1. Ib yam li Vajntxwv Daviv, muaj tej thaud peb yuav nug Vajtswv li cas?

PEB SAWVDAWS yeej xav kom peb lub neej muaj kev thaj yeeb thiab tsis muaj kev txhawj xeeb dabtsi li. Tiamsis muaj tej thaud peb yuav muaj kev txhawj xeeb ntau heev thiab peb yuav nug Yehauvas ib yam li Vajntxwv Daviv nug no: “Kuv lub siab yuav quaj ntsuag nruab hnub hmo ntuj mus txog hnub twg?”​—Phau Ntawv Nkauj 13:2.

2. Hauv zaj no peb yuav tham txog dabtsi?

² Txawm hais tias peb muaj kev txhawj xeeb ntau yam los muaj tej yam peb ua tau kom peb ua ntsuas txhawj dhau lawm. Hauv zaj no, peb yuav kawm seb dabtsi yuav ua rau peb txhawj thiab peb yuav kawm txog 6 yam uas peb ua tau los pab peb muaj lub siab tus thaum peb muaj teeb meem.

3. Dabtsi yuav ua rau peb txhawj thiab yuav ua li cas peb thiaj tsis txhawj dhau lawm?

³ Muaj ntau yam ua rau peb ntxhov siab thiab muaj tej yam peb cheem tsis tau kom tsis txhob los raug peb. Xws li peb tswj tsis tau nqi zaub nqi mov, nqi vaj nqi tsev, thiab nqi khaub ncaws kom tsis txhob nce. Peb los kuj cheem tsis tau kom cov neeg tom haujlwm thiab tom tsev kawm ntawv tsis txhob los haub ntxias kom peb dag lossis kom peb mus ua nkauj ua nraug. Thiab peb cheem tsis tau kom neeg tsis txhob ua phem hauv peb zej peb zos. Peb muaj tej teeb meem no vim rau qhov peb nyob rau lub qab ntuj uas tibneeg feem coob txojkev xav txawv ntawm phau Vajlugkub. Thiab Xatas yog tus kav cov  neeg hauv ntiajteb no. Nws paub hais tias yog lawv raug kev nyuaj siab ces ib txhia yuav tso tseg tsis teev tiam Yehauvas. (Mathais 13:22; 1 Yauhas 5:19) Twb yog vim li no lub ntiajteb no thiaj muaj kev kub ntxhov thiab kev txhawj xeeb ntau ua luaj.

4. Thaum peb muab peb tej teeb meem txhawj dhau lawm yuav ua li cas rau peb?

⁴ Tej zaum peb muab peb tej teeb meem txhawj dhau lawm ces peb tsis paub xyov yuav ua li cas. Muab ua piv txwv li no, peb yuav txhawj tsam peb khwv tsis tau nyiaj txaus los yuav tej uas peb cheem tsum lossis txhawj tsam peb ho muaj mob es mus ua tsis tau haujlwm lossis poob haujlwm. Tej zaum peb kuj yuav txhawj tias peb puas tseem yuav mloog Vajtswv lus thaum peb raug kev sim siab. Tej zaum peb yuav txhawj tias xyov peb yuav ua li cas thaum cov uas nyob hauv Xatas qab kev tswjhwm tawm tsam peb. Peb yuav xav tias, ‘Puas txhaum rau kuv pheej txhawj txog tej no?’

5. Yexus hais li cas tiag thaum nws hais kom nws cov thwjtim “tsis txhob txhawj”?

⁵ Yexus hais rau nws cov thwjtim tias: “Nej tsis txhob txhawj.” (Mathais 6:25) Puas yog nws hais kom peb tsis txhob txhawj txog ib yam dabtsi li? Tsis yog li ntawd, thaum ub Yehauvas cov tub qhe los yeej muaj kev txhawj xeeb thiab, tiamsis Yehauvas yeej tseem txaus siab rau lawv. * (1 Vajntxwv 19:4; Phau Ntawv Nkauj 6:3) Twb yog Yexus tsis xav kom peb txhawj txog tej uas peb cheem tsum heev dhau es peb tsis muab qhov uas peb teev tiam Yehauvas tso ua ntej hauv peb lub neej lawm. Yog li ntawd, thaum peb muaj kev txhawj xeeb peb yuav ua li cas?​—Mus saib lub ntsiab me “ Ua Li No.”

6. Raws li Filipis 4:6, 7, Yehauvas pab peb muaj lub siab tus li cas?

⁶ (1) Thov Vajtswv tsis tseg. Thaum koj muaj kev txhawj xeeb cia li mus thov Yehauvas pab. (1 Petus 5:7) Yehauvas yuav teb koj tej lus thov. Vajtswv ‘txojkev siab tus uas ntau dhau li neeg nkag siab tau yuav tsom kwm koj lub siab.’ (Nyeem Filipis 4:6, 7, TT. *) Yehauvas lub hwj huam dawb huv yuav pab kom peb muaj lub siab tus.​—Kalatias 5:22.

7. Thaum peb thov Vajtswv, peb yuav thov li cas?

⁷ Thaum koj thov Yehauvas, qhia tag nrho tej uas nyob hauv koj lub siab rau nws. Qhia tias koj tej teeb meem yog dabtsi thiab koj xav li cas. Yog tej yam uas koj xav tias yuav daws tau, thov nws muab lub laj lim tswvyim thiab lub zog pab koj daws. Tiamsis tej uas koj daws tsis tau, thov nws pab kom koj tsis txhob txhawj txhawj. Yog koj qhia ntxaws ntxaws rau Yehauvas tias koj xav kom nws pab koj li cas ces thaum nws teb koj, koj thiaj paub. Tiamsis yog nws tsis teb koj raws li koj siab xav, tsis txhob qaug zog. Nws yeej xav kom koj thov nws tsis tu ncua.​—Lukas 11:8-10.

8. Thaum peb thov Yehauvas, peb yuav thov li cas?

⁸ Thaum koj thov Yehauvas thiab muab koj tej kev txhawj xeeb tso rau nws, nco ntsoov ua nws tsaug. Thiab ua zoo xav txog tej yam zoo uas koj muaj txawm hais tias koj muaj kev nyuaj siab ntau yam. Yog tias muaj tej thaud koj nyuaj siab heev es koj tsis paub piav koj tej kev nyuaj siab rau Yehauvas es koj tsuas hais tias ‘thov pab kuv’ xwb los nws yeej hnov koj  tej lus thov.​—2 Xwmtxheej Vajntxwv 18:31; Loos 8:26.

9. Yog cov Yudas xav muaj kev thaj yeeb tiag, lawv yuav tsum ua li cas?

⁹ (2) Txhob tso siab rau koj tej kev txawj ntse tiamsis tso siab rau Yehauvas. Nyob rau Yaxayas tiam, cov neeg Yudas tsis xav kom cov Axilias kav lawv. Yog li ntawd, thaum lawv ntshai tias cov Axilias yuav tuaj ua rog rau lawv, lawv thiaj li mus cuag cov Iziv uas twb tsis teev tiam Yehauvas pab lawv. (Yaxayas 30:1, 2) Vim cov neeg Yudas tsis tso siab rau Yehauvas, nws thiaj hais rau lawv tias lawv yuav raug kev puastsuaj vim lawv ntxeev siab rau nws. (Yaxayas 30:7, 12, 13) Yehauvas txib Yaxayas mus hais rau nws cov neeg tias yog lawv xav muaj kev thaj yeeb tiag ces lawv yuav tsum “nyob twjywm thiab cia siab rau nws.”​—Yaxayas 30:15.

10. Yog peb tso siab rau Yehauvas, peb yuav ua li cas thaum peb ntsib teeb meem?

¹⁰ Yog peb tso siab rau Yehauvas, peb yuav ua li cas? Muab piv txwv tias yog koj nrhiav tau ib txoj haujlwm uas them nyiaj ntau tiamsis koj yuav tau ua haujlwm ntau thiab tsis muaj sijhawm los teev tiam Yehauvas li qub. Lossis muaj ib tug neeg tom haujlwm hais rau koj tias nws nyiam koj tiamsis nws tsis teev tiam Yehauvas. Lossis ib tug hauv koj tsev neeg hais rau koj tias yog koj tsis tso Yehauvas tseg ces nws yuav tsis lees yuav koj lawm, koj yuav ua li cas? Cov uas hais tas los no yeej tsis yoojyim tiamsis Yehauvas yeej pab tau koj. (Mathais 6:33; 10:37; 1 Kauleethaus 7:39) Qhov tseem ceeb ces seb koj puas ua li Yehauvas hais xwb.

11. Cov qauv twg hauv phau Vajlugkub pab tau peb ua siab tus thaum peb raug luag tawm tsam?

¹¹ (3) Peb kawm tau los ntawm cov qauv zoo thiab cov qauv phem. Vajtswv cov tub qhe hauv phau Vajlugkub cov qauv qhia rau peb tias tseem ceeb heev rau peb muaj lub siab tus thiab tso siab rau Yehauvas. Thaum koj kawm txog lawv cov qauv, ua zoo xyuas seb vim li cas lawv thiaj ua tau lub siab tus thaum lawv raug kev tawm tsam. Thaum cov Yudas tus Povthawj Hlob txwv tsis pub cov tubtxib mus tshaj tawm, lawv tsis ntshai thiab teb ntua tias: “Peb yeej yuav mloog Vajtswv lus heev dua li mloog neeg lus.” (Tes Haujlwm 5:29) Thaum lawv raug nplawm tag los lawv yeej tsis ntshai vim lawv paub tias Yehauvas tuaj lawv tog thiab txaus siab rau lawv. Lawv thiaj rau siab ntso mus tshaj tawm txoj xov zoo. (Tes Haujlwm 5:40-42) Ib yam li cov tubtxib, Xatefanaus ua tau lub siab tus thaum luag yuav muab nws tua. Phau Vajlugkub hais tias thaum ntawd “lawv pom nws lub ntsejmuag ci ib yam li ib tug timtswv ceebtsheej lub.” (Tes Haujlwm 6:12-15) Yog vim li cas? Vim nws paub tias Yehauvas txaus siab rau nws.

12. Raws li 1 Petus 3:14 thiab 4:14, vim li cas thaum peb raug kev tsim txom peb tseem muaj kev zoo siab?

¹² Cov tubtxib thaum ub paub tias Yehauvas nrog nraim lawv rau qhov Yehauvas pub hwjchim rau lawv ua txujci ntau yam. (Tes Haujlwm 5:12-16; 6:8) Tiamsis nimno Yehauvas tsis ua li ntawd rau peb lawm. Txawm li ntawd los Vajtswv Txojlus qhia rau peb tias thaum peb raug kev tsim txom vim peb mloog Yehauvas lus, nws yuav txaus siab rau peb thiab nws lub hwj huam yuav nrog nraim peb. (Nyeem 1 Petus 3:14; 4:14.) Yog li ntawd, tsis txhob txhawj tias yog yav tom hauv ntej peb raug kev tsim txom peb yuav ua li cas. Tiamsis peb yuav tsum ua li peb ua tau tamsim no kom peb tso siab rau Yehauvas tias nws yeej yuav pab peb thiab cawm peb. Ib yam li Yexus cov thwjtim thaum ub, peb yuav tsum tso siab rau Yexus cov lus no: “Kuv yuav pub tswvyim rau nej kom nej txawj hais, nej cov yeebncuab  yuav teb tsis taus nej, thiab nrhiav tsis tau lus rau nej.” Yexus kuj hais ntxiv tias: “Nej yuav tsum ua siab ntev nyiaj tej kev txomnyem, nej thiaj yuav tau txojsia.” (Lukas 21:12-19) Thiab nco ntsoov tias Yehauvas paub ib puas tsav yam txog cov uas muab siab npuab nws. Nws thiaj tsa tau lawv sawv rov qab los.

13. Peb kawm tau li cas los ntawm cov uas tsis nyob twj ywm thiab tsis tso siab rau Yehauvas?

¹³ Peb kuj kawm tau los ntawm cov uas tsis nyob twj ywm thiab tsis tso siab rau Yehauvas. Thaum peb kawm txog lawv cov qauv yuav pab kom peb tsis txhob xyaum ua li lawv. Xws li Vajntxwv Axas, thaum nws nyuam qhuav los ua Vajntxwv kav tebchaws Yudas es muaj ib pab tub rog coob coob tuaj ua rog rau nws, nws tso siab plhuav rau Yehauvas. Yehauvas thiaj ua rau nws yeej. (2 Xwmtxheej Vajntxwv 14:9-12) Tiamsis tom qab no, Vajntxwv Npa-asas uas kav tebchaws Yixalayees coj ib pab tub rog tsawg tsawg tuaj ua rog nrog Axas. Axas txawm nqa nyiaj mus ntiav cov Xilias kom lawv cov tub rog pab nws. Nws tsis tso siab rau Yehauvas li thaum ub lawm. (2 Xwmtxheej Vajntxwv 16:1-3) Thaum nws yuav tuag thiab muaj mob los nws yeej tsis thov Yehauvas pab nws.​—2 Xwmtxheej Vajntxwv 16:12.

14. Peb kawm tau li cas los ntawm qhov uas Axas ua yuam kev?

¹⁴ Thaum Axas pib ua Vajntxwv nws yeej tso siab rau Yehauvas pab nws thaum nws muaj teeb meem. Tiamsis tom qab no nws tso siab rau nws tus kheej lawm xwb, nws tsis thov Yehauvas pab nws lawm. Ntawm tibneeg lub tswvyim xwb ces qhov uas Axas mus cuag cov Xilias pab nws tawm tsam cov Yixalayees yeej ntxim li yog ib lub tswvyim zoo. Tiamsis txawm Axas kov yeej zaum no los tsis kav ntev. Yehauvas tus cev lus hais tias: “Twb tsimnyog koj cia siab rau tus TSWV [“Yehauvas,” NWT ] uas yog koj tus Vajtswv, tiamsis koj ho cia siab rau tus vajntxwv uas kav tebchaws Xilias, vim li ntawd, tus vajntxwv uas kav tebchaws Xilias cov tubrog thiaj khiav dim ntawm koj mus lawm.” (2 Xwmtxheej Vajntxwv 16:7) Peb yuav tsum ceev faj tsis txhob xav tias peb paub daws peb tej teeb meem lawm ces peb tsis tas mus thov Yehauvas pab. Txawm thaum peb muaj ib qho teeb meem ti tes ti taw los, peb yuav tsum ua siab tus thiab thov Yehauvas. Nws yeej yuav pab kom peb paub ua qhov yog.

15. Thaum peb nyeem phau Vajlugkub zoo rau peb ua li cas?

¹⁵ (4) Cim cov nqi Vajlugkub. Thaum koj pom tej nqi Vajlugkub uas pab koj ua tau siab tus thiab cia siab rau Yehauvas, nco ntsoov muab cim tseg. Yog koj muab sau cia thiab niaj hnub coj los nyeem ces yuav pab koj cim tau cov nqi Vajlugkub. Yehauvas hais rau Yausuas tias nws yuav tsum nyeem Vajtswv Txojlus nruab hnub hmo ntuj nws thiaj ua tau txhua yam tiav zoo. Vajtswv Txojlus kuj pab kom Yausuas ua tau siab loj thiab paub coj Vajtswv haiv neeg. (Yausuas 1:8, 9) Muaj ntau nqi Vajlugkub uas yuav pab koj ua tau siab tus thaum koj muaj kev txhawj xeeb lossis ntshai.​—Phau Ntawv Nkauj 27:1-3; Pajlug 3:25, 26.

16. Peb cov kwvtij nkauj muam pab peb ua tau lub siab tus thiab tso siab rau Yehauvas li cas?

¹⁶ (5) Siv sijhawm nrog Vajtswv cov neeg. Yehauvas siv peb cov kwvtij nkauj muam los pab kom peb muaj lub siab tus thiab tso siab rau nws. Lawv txhawb tau peb thaum mus kev sib txoos xws li thaum peb mloog cov kwvtij tej lus qhuab qhia, cov kwvtij nkauj muam tej lus teb, thiab tej peb nrog lawv tham tom Tsev Nceeg Vaj. (Henplais 10:24, 25) Thaum peb qhia peb tej kev nyuaj siab rau cov phoojywg  uas peb ntseeg siab, lawv “tej lus zoo” yuav pab peb ua tau lub siab tus thiab tsis txhawj ua luaj twg lawm.​—Pajlug 12:25.

17. Raws li Henplais 6:19, peb txojkev cia siab rau Vajtswv lub Nceeg Vaj pab peb ua tau siab tus li cas thaum peb muaj teeb meem?

¹⁷ (6) Txhob tag kev cia siab. Peb txojkev cia siab rau Vajtswv lub Nceeg Vaj “zoo ib yam li tus tswg uas muaj hlua khi peb lub siab kom nyob ruaj ruaj” thaum peb muaj teeb meem lossis peb muaj kev txhawj xeeb ntau dhau. (Nyeem Henplais 6:19.) Koj yuav tsis tag kev cia siab yog koj nco ntsoov Yehauvas cov lus cog tseg tias yav tom hauv ntej yuav tsis muaj kev txhawj xeeb. (Yaxayas 65:17) Thiab nyob hauv lub qab ntuj tshiab yuav tsis muaj kev phem li lawm. (Mikhas 4:4) Thaum koj mus qhia lwm tus txog Vajtswv lub qab ntuj tshiab kuj yuav pab kom koj tsis tag kev cia siab thiab. Yog li ntawd, kav tsij rau siab ntso mus tshaj tawm thiab coj tibneeg los ua Yexus cov thwjtim. Yog koj ua li ntawd ces koj yuav tsis tag kev cia siab thiab koj yuav “muab siab npuab Vajtswv mus txog hnub kawg.”​—Henplais 6:11.

18. Lub sijhawm kawg no peb yuav ntsib dabtsi, thiab peb yuav ua li cas?

¹⁸ Rau qhov peb nyob rau lub caij uas lub sijhawm kawg twb los yuav txog ces peb yeej yuav ntsib tej teeb meem uas ua rau peb txhawj ntau zuj zus. Peb nqi Vajlugkub rau xyoo 2021 yuav pab peb muaj lub siab tus thaum peb ntsib teeb meem vim peb tso siab plhuav rau Yehauvas. Yog li ntawd, lub xyoo yuav los no cia txhua tsav txhua yam uas peb ua qhia tias peb tso siab rau Yehauvas lo lus cog tseg no: “Nyob twjywm thiab cia siab rau kuv, nej thiaj yuav muaj zog.”​—Yaxayas 30:15.