ZAJ KAWM 49
ZAJ NKAUJ 147 Vajtswv Cog Tseg Txog Txojsia Mus Ib Txhis
Yuav Ua Li Cas Thiaj Nyob Tau Mus Ib Txhis?
“Txhua tus uas txais yuav Leej Tub thiab ntseeg nws tau txoj sia ntev dhawv mus ib txhis.”—YAUHAS 6:40.
LUB NTSIAB RAU ZAJ NO
Peb yuav kawm txog seb Yexus tus nqi txhiv pab tau cov xaiv tseg thiab lwm pab yaj li cas.
1. Vim li cas tib neeg ho xav hais tias lawv nyob tsis tau mus ib txhis?
MUAJ coob leej ntau tus tib neeg noj zoo zoo thiab qoj ib ce kom noj qab nyob zoo. Txawm li ntawd los lawv paub hais tias muaj ib hnub twg lawv txoj sia yeej yuav txawj tu. Lawv paub ntsoov tias tib neeg yeej nyob tsis tau mus ib txhis. Tiam sis Yexus hais nyob rau hauv Yauhas 3:16 thiab 5:24 tias tib neeg yeej muaj peev xwm nyob tau mus ib txhis.
2. Yauhas tshooj 6 hais li cas txog txoj sia ntev dhawv mus ib txhis? (Yauhas 6:39, 40)
2 Muaj ib hnub Yexus ua txuj ci muab ncuav thiab ntses rau tib neeg coob coob noj. a Hnub ntawd zoo heev tiam sis hnub tom qab haj tseem zoo tshaj vim Yexus qhia rau cov uas raws nws qab mus rau Khapena-us tias cov tib neeg uas nruam sim lawm yuav sawv rov qab los muaj sia dua thiab muaj feem nyob tau mus ib txhis. (Nyeem Yauhas 6:39, 40.) Yexus tej lus no qhia tias muaj ib hnub twg koj yuav rov pom koj tej phooj ywg thiab nruab ze uas tau tag sim neej lawm thiab nej sawv daws yuav muaj feem nyob tau mus ib txhis. Tiam sis Yexus cov lus uas hais txuas ntxiv nyob hauv Yauhas tshooj 6 ua rau ib txhia tib neeg tsis nkag siab li. Cia peb mam mus kawm txuas ntxiv seb Yexus hais li cas.
3. Nyob hauv Yauhas 6:51 Yexus hais li cas?
3 Thaum Yexus muab cov ncuav rau cov neeg coob coob hauv Khapena-us noj, ua rau lawv xav txog cov manas uas Yehauvas muab rau lawv cov yawg koob hauv teb chaws moj sab qhua. Cov tib neeg uas mloog Yexus qhia paub tias Vajtswv Txoj Lus muab manas hu ua “mov saum ntuj los.” (Phau Ntawv Nkauj 105:40; Yauhas 6:31) Yexus thiaj muab manas ua piv txwv qhia txog ib yam uas tseem ceeb heev. Cov manas yog Vajtswv pub, tiam sis cawm tsis tau cov uas noj nyob mus ib txhis. (Yauhas 6:49) Tiam sis Yexus hais tias nws yog “cov tseem mov saum ntuj los,” “Vajtswv cov mov,” thiab “cov mov uas pub txoj sia.” (Yauhas 6:32, 33, 35) Nws hais tias, “Kuv yog cov mov los saum ntuj los uas pub txoj sia. Yog leej twg noj cov mov no ces nws yuav nyob mus ib txhis.” (Nyeem Yauhas 6:51.) Yexus qhia tias nws tsis zoo li cov manas. Tiam sis cov Yudais txais tsis raug lub ntsiab. Ua li cas Yexus ho hais tias nws yog cov “mov” los saum ntuj los thiab tseem zoo tshaj cov manas Vajtswv muab rau lawv cov yawg koob lawm thiab? Yexus piav ntxiv tias, “cov mov uas kuv yuav pub . . . yog kuv cev nqaij ntag.” Yexus cov lus no txhais li cas? Peb yuav tau nkag siab tej no vim yuav pab tau peb thiab cov uas peb hlub tau txoj sia ntev dhawv mus ib txhis. Cia peb mus kawm ntxiv.
COV MOV UAS PUB TXOJ SIA THIAB NWS CEV NQAIJ
4. Vim li cas ib txhia poob siab rau Yexus tej lus?
4 Ib txhia uas hnov Yexus hais tias nws yog “cov mov los saum ntuj los uas pub txoj sia” txawm poob siab. Tej zaum lawv xav tias nws yuav muab nws cov nqaij rau lawv noj tiag. (Yauhas 6:52) Tiam sis Yexus tseem hais ntxiv tias “yog nej tsis noj neeg Leej Tub cev nqaij thiab haus nws cov ntshav, nej yuav tsis tau txoj sia.” (Yauhas 6:53) Ntshe qhov no haj yam ua rau lawv poob siab.
5. Ua li cas peb thiaj paub tias Yexus tsis hais kom tib neej haus nws cov ntshav tiag?
5 Puag thaum ub, tiam Nau-as nyob Vajtswv txwv kom tib neeg tsis txhob noj ntshav. (Chivkeeb 9:3, 4) Tom qab no Vajtswv Yehauvas tseem txwv qees kom cov Ixayees txhob noj ntshav. Yog leej twg noj, tus ntawd yuav raug tua pov tseg. (Levis Kevcai 7:27, NW cov taw ntawv.) Yexus yeej qhia kom cov Yudais mloog Mauxes Txoj Kev Cai txhua nqe. (Mathais 5:17-19) Yog li ntawd, nws yeej tsis hais kom cov Yudais noj nws cev nqaij thiab haus nws cov ntshav tiag. Tiam sis Yexus xav kom lawv cuab pob ntseg mloog lawv thiaj paub tias yuav ua li cas tau “txoj sia ntev dhawv mus ib txhis.”—Yauhas 6:54.
6. Ua li cas peb ho paub tias Yexus cov lus hauv Yauhas 6:53 yog lus piv txwv xwb?
6 Peb yeej paub tias Yexus tsuas qhia ua lus piv txwv rau cov neeg coob coob ntawd xwb. Nws kuj qhia li ntawd thaum nws nrog tus poj niam Xamalis tham thiab. Nws hais tias, “Tus uas haus cov dej kuv muab, nws yuav tsis nqhis ib zaug li lawm. Cov dej uas kuv muab yuav txhawv hauv tus ntawd thiab pub txoj sia ntev dhawv mus ib txhis rau nws.” (Yauhas 4:7, 14) b Puas yog Yexus hais tias tus poj niam Xamalis yuav tau mus ce dej lwm qhov los haus nws thiaj tau txoj sia ntev dhawv mus ib txhis? Tsis yog. Ib yam li ntawd, Yexus tsis yog hais tias cov tib neeg yuav tau noj nws cev nqaij thiab haus nws cov ntshav tiag tiag es lawv thiaj tau txoj sia ntev dhawv mus ib txhis.
PUAS YOG YEXUS HAIS TXOG TUS TSWV PLUAS HMO?
7. Ib txhia hais li cas txog Yexus cov lus hauv Yauhas 6:53?
7 Ib txhia hais tias Yexus cov lus hauv Yauhas 6:53 yog Yexus qhia tias yuav tau noj tus Tswv Pluas Hmo li cas. Lawv xav li ntawd vim tias Yexus siv tib co lus. (Mathais 26:26-28) Lawv thiaj xav tias txhua tus uas mus koom ua tus Tswv Pluas Hmo yuav tau noj lub ncuav thiab haus khob cawv txiv hmab. Tiam sis ua li ntawd puas yog thiab? Peb yuav tau kawm tseeb seb puas yog li ntawd, rau qhov txhua xyoo tsheej plhom leej thoob ntiaj teb tuaj nrog peb koom ua tus Tswv Pluas Hmo. Cia peb kawm seb Yexus cov lus hauv Yauhas 6:53 thiab tej uas nws hais hmo ntawd txawv li cas.
8. Vim li cas tej uas Yexus hais hauv Yauhas 6:53 tsis yog nws hais tias yuav noj tus Tswv Pluas Hmo li cas? (Saib cov duab.)
8 Cia peb xub tham txog ob yam. Yam ib, thaum Yexus hais nws cov lus hauv Yauhas 6:53-56 nws nyob qhov twg thiab nws hais rau xyoo twg? Nws hais cov lus ntawd rau ib pab neeg Yudais hauv Kalilais xyoo 32 tom qab Yexus. Lub sij hawm ntawd tseem tshuav li ib xyoos mam ua tus Tswv Pluas Hmo hauv Yeluxalees. Yam ob, Yexus hais rau leej twg? Nws hais rau ib pab neeg coob coob hauv Kalilais. Lawv xav tau kev pab ntawm sab nqaij tawv dua li ntawm sab kev ntseeg. (Yauhas 6:26) Thaum Yexus hais txog tej yam uas lawv tsis nkag siab, lawv txawm tsis xav mloog lawm. Thaum ntawd cov thwj tim ib txhia kuj tsis raws nws qab lawm thiab. (Yauhas 6:14, 36, 42, 60, 64, 66) Tiam sis ib xyoos tom qab ntawd, nyob rau xyoo 33 tom qab Yexus, thaum Yexus tsa txoj kev cai tshiab ua tus Tswv Pluas Hmo, nws hais rau leej twg xwb? Nws hais rau nws 11 tus tub txib uas nrog nraim nws. Txawm lawv tsis nkag siab txhua yam nws qhia los lawv tsis zoo li pab neeg hauv Kalilais. Yexus cov tub txib ntseeg ruaj nreeg tias nws yog Vajtswv tus Tub uas los saum ntuj los. (Mathais 16:16) Nws thiaj qhuas lawv tias, “Nej yog cov uas nrog nraim kuv thaum kuv raug kev txom nyem.” (Lukas 22:28) Ob yam no qhia meej tias tej uas Yexus hais hauv Yauhas 6:53 tsis yog nws hais tias yuav noj tus Tswv Pluas Hmo li cas. Tiam sis tseem muaj lwm yam thiab.
Yauhas tshooj 6 piav txog tej uas Yexus qhia ib pab Yudais hauv Kalilais (sab laug). Ib xyoos tom qab ntawd nws qhia nws 11 tus tub txib uas muab siab npuab nws hauv Yeluxalees (sab xis) (Saib nqe 8)
YEXUS COV LUS MUAJ NQIS LI CAS RAU KOJ?
9. Thaum noj tus Tswv Pluas Hmo, Yexus cov lus yog hais rau pab twg?
9 Thaum Yexus nrog nws cov tub txib noj tus Tswv Pluas Hmo, nws muab lub ncuav tsis xyaw keeb ntais cev rau nws cov tub txib, thiab hais tias yog piv txog nws lub cev. Tom qab ntawd, nws muab khob cawv txiv hmab rau lawv haus, thiab hais tias yog piv txog nws “cov ntshav uas ua hom thawj nias rau Vajtswv lo lus cog tseg.” (Malakaus 14:22-25; Lukas 22:20; 1 Kauleethaus 11:24) Tej uas Yexus hais txog lo lus cog tseg no tseem ceeb heev. Yexus hais tias nov yog ib “lo lus cog tseg tshiab.” Yehauvas cog lus li no rau cov uas yuav nrog Yexus kav lub Nceeg Vaj xwb. Tsis yog nws cog rau txhua tus neeg. (Henplais 8:6, 10; 9:15) Lub sij hawm ntawd, Yexus cov tub txib tsis nkag siab tej uas nws hais. Tiam sis tsis ntev tom qab ntawd, lub hwj huam dawb huv tau xaiv lawv los ua cov uas muaj feem rau lo lus cog tseg tshiab es nrog Yexus nyob saum ntuj ceeb tsheej.—Yauhas 14:2, 3.
10. Tej uas Yexus hais thaum nws nyob hauv Kalilais thiab thaum noj tus Tswv Pluas Hmo sib txawv li cas? (Saib daim duab.)
10 Thaum noj tus Tswv Pluas Hmo, Yexus yeej hais tsi ntsees rau “pab. . .yaj tsawg.” Yexus cov tub txib uas nrog nws hmo ntawd yog thawj cov uas muaj feem ua pab yaj tsawg. (Lukas 12:32) Cov tub txib, thiab lwm cov uas tseem yuav los koom lawv, thiaj yog cov uas noj lub ncuav thiab haus khob cawv txiv hmab. Lawv yog cov uas muaj feem mus nrog Yexus nyob saum ntuj. Thaum noj tus Tswv Pluas Hmo, Yexus tsuas hais rau nws cov tub txib xwb, tsis zoo li thaum nws nyob hauv Kalilais es hais rau pab neeg coob coob. Txawm li ntawd los nws tej lus tseem muaj nqis rau coob leej ntau tus.
Tsis muaj coob tus noj tau lub ncuav thiab haus khob cawv txiv hmab. Tiam sis txhua tus yeej ntseeg tau Yexus thiab tau txoj sia nyob mus ib txhis (Saib nqe 10)
11. Ua li cas peb ho paub tias tej uas Yexus hais hauv Kalilais tsis yog hais rau ib txhia xwb?
11 Thaum Yexus nyob hauv Kalilais xyoo 32 tom qab Yexus, cov uas mloog nws qhia feem coob xav tau mov noj xwb. Tiam sis nws qhia lawv tias muaj dua lwm yam zaub mov uas yuav pub tau txoj sia ntev dhawv mus ib txhis, thiab tseem ceeb dua tej zaub mov lawv niaj hnub noj. Yexus qhia tias thaum txog hnub kawg, cov uas nruam sim lawm los yuav ciaj sawv rov los tau txoj sia nyob mus ib txhis. Hauv Kalilais, Yexus hais tsi ntsees rau pab neeg coob coob ntawd tias lawv yuav tau txais koob hmoov. Nws hais tias, “Yog leej twg noj cov mov no ces nws yuav nyob mus ib txhis . . . Cov mov uas kuv yuav pub rau lub qab ntuj neeg tau txoj sia yog kuv cev nqaij ntag.” (Yauhas 6:51) Tej uas Yexus qhia no tsis zoo li thaum nws noj tus Tswv Pluas Hmo es nws hais rau nws cov tub txib nkaus xwb.
12. Yuav ua li cas thiaj tau txoj sia ntev dhawv mus ib txhis?
12 Puas yog Yexus qhia tias txhua tus uas yug los yuav tau txoj sia ntev dhawv mus ib txhis? Tsis yog. Tsuas yog tus uas “noj cov mov” Yexus pub uas qhia tias nws ntseeg Yexus thiaj yuav tau txoj sia xwb. Muaj coob leej xav tias lawv tsuas lees Yexus ua lawv tus cawm seej xwb ces lawv yeej yuav dim. (Yauhas 6:29) Pab neeg coob coob hauv Kalilais kuj ntseeg Yexus thiab, tiam sis ib txhia cia li tso nws tseg lawm. Vim li cas?
13. Tus uas xav ua Yexus thwj tim tiag yuav tsum ua li cas?
13 Cov neeg ntawd feem coob tsuas raws Yexus qab thaum nws ua haum lawv siab xwb. Lawv xav kom nws ua txuj ci kho lawv tej mob, xav tau mov noj, thiab xav kom nws qhia mus ib seem li lawv lub siab xav. Tiam sis Yexus los hauv ntiaj teb tsis yog los ua raws li neeg lub siab nyiam. Tus uas xav raws Yexus qab thiab ua nws ib tug thwj tim tiag yuav tsum coj txawv. Nws yuav tau “los cuag” Yexus es ua txhua yam raws li Yexus tau qhia.—Yauhas 5:40; 6:44.
14. Peb yuav tau ua li cas Yexus lub cev thiab nws cov ntshav thiaj muaj nqis rau peb?
14 Yexus qhia tias lawv yuav tau txoj sia ntev dhawv mus ib txhis rau qhov nws yuav muab nws lub cev thiab nws cov ntshav txhiv lawv. Thiab lawv yuav tsum ntseeg tias nws yeej txhiv tau lawv tiag. Cov Yudais yuav tsum ntseeg li ntawd, niaj hnub no los peb yuav tau ntseeg ib yam li ntawd thiab. (Yauhas 6:40) Yauhas 6:53 qhia tias yuav kom peb tau txoj sia ntev dhawv mus ib txhis, peb yuav tsum ntseeg tias Yexus twb txhiv peb txoj sia lawm. Txhua tus tib neeg muaj peev xwm txais tau qhov koob hmoov no.—Efexus 1:7.
15-16. Peb kawm tau li cas los ntawm Yauhas tshooj 6?
15 Yauhas tshooj 6 muaj nqis heev rau peb thiab rau txhua tus uas peb hlub tshua. Peb yeej pom qhov uas Yexus hlub tib neeg kawg nkaus li. Thaum nws nyob hauv Kalilais nws kho cov muaj mob, qhia txog Vajtswv txoj kev kav, thiab pub zaub mov rau cov tshaib nqhis. (Lukas 9:11; Yauhas 6:2, 11, 12) Tiam sis nws kuj qhia rau lawv tias nws “yog cov mov uas pub txoj sia.” (Yauhas 6:35, 48) Qhov no yog yam uas tseem ceeb tshaj.
16 Txhua xyoo thaum ua tus Tswv Pluas Hmo, cov uas noj lub ncuav thiab haus khob cawv txiv hmab qhia tias lawv muaj feem rau lo lus cog tseg tshiab thiab yuav tau kav lub Nceeg Vaj saum ntuj. Tiam sis, cov uas Yexus muab hu ua “lwm pab yaj” yeej tsis noj lub ncuav thiab haus khob cawv txiv hmab. (Yauhas 10:16) Lawv yuav tsum tsis txhob noj hlo li. Tiam sis lawv yeej noj tau cov mov uas pub txoj sia. Noj li cas? Qhov uas lawv noj yog qhov uas lawv ntseeg tias Yexus txhiv tau lawv txoj sia thiab lawv yuav tau txais koob hmoov los ntawm tus nqi txhiv. (Yauhas 6:53) Yog li ntawd, txawm peb yog cov xaiv tseg los sis yog lwm pab yaj, tej uas hais hauv Yauhas tshooj 6 puav leej muaj nqis rau peb. Rau qhov tej lus ntawd qhia tias peb txhua tus yuav tsum saib tus nqi txhiv rau nqi, peb thiaj tau txoj sia ntev dhawv mus ib txhis.
ZAJ NKAUJ 150 Nrhiav Vajtswv Koj Thiaj Dim
a Zaj kawm tag los lawm tham txog Yauhas 6:5-35.
b Cov dej uas Yexus hais no, piv txwv txog txhua yam uas Yehauvas tau ua thiab tseem tab tom ua xwv tib neeg thiaj tau txoj sia ntev dhawv mus ib txhis.
