Tej Phau Tsom Faj xyoo no koj puas tau nyeem txhua phau tib si? Nyeem mus seb koj teb puas tau cov lus nug nram qab no:

Yehauvas saib poj niam zoo li cas?

Vajtswv tsis xaiv ntsej muag. Nws tsis saib txiv neej rau nqi dua poj niam. Nws mloog ntsoov poj niam tej lus thov thiab paub tej uas nyob hauv lawv siab. Nws tso siab rau cov poj niam Khixatias ua nws txoj hauj lwm.​—w24.01, sab 15-16.

Peb yuav ua li cas coj raws li Efexus 5:7 uas hais tias, “Nej tsis txhob mus nrog cov neeg ntawd ua ke hlo li”?

Tus tub txib Povlauj ceeb toom kom peb tsis txhob nrog tej tug uas yuav ua rau peb tsis xav coj raws li Vajtswv tej kev cai lawm. Tej tug ntawd tsis yog cov uas peb pom tim ntsej tim muag xwb, tiam sis yog cov uas peb sau ntawv rau hauv tej vej xaij zeem phooj ywg thiab.​—w24.03, pp. 22-23.

Peb yuav tsum tsis txhob mloog tej zaj uas tsis muaj tseeb twg?

Peb yuav tsum ceev faj tej lus moo cua uas los ntawm tej phooj ywg, tej email uas tib neeg lam xa tuaj ntxias peb, thiab cov neeg fav xeeb uas ua txuj xav kawm Vajlugkub.​—w24.04, p. 12.

Peb paub thiab tsis paub li cas txog Yehauvas txoj kev txiav txim rau Vaj Ntxwv Xalaumoos, cov uas tuag hauv Xaudoos thiab Kaumaulas, thiab tuag thaum dej dag nyab ntiaj teb?

Peb tsis paub tias xyov Yehauvas puas yuav muab lawv rhuav tshem mus ib txhis. Tiam sis peb paub tias Yehauvas yeej pom txhua yam thiab muaj lub siab khuv leej tshaj plaws.​—w24.05, pp. 3-4.

Vajtswv yog “lub Pob Zeb,” qhov no pab tau peb li cas? (2 Kevcai 32:4)

Peb nrhiav chaw nkaum rau ntawm Yehauvas. Nws yog tus uas peb tso siab tau, rau qhov nws yeej tsis hloov. Nws yeej yuav ua raws li nws lub ntsiab.​—w24.06, pp. 26-28.

Yuav ua li cas koj thiaj zoo siab thaum tsiv koom txoos tshiab?

Cia siab rau Yehauvas, nws yuav pab koj ib yam li nws twb pab lwm tus lawm. Tsis txhob muab lub koom txoos qub thiab lub tshiab sib piv. Kub siab lug ua hauj lwm hauv lub koom txoos, thiab ua tiag zeem phooj ywg tshiab.​—w24.07, pp. 26-28.

Peb zaj lus piv txwv hauv Mathais tshooj 25 qhia li cas rau peb?

Zaj lus piv txwv txog cov yaj thiab cov tshis qhia tias yuav tsum muaj kev ntseeg thiab npuab siab nraim rau Yehauvas. Zaj lus piv txwv txog 10 tus hluas nkauj qhia tias yuav tsum npaj kom txhij thiab ua zoo zov tos. Thiab zaj lus piv txwv txog cov talas qhia tias yuav tsum muaj tswv yim thiab ua neeg nquag.​—w24.09, pp. 20-24.

Chav ntawm lub qhov rooj uas mus rau hauv Xalaumoos lub tuam tsev siab npaum li cas?

Hauv 2 Xwmtxheej Vajntxwv 3:4 tej kauj ntawv qub qub thaum ub ib txhia muab tso ua “120 tshim.” Yog muaj li ntawd tiag ces yuav yog 53 meters (175 feet). Lwm cov ntawv thiab ib txhia uas txhais phau Vajlugkub ho muab tso ua “20 tshim.” Yog muaj li ntawd ces yuav yog 9 meters (30 feet). Yog siab li 20 tshim ces thiaj sib txig nrog lub tuam tsev zaj phab ntsa.​—w24.10, p. 31.

Cov tub leg num yuav tsum ‘muaj ib tug poj niam xwb.’ Qhov no txhais li cas? (1 Timautes 3:12)

Txhais tias nws muaj ib tug poj niam xwb thiab nws tsis mus ua nkauj ua nraug. Tsis tas li ntawd, nws yuav tsum tsis txhob saib tej ntxhais thiab tej poj niam mus rau qhov phem.​—w24.11, p. 19.

Vim li cas peb thiaj paub tias Yauhas 6:53 tsis yog Yexus ua qauv qhia tias yuav noj tus Tswv Pluas Hmo li cas?

Yauhas 6:53 hais tias yuav tsum noj Yexus cev nqaij thiab haus nws cov ntshav. Yexus hais cov lus ntawd hauv Kalilais xyoo 32 tom qab Yexus. Nws hais rau cov Yudais uas tsis muaj kev ntseeg. Tiam sis ib xyoos tom qab ntawd nws mam noj tus Tswv Pluas Hmo hauv Yeluxalees. Lub sij hawm ntawd Yexus hais rau cov uas yuav ua vaj ntxwv nrog nws kav saum ntuj.​—w24.12, pp. 10-11.