KOJ puas ris luag txiaj ntsig? Zoo rau peb tshuaj ntsuam seb peb puas paub ris luag txiaj ntsig. Phau Vajlugkub qhia tias nyob rau peb tiam yuav muaj cov uas “tsis ris luag txiaj ntsig” coob heev. (2 Timautes 3:2) Tej zaum koj yeej ntsib cov neeg zoo li no lawm thiab. Lawv xav tias lwm tus yuav tsum tiam lawv xwb thiab lawv tsis tas ris leejtwg txiaj lossis ua leejtwg tsaug. Yeej tsis yoojyim rau peb nrog cov neeg zoo li no ua ke.

Tiamsis Vajtswv Txojlus qhia tias nws cov tub qhe yuav tsum paub “ris txiaj ntsig.” (Kaulauxais 3:15, NWT ) Muaj ntau yam qhia tias yog vim li cas peb yuav tsum ris luag txiaj ntsig.

Yog peb ris luag txiaj ntsig ces peb yuav muaj kev zoo siab dua. Thaum ib tug neeg ua luag tsaug yuav ua rau nws thiab tus uas nws hais ua tsaug rau zoo siab heev. Vim li cas thiaj hais li no? Muab xav li no: Yog tias muaj ib tug neeg siv nws lub sijhawm, nws lub dag lub zog, lossis siv nws tej nyiaj txiag los ua ib yam zoo rau koj vim nws hlub koj, koj xav li cas xwb? Yeej ua rau koj zoo siab heev, puas yog? Ib yam li Luv thiab Npau-am nkawd. Thaum Npau-am ua siab dawb siab zoo pab Luv, ua rau Luv zoo siab heev tias tseem muaj neeg hlub nws.​—Luv 2:10-13.

Qhov uas tseem ceeb tshaj mas yog peb yuav tsum nco Vajtswv txiaj ntsig. (1 Thexalaunikes 5:18) Tej zaud, koj twb xav txog ntau yam uas Vajtswv twb ua thiab twb muab rau koj lawm, thiab tej uas nws tseem niaj hnub yuav ua rau koj. (2 Kevcai 8:17, 18; Tes Haujlwm 14:17) Tiamsis thaum koj siv sijhawm los ua tib zoo xav txog tej koob hmoov uas Vajtswv nchuav laub lug los rau koj thiab cov uas koj hlub ces koj yuav hajyam nco Vajtswv tsiaj ntsig. Koj kuj yuav pom tias nws hlub koj npaum li cas thiab.​—1 Yauhas 4:9.

Peb yuav tsum ua tib zoo xav txog tej uas Yehauvas ua rau peb thiab nco ntsoov ua nws tsaug. (Phau Ntawv Nkauj 100:4, 5) Yog peb sawvdaws paub ua luag tsaug ces peb yuav zoo siab dua.

Yog peb ris luag txiaj ntsig ces peb yuav muaj kev sib raug zoo nrog lwm tus. Peb txhua leej txhua tus yeej zoo siab heev thaum luag ris peb txiaj ntsig. Thaum ib tug neeg ua ib yam dabtsi rau koj es koj nco nws txiaj ntsig ces neb yuav muaj kev sib raug zoo dua. (Loos 16:3, 4) Tsis tas li ntawd xwb, cov uas nco luag txiaj ntsig yuav muaj siab pab luag dua. Vim lwm tus ua zoo rau lawv, lawv thiaj xav ua zoo rau luag tej thiab. Yeej muaj tseeb li Yexus hais no: “Thaum yus pub rau luag yus zoo siab heev dua thaum yus tau luag li.”​—Tes Haujlwm 20:35.

Lanpaw Emoos (Robert Emmons) yog ib tug xibhwb qhia ntawv qib siab hauv lub xeev Kalifaunias (California) hais tias: “Yuav kom peb paub ris luag txhiaj ntsig mas peb yuav tsum to taub tias ua neeg nyob peb ib leeg yeej xav tau ib leeg txojkev pab. Muaj tej thaud yus pab luag tiamsis muaj tej thaud luag ho pab yus.” Ua neeg nyob, peb yuav tsum sib pab peb thiaj nyob taus thiab muaj kev zoo siab. Xws li thaum peb tu pluas, peb xav kom muaj tus pub zaub pub mov rau peb. Thaum peb muaj mob, peb xav kom muaj tus tu peb. (1 Kauleethaus 12:21) Tus  uas ris luag txiaj ntsig yuav paub ua luag tsaug thaum luag ua ib yam zoo rau nws. Yog li ntawd, koj puas ua luag tsaug thaum luag ua ib yam zoo rau koj?

Yog peb ris luag txiaj ntsig ces yuav pab peb xav txog qhov zoo xwb. Peb lub siab zoo ib yam nkaus li lub lim dej uas lim cov dej ntshiab cia tiamsis lim cov txo pov tseg. Yog peb nco luag txiaj ntsig ces peb lub siab yuav khaws qhov zoo cia xwb, tiamsis qhov phem peb yuav tsis xav txog. Yog peb xav txog qhov zoo xwb ces peb yuav tsis nco qab xav txog tej teeb meem. Peb yimhuab ris luag txiaj ntsig, peb yimhuab pom tej uas luag ua zoo ces qhov no yuav pab kom peb yimhuab paub ris luag txiaj ntsim ntxiv. Yog peb xav txog tej uas luag ua zoo rau peb ces yuav pab tau peb ua li tus tubtxib Paulus hais no: “Cia li xyiv fab rau hauv tus Tswv txhua lub sijhawm.”​—Filipis 4:4, TT.

Yog peb nco luag txiaj ntsig ces peb yuav tsis khib luag, yuav tsis nyuaj siab, lossis tu siab. Cov neeg uas ris txiaj rau tej uas lawv muaj yuav tsis mus lob ub lob no.​—Filipis 4:12.

Peb paub tias nyob rau tiam kawg no Xatas xav kom txhua tus Khixatia tu siab thiab qaug zog rau lawv tej kev txomnyem. Thiab Xatas yuav zoo siab heev yog peb muaj tus cwj pwm phem thiab yws daws dom txog ib puas tsav yam tas li xwb. Rau qhov, yog peb zoo li ntawd ces neeg yuav tsis xav mloog peb thaum peb mus tshaj tawm txoj xov zoo. Thaum peb ua neeg ris luag txiaj ntsig qhia tias peb muaj tej yeeb yam uas lub hwj huam dawb huv txi txiv lossis pub rau peb. Xws li, peb muaj kev zoo siab xyiv fab rau tej koob hmoov uas Vajtswv muab pub rau peb thiab peb muaj kev ntseeg rau tej uas Vajtswv cog lus tseg txog yav tom hauv ntej.​—Kalatias 5:22, 23.

Koj yog Yehauvas ib tug Timkhawv, tej zaum koj yeej xav li tej uas peb tham hauv zaj no thiab. Tiamsis muaj tej thaud yeej tsis yoojyim rau peb nco luag txiaj ntsig thiab xav txog qhov zoo nkaus xwb. Txawm li ntawd los, tsis txhob ntaus siab yau. Koj yeej ua tau tus neeg paub ris luag txiaj ntsig thiab xav txog qhov zoo xwb. Yuav ua li cas koj thiaj ua tau li ntawd? Niaj hnub siv sijhawm los xav seb muaj tej yam twg hauv koj lub neej uas koj txaus siab rau. Yog koj ua li no ces koj yuav paub ris txiaj dua thiab koj yuav zoo siab dua cov uas pheej xav txog lawv tej kev nyuaj siab xwb. Xav txog tej uas lwm tus thiab Vajtswv tau ua los txhawb koj thiab ua rau koj zoo siab. Tej zaum kuj zoo rau koj muab ob peb yam uas koj txaus siab heev rau, los sau cia rau hauv ib phau ntawv.

Cov neeg tshawb fawb pom tias yog peb ris luag txiaj ntsig yuav hloov tau peb txojkev xav kom peb txaus siab rau peb lub neej. Tus neeg uas paub ris txiaj ntsig yeej zoo siab dua tiag. Yog li ntawd, nco ntsoov xam tej koob hmoov uas koj tau txais, nco ntsoov tej yam zoo hauv koj lub neej, thiab ris luag txiaj ntsig. “Cia li ua tus TSWV [“Yehauvas,” NWT ] tsaug, vim nws yog tus zoo tshaj plaws” thiab nco ntsoov ua tsaug rau txhua yam.​—1 Xwmtxheej Vajntxwv 16:34; Kaulauxais 3:15, NWT.