Koj puas tau muab cov Phau Tsom Faj rau xyoo no coj los ua tib zoo nyeem? Sim seb koj teb puas tau cov lus nug hauv qab no:

Peb yuav saib cov xaiv tseg li cas xwb?

Peb yuav tsum hwm lawv tiamsis tsis txhob muab lawv saib hlob dhau hwv lawm. (Yudas 16) Peb yuav tsis nug lawv seb Vajtswv xaiv lawv li cas.​—w20.01, sab 28-29.

Ua cas koj thiaj ntseeg tau tias Yehauvas yeej xam pom koj?

Phau Vajlugkub qhia tias ua ntej koj tsis tau yug los Yehauvas twb pom koj lawm. Nws yeej mloog koj tej lus thov thiab paub txhua yam hauv koj nruab siab. Tej koj ua ua tau rau Yehauvas zoo siab lossis tu siab. (1 Xwmtxheej Vajntxwv 28:9; Pajlug 27:11) Yehauvas yog tus coj koj los cuag nws.​—w20.02, sab 12.

Thaum twg thiaj zoo rau peb hais lus thiab thaum twg zoo rau peb nyob twjywm?

Peb zoo siab qhia tibneeg txog Yehauvas. Thaum peb pom ib tug yuav ua yuam kev loj peb yuav tsum mus qhia nws. Yog cov txwj laus pom ib tug ua yuam kev los lawv yuav tsum ntuas tus ntawd thiab. Nyob rau tej lub tebchaws uas nom tswv txwv peb tes haujlwm, peb yuav tsis nug cov kwvtij nkauj muam seb lawv ua lawv tes haujlwm li cas thiab lawv los yuav tsum tsis txhob qhia lwm tus. Peb tsis tham txog tej yam uas tsis tsim nyog lwm tus paub txog.​—w20.03, sab 20-21.

Cov kooj hauv Yau-ees tshooj 2 txawv ntawm cov kooj hauv Tshwmsim tshooj 9 li cas?

Yau-ees 2:20-29 hais tias Vajtswv yuav raws cov kooj tawm mus thiab cog lus tias nws yuav them rov qab tej uas cov kooj muab noj tag lawm. Tom qab ntawd Vajtswv yuav pub nws lub hwj huam dawb huv rau txhua tus. Zaj lus faj lem no muaj tiav thaum cov Npanpiloos tuaj ntaus cov Yixalayees thiab tom qab ntawd. Cov kooj hauv Tshwmsim 9:1-11 yog piv txog cov xaiv tseg nyob rau peb tiam no. Lawv yuav tshaj tawm tias Vajtswv yuav rhuav tshem tej kev phem hauv lub ntiajteb no kom puas tsuaj tag. Cov uas nyiam lub qab ntuj no tej kev phem tsis nyiam tej uas cov xaiv tseg tshaj tawm.​—w20.04, sab 2-6.

Niaj hnub nimno leejtwg yog tus vajntxwv qaum teb?

Tebchaws Lav Xias thiab cov tebchaws uas koom tes nrog nws yog tus vajntxwv qaum teb. Lawv tawm tsam Vajtswv cov neeg, lawv txwv tes haujlwm tshaj tawm, thiab tej uas lawv ua qhia tias lawv ntxub cov Timkhawv heev. Lawv ua kom lawv muaj zog tshaj tus vajntxwv qab teb.​—w20.05, sab 13.

Puas yog Vajtswv lub hwj huam dawb huv tsuas pab peb ua tau 9 yam uas hais hauv Kalatias 5:22, 23 xwb?

Tsis yog. Tseem tshuav ntau yam ntxiv uas lub hwj huam dawb huv pab kom peb ua. Xws li lub hwj huam pab kom peb ua neeg ncaj ncees. (Efexus 5:8, 9)​—w20.06, sab 17.

Yog koj yuav tso ib yam dabtsi tawm rau saum huab cua, koj yuav tsum ua zoo xav txog dabtsi?

Ua zoo xav seb tej lus uas koj sau, tej duab lossis yeeb yaj kiab uas koj tso tawm puas zoo li yog koj khav txog koj tus kheej.​—w20.07, sab 6-7.

Cov tshaj tawm txoj xov zoo kawm tau li cas los ntawm cov neeg ntaus ntses?

Cov neeg ntaus ntses khwv heev thiab mus rau tej qho chaw uas lawv paub tias yuav muaj ntses. Lawv paub siv cov cuab yeej ntaus ntses thiab ua siab loj siab tuab vim lawv tsis paub xyov thaum twg yuav muaj cua daj cua dub. Peb kuj xyaum tau lawv thiab thaum peb mus tshaj tawm.​—w20.09, sab 4, 5.

Peb yuav pab cov kawm Vajlugkub kom muaj kev hlub rau Yehauvas li cas?

Txhawb kom lawv nyeem phau Vajlugkub txhua hnub thiab ua tib zoo xav txog tej lawv nyeem. Qhia kom lawv paub thov Vajtswv.​—w20.11, sab 4.

Nqi Vajlugkub no yog hais rau leejtwg: “Txhua tus uas nyob hauv Khetos yuav ciaj sawv rov los”?​—1 Kauleethaus 15:22, TT.

Cov lus no yog Paulus hais rau cov xaiv tseg uas Vajtswv yuav tsa sawv mus nyob saum ntuj. Lawv yog cov “uas muab cais ua cov uas dawb huv rau hauv Yexus Khetos.”(1 Kauleethaus 1:2, TT; 15:18)​—w20.12, sab 6.

Cov xaiv tseg yuav ua dabtsi tom qab “tshuab raj tshuab xyu zaum kawg” es “tib ntsais muag xwb” lawv lub cev hloov kiag lawm?​—1 Kauleethaus. 15:51-53.

Lawv yuav nqa qws hlau nrog Yexus kav ib tsoom tebchaws. (Tshwmsim 2:26, 27)​—w20.12, sab 13.