1. Ua li cas rau ib tug kwvtij thaum nws hnov zaj lus qhuab qhia uas Kwvtij Yauxej Luthafaw cev hauv ib lub rooj sib txoos xyoo 1935?

MUAJ ib tse neeg uas yog Cov Tub Kawm Vajlugkub uas nimno peb hu ua Yehauvas Cov Timkhawv. Lawv muaj 3 tug tub thiab 2 tug ntxhais puavleej teev tiam Yehauvas thiab xyaum ua li Yexus Khetos. Ib tug tub ua kevcai raus dej xyoo 1926 thaum nws muaj 18 xyoo. Nws noj lub ncuav thiab haus khob cawv ib yam li Cov Tub Kawm Vajlugkub thaum ub niaj xyoo ua rau hmo lawv ua tus Tswv Pluas Hmo. Tiamsis xyoo 1935, Yauxej Luthafaw (Joseph F. Rutherford) cev zaj lus qhuab qhia hu ua “Pab Neeg Coob Coob” (The Great Multitude) hauv ib lub rooj sib txoos hauv tebchaws U.S.A. ua rau tus kwvtij no hloov nws txojkev cia siab. Yog li, zaj lub qhuab qhia no tham txog dabtsi?

2. Kwvtij Yauxej zaj lus qhuab qhia hais txog dabtsi?

² Kwvtij Yauxej qhia tias “pab neeg coob coob” (Txojlus Txhais Tshiab) lossis cov “neeg coob coob suav tsis txheeb li” hauv Tshwmsim 7:9 yog hais txog leejtwg. Ua ntej ntawd, Cov Tub Kawm Vajlugkub xav tias pab neeg coob coob no yuav mus saum ntuj tsuas yog lawv tsis muaj kev ntseeg npaum li cov xaiv tseg xwb. Tiamsis Kwvtij Yauxej muab Vajtswv Txojlus los qhia tias pab neeg coob coob yog cov uas yuav dim thaum muaj kev ceeblaj txom nyem loj kawg li thiab yuav nyob mus ib txhis hauv ntiajteb. (Tshwmsim 7:14;  Mathais 25:31-33, 46) Cov no yog lwm pab yaj * uas Yexus hais tias: “Kuv muaj dua ib pab yaj uas tsis nyob hauv lub nkuaj no. Kuv yuav tsum mus coj lawv los rau hauv lub nkuaj no; lawv yuav mloog kuv lub suab, thiab lawv yuav los ua ib pab koom ib tug tswv xwb.” (Yauhas 10:16) Cia peb kawm seb Kwvtij Yauxej zaj lus qhuab qhia no hloov Yehauvas cov neeg thiab tus kwvtij uas muaj 18 xyoo txojkev cia siab li cas.​—Phau Ntawv Nkauj 97:11; Pajlug 4:18.

3-4. Ntawm lub rooj sib txoos xyoo 1935, coob tus muaj kev cia siab li cas thiab vim li cas lawv ho paub li ntawd?

³ Thaum Kwvtij Yauxej hais rau sawvdaws tias: “Cov uas muaj kev cia siab tias nej yuav nyob hauv ntiajteb no, thov nej sawv.” Ib tug kwvtij hais tias nws pom li ib nrab ntau ntawm 20,000 leej uas tuaj koom lub rooj sib txoos no sawv ntsug. Kwvtij Yauxej hais ntxiv tias: “Saib pab neeg coob coob no!” Sawvdaws txawm npuaj teg thiab qw zoo siab hlo. Cov uas sawv ntsug to taub lawm tias Yehauvas lub hwj huam dawb huv tsis xaiv lawv mus nyob saum ntuj. Hnub tom qab xwb, muaj 840 leej ua kevcai raus dej. Lawv feem coob yog lwm pab yaj.

⁴ Tom qab zaj lus qhuab qhia no tus kwvtij thiab coob tus tso tseg tsis noj lub ncuav thiab tsis haus khob cawv rau tus Tswv Pluas Hmo lawm. Ib tug kwvtij hais tias: “Hmo ua kevcai nco txog Yexus xyoo 1935 yog hmo kawg uas kuv noj lub ncuav thiab haus khob cawv vim kuv paub tias Yehauvas lub hwj huam dawb huv tsis tau xaiv kuv mus nyob saum ntuj. Kuv muaj kev cia siab tias kuv yuav nyob hauv ntiajteb no thiab pab kho lub ntiajteb ua ib lub vaj kaj siab.” Muaj coob tus kuj xav ib yam li nws thiab. (Loos 8:16, 17; 2 Kauleethaus 1:21, 22) Txij thaum ntawd los pab neeg coob coob muaj ntau zuj zus tuaj thiab lawv kub siab lug ua haujlwm nrog cov xaiv tseg uas tseem muaj sia nyob hauv ntiajteb no.

5. Yehauvas xav li cas txog cov uas tso tseg tsis noj lub ncuav thiab haus khob cawv rau hmo ua kevcai nco txog Yexus lawm?

⁵ Yehauvas xav li cas txog cov uas tso tseg tsis noj lub ncuav thiab haus khob cawv tom qab xyoo 1935? Thiab Yehauvas xav li cas txog cov Timkhawv uas ib txwm noj lub ncuav thiab haus khob cawv tiamsis nimno ho tso tseg lawm vim lawv paub tias lub hwj huam dawb huv tsis tau xaiv lawv mus nyob saum ntuj? (1 Kauleethaus 11:28) Yehauvas yeej tseem yuav lawv ua lwm pab yaj yog lawv lees tias lawv xav yuam kev lawm, lawv tso tseg tsis noj lub ncuav thiab haus khob cawv, thiab tseem teev tiam Yehauvas li qub. Txawm lawv tsis noj lub ncuav thiab haus khob cawv los lawv tseem tuaj koom hmo ua kevcai nco txog Yexus vim lawv ris Yehauvas thiab Yexus txiaj ntsig.

6. Yexus sam hwm kom cov tubtxib saum ntuj ua dabtsi?

⁶ Kev ceeblaj txom nyem loj kawg li twb los yuav txog. Yog li ntawd zoo rau peb kawm seb Tshwmsim tshooj 7 hais li cas txog cov xaiv tseg thiab pab neeg coob coob uas yog lwm pab yaj. Yexus sam hwm kom cov tubtxib saum ntuj txwv tsis pub cua ntsawj plaub ceg kaum ntuj tuaj rau lub ntiajteb  mus txog thaum Yexus thiab cov tubtxib saum ntuj nias hom thawj tag rau cov xaiv tseg. Cov no yog cov uas muab siab npuab Yehauvas uas Yehauvas pom zoo. (Tshwmsim 7:1-4) Cov xaiv tseg yuav mus ua vajntxwv thiab ua pov thawj nrog Yexus Khetos saum ntuj. (Tshwmsim 20:6) Yehauvas, Yexus, thiab cov tubtxib saum ntuj yuav zoo siab heev thaum lawv pom 144,000 tus xaiv tseg mus tas saum ntuj.

7. Yauhas pom leejtwg hauv Tshwmsim 7:9, 10 thiab lawv ua dabtsi? (Saib daim duab ntawm lub khaum.)

⁷ Tom qab Yauhas qhia txog 144,000 tus vajntxwv thiab pov thawj ces nws txawm pom ib pab “neeg coob coob suav tsis txheeb li” uas dim Amankedoos. Pab no coob tshaj cov 144,000 tus xaiv tseg. (Nyeem Tshwmsim 7:9, 10.) Pab neeg coob coob no hnav “ris tsho dawb.” Qhov no qhia tias lawv tsis “mus nrog neeg ntiajteb ua phem ua qias” thiab lawv muab siab npuab Vajtswv thiab Khetos. (Yakaunpaus 1:27) Lawv qw nrov nrov tias Yehauvas thiab Yexus cawm lawv dim lawm. Lawv kuj tuav ib daim nplooj toov laj uas qhia tias lawv zoo siab txais yuav Yexus uas yog tus Vajntxwv uas Yehauvas tsa los kav lawv.​—Muab piv rau Yauhas 12:12, 13.

8. Tshwmsim 7:11, 12 qhia li cas txog Yehauvas tsev neeg uas nyob saum ntuj?

⁸ Nyeem Tshwmsim 7:11, 12. Cov uas nyob saum ntuj ua li cas xwb thaum lawv pom pab neeg coob coob dim kev ceeblaj txom nyem loj kawg li? Yauhas pom lawv zoo siab heev thiab tsa suab hlo qhuas Vajtswv.

9. Raws li Tshwmsim 7:13-15, pab neeg coob coob ua dabtsi tamsim no?

⁹ Nyeem Tshwmsim 7:13-15. Yauhas hais tias pab neeg coob coob “twb muab tus menyuam Yaj cov ntshav ntxhua lawv tej ris tsho thiab ntxuav lawv dawbhuv lawm.” Qhov no txhais tias lawv yog neeg ncaj ncees thiab lawv ua haum Yehauvas siab. (Yaxayas 1:18) Lawv yog cov uas ua kevcai raus dej lawm, lawv ntseeg Yexus tus nqi txhiv thiab muaj kev sib raug zoo nrog Yehauvas. (Yauhas 3:36; 1 Petus 3:21) Vajtswv thiaj txaus siab rau lawv thiab cia lawv pe hawm nws “tas hnub tas hmo” hauv ntiajteb no. Vim Vajtswv lub Nceeg Vaj yog yam uas tseem ceeb tshaj rau lawv, lawv thiaj kub siab lug tshaj tawm txoj xov zoo txog Vajtswv lub Nceeg Vaj thiab rau siab ntso mus coj tibneeg los ua Yexus cov thwjtim.​—Mathais 6:33; 24:14; 28:19, 20.

10. (1) Pab neeg coob coob tso siab li cas? (2) Lawv yuav pom cov lus cog tseg twg muaj tiav?

¹⁰ Pab neeg coob coob uas dim kev ceeblaj txom nyem loj kawg li tso siab tias Vajtswv yeej yuav nrog nraim lawv rau qhov “tus uas zaum saum lub zwmtxwv yuav nrog lawv nyob thiab tsomkwm lawv.” Lawv yuav pom muaj tiav li cov lus cog tseg no hais: “[Vajtswv] yuav so lawv tej kua muag huv tibsi mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm.”​—Tshwmsim 21:3, 4.

11-12. (1) Raws li Tshwmsim 7:16, 17 pab neeg coob coob yuav tau txais koob hmoov li cas? (2) Thaum cov uas yog lwm pab yaj mus koom hmo ua kevcai nco txog Yexus yog lawv ua dabtsi?

¹¹ Nyeem Tshwmsim 7:16, 17. Niaj hnub nimno Yehauvas cov neeg ib txhia raug kev txom nyem vim lawv tsis muaj noj muaj haus lossis lub tebchaws lawv nyob muaj kev tsov kev rog. Muaj ib txhia raug kaw vim lawv txojkev ntseeg. Tiamsis pab neeg coob coob zoo siab heev vim lawv paub tias tom qab Vajtswv rhuav tshem Xatas lub qab ntuj, lawv yuav muaj zaub muaj mov nplua mias  thiab Yehauvas yuav qhia lawv txog ntau yam tshiab. Thaum Yehauvas rhuav tshem Xatas lub qab ntuj nws yuav tsis pub pab neeg coob coob raug nws txojkev npau taws. Thaum kev ceeblaj txom nyem loj kawg li dhau lawm Yexus yuav coj lawv mus rau “tej qhovdej txhawv uas cawm neeg txojsia [mus ib txhis].” Pab neeg coob coob yog cov dim Amankedoos thiab yuav tsis ntsib kev ploj kev tuag li yog lawv mloog Yehauvas lus.​—Yauhas 11:26.

¹² Cov uas yog lwm pab yaj ua Yehauvas thiab Yexus tsaug uas lawv yuav tau nyob hauv ntiajteb no mus ib txhis. Txawm hais tias lawv tsis tau mus saum ntuj los Yehauvas yeej tseem hlub lawv ib yam li cov xaiv tseg thiab. Cov xaiv tseg thiab lwm pab yaj qhuas Vajtswv thiab Yexus Khetos nkawd thaum lawv mus koom tus Tswv Pluas Hmo.

13-14. Vim li cas cov xaiv tseg uas tseem nyob hauv ntiajteb no thiab cov uas yog lwm pab yaj yuav tsum koom hmo ua kevcai nco txog Yexus?

¹³ Tau ob peb xyoos no cov uas mus koom hmo ua kevcai nco txog Yexus tsuas muaj tus puav noj lub ncuav thiab haus khob cawv xwb. Cov koom txoos feem ntau tsis muaj cov noj lub ncuav thiab haus khob cawv. Cov uas tuaj koom feem coob yog cov uas yuav nyob hauv ntiajteb no. Ua cas lawv ho mus koom? Muab piv xam li no: Thaum peb mus koom ib rooj tshoob twb yog peb mus txhawb tus nkauj nyab thiab nraug vauv xwb. Zoo ib yam li ntawd, thaum cov uas yog lwm pab yaj mus koom hmo ua kevcai nco txog Yexus twb yog lawv mus txhawb Khetos thiab cov xaiv tseg. Lawv kuj ris Yexus txiaj ntsig rau qhov uas nws tuag theej lawv lub txhoj, lawv thiaj tau txojsia ib txhis nyob hauv ntiajteb no.

¹⁴ Cov uas yog lwm pab yaj kuj mus koom hmo ua kevcai nco txog Yexus vim lawv ua li Yexus sam hwm thiab. Thawj zaug uas Yexus ua txoj kevcai no nws hais rau nws cov tubtxib hais tias: “Nej ua li no nej thiaj yuav nco ntsoov kuv.” (1 Kauleethaus 11:23-26) Cov uas yog lwm pab yaj caw sawvdaws mus koom tus Tswv Pluas Hmo nrog lawv. Lawv yuav ua li no mus txog thaum tsis muaj cov xaiv tseg hauv ntiajteb no lawm.

15. Hmo ua kevcai nco txog Yexus peb yuav qhuas Vajtswv thiab Yexus Khetos li cas?

 ¹⁵ Hmo ua kevcai nco txog Yexus, peb hu nkauj qhuas Vajtswv thiab Yexus Khetos thiab peb thov Vajtswv ua ke. “Ris Vajtswv Thiab Yexus Nkawd Txiaj Ntsig” yog lub ntsiab lus uas peb yuav tham rau hmo ntawd. Zaj lus qhuab qhia no yuav pab kom peb haj yam ris Yehauvas thiab Yexus txiaj ntsig. Thaum cov kwvtij muab cov ncuav thiab khob cawv cev los rau peb, yuav ua rau peb nco tias cov no piv txog Yexus lub cev thiab nws cov ntshav. Thiab peb yuav nco txog qhov uas Yehauvas xa nws tus Tub los tuag this peb. (Mathais 20:28) Cov uas hlub peb Leej Txiv Yehauvas thiab nws Leej Tub Yexus yuav mus koom hmo ua kevcai nco txog Yexus.

16. Cov xaiv tseg thiab lwm pab yaj zoo li cas rau Yehauvas?

¹⁶ Cov xaiv tseg thiab lwm pab yaj muaj nqis ib yam nkaus rau Yehauvas. Peb paub li no vim rau qhov Yehauvas them tib tug nqi rau cov xaiv tseg thiab lwm pab yaj. Nws xa nws tus Tub uas nws hlub los tuag this peb sawvdaws. Qhov txawv ces tsuas yog qhov uas cov xaiv tseg yuav mus saum ntuj thiab cov uas yog lwm pab yaj yuav nyob hauv ntiajteb no xwb. Tiamsis lawv sawvdaws yuav tsum muab siab npuab Vajtswv thiab Yexus Khetos. (Phau Ntawv Nkauj 31:23) Nco ntsoov tias txawm peb yog cov xaiv tseg los yog lwm pab yaj los Yehauvas muab nws lub hwj huam dawb huv rau peb sawvdaws raws li peb cheem tsum.

17. Cov xaiv tseg uas tseem muaj sia nyob hauv ntiajteb no tos ntsoov lub sijhawm twg?

¹⁷ Cov xaiv tseg tsis yog yug los li ntawd. Tiamsis Vajtswv yog tus muab txojkev vam tias lawv yuav mus saum ntuj rau lawv. Lawv ua Vajtswv tsaug rau lawv txojkev vam thiab tos tsis taus mus txog thaum lawv yuav mus nyob saum ntuj. Txawm lawv tsis paub tias lawv lub cev plig yuav zoo li cas los lawv tos ntsoov txog lub sijhawm uas lawv yuav ua lawv lub luag haujlwm saum ntuj thiab nrog Yehauvas, Yexus, cov tubtxib saum ntuj, thiab cov xaiv tseg uas twb nyob saum ntuj lawm ua ke.​—Filipis 3:20, 21; 1 Yauhas 3:2.

18. Cov uas yog lwm pab yaj tos ntsoov lub sijhawm twg?

¹⁸ Peb sawvdaws yeej ntshaw lub neej uas nyob mus ib txhis hauv ntiajteb no. Cov uas yog lwm pab yaj tos ntsoov lub sijhawm ntawd. (Tej Lus Qhia 3:11) Lawv tos tsis taus txog lub sijhawm uas lawv yuav pab kho lub ntiajteb no ua ib lub vaj kaj siab, ua  vaj ua tsev rau lawv nyob, thiab lawv cov menyuam yuav noj qab nyob zoo tsis muaj mob muaj nkeeg. (Yaxayas 65:21-23) Thaum ntawd lawv yuav muaj sijhawm mus ncig xyuas liaj ia tebchaws, toj roob hauv pes, dej hiav txwv, thiab kawm txog ib puas tsav yam uas Yehauvas tsim. Tiamsis qhov uas lawv zoo siab tshaj plaws ces yog qhov uas lawv yuav muaj kev sib raug zoo nrog Yehauvas ntxiv.

19. (1) Hmo ua kevcai nco txog Yexus yog lub sijhawm rau peb ua dabtsi? (2) Xyoo no, peb yuav ua hmo ua kevcai nco txog Yexus rau hnub twg?

¹⁹ Yehauvas cov neeg txhua tus yeej muaj kev vam kev cia siab rau lub neej yav tom hauv ntej. (Yelemis 29:11) Hmo ua kevcai nco txog Yexus txojkev tuag yog ib hmo tshwj xeeb heev rau peb sawvdaws. Yog ib lub sijhawm rau peb los qhuas Vajtswv thiab Yexus Khetos rau tej uas nkawd ua kom peb thiaj tau txojsia nyob mus ib txhis. Xyoo no peb yuav ua kevcai nco txog Yexus rau hnub tim 27 lub 3 Hlis xyoo 2021 tom qab hnub poob. Coob tus yuav tuaj koom tau tsis muaj teeb meem dabtsi li. Txawm muaj ib txhia yuav raug kev tawm tsam los lawv yeej yuav koom kom tau. Hos cov uas raug kaw los lawv yuav ua kevcai nco txog Yexus hauv tsev loj cuj. Yehauvas, Yexus, cov tubtxib saum ntuj, thiab cov xaiv tseg uas twb mus saum ntuj lawm yuav saib ntsoov peb. Thov kom txhua txhua lub koom txoos, txhua pab txhua pawg, thiab txhua leej txhua tus koom kom tau hmo ua kevcai nco txog Yexus xyoo no.