1, 2. (1) Yehauvas cov neeg coob tus raug kev nyuaj siab li cas? (2) Thaum lawv raug kev nyuaj siab yuav ua li cas rau lawv?

XAV TXOG 3 tug qauv no: Tus kws kho mob qhia rau ib tug kwvtij hluas tias nws muaj ib tug mob uas yuav ua rau nws lub zog ntaug zuj zus xwb. Muaj ib tug kwvtij poob haujlwm, txawm nws mus nrhiav haujlwm npaum li cas los nws nrhiav tsis tau. Muaj ib tug niam tais laus uas ua tsis taus ntau rau Yehauvas lawm.

² Yog muaj li no rau koj, tej zaum koj yuav xav tias koj tsis tsim nuj nqis dabtsi li lawm. Yuav ua rau koj tsis qab siab ua neej, poob ntsej muag, lossis yuav ua rau koj cais koj ntawm lwm tus.

3. Xatas thiab cov uas coj li nws saib tibneeg txojsia zoo li cas xwb?

³ Lub ntiajteb no saib tibneeg zoo ib yam li Xatas saib. Xatas ib txwm saib tibneeg tsis muaj nqis dabtsi li. Nws twb paub tias yog Evas tsis mloog Vajtswv lus ces Evas yeej yuav tuag. Txawm li ntawd los, Xatas tseem dag ntxias Evas tias Evas yuav tau lub neej ywj siab. Kev lag luam, kev nom kev tswv, thiab kev ntseeg cuav hauv ntiajteb no puavleej nyob hauv Xatas qab xib teg. Twb yog vim li no, cov tub lag tub luam, tej nom tej tswv, thiab tej thawj coj ntawm tej kev ntseeg thiaj saib tibneeg txojsia tsis rau nqi dabtsi li thiab tsis quav ntsej txog lawv.

4. Hauv zaj kawm no peb yuav tham txog dabtsi?

⁴ Yehauvas tsis zoo li Xatas. Yehauvas xav kom peb paub tias  peb muaj nqis heev rau nws. Yehauvas yuav pab peb thaum peb raug kev txomnyem nyuaj siab uas ua rau peb xav tias peb tsis tsim nuj nqis dabtsi li. (Phau Ntawv Nkauj 136:23, NWT; Loos 12:3) Zaj kawm no peb yuav tham seb Yehauvas pab peb li cas: (1) Thaum peb ntoog ib tug mob, (2) thaum peb txom nyem nyiaj txiag, thiab (3) thaum peb laus thiab ua tsis taus Yehauvas tes haujlwm npaum li qub lawm. Ua ntej no, cia peb tham seb vim li cas peb thiaj paub tias Yehauvas saib peb rau nqi.

5. Ua li cas peb thiaj paub tias Yehauvas saib tibneeg muaj nqis?

⁵ Txawm Yehauvas muab hmoov av los puab peb xwb los peb muaj nqis tshaj ib phoo tes av. (Chivkeeb 2:7) Vim li cas peb thiaj paub tias peb muaj nqis rau Yehauvas? Peb paub vim Yehauvas tsim tibneeg kom muaj tus yam ntxwv zoo li nws. (Chivkeeb 1:27) Nws tsim peb zoo tshaj txhua yam hauv ntiajteb no thiab kom peb tu lub ntiajteb thiab saib xyuas tej tsiaj txhu huv tibsi.​—Phau Ntawv Nkauj 8:4-8.

6. Puas muaj lwm yam pov thawj tias Yehauvas saib peb muaj nqis?

⁶ Txawm Adas ua txhaum lawm los Yehauvas tseem saib tibneeg muaj nqis. Peb muaj nqis heev rau Yehauvas nws thiaj cia nws tib leeg Tub Yexus los tuag theej peb lub txhoj. (1 Yauhas 4:9, 10) Vim muaj Yexus tus nqi txhiv Yehauvas thiaj yuav tsa cov tuag sawv rov qab los, “tsis hais cov neeg ua phem lossis cov neeg ua zoo.” (Tes Haujlwm 24:15) Vajtswv Txojlus qhia tias txawm peb muaj mob muaj nkeeg, ua neej txom nyem, lossis laus lawm los Yehauvas yeej tseem saib peb muaj nqis.​—Tes Haujlwm 10:34, 35.

7. Muaj pov thawj dabtsi ntxiv tias Yehauvas saib peb rau nqi?

⁷ Tseem muaj lwm yam qhia ntxiv tias Yehauvas saib peb rau nqi thiab. Yehauvas coj peb los paub nws. (Yauhas 6:44) Nws zoo siab heev thaum peb txais yuav nws txoj xov zoo. Thaum peb txav ze Yehauvas nws yuav txav los ze peb. (Yakaunpaus 4:8) Nws siv sijhawm thiab siv dag siv zog cob qhia peb. Nws paub tias peb zoo li cas thiab muaj peevxwm npaum li cas. Thiab nws qhuab ntuas peb los yog vim nws hlub peb. (Pajlug 3:11, 12) Tej no ua pov thawj tias peb yeej muaj nqis heev rau Yehauvas tiag!

8. Cov lus hauv Phau Ntawv Nkauj 18:27-29 pab tau peb li cas thaum peb raug teeb meem?

⁸ Muaj ib co xav tias Vajntxwv Daviv tsis tsim nuj nqis dabtsi tiamsis Yehauvas tsis xav li ntawd. Nws hlub thiab txhawb Daviv. Vim Daviv paub tias Yehauvas hlub nws, Daviv thiaj uv taus thaum nws raug teeb meem. (2 Xamuyees 16:5-7) Thaum peb muaj kev txom nyem nyuaj siab lossis raug teeb meem Yehauvas yuav pab peb hloov peb txojkev xav kom peb nyiaj taus. (Nyeem Phau Ntawv Nkauj 18:27-29.) Yog peb muaj Yehauvas pab ces peb yuav zoo siab hlo teev tiam Yehauvas, tsis muaj ib yam dabtsi yuav cheem tau peb. (Loos 8:31) Tamsim no cia peb tham txog 3 yam kev nyuaj siab uas yuav ua rau peb xav tias peb tsis muaj nqis dabtsi li, seb Yehauvas yuav pab peb li cas.

9. Thaum peb muaj mob ua rau peb xav li cas?

⁹ Thaum peb muaj mob yeej ua rau peb ntxhov siab kawg thiab xav tias peb ua tsis tau dabtsi li lawm. Thaum luag pom tias peb muaj ib tug mob lossis peb yuav tsum tos lwm tus pab peb lawm xwb, yuav ua rau peb txaj muag. Txawm tias luag tsis paub txog peb tus  mob los tej zaum peb tseem txaj muag rau qhov peb ua tsis taus npaum li qub lawm. Thaum muaj li no Yehauvas txhawb peb lub zog li cas?

10. Pajlug 12:25 pab tau peb li cas thaum peb muaj ib tug mob?

¹⁰ Thaum peb muaj ib tug mob, ‘tej lus zoo yuav txhawb tau peb lub zog.’ (Nyeem Pajlug 12:25.) Yehauvas muab nws tej lus txhawb zog sau cia rau hauv phau Vajlugkub kom peb paub tias txawm peb muaj mob los peb tseem muaj nqis rau nws. (Phau Ntawv Nkauj 31:19; 41:3) Yog peb muab tej nqi Vajlugkub no coj los nyeem tag nyeem dua ces Yehauvas yuav pab tau kom peb tsis txhob txhawj txhawj txog peb tus mob.

11. Yehauvas pab ib tug kwvtij li cas?

¹¹ Muaj ib tug kwvtij hu ua Hohej (Jorge) uas thaum nws tseem hluas, nws muaj ib tug mob uas ua rau nws lub zog ntaug zuj zus. Nws xav tias nws tsis muaj nqis dabtsi li lawm. Nws hais tias, “Kuv tus mob ua rau kuv txaj muag heev rau qhov neeg pheej ntsia ntsia kuv. Thaum kuv tsis taus zuj zus, kuv xav txog kuv lub neej thaum twg mas ua rau kuv qaug zog thaum ntawd. Kuv thiaj thov Yehauvas pab.” Yehauvas pab Hohej li cas? Hohej hais tias, “Kuv tsis qab siab nyeem Vajlugkub vim kuv pheej xav txog kuv tus mob, kuv tsuas nyeem ob peb nqi hauv Phau Ntawv Nkauj uas qhia tias Yehauvas mob siab txog nws cov tub qhe xwb. Tiamsis thaum kuv niaj hnub muab cov nqi Vajlugkub no coj los nyeem pab tau kuv kawg li. Tsis ntev xwb, luag pom tias kuv cus plaws thiab muaj ntsej muag luag ntxhi tuaj. Lawv hais tias txhawb tau lawv lub zog kawg li. Yehauvas teb kuv tej lus thov. Nws pab kuv hloov kuv txojkev xav ntawm kuv tus kheej. Nimno kuv tsuas xav txog Vajtswv Txojlus uas hais tias Vajtswv yeej hlub kuv txawm tias kuv muaj ib tug mob.”

12. Yog koj ntoog ib tug mob, yuav ua li cas koj thiaj tau kev pab los ntawm Yehauvas?

 ¹² Yog tias koj niaj hnub ntoog ib tug mob, nco ntsoov tias Yehauvas paub txog koj tej kev nyuaj siab. Yog li ntawd, thov Yehauvas pab koj xav mus rau qhov zoo xwb. Tom qab ntawd, mus nyeem tej nqi Vajlugkub txhawb siab thiab tej nqi uas qhia tias Yehauvas saib nws cov tub qhe rau nqi. Yog koj ua li no ces koj yuav pom tias Yehauvas yeej ua zoo rau txhua tus uas muaj siab teev tiam nws.​—Phau Ntawv Nkauj 84:11.

13. Yog ib tug txiv tsev poob haujlwm lawd yuav ua rau nws xav li cas?

¹³ Txhua tus txiv tsev yeej xav khwv los yug lawv tsev neeg. Piv xam tias ib tug kwvtij tsis tau ua txhaum dabtsi li ho poob nws txoj haujlwm lawm. Nws sib zog nrhiav npaum li cas los nrhiav tsis tau ib txoj haujlwm tshiab. Tej zaum nws yuav xav tias nws tsis tsim nuj nqis dabtsi li. Tiamsis yog nws xav ntsoov txog Yehauvas tej lus cog tseg yuav pab tau nws li cas?

14. Vim li cas Yehauvas thiaj yuav ua raws li nws tej lus cog tseg lawm?

¹⁴ Yehauvas yeej ua raws li nws cog tseg. (Yausuas 21:45; 23:14) Nws yeej tsis pub kom nws poob koob poob npe. Yehauvas cog lus lawm tias nws yuav saib xyuas nws cov tub qhe uas muab siab npuab nws ces nws yeej yuav ua li ntawd. (Phau Ntawv Nkauj 31:1-3) Tsis tas li ntawd xwb, peb yog Yehauvas tsev neeg, nws paub tias yog nws tsis saib xyuas peb ces peb yuav tu siab rau nws. Yehauvas cog lus tias nws yuav muab txhua yam uas peb cheem tsum rau peb thiab pab kom peb muaj siab teev tiam nws. Nws yeej yuav ua raws li nws tej lus cog tseg ntawd!​—Mathais 6:30-33; 24:45.

15. (1) Cov Khixatia thawj 100 xyoo raug teeb meem li cas? (2) Phau Ntawv Nkauj 37:18, 19 pab peb tso siab li cas?

 ¹⁵ Thaum peb paub tias Yehauvas yeej yuav ua raws li nws tej lus cog tseg, ces thaum peb txom nyem nyiaj txiag los peb tsis txhawj. Zoo ib yam li cov Khixatia nyob thawj 100 xyoo. Thaum lub koom txoos hauv Yeluxalees raug kev tsim txom, “tsuas tshuav cov timthawj [lossis cov tubtxib] thiaj tsis khiav xwb.” (Tes Haujlwm 8:1) Qhov no ua rau cov Khixatia txom nyem nyiaj txiag kev noj kev haus rau qhov lawv poob vaj poob tse poob lag poob luam. Txawm li ntawd los, Yehauvas tsis tso lawv tseg thiab lawv tseem muaj kev zoo siab. (Tes Haujlwm 8:4; Henplais 13:5, 6; Yakaunpaus 1:2, 3) Yehauvas yeej yuav pab peb ib yam li nws pab cov Khixatia yav thaud uas muab siab npuab nws.​—Nyeem Phau Ntawv Nkauj 37:18, 19.

16. Dabtsi yuav ua rau peb xav tias peb txojkev pe hawm rau Yehauvas tsis muaj nqis lawm?

¹⁶ Thaum peb laus zuj zus lawd, peb yuav xav tias peb ua tsis tau dabtsi rau Yehauvas lawm. Tej zaum thaum Vajntxwv Daviv laus lawm, nws kuj xav li no thiab. (Phau Ntawv Nkauj 71:9) Yehauvas yuav pab tau peb li cas?

17. Tus muam Ntsias Lis tus qauv pab tau peb li cas?

¹⁷ Muaj ib tug muam hu ua Ntsias Lis (Jheri). Cov kwvtij caw nws mus kawm kho vaj kho tsev tom Tsev Nceeg Vaj. Tiamsis Ntsias Lis tsis xav mus. Nws hais tias: “Kuv laus lawm. Kuv yog ib tug poj ntsuam thiab kuv twb tsis paub ua vaj tse dabtsi li. Yehauvas yeej siv tsis tau kuv.” Hmo ua ntej yuav mus kawm kho vaj kho tsev, Ntsias Lis qhib siab hlo thov Yehauvas. Thaum nws mus txog tom Tsev Nceeg Vaj nws tseem xav hais tias nws tuaj ua dabtsi ntawd. Thaum lawv muaj  kev sib txoos, ib tug kwvtij hais tias qhov tseem ceeb tshaj tsis yog qhov uas peb txawj ib yam dabtsi tiamsis yog qhov uas peb zoo siab hlo cia Yehauvas ua tus qhia peb. Ntsias Lis hais tias: “Kuv txawm xav tias, ‘Kuv ua tau li ntawd!’ Ces kuv txawm pib los kua muag rau qhov Yehauvas teb kuv cov lus thov lawm. Yehauvas pab kuv pom tias kuv tseem ua tau yam puav rau nws thiab. Yehauvas tseem zoo siab hlo qhia kuv ua nws tes haujlwm ntxiv.” Ntsias Lis hais ntxiv tias: “Thaum kuv mus qhov kev kawm no kuv ntshai thiab qaug zog kawg. Tiamsis thaum kuv tawm los kuv tsis ntshai thiab tsis qaug zog lawm. Kuv paub tias kuv tseem muaj nqis heev rau Yehauvas.”

18. Phau Vajlugkub qhia tias txawm peb laus lawm los Yehauvas tseem saib peb tes haujlwm muaj nqis li cas?

¹⁸ Txawm peb laus lawm los, peb cia siab tau tias Yehauvas tseem yuav muab haujlwm rau peb ua. (Phau Ntawv Nkauj 92:12-15) Yexus qhia rau peb tias txawm peb ua tsis taus npaum li qub thiab tsuas ua tau me me xwb los Yehauvas yeej saib tej uas peb ua tau muaj nqis. (Lukas 21:2-4) Yog li ntawd, xav txog tej uas koj ua tau xwb. Xws li, nrog lwm tus tham txog Yehauvas, thov Yehauvas pab koj cov kwvtij nkauj muam, thiab txhawb cov kwvtij nkauj muam kom muab siab rau ntseeg. Tsis yog qhov uas koj txawj txawj es Yehauvas thiaj cia koj ua haujlwm nrog nws tiamsis yog qhov uas koj mloog nws lus thiab ua li nws hais.​—1 Kauleethaus 3:5-9.

19. Loos 8:38, 39 txhawb tau peb lub zog li cas?

¹⁹ Peb zoo siab heev uas peb teev tiam Vajtswv Yehauvas. Nws saib cov uas teev tiam nws muaj nqis heev. Nws tsim peb los ua nws tes haujlwm thiab txojkev pe hawm tseeb pab kom peb txaus siab rau peb lub neej. (Tshwmsim 4:11) Txawm lub qab ntuj no saib peb tsis tsim nuj nqis dabtsi los Yehauvas saib peb rau nqi. (Henplais 11:16, 38) Thaum peb qaug zog vim peb muaj mob muaj nkeeg, txom nyem nyiaj txiag, lossis laus lawm los peb yuav tsum nco ntsoov tias yeej tsis muaj ib yam dabtsi yuav cais tau peb ntawm peb Leej Txiv Yehauvas txojkev hlub.​—Nyeem Loos 8:38, 39.