, qhov uas nkawd sau no yuav tsum muaj chaw txawb chaw rau. Cia peb ua tib zoo soj ntsuas seb nkawd ho sau dab tsi xwv peb thiaj nkag siab.

10. Thaum Povlauj hais txog “hauj lwm,” yog nws hais li cas tiag? (Loos 3:21, 28) (Saib daim duab.)

¹⁰ Thaum Povlauj hais txog “hauj lwm” hauv Loos tshooj 3 thiab 4, nws yog hais txog qhov uas “coj raws li Mauxes Txoj Kev Cai” uas tau muab rau cov Ixayees. (Nyeem Loos 3:21, 28.) Nyob rau Povlauj tiam, muaj ib txhia ntseeg uas yog neeg Yudais xav tias lawv yuav  tau coj Mauxes Txoj Kev Cai. Yog li ntawd, Povlauj thiaj tau siv Anplahas tus yam ntxwv los qhia kom lawv nkag siab tias lawv tsis tas “coj raws li Mauxes Txoj Kev Cai” kom thiaj haum Vajtswv siab. Povlauj piav tias peb yuav tau muaj kev ntseeg. Qhov no qhia rau peb tias yog peb muaj kev ntseeg rau Vajtswv thiab Khetos ces peb yeej ua tau haum Vajtswv siab.

11. Thaum Yakaunpaus hais txog “haujlwm,” yog nws hais li cas tiag?

¹¹ Thaum Yakaunpaus hais txog “haujlwm” hauv Yakaunpaus tshooj 2, tsis yog ua tej yam raws li Mauxes Txoj Kev Cai. Thaum Yakaunpaus hais txog hauj lwm, yog nws hais txog tej yam cov ntseeg ua hauv lawv lub neej. Yog li ntawd, tej uas lawv ua hauv lawv lub neej yuav qhia tias lawv muaj kev ntseeg rau Vajtswv los tsis muaj. Cia peb mus piav txog ob tug yam ntxwv uas Yakaunpaus hais.

12. Yakaunpaus piav li cas kom thiaj nkag siab tias yuav tsum muaj kev ntseeg thiab hauj lwm? (Saib daim duab.)

¹² Thawj tug yam ntxwv uas Yakaunpaus hais ntawd yog cov ntseeg yuav tau tsis txhob xaiv ntsej xaiv muag. Yuav kom pab tau lawv nkag siab, Yakaunpaus thiaj tham txog ib tug txiv neej uas saib tus muaj txiag nplua nuj raug ntsej muag tiam sis nws saib tus neeg txom nyem qes qes. Yakaunpaus thiaj li hais tias tus txiv neej ntawd lam hais tias nws muaj kev ntseeg tiam sis nws tsis ua raws li tej nws ntseeg. (Yakaunpaus 2:1-5, 9) Tus yam ntxwv ob, Yakaunpaus hais txog ib tug uas pom “cov kwvtij ntseeg tsis hais pojniam lossis txivneej, lawv tsis muaj noj lossis tsis muaj hnav” tiam sis nws ho tsis cev tes pab dab tsi. Txawm hais tias tus ntawd xav tias nws muaj kev ntseeg los nws tes hauj lwm qhia tau tias nws tsis muaj kev ntseeg. Yog li ntawd, Yakaunpaus thiaj sau li no tias, “yog nej hais tias nej ntseeg, tiamsis nej  tsis ua ib yam haujlwm tshwm, ces nej txojkev ntseeg twb tuag lawm.”​—Yakaunpaus 2:14-17.

13. Yakaunpaus siv tus yam ntxwv twg kom pab tau peb nkag siab tias peb yuav tsum muaj kev ntseeg thiab ua zoo? (Yakaunpaus 2:25, 26)

¹³ Yakaunpaus muab Lahaj coj los ua ib qho piv txwv tias tej uas nws ua qhia tias nws muaj kev ntseeg heev. (Nyeem Yakaunpaus 2:25, 26.) Lahaj hnov txog tej Yehauvas ua thiab xam pom tias Yehauvas yeej nrog nraim cov Ixayees. (Yausuas 2:9-11) Tej uas Lahaj ua qhia tias nws muaj kev ntseeg heev vim nws tiv thaiv ob tug Ixayees uas mus soj teb chaws. Qhov no qhia tau tias txawm Lahaj yog noob txaug neeg txhaum thiab tsis yog ib tug Ixayees los Yehauvas suav tias nws ncaj ncees vim nws muaj kev ntseeg tib yam li Anplahas. Peb khaws tau Lahaj tus yam ntxwv tias tseem ceeb uas peb yuav tau ua raws li tej uas peb ntseeg.

14. Vim li cas peb ho paub tias Povlauj thiab Yakaunpaus nkawd cov lus tsis sib cov nyom?

¹⁴ Tej uas hais tas los no qhia tias Povlauj thiab Yakaunpaus nkawd nyias hais txawv nyias ib lub ntsiab lus txog kev ntseeg thiab ua hauj lwm. Povlauj qhia tias cov ntseeg uas yog neeg Yudais yuav tuav tsis tau Mauxes Txoj Kev Cai yog tias lawv xav ua haum Yehauvas siab. Hos Yakaunpaus piav tias txhua tus ntseeg yuav tau qhia lawv txoj kev ntseeg los ntawm tej yam zoo lawv ua.

15. Muaj tej yam twg qhia tias peb ua raws li tej peb ntseeg? (Saib cov duab.)

¹⁵ Yehauvas tsis tau hais tias kom peb ua raws nraim li Anplahas ua peb thiaj li ncaj ncees. Yeej muaj ntau txoj hau kev uas peb ua tau los qhia tias peb muaj kev ntseeg. Xws li tos txais cov tuaj tshiab hauv lub koom txoos, pab cov kwv tij nkauj muam uas xav tau kev pab, thiab ua zoo rau peb tsev neeg. Tej no  yog tej yam uas Vajtswv txaus siab thiab yuav foom koob hmoov rau. (Loos 15:7; 1 Timautes 5:4, 8; 1 Yauhas 3:18) Muaj ib yam tseem ceeb heev uas peb ua tau yog tshaj tawm txoj xov zoo rau lwm leej lwm tus. (1 Timautes 4:16) Peb yeej ua tau ntau yam los qhia tias peb ntseeg tias tej uas Yehauvas cog tseg yuav muaj tiag thiab coj lub neej li nws qhia yog qhov zoo tshaj. Yog peb coj lub neej yam li no ces Vajtswv yuav suav tias peb ua tau ncaj ncees thiab peb yuav yog nws tej phooj ywg.

16. Anplahas ntseeg thiab muaj kev vam kev cia siab li cas?

¹⁶ Nyob rau hauv Loos tshooj 4, Anplahas tso tau ib tug yam ntxwv zoo txog qhov uas muaj txoj kev vam kev cia siab. Yehauvas cog lus rau Anplahas tias “ntau haivneeg” yuav txais koob hmoov los ntawm nws. (Chivkeeb 12:3; 15:5; 17:4; Loos 4:17) Txawm Yehauvas cog lus tias nkawd yuav muaj ib tug tub no los Anplahas twb muaj 100 xyoo lawm hos Xalas muaj 90 xyoo, nkawd twb tsis pom dab tsi. Yog tib neeg saib xwb ces lawv yuav hais tias nkawd yeej muaj tsis taus me nyuam li. Tej no yeej sim Anplahas txoj kev ntseeg kawg tiam sis “nws yeej vam thiab ntseeg tias nws yuav tau ua ntau haiv neeg tus yawg koob.” (Loos 4:18, 19) Tsis ntev tom qab ntawd, muaj raws li Anplahas cia siab lawm tiag. Nws thiaj tau ib tug tub npe hu ua Ixaj.​—Loos 4:20-22.

17. Ua li cas peb thiaj paub hais tias Vajtswv suav peb ua nws tus phooj ywg uas coj tau ncaj ncees?

¹⁷ Zoo ib yam li Anplahas, peb yeej ua tau haum Vajtswv siab, ua tau nws tus phooj ywg, thiab coj tau ncaj ncees. Povlauj kuj hais li ntawd tib yam nkaus hauv nws tsab ntawv tias: “Qhov uas Vajtswv ‘suav tias nws ncaj ncees’ tsis yog sau rau Anplahas xwb. Cov lus no kuj yog sau rau peb thiab. Vim peb ntseeg Vajtswv tus uas tsa tau peb tus Tswv Yexus sawv hauv qhov tuag rov los, Vajtswv kuj suav tias peb ncaj ncees thiab.” (Loos 4:23, 24) Zoo ib yam li Anplahas, peb yuav tau muaj kev ntseeg, ua raws li peb ntseeg, thiab muaj kev vam kev cia siab tias tej uas Yehauvas hais tseg yuav muaj tiag. Nyob rau zaj txuas ntxiv no, peb yuav mus kawm txog txoj kev vam kev cia siab uas Povlauj hais nyob rau hauv Loos tshooj 5.