1. Vim li cas Anplahas pheej cia siab tias nws yuav muaj ib tug tub?

 YEHAUVAS cog lus tias Anplahas yuav muaj ib tug tub thiab ntau haiv neeg yuav tau txais koob hmoov vim muaj nws. (Chivkeeb 15:5; 22:18) Vim Anplahas muaj kev ntseeg loj heev rau Yehauvas, nws thiaj li paub ntsoov tias tej uas Yehauvas cog lus yeej yuav muaj tiag. Anplahas muaj 100 xyoo hos nws tus poj niam muaj 90 xyoo los nkawd twb tsis muaj ib tug me nyuam li. (Chivkeeb 21:1-7) Txawm li ntawd los phau Vajlugkub hais tias: “[Anplahas] yeej vam thiab ntseeg tias nws yuav tau ua ntau haiv neeg tus yawg koob.” (Loos 4:18) Anplahas txoj kev vam kev cia siab tau muaj lawm tiag vim nws muaj ib tug tub npe hu ua Ixaj. Vim li cas Anplahas ho tso siab tias Yehauvas yuav ua raws li nws cog lus tseg?

2. Vim li cas Anplahas ho tso siab tias Yehauvas yuav ua raws li nws cog tseg?

² Anplahas muaj kev sib raug zoo nrog Yehauvas, nws thiaj li “ntseeg ruaj nreeg tias Vajtswv yeej ua tau raws li Vajtswv cog lus tseg.” (Loos 4:21) Vim Anplahas muaj kev ntseeg, Yehauvas thiaj li txaus siab rau Anplahas thiab suav tias nws ncaj ncees. (Yakaunpaus 2:23) Raws li hais hauv Loos 4:18, ob yam uas Anplahas muaj yog kev ntseeg thiab kev vam kev cia siab. Cia peb mus tham txuas ntxiv seb tus tub txib Povlauj hais li cas txog kev vam kev cia siab hauv Loos tshooj 5.

3. Povlauj yuav piav li cas txog kev vam kev cia siab?

³ Povlauj yuav piav tias “tsis yog peb vam qhuav xwb,” thiab seb yuav ua li cas peb txoj kev vam kev cia siab thiaj yuav ruaj  zuj zus. (Loos 5:5) Thaum peb nyeem Loos 5:1-5, ua tib zoo xav txog seb koj txoj kev vam kev cia siab rau yav tom ntej ruaj khov ua ntu zus li cas. Cia peb mus kawm txog ib qho kev vam kev cia siab uas Povlauj tau hais.

4. Nyob hauv Loos 5:1, 2 hais li cas?

⁴ Nyeem Loos 5:1, 2. Povlauj sau cov lus no xa mus rau lub koom txoos nyob rau hauv Loos. Nyob rau hauv, muaj ib co kawm txog Yehauvas thiab Yexus nkawd ces txawm muaj kev ntseeg thiab los ntseeg Yehauvas. Vim lawv muaj kev ntseeg, “Vajtswv thiaj suav tias [lawv] ncaj ncees” thiab muab lub hwj huam dawb huv los xaiv lawv. Lawv tau txais ib txoj kev vam kev cia siab zoo kawg li.

5. Cov xaiv tseg txoj kev vam kev cia siab yog dab tsi?

⁵ Tom qab no Povlauj sau ib tsab ntawv mus rau cov xaiv tseg hauv Efexus txog txoj kev vam kev cia siab uas Vajtswv tau muab rau lawv. Lawv yuav tau txais “tej qub txeeg qub teg ci ntsa iab uas Vajtswv pub rau cov xov dawb.” (Efexus 1:18) Thiab Povlauj kuj hais mus rau cov nyob hauv Kaulauxais seb thaum twg lawv mam li tau txais lawv tej nqi zog. Nws hais tias yog “txojkev vam uas khaws cia saum ntuj ceeb tsheej rau nej.” (Kaulauxais 1:4, 5) Cov xaiv tseg txoj kev vam kev cia siab yog nyob mus ib txhis saum ntuj ceeb tsheej thiab nrog Khetos kav.​—1 Thexalaunikes 4:13-17; Tshwmsim 20:6.

6. Ib tug xaiv tseg hais li cas txog nws txoj kev vam kev cia siab?

⁶ Txhua tus xaiv tseg yeej saib lawv txoj kev vam kev cia siab rau nqi heev. Ib tug ntawd yog Kwv Tij Fedeliv Faleexis (Frederick Franz) uas hais tias: “Peb txoj kev cia siab yeej yuav muaj tiag tiag thiab txhua leej txhua tus uas yog cov 144,000 leej yuav tau txais tej uas Vajtswv tau cog lus tseg. Tej nqi zog uas peb yuav txais ntawd zoo tshaj li qhov uas peb tau xav tseg.” Kwv Tij Fedeliv teev tiam Yehauvas tau ntau ntau xyoo. Nyob rau xyoo 1991, nws hais tias: “Peb haj tseem saib peb txoj kev vam kev cia siab rau nqi heev. . . . Peb yim tos txoj  kev cia siab ntawd mas peb yim ris txiaj ntsig rau. Peb yeej txaus siab hlo tos txawm ntev npaum li cas los xij peem. Kuv saib kuv txoj kev cia siab ntawd rau nqi tshaj yav tas los.”

7-8. Cov uas teev tiam Yehauvas feem coob tos ntsoov dab tsi? (Loos 8:20, 21)

⁷ Feem ntau cov uas teev tiam Yehauvas niaj hnub nim no muaj txoj kev vam kev cia siab ib yam li Anplahas uas yog nyob mus ib txhis hauv lub ntiaj teb no thiab Vajtswv lub Nceeg Vaj yuav kav. (Henplais 11:8-10, 13) Povlauj kuj sau txog txoj kev vam kev cia siab no. (Nyeem Loos 8:20, 21.) Ua li koj tos ntsoov txog dab tsi thaum koj nyuam qhuav paub tias Vajtswv cog lus tseg li cas txog yav tom ntej? Puas yog ib hnub twg koj yuav tsis muaj kev txaug kev txhaum lawm? Los sis cov tib neeg uas koj hlub yuav sawv rov qab los nyob hauv lub vaj kaj siab? Vajtswv yuav muab tej no rau peb, yog li ntawd peb thiaj li “muaj chaw vam.”

⁸ Txawm peb yuav tau txoj sia ntev dhawv mus ib txhis saum ntuj ceeb tsheej los sis hauv ntiaj teb no, peb nyias yeej muaj nyias ib txoj kev vam kev cia siab uas yuav ua rau peb muaj kev zoo siab. Povlauj qhia tias yuav ua li cas peb txoj kev vam kev cia siab thiaj li yim huab yuav ruaj khov. Cia peb tham seb nws sau txuas ntxiv li cas txog peb txoj kev vam kev cia siab xwv peb thiaj tso siab tias txoj kev vam kev cia siab ntawd yeej yuav muaj tiag.

9-10. Raws li Povlauj tus yam ntxwv, cov ntseeg yuav raug dab tsi? (Loos 5:3) (Saib cov duab.)

⁹ Nyeem Loos 5:3. Povlauj hais tias thaum peb raug kev txom nyem ces peb txoj kev vam kev cia siab yuav yim huab ruaj khov. Txhua tus uas raws Khetos qab yeej yuav raug kev txom nyem. Xws li Povlauj tus yam ntxwv. Nws hais rau cov ntseeg hauv Thexaulaunikes tias: “Thaum peb tseem nrog nej nyob, peb twb qhia rau nej paub lawm hais tias, peb cov uas ntseeg yeej yuav raug kev tsimtxom. Nimno nej pom hais tias twb muaj li ntawd lawm  tiag.” (1 Thexalaunikes 3:4) Thiab nws sau rau cov ntseeg hauv Kauleethaus tias: “Cov kwvtij, peb xav kom nej paub hais tias . . . peb raug txomnyem heev kawg li, . . . peb xav hais tias peb yeej yuav tuag xwb.”​—2 Kauleethaus 1:8; 11:23-27.

¹⁰ Cov ntseeg niaj hnub nim no yeej paub ntsoov tias lawv yuav raug kev txom nyem. (2 Timautes 3:12) Koj puas tau raug kev txom nyem vim koj raws Yexus qab? Tej zaum koj tej phooj ywg los sis tej nruab ze tau thuam luag koj. Tej zaum lawv kuj ua saib tsis taus koj. Los sis tej zaum koj tus los pav los sis cov neeg koj nrog ua hauj lwm yuav tsim txom koj vim koj ua qhov ncaj. (Henplais 13:18) Thaum koj qhia Vajlugkub rau lwm leej lwm tus, koj puas tau raug tej nom tej tswv tawm tsam? Txawm peb yuav raug hom kev txom nyem li cas los xij peem. Povlauj hais tias kom cia li zoo siab. Vim li cas nws ho hais li ntawd?

11. Vim li cas peb yuav tau ua tiag thev kev sim siab?

¹¹ Peb cia li zoo siab thaum raug kev txom nyem vim tej ntawd yuav pab kom peb muaj tus yeeb yam uas hais nyob rau hauv Loos 5:3 uas yog “ua siab ntev thev.” Txhua tus ntseeg yeej yuav muaj kev sim siab ces yog li ntawd txhua tus yuav tau xyaum tiag kom muaj lub siab ntev thev. Yog peb thev dhau tej no lawm ces peb yuav pom tej nqi zog uas Yehauvas tau npaj tseg cia. Peb tsis txhob ua ib yam li Yexus zaj lus piv txwv uas cov noob poob rau saum cov av uas muaj pob zeb tiv. Thaum thawj lawv txaus siab hlo txais yuav Vajtswv txoj lus tiam sis tom qab lawv “raug kev txom nyem thiab kev tsim txom,” lawv txawm tso tseg lawm. (Mathais 13:5, 6, 20, 21) Kev tawm tsam thiab kev sim siab yeej ua rau peb ntxhov siab hnyo tiam sis thaum peb thev dhau lawd yuav pab tau peb ntau heev. Ua li ho pab tau peb rau txoj ke twg?

12. Thaum peb thev kev sim siab yuav pab tau peb li cas?

¹² Tus tub txib Yakaunpaus hais txog qhov uas thev dhau kev sim siab seb yuav pab tau peb li cas rau li cas. Nws hais tias: “Nej yuav tsum ua siab ntev mus li tsis txhob tso tseg, nej thiaj yuav ua tau neeg zoo kawg nkaus, tsis muaj ib qho uas lwm tus yuav thuam tau.” (Yakaunpaus 1:2-4) Yog li ntawd, Yakaunpaus hais tias yog peb ua tiag thev ces peb yuav ua taus siab ntev, muaj kev ntseeg, thiab tso siab rau Vajtswv. Kuj muaj dua lwm yam uas yuav pab tau peb yog peb ua tiag thev kev sim siab.

13-14. Thaum peb thev dhau muaj li cas, thiab peb txoj kev vam kev cia siab yuav zoo li cas? (Loos 5:4)

¹³ Nyeem Loos 5:4. Povlauj hais tias yog peb ua siab ntev thev ces peb yuav ua tau “haum Vajtswv siab.” Qhov uas koj thev yuav haum Vajtswv siab. Qhov no tsis yog hais tias Vajtswv xav pom kom koj raug kev sim siab los sis teeb meem tiam sis qhov uas Vajtswv zoo siab yog koj thev dhau tej uas koj raug.​—Phau Ntawv Nkauj 5:12.

¹⁴ Nco ntsoov thaum Anplahas tiv dhau kev sim siab, nws ua haum Yehauvas siab. Yehauvas saib nws tam li ib tug phooj ywg thiab suav tias nws ncaj ncees. (Chivkeeb 15:6; Loos 4:13, 22) Peb los kuj zoo tib yam li ntawd. Qhov uas peb ua haum Yehauvas siab tsis yog peb tuav ntau tes dej num hauv nws lub koom haum tiam sis yog qhov uas peb rau siab teev tiam nws tab txawm peb raug kev sim siab. Txawm peb yuav laus yuav hluas, yuav ua tau ntau tau tsawg los peb yeej muaj rab peev xwm thev taus. Yog koj tseem tab tom raug kev sim siab thiab haj tseem ntseeg Yehauvas ruaj nreeg, nco ntsoov tias koj ua haum Yehauvas siab. Yog peb xam pom tias Yehauvas txaus siab rau peb lawm ces yuav yim huab pab tau kom peb muaj kev vam kev cia siab rau yav tom ntej.

15. Povlauj hais li cas hauv Loos 5:4, 5, thiab ho ua rau ib txhia xav li cas?

¹⁵ Raws li Povlauj tau hais, Yehauvas txaus siab rau peb thaum peb rau siab ntso teev tiam nws thiab thev kev sim siab. Povlauj hais li no txuas ntxiv tias: “Yog haum Vajtswv siab ces peb yuav muaj kev vam. Tsis yog peb vam qhuav xwb.” (Loos 5:4, 5) Qhov uas Povlauj hais no yuav ua rau ib txhia xav tsis thoob vim Loos 5:2, Povlauj hais tias cov ntseeg hauv Loos twb muaj kev vam kev cia siab thiab “Vajtswv yuav pub meej mom” rau lawv. Tej zaum muaj ib txhia xav tias, ‘Yog cov ntseeg twb muaj kev vam kev cia siab lawm, vim li cas Povlauj ho rov qab hais txog kev vam kev cia siab dua?’

16. Ib tug tib neeg txoj kev vam kev cia siab ruaj khov zuj zus li cas? (Saib cov duab.)

¹⁶ Thaum peb txoj kev vam kev cia siab ruaj khov zuj zus, peb mam li nkag siab Povlauj cov lus. Xws li: Koj puas nco qab thaum koj nyuam qhuav hnov txog txoj kev vam kev cia siab uas hais hauv phau Vajlugkub tias peb nyob tau mus ib txhis hauv lub vaj kaj siab? Tej zaum koj yuav ua xyem xyav tias xyov puas muaj tiag. Tiam sis thaum koj paub Yehauvas thiab tej uas nws cog tseg zoo zuj zus tuaj ces koj mam li ntseeg tias tsis yog lam hais xwb tiam sis yeej yuav muaj tiag tiag.

17. Tom qab koj ua kev cai raus dej, koj txoj kev vam kev cia siab ruaj khov zuj zus li cas?

¹⁷ Tom qab koj ua kev cai raus dej, koj rau siab ntso kawm txog Yehauvas thiab koj yim huab paub thiab hlub nws zuj zus ntxiv. Tej no ua rau koj txoj kev vam kev cia siab ruaj khov zuj zus tuaj. (Henplais 5:13–6:1) Tej zaum koj twb pom tias cov lus hais hauv Loos 5:2-4 muaj tiag. Koj raug ntau yam kev txom nyem tiam sis koj yeej ua siab ntev thev thiab pom tias Vajtswv txaus siab rau koj. Thaum koj paub li ntawd, ua rau koj tos ntsoov tej uas Vajtswv cog tseg. Tam sim no koj txoj kev vam kev cia siab ruaj khov tshaj  li thaum koj nyuam qhuav los ntseeg. Koj lub neej hloov hlo thiab koj kuj coj zoo rau koj tsev neeg, txawj txiav txim siab ua ub ua no, thiab kuj siv koj lub sij hawm kom muaj nuj nqis.

18. Yehauvas cog lus tias yuav muaj dab tsi tiag?

¹⁸ Tom qab koj paub tias Vajtswv txaus siab rau koj thiab koj txoj kev vam kev cia siab ruaj khov zuj zus tuaj, tus tub txib Povlauj hais tias koj yuav paub tias koj txoj kev vam kev cia siab yeej yuav muaj tiag. Peb tso siab tau li no vim Povlauj tau hais li no rau cov ntseeg tias: “Tsis yog peb vam qhuav xwb, tiam sis Vajtswv pub nws lub hwj huam dawb huv rau peb kom peb paub tias nws hlub peb kawg li.” (Loos 5:5) Yog li ntawd, peb yeej ntseeg tau tias tej uas peb vam thiab tos ntsoov yeej yuav muaj tiag.

19. Koj cia siab li cas txog koj txoj kev vam kev cia siab?

¹⁹ Cia li zaum tsaws xav txog Yehauvas lo lus cog tseg rau Anplahas, seb nws tau ua li cas Yehauvas thiaj txaus siab rau nws, thiab qhov uas nws nrog Yehauvas sib raug zoo. Anplahas tej kev cia siab ntawd tsis yog tag dawb tag do xwb. Nyob rau hauv phau Vajlugkub hais tias: “Anplahas ua siab ntev tos nws thiaj tau tej uas Vajtswv coglus tseg.” (Henplais 6:15; 11:9, 18; Loos 4:20-22) Qhov uas Anplahas tau raws nkaus li nws txoj kev cia siab ntawd qhia tau rau peb tias yog peb rau siab ntso teev tiam Yehauvas ces peb yeej yuav tau raws nkaus li tej uas peb cia siab. Tej uas peb vam thiab tos ntsoov ntawd tsis yog lam hais xwb tiam sis yeej yuav muaj tiag! (Loos 12:12) Povlauj tau hais tias: “Thov tus Vajtswv uas pab nej muaj kev vam ua rau nej muaj kev xyiv fab thiab muaj lub siab tus rau qhov nej tso siab rau nws. Thov kom lub hwj huam dawb huv nrog nraim nej thiab pab nej yim huab tso siab rau nws.”​—Loos 15:13.