Hauv 2 Kevcai 22:25-27 tsis yog sau los soj ntsuam seb tus txivneej puas txhaum rau qhov nqi no yeej qhia meej tias tus txivneej yeej txhaum lawm. Txoj cai no yog sau los qhia tias tus ntxhais tsis tau ua txhaum kev nkauj kev nraug. Cia peb mus saib seb ob nqi ua ntej ntawd ho hais li cas.

Hauv 2 Kevcai 22:23, 24 qhia txog tus txivneej uas nrog tus hluas nkauj uas luag twb qhaib lawm pw “hauv nroog.” Qhov uas tus txivneej ua li ntawd nws yeej txhaum kev nkauj kev nraug lawm vim tias tus hluas nkauj uas luag qhaib lawd muaj tug lawm. Ua li tus hluas nkauj puas txhaum? “Vim [tus hluas nkauj] nyob hauv nroog thiab nws tsis qw thov luag pab” ces nws txhaum kev nkauj kev nraug lawm thiab. Yog tias nws qw thov luag pab ces yeej yuav muaj neeg hnov thiab pab nws tiamsis nws tsis qw. Yog li ntawd, nkawd 2 leeg thiaj li txhaum tibsi.

Hauv 2 Kevcai 22:25-27 hais ntxiv tias: “Yog hais tias, muaj ib tug txivneej mus ntsib ib tug ntxhais uas luag twb qhaib lawm, nws cia li muab mos tom xubtsuag, ces tsuas muab tus txivneej tua povtseg xwb; tsis txhob ua li cas rau tus ntxhais, rau qhov nws tsis tau ua txhaum uas tsimnyog muab nws tua. Rooj plaub no txiav txim ib yam li . . . ib tug [txivneej] muab ib tug ntaus tuag lawm. Rau qhov tus txivneej ntawd mus mos tus ntxhais uas luag qhaib lawm nyob deb nroog, txawm yog tus ntxhais ntawd qw thov neeg pab los tsis muaj leejtwg hnov thiab pab nws.”

Yog zoo li hais no ces cov txwj laus neeg uas txiav txim ntseeg tias tus ntxhais “qw thov neeg pab los tsis muaj leejtwg hnov thiab pab nws.” Yog li ntawd, tus ntxhais ntawd thiaj tsis tau ua txhaum kev nkauj kev nraug. Tiamsis tus txivneej txhaum rau qhov (1) nws mos tus ntxhais ntawd thiab (2) nws ua txhaum kev ua nkauj ua nraug vim tus ntxhais ntawd twb muaj neeg qhaib lawm.

Txoj kevcai hauv 2 Kevcai 22:25-27 qhia tias tus ntxhais yog tus dawb huv tiamsis kuj qhia tias tus txivneej ua txhaum vim nws mos pojniam thiab ua txhaum kev nkauj kev nraug lawm thiab. Peb yeej tso siab tias cov txwj laus neeg uas txiav txim yeej yuav ua tib zoo “tshuaj saib puas muaj tseeb” thiab yuav txiav txim raws li Vajtswv tej lus cob qhia uas nws qhia tag los qhia thiab.​—2 Kevcai 13:14; 17:4; Khiav Dim 20:14.