1. Thaum peb qaug zog ua li cas rau peb?

THAUM peb ntsib teeb meem peb yeej ua npaum li peb ua tau los daws peb qhov teeb meem. Tiamsis nyuaj rau peb daws peb tej teeb meem thaum peb qaug zog. Thaum peb qaug zog peb yuav xav tias peb tsis muaj nuj nqis dabtsi li thiab peb yuav tsis muaj kev zoo siab. Pajlug 24:10, NWT hais tias thaum peb tej kev ntxhov siab ua rau peb qaug zog, peb yuav tsis xav ua dabtsi. Yeej muaj tseeb li nqi Vajlugkub no hais, thaum peb muaj kev nyuaj siab yeej tsis yoojyim rau peb daws peb tej teeb meem.

2. (1) Dabtsi yuav ua rau peb qaug zog? (2) Hauv zaj no peb yuav kawm txog dabtsi?

² Muaj ntau yam ua rau peb qaug zog, tej zaum kuj yog tej peb ua yuam kev, tej peb ua tsis tau lossis peb muaj kev mob kev nkeeg. Tej zaum kuj yog vim peb tsis tau tes haujlwm uas peb xav ua rau Yehauvas. Lossis tsis muaj leejtwg xav mloog thaum peb mus tshaj tawm txoj xov zoo. Hauv zaj no peb yuav tham txog tej uas peb ua tau los pab kom peb tsis txhob qaug zog.

3. Yuav ua li cas peb thiaj tsis qaug zog thaum peb ua yuam kev?

³ Yog peb pheej ua txhaum thiab ua yuam kev ces tej zaum peb yuav xav tias Yehauvas yuav tsis pub peb mus nyob hauv Vaj Kaj Siab. Tsis zoo rau peb xav li ntawd. Phau Vajlugkub hais tias “txhua tus puavleej ua txhaum.” (Loos 3:23) Tsuas yog Yexus tib leeg xwb thiaj tsis ua txhaum. Tiamsis Yehauvas tsis saib ntsoov tej uas peb ua yuam kev thiab tsis tseev kom peb ua tau txhua yam zoo tiav log. Yehauvas hlub peb thiab  xav pab peb. Nws ua siab ntev rau peb thiab paub tias yeej tsis yoojyim rau peb ua qhov yog tas mus li thiab nws tsis xav kom peb qaug zog rau tej uas peb ua tsis tau.​—Loos 7:18, 19.

4, 5. Ib Yauhas 3:19, 20 pab tau 2 tug muam no rau siab ntso teev tiam Yehauvas li cas?

⁴ Cia peb tham txog 2 tug muam hu ua Denpaulas thiab Malias. * Thaum Denpaulas tseem yau nws tsev neeg tsis hlub nws. Thaum nws ua tau zoo los tsis muaj leejtwg qhuas nws. Nws thiaj xav tias nws tsis muaj nuj nqis dabtsi. Txawm nws ua yuam kev me me xwb los ua rau nws xav tias nws ua tsis tau dabtsi li. Malias los kuj ntsib ib yam li Denpaulas thiab. Nws cov txheeb ze thuam thiab saib tsis taus nws.. Twb yog vim li ntawd nws thiaj saib nws tsis muaj nuj nqis. Thaum nws ua kevcai raus dej lawm los nws tseem xav tias xyov puas tsim nyog nws ua Yehauvas ib tug Timkhawv.

⁵ Txawm li ntawd los 2 tug muam no rau siab ntso teev tiam Yehauvas. Nkawd thov Vajtswv thiab qhia nkawd tej kev nyuaj siab rau nws. (Phau Ntawv Nkauj 55:22) Nkawd paub tias Yehauvas yeej pom thiab paub tias vim li cas nkawd thiaj xav tias nkawd tsis muaj nuj nqis dabtsi. Txawm hais tias peb tsis pom los Yehauvas yeej pom tej yam zoo hauv peb lub siab.​—Nyeem 1 Yauhas 3:19, 20.

6. Yog ib tug neeg pheej rov qab mus ua txhaum qhov qub yuav ua li cas rau nws?

⁶ Muaj tej tug yeej siv zog kawg tiamsis lawv pheej rov qab mus ua txhaum qhov qub. Thaum peb ua txhaum lossis ua yuam kev peb yeej nyuaj siab kawg. (2 Kauleethaus 7:10) Tiamsis tsis txhob xav tias ‘Kuv tsis muaj nuj nqis dabtsi li. Yehauvas yuav tsis zam txim rau kuv.’ Yog peb pheej xav li ntawd ces yuav ua rau peb tso tseg tsis teev tiam Yehauvas. Nco ntsoov Pajlug 24:10, NWT hais tias peb yuav tsis xav ua dabtsi thaum peb qaug zog. Yog li ntawd peb yuav tsum mus cuag Yehauvas thiab thov nws zam txim rau peb. (Yaxayas 1:18) Thaum Yehauvas pom tias koj yeej tu siab heev rau tej uas koj ua txhaum thiab koj yeej sib zog hloov koj tus kheej ces nws yeej yuav zam txim rau koj. Koj kuj mus cuag tau cov txwj laus thiab. Lawv yuav ua siab ntev pab kom koj txojkev ntseeg rov ruaj khov.​—Yakaunpaus 5:14, 15.

7. Vim li cas peb yuav tsum tsis txhob qaug zog yog hais tias peb muaj ib txojkev txhaum uas nyuaj rau peb tso tseg?

⁷ Ib tug txwj laus nyob Fab Kis teb hais li no rau cov uas xav tso lawv txojkev txhaum tseg tiamsis nyuaj heev rau lawv tias: “Rau Yehauvas, tus neeg ncaj ncees tsis yog tus uas tsis ua  txhaum ib zaug li tiamsis yog tus uas tu siab rau thaum nws ua txhaum thiab sib zog hloov nws tus kheej.” (Loos 7:21-25) Yog li ntawd, yog hais tias koj muaj ib txojkev txhaum uas nyuaj heev rau koj tso tseg, tsis txhob xav hais tias koj tsis tsim nuj nqis dabtsi li. Rau qhov peb txhua leej txhua tus yeej ua yuam kev. Twb yog li ntawd Vajtswv thiaj xa nws Leej Tub los tuag theej peb lub txhoj thiab zam peb lub txim.​—Efexus 1:7; 1 Yauhas 4:10.

8. Thaum peb qaug zog peb yuav mus cuag leejtwg pab peb?

⁸ Peb mus cuag tau cov kwvtij nkauj muam hauv lub koom txoos pab peb thaum peb qaug zog. Lawv yuav mloog peb thiab nplig peb lub siab. (Pajlug 12:25; 1 Thexalaunikes 5:14) Ib tug muam uas qaug zog hu ua Ntsais (Joy) nyob Nai Ntsaw Lia (Nigeria) hais tias: “Yog tsis muaj kuv cov kwvtij nkauj muam pab kuv, xyov kuv yuav ua li cas. Tej uas lawv ua los pab kuv ua rau kuv pom tias Yehauvas yeej teb kuv tej lus thov tiag. Kuv kuj xyaum lawv es mus pab lwm tus thiab.” Tiamsis peb yuav tsum nco ntsoov tias lawv yuav tsis paub thaum peb xav tau kev txhawb zog. Yog li ntawd peb yuav tsum mus cuag cov kwvtij nkauj muam uas paub tab thiab thov lawv pab peb.

9. Phau Ntawv Nkauj 41:3 thiab 94:19 txhawb tau peb li cas?

⁹ Thov Yehauvas pab peb. Thaum peb tsis xis nyob lossis ntoog ib tug mob los ntev lawm yuav ua rau peb qaug zog. Txawm tias Yehauvas tsis tshem hlo peb tus mob los nws yuav pab kom peb nyiaj taus. (Nyeem Phau Ntawv Nkauj 41:3; 94:19.) Tej zaum Yehauvas yuav ua rau peb cov kwvtij nkauj muam tuaj pab peb ua haujlwm hauv vaj hauv tsev, mus yuav khoom tom khw rau peb, thiab thov Vajtswv rau peb. Lossis Yehauvas yuav ua kom peb nco qab cov nqi Vajlugkub txog lub qab ntuj tshiab uas peb yuav tsis muaj mob muaj nkeeg li lawm.​—Loos 15:4.

10. Vim li cas Ib Xas thiaj tsis tag kev cia siab?

¹⁰ Muaj ib tug kwvtij hu ua Ib Xas (Isang) nyob Nai Ntsaw Lia raug mob, ua rau nws tuag tes tuag taw. Nws tus kws kho mob hais rau nws tias nws yuav mus tsis taus kev li lawm. Ib Xas hais tias: “Kuv tag kev cia siab thiab tsis muaj chaw vam khom li lawm.” Tiamsis dabtsi thiaj li txhawb tau nws lub zog? Ib Xas hais tias: “Kuv pojniam wb niaj hnub thov Yehauvas thiab kawm nws Txojlus, wb ua Yehauvas tsaug rau tej uas nws pub rau wb tamsim no, thiab wb nco ntsoov txog lub neej yav tom hauv ntej hauv lub qab ntuj tshiab.”

11. Txawm tias Xee Dim muaj mob los ua cas nws muaj kev zoo siab?

¹¹ Tus muam Xee Dim (Cindy) nyob Mev teb (Mexico) tus kwv kho mob hais rau nws tias nws muaj ib tug mob loj uas yuav ua rau nws tuag taus. Nws ua li cas nws thiaj tsis nco txhawj txog nws tus mob? Txhua zaus thaum Xee Dim mus kho mob nws nco ntsoov tshaj tawm rau cov neeg nws ntsib. Nws hais tias: “Thaum kuv ua li ntawd ces kuv tsuas txhawj txog lwm tus neeg xwb kuv tsis nco xav txog thaum lawv phais kuv thiab xav tias yuav mob npaum li cas. Thaum kuv nrog cov kws kho mob thiab cov neeg tu mob tham kuv nug txog lawv thiab lawv tsev neeg. Kuv kuj nug lawv tias txoj haujlwm no khwv ua luaj ua li cas lawv ho xav ua? Thaum kuv nrog lawv tham tag kuv thiaj paub hais tias lawv nyiam dabtsi. Muaj ib txhia hais tias cov neeg mob tsis tshua nug txog lawv. Ib txhia ua kuv tsaug thiab muab lawv chaw nyob thiab xov thooj rau kuv. Kuv paub hais tias Yehauvas yeej yuav pab kom kuv nyiaj taus kuv tus mob  tiamsis kuv tsis paub hais tias nws yuav ua rau kuv muaj kev zoo siab npaum li no.”​—Pajlug 15:15.

12, 13. Cov muaj mob lossis tsis taus lawm ua li cas lawv thiaj tshaj tawm tau rau lwm tus? Thiab lawv pab tau lwm tus li cas?

¹² Cov uas muaj mob thiab tsis taus lawm yuav mus tshaj tawm tsis tau npaum li lawv lub siab xav. Txawm li ntawd los lawv yeej tseem nrhiav tau lwm txoj hau kev mus tshaj tawm rau lwm tus thiab. Xws li tus muam Lov Laum (Laurel) nyob tebchaws U.S.A. Tau 37 xyoo nws pw saum lub txaj nyob hauv ib lub tshuab uas pab nws ua pa. Nws muaj tus mob kheeb xawm, raug phais mob, thiab muaj mob rau nws cov tawv nqaij. Txawm li ntawd los nws rau siab qhia Vajlugkub rau cov neeg uas tuaj tu nws tom tsev. Twb yog li ntawd, nws thiaj pab tau 17 tus neeg los kawm txog Yehauvas! *

¹³ Ib tug txwj laus nyob Fab Kis teb hu uas Litshaj (Richard) hais txog cov uas mus tsis tau qhov twg thiab cov nyob hauv tsev laus tias: “Kuv txhawb kom lawv muab peb tej ntaub ntawv tso rau ib qho chaw rau tibneeg pom. Cov uas xav paub ntxiv mam los nug lawv thiab nrog lawv tham. Qhov no yuav txhawb tau lawv zog heev.” Cov uas mus tsis tau qhov twg kuj sau tau ntawv thiab hu tau xov thooj mus tshaj tawm.

14. Vajntxwv Daviv tso tau tus qauv zoo li cas rau peb xyaum?

¹⁴ Thaum peb hnub nyoog laus lawm thiab thaum peb muaj ib tug mob lossis lwm yam teeb meem, peb yuav tsis tau ua tes haujlwm uas peb xav ua. Xws li Vajntxwv Daviv xav ua Vajtswv lub tuam tsev heev tiamsis Yehauvas ho xaiv lwm tus lawm. Txawm li ntawd los Daviv tseem txhawb nqa thiab muab nyiaj muab kub mus pab ua Vajtswv lub tuam tsev. Daviv tso tau ib tug qauv zoo kawg rau peb xyaum.​—2 Xamuyees 7:12, 13; 1 Xwmtxheej Vajntxwv. 29:1, 3-5.

15. Ua li cas tus kwvtij Ub Nkawm thiaj tsis qaug zog lawm?

¹⁵ Ib tug kwvtij nyob Fab Kis teb hu uas Ub Nkawm (Hugues) ua tsis tau ib tug txwj laus lawm vim nws muaj mob. Txawm ua haujlwm me me hauv vaj hauv tsev xwb los nyuaj heev rau nws. Nws hais tias: “Thaum xub thawj kuv xav tias kuv tsis muaj nqis dabtsi li thiab kuv qaug zog kawg tiamsis ib ntus tom qab ntawd kuv xav tias tsis zoo rau kuv pheej xav txog tej uas kuv ua tsis tau. Kuv yuav tsum xav txog tej uas kuv ua tau rau Yehauvas xwb. Kuv ua ib yam li Nkide-oos thiab nws 300 tus tub rog.  Lawv yeej sab heev tiamsis lawv yeej ua tiag mus ntaus rog. Kuv yuav rau siab ntso ua li kuv ua tau!”​—Cov Thawjtswj 8:4, TT.

16. Peb kawm tau li cas los ntawm cov tubtxib saum ntuj cov qauv?

¹⁶ Cov tubtxib saum ntuj uas muab siab npuab Yehauvas kuj tso tau qauv zoo rau peb xyaum thiab. Muaj ib zaug Yehauvas nug cov tubtxib saum ntuj seb leejtwg yuav mus ntxias Vajntxwv Ahaj. Tus yuav tawm tswvyim li cas los muaj. Tiamsis Vajtswv xaiv ib tug thiab hais rau nws tias nws yeej yuav ntxias tau Vajntxwv Ahaj. (1 Vajntxwv 22:19-22) Cov tubtxib saum ntuj uas Vajtswv tsis xaiv puas qaug zog thiab yws tias, ‘Kuv nkim kuv lub zog tawm tswvyim ua dabtsi?’ Lawv yeej tsis ua li ntawd, lawv txo hwjchim thiab xav kom sawvdaws qhuas Yehauvas tib leeg xwb.​—Cov Thawjtswj 13:16-18; Tshwmsim 19:10.

17. Peb yuav ua li cas peb thiaj tsis qaug zog yog tias peb tsis tau tes haujlwm uas peb xav ua?

¹⁷ Nco ntsoov tias qhov koob hmoov uas zoo tshaj plaws yog qhov uas peb tau ua Yehauvas ib tug timkhawv thiab tshaj tawm txog nws lub Nceeg Vaj. Tsis yog peb tes haujlwm ua rau peb muaj nqis rau Yehauvas thiab peb cov kwvtij nkauj muam tiamsis yog qhov uas peb txo hwjchim. Yog li ntawd, thov Yehauvas pab kom koj ua tau ib tug neeg txo hwjchim. Ua tib zoo xav txog Yehauvas cov tub qhe uas txo hwjchim thaum ub thiab rau siab ntso ua li koj ua tau los pab koj cov kwvtij nkauj muam.​—Phau Ntawv Nkauj 138:6; 1 Petus 5:5.

18, 19. Yog thaj tsam koj nyob tsis muaj leejtwg xav mloog txoj xov zoo, koj yuav ua li cas koj thiaj muaj siab mus tshaj tawm?

¹⁸ Thaum koj mus tshaj tawm es zoo li tsis muaj leejtwg xav mloog txoj xov zoo lossis tsis muaj leejtwg nyob hauv tsev li, puas ua rau koj qaug zog? Peb yuav ua li cas peb thiaj muaj siab mus tshaj tawm? Lub ntsiab me “ Yuav Ua Li Cas Koj Thiaj Nyiam Mus Tshaj Tawm” yuav pab tau koj. Tseem ceeb heev rau peb nco ntsoov tias vim li cas peb thiaj mus tshaj tawm.

¹⁹ Nco ntsoov tias qhov uas peb mus tshaj tawm twb yog peb xav kom tibneeg paub txog Yehauvas lub npe thiab nws lub Nceeg Vaj. Yexus hais meej tias cov taug txojkev uas  yuav coj mus tau txojsia tsis muaj coob leej. (Mathais 7:13, 14) Thaum peb mus tshaj tawm twb yog peb ua haujlwm nrog Yehauvas, Yexus, thiab cov tubtxib saum ntuj. (Mathais 28:19, 20; 1 Kauleethaus 3:9; Tshwmsim 14:6, 7) Yehauvas nrhiav cov neeg uas xav los teev tiam nws. (Yauhas 6:44) Yog li ntawd yog tias koj mus ntsib ib tug neeg es nws tsis xav mloog txoj xov zoo los tsis txhob qaug zog, tej zaum lwm zaus koj rov qab mus nws yuav mloog.

20. Yelemis 20:8, 9 pab tau peb li cas thaum peb qaug zog?

²⁰ Peb kuj kawm tau ntau yam los ntawm tus cev Vajtswv lus Yelemis. Thaj tsam uas nws mus tshaj tawm tsis muaj leejtwg xav mloog nws li. Lawv niaj hnub thuam thiab luag nws. (Nyeem Yelemis 20:8, 9.) Muaj ib zaug Yelemis qaug zog heev nws tsis xav mus tshaj tawm ntxiv li lawm. Tiamsis nws tsis ua li ntawd vim Yehauvas Txojlus zoo li cov hluavtaws kub lug hauv Yelemis lub siab tuaj thiab nws nyiaj tsis taus ntxiv lawm! Peb los yeej ua tau ib yam li Yelemis thiab yog tias peb niaj hnub kawm Vajtswv Txojlus thiab muab coj los ua tib zoo xav. Yog peb ua li ntawd ces thaum peb mus tshaj tawm peb yuav zoo siab dua thiab tej zaum yuav muaj neeg coob dua xav mloog peb.​—Yelemis 15:16.

21. Yuav ua li cas peb thiaj tsis qaug zog?

²¹ Denpaulas hais tias: “Xatas yuav ua kom peb qaug zog.” Tiamsis Yehauvas muaj zog dua Xatas thiab tej cuab yeeb uas nws siv los tawm tsam peb. Yog li ntawd thaum koj qaug zog nco ntsoov thov Yehauvas pab koj. Nws yuav pab koj rau tej uas koj ua tsis tau. Nws yuav pab koj thaum koj muaj mob muaj nkeeg. Nws yuav pab kom koj zoo siab rau tes haujlwm uas koj ua rau nws thiab nws yuav pab kom koj muaj siab mus tshaj tawm. Tsis tas li ntawd xwb yog koj muaj kev nyuaj siab dabtsi los qhia siab hlo rau koj Leej Txiv tus uas hlub koj. Nws yuav pab koj thaum koj qaug zog.