Koj teb puas tau cov lus nug no uas rho los ntawm Phau Tsom Faj xyoo 2019?

Vajtswv lo lus cog tseg no txhais li cas: “Tsis muaj ib yam cuabyeej twg uas yuav tawmtsam tau koj li”? (Yaxayas 54:17)

Vajtswv yuav tiv thaiv peb ntawm “cov neeg limhiam.” (Yaxayas 25:4, 5) Peb cov yeeb ncuab yeej yuav tawm tsam peb tiamsis tsuas yog ib vuag dua xwb.​—w19.01, sab 6-7.

Vajtswv coj ncaj li cas thaum nws rau txim rau cov neeg Kana-as thiab cov Yixalayees uas tso nws tseg?

Vajtswv rau txim rau cov uas ua nkauj ua nraug thiab cov uas yuam cai ua siab phem rau tej pojniam menyuam uas tsis muaj txiv pab. Cov uas muab siab npuab Yehauvas es ib leeg ua ncaj rau ib leeg, nws foom koob hmoov rau lawv.​—w19.02, sab 22-23.

Peb yuav coj li cas thaum ib tug uas tsis ntseeg Yehauvas thov Vajtswv?

Zoo rau peb nyob twjywm thiaj qhia tias peb saib taus lawv. Peb yuav tsis hais “amee” lossis nrog lawv tuav tes thov. Peb thov Yehauvas twjywm hauv nruab siab los tau.​—w19.03, sab 31.

Tus neeg yuam menyuam ua phem ua qias ua txhaum loj npaum li cas?

Tus neeg yuam menyuam ua phem ua qias ua txhaum tus menyuam, txhaum lub koom txoos, txhaum nom tswv, thiab ua txhaum Vajtswv. Cov txwj laus yeej coj raws nraim li nom tswv txoj cai hauv lawv lub tebchaws tias yuav tsum qhia rau nom tswv paub thaum muaj neeg liam tias ib tug yuam menyuam ua phem ua qias.​—w19.05, sab 9-10.

Koj yuav hloov dua siab tshiab li cas?

Koj yuav tsum thov Vajtswv pab, ua tib zoo tshuaj koj lub siab, thiab xaiv tej phoojywg zoo.​—w19.06, sab 11.

Peb yuav npaj tamsim no rau kev tsim txom li cas?

Peb yuav tsum tsav peb txojkev sib raug zoo nrog Yehauvas, ntseeg ruaj nreeg tias Yehauvas hlub peb thiab nws yeej yuav tsis tso peb tseg ib zaug li. Nyeem phau Vajlugkub txhua hnub thiab thov Vajtswv tsis tu ncua. Ntseeg ruaj nreeg tias tej koob hmoov ntawm Vajtswv lub Nceeg Vaj yeej yuav muaj tiav. Cim kom tau cov nqi Vajlugkub uas koj nyiam thiab tej nkauj qhuas Vajtswv rau nruab siab.​—w19.07, sab 2-4.

Yuav ua li cas thiaj pab tau peb tsevneeg dim?

Xam pom koj tsevneeg, coj tus cwjpwm zoo, ua siab ntev, thiab ua zoo hais koj tsevneeg tiamsis txhob cia lawv hloov tau koj lub siab.​—w19.08, sab 15-17.

Vim li cas peb ho nyiam ua tes haujlwm uas Yexus muab rau peb? (Mathais 11:28)

Peb muaj cov saib xyuas zoo tshaj plaws, tej phoojywg zoo tshaj plaws, thiab tes haujlwm zoo tshaj plaws.​—w19.09, sab 23.

Yehauvas yuav pab kom peb muaj peevxwm thiab muaj siab xav ua nws tes haujlwm li cas? (Filipis 2:13)

Thaum xav txog tej peb nyeem hauv phau Vajlugkub, Yehauvas yuav pab kom peb muaj peevxwm thiab muaj siab xav ua nws tes haujlwm ntxiv. Yog peb twb txawj ua ib yam dabtsi lawm, Yehauvas yuav pub nws lub hwj huam dawb huv los pab kom peb hajyam txawj ntxiv.​—w19.10, sab 21.

Dabtsi thiaj yuav pab peb txawj txiav txim siab zoo?

Muaj 5 yam uas yuav pab peb txiav txim siab zoo: Ua tib zoo tshawb nrhiav. Thov Yehauvas pub laj lim tswvyim rau koj. Ua tib zoo xav seb yog vim li cas koj thiaj txiav txim siab ua li ntawd. Paub meej seb koj xav ua dabtsi. Npaj li koj muaj peevxwm ua tau xwb.​—w19.11, sab 27-29.

Puas yog txojkev ntseeg tias neeg muaj ib tug ntsuj plig uas tsis txawj tuag pib thaum Xatas nrog Evas tham?

Tsis yog. Xatas tsis tau hais rau Evas tias yog nws noj tsob txiv uas Vajtswv tsis pub noj ces thaum nws tuag tsuas yog nws lub cev xwb tiamsis nws tus ntsuj plig tseem ciaj mus nyob rau lwm qhov. Xatas hais tias Evas yeej yuav tsis tuag ib zaug li. Thaum Dej Dag Nyab Ntiajteb rau Nau-es tiam txhua txojkev ntseeg cuav raug puas tsuaj tag lawm. Yog li ntawd, txojkev ntseeg tias neeg muaj ib tug ntsuj plig uas tsis txawj tuag yuav tsum pib ua ntej Vajtswv ua rau neeg tawg ri sua ntawm qhov chaw Npanpee mus nyob thoob plaws lub ntiajteb no.​—w19.12, sab 15.