1-2. Raws li Mathais 5:11, peb yuav ua li cas thaum peb ntsib kev nyuaj siab?

YEXUS cog lus hais tias nws cov thwjtim yuav muaj kev zoo siab xyiv fab. Tiamsis nws kuj qhia lawv tias lawv yuav raug tawm tsam thiab. (Mathais 10:22, 23; Lukas 6:20-23) Peb zoo siab tias peb yog Yexus Khetos cov thwjtim. Tiamsis peb yuav ua li cas thaum peb tsev neeg tawm tsam peb, cov nom tswv tsim txom peb, cov neeg tom haujlwm lossis tom tsev kawm ntawv yaum kom peb mus ua tej yam tsis zoo? Yog muaj li no ces tej zaum yuav ua rau peb ntxhov siab.

² Thaum yus muaj kev nyuaj siab yus yeej tsis zoo siab. Tiamsis Yakaunpaus sau tias kom peb cia li zoo siab thaum peb raug kev nyuaj siab. (Yakaunpaus 1:2, 12) Thiab Yexus hais tias thaum luag thuam thiab tsim txom peb, peb tau koob hmoov. (Nyeem Mathais 5:11.) Yuav ua li cas peb thiaj muaj kev zoo siab thaum peb raug kev nyuaj siab? Cia peb kawm txog qho yam hauv Yakaunpaus tsab ntawv seb nws hais li cas rau cov Khixatia thaum ub. Tiamsis ua ntej ntawd cia peb tham seb lawv raug kev nyuaj siab li cas.

3. Cov Khixatia ntsib teeb meem li cas tsis ntev tom qab Yakaunpaus los ua Yexus ib tug thwjtim?

³ Tsis ntev tom qab Yexus tus kwv Yakaunpaus los ua ib tug thwjtim, cov Khixatia hauv Yeluxalees pib raug kev tawm tsam. (Tes Haujlwm 1:14; 5:17, 18) Thaum Xatefanaus raug tua, cov Khixatia coob tus khiav tawm Yeluxalees “mus nyob txhua lub zos hauv lub xeev Yudas thiab lub xeev Xamalis” mus txog ntua koog Povtxwv Xaipas thiab lub nroog Ati-aukias. (Tes Haujlwm 7:58–8:1; 11:19) Txawm Yexus cov thwjtim raug kev nyuaj siab ntau yam los lawv yeej tseem mus tshaj tawm txoj xov zoo tsis tseg, thiaj muaj neeg coob los ntseeg thiab pawg ntseeg  thiaj huaj vam coob zuj zus tuaj. (1 Petus 1:1) Tom qab ntawd los lawv haj tseem ntsib teeb meem ntau yam thiab.

4. Cov Khixatia thaum ub ntsib teeb meem zoo li cas?

⁴ Cov Khixatia thaum ub ntsib ntau yam teeb meem. Kwv lam li xyoo 50, Vajntxwv Kalaudi-us ntiab cov Yudais tawm hauv lub nroog Loos mus. Cov Yudais uas los ua Yexus cov thwjtim yuav tau tsiv mus nyob rau lwm qhov thiab tso lawv tej vaj tse tseg. (Tes Haujlwm 18:1-3) Kwv lam li xyoo 61, tus tubtxib Paulus sau tias cov Khixatia raug luag thuam thiab tsim txom tab meeg sawvdaws, lawv raug kaw, thiab raug neeg huab lawv tej cuab yeej cuab tam. (Henplais 10:32-34) Lawv ib txhia raug kev txom nyem thiab muaj mob muaj nkeeg.​—Loos 15:26; Filipis 2:25-27.

5. Peb yuav teb cov lus nug twg?

⁵ Ua ntej xyoo 62, thaum Yakaunpaus sau nws tsab ntawv nws yeej paub zoo txog tej uas cov kwvtij nkauj muam raug. Yehauvas tshoov kom Yakaunpaus sau ntawv mus pab cov Khixatia kom lawv muaj kev zoo siab txawm hais tias lawv ntsib ntau yam teeb meem. Yakaunpaus tsab ntawv yuav teb cov lus nug no: Yakaunpaus sau txog kev zoo siab dabtsi? Dabtsi yuav ua rau cov Khixatia tsis muaj kev zoo siab? Thiab vim li cas peb yuav tsum muaj tswvyim, muaj kev ntseeg, thiab ua siab loj peb thiaj muaj kev zoo siab thaum peb ntsib teeb meem?

6. Raws li Lukas 6:22, 23, vim li cas ib tug Khixatia thiaj muaj kev zoo siab xyiv fab txawm nws raug kev nyuaj siab?

⁶ Peb ua neej nyob peb yeej xav muaj xwb tsis xav pluag xav ciaj xwb tsis xav tuag. Peb  yeej xav kom peb tsev neeg muaj kev zoo siab thiab nyob sib haum xeeb. Tiamsis txojkev zoo siab uas Yakaunpaus sau txog yog los ntawm Vajtswv lub hwj huam dawb huv los tsis yog los ntawm tej uas peb muaj. (Kalatias 5:22) Tus Khixatia muaj kev zoo siab xyiv fab rau qhov nws xyaum ua li Yexus ua thiab nws paub tias nws ua haum Yehauvas siab. (Nyeem Lukas 6:22, 23; Kaulauxais 1:10, 11) Peb txojkev zoo siab ces zoo tam li tus nplaim cig hauv lub teeb. Txawm los nag thiab muaj cua ntsawj los nws tsis tuag. Txawm peb muaj mob muaj nkeeg lossis tsis muaj txaus noj txaus siv los peb tsis tas kev cia siab. Thaum luag thuam peb thiab peb tsev neeg lossis lwm tus tawm tsam peb los peb yeej tseem muaj kev zoo siab. Txhua zaus uas luag xav ua kom peb tag kev cia siab, peb haj yam muaj kev zoo siab. Tej kev nyuaj siab uas peb raug vim peb txojkev ntseeg qhia meej tias peb yeej yog Yexus Khetos cov thwjtim tiag. (Mathais 10:22; 24:9; Yauhas 15:20) Twb yog vim li no Yakaunpaus thiaj sau hais tias: “Cia li zoo siab cov kwvtij, thaum nej raug ntau yam kev nyuaj siab.”​—Yakaunpaus 1:2, NWT.

7-8. Vim li cas peb txojkev ntseeg haj yam ruaj khov tuaj thaum peb raug kev nyuaj siab?

⁷ Yakaunpaus hais tias: “Yog nej ua siab ntev nyiaj tej kev nyuaj siab, ces tej ntawd yuav ua rau nej muab siab rau ntseeg ntxiv.” (Yakaunpaus 1:3) Tej kev nyuaj siab uas peb raug zoo ib yam li cov hluav taws ceem hniav ntaj hniav riam. Tus hniav ntaj hniav riam uas muab hlawv kub kub tag, thaum txias lawm yuav ruaj dua qub. Zoo ib yam li ntawd, thaum peb nyiaj taus peb tej kev nyuaj siab peb txojkev ntseeg yuav haj yam ruaj khov tuaj. Yakaunpaus thiaj hais ntxiv tias: “Nej yuav tsum ua siab ntev mus li tsis txhob tso tseg, nej thiaj yuav ua tau neeg zoo kawg nkaus, tsis muaj ib qho uas lwm tus yuav thuam tau.” (Yakaunpaus 1:4) Thaum peb pom tias peb tej kev nyuaj siab ua rau peb txojkev ntseeg ruaj khov tuaj ces peb yuav ua taus siab ntev thev.

⁸ Yakaunpaus tsab ntawv hais txog yam puav uas yuav ua rau peb plam peb txojkev zoo siab. Tej ntawd yog dabtsi thiab yuav ua li cas peb thiaj tsis plam peb txojkev zoo siab?

9. Vim li cas peb yuav tsum muaj laj lim tswvyim?

⁹ Yog peb tsis paub xyov yuav daws peb tej teeb meem li cas ces peb yuav qaug zog thiab tsis muaj kev zoo siab. Thaum peb muaj teeb meem peb yuav tsum mus cuag Yehauvas pab kom peb txiav txim siab tau zoo peb thiaj ua haum Yehauvas siab, pab tau cov kwvtij nkauj muam, thiab tuav rawv peb txojkev ntseeg.  (Yelemis 10:23) Peb yuav tsum muaj laj lim tswvyim peb thiaj paub yuav ua li cas thiab paub teb cov uas tawm tsam peb.

10. Yakaunpaus 1:5 hais kom peb ua li cas yog peb xav muaj laj lim tswvyim?

¹⁰ Yuav kom peb muaj kev zoo siab thaum peb ntsib kev nyuaj siab peb yuav tsum thov Yehauvas pub laj lim tswvyim rau peb. (Nyeem Yakaunpaus 1:5.) Yog hais tias zoo li Yehauvas pheej tsis txawj teb peb tej lus thov los Yakaunpaus hais kom peb thov Yehauvas tsis tseg tsis tu. Peb yeej tsis tab kaum Yehauvas thiab nws yeej tsis chim rau peb yog peb pheej thov nws tas los thov thiab. Nws yeej hlub peb thiab pom tej uas peb raug. Nws “siab dawb siab zoo.” (Phau Ntawv Nkauj 25:12, 13) Nws yeej yuav pub tswvyim rau peb kom peb nyiaj taus peb tej kev nyuaj siab. Qhov no yeej ua rau peb zoo siab kawg nkaus li! Yehauvas pub laj lim tswvyim rau peb li cas?

11. Peb yuav tsum ua li cas ntxiv peb thiaj muaj laj lim tswvyim?

¹¹ Yuav kom peb muaj laj lim tswvyim peb yuav tsum kawm Vajtswv Txojlus thiab nyeem cov ntaub ntawv Vajlugkub. (Pajlug 2:6) Tiamsis tsis yog tas li ntawd xwb. Peb yuav tsum ua li Vajtswv hais. Yakaunpaus hais tias: “Nej yuav tsum xyaum ua raws li Vajtswv Txojlus, tsis yog ua cov mloog xwb.” (Yakaunpaus 1:22) Yog peb ua li ntawd ces peb yuav nyob sib haum xeeb, yoojyim hais lus, thiab paub khuvleej lwm tus. (Yakaunpaus 3:17, TT ) Peb yuav nyiaj taus peb tej kev nyuaj siab thiab tsis plam peb txojkev zoo siab.

12. Vim li cas peb yuav tsum paub phau Vajlugkub zoo?

¹² Vajtswv Txojlus zoo ib yam li daim tsom iav uas pab peb pom tias peb yuav kho peb tus kheej li cas. (Yakaunpaus 1:23-25) Xws li thaum peb kawm Vajtswv Txojlus tag ua rau peb ras tias peb yuav tau ua siab ntev. Yog peb cia Yehauvas pab peb ces peb yuav ua  tau li ntawd thaum muaj lwm tus ua rau peb npau taws. Rau qhov yog peb ua siab ntev ces peb yuav paub daws peb tej teeb meem dua. (Yakaunpaus 3:13) Yog li ntawd thiaj tseem ceeb heev rau peb yuav tsum paub Vajlugkub zoo!

13. Vim li cas zoo rau peb nyeem thiab kawm txog cov qauv hauv phau Vajlugkub?

¹³ Muaj tej thaud peb twb ua yuam kev tag lawm peb mam paub. Tiamsis qhov zoo tshaj yog qhov uas peb kawm ntawm lwm tus. Thaum peb pom luag ua tau zoo ces peb xyaum luag, thaum peb pom luag ua tau tsis zoo ces peb tsis txhob xyaum. Twb yog li ntawd Yakaunpaus thiaj kom peb saib cov qauv hauv phau Vajlugkub xws li Anplahas, Lahaj, Yauj, thiab Eliyas. (Yakaunpaus 2:21-26; 5:10, 11, 17, 18) Vajtswv cov tub qhe no yeej muaj kev nyuaj siab ntau yam tiamsis lawv yeej tseem muaj kev zoo siab. Yog peb cia Yehauvas pab peb ces peb yeej ua tau ib yam li lawv thiab.

14-15. Vim li cas peb yuav tsum tsis txhob ua xyem xyav?

¹⁴ Thaum peb ua xyem xyav. Muaj tej thaud peb yuav tsis to taub zoo txog tej uas phau Vajlugkub hais lossis tej zaum zoo li Vajtswv tsis teb peb tej lus thov raws li peb lub siab xav ces yuav ua rau peb ua xyem xyav. Yog peb ua xyem xyav ces peb txojkev ntseeg thiab txojkev sib raug zoo nrog Yehauvas yuav tsis ruaj khov. (Yakaunpaus 1:7, 8) Thiab yuav ua rau peb tsis muaj kev vam khom rau yav tom hauv ntej los kuj muaj thiab.

¹⁵ Paulus muab peb txojkev vam khom rau yav tom hauv ntej piv rau tus tswg. (Henplais 6:19) Thaum muaj cua daj cua dub, tus tswg rub tau lub nkoj cia kom tsis txhob mus tsoo pob zeb. Tiamsis tus tswg tsuas rub tau lub nkoj cia yog tias txoj saw hlau uas khi lub nkoj rau ntawm tus tswg tsis tu. Zoo ib yam li txoj saw hlau uas xeb lawm yuav tsis ruaj khov, tus uas ua xyem xyav txojkev ntseeg yuav tsis ruaj khov thiab. Thaum nws ntsib kev nyuaj siab nws yuav tsis tso siab rau Yehauvas tej lus cog tseg. Yakaunpaus hais tias tus neeg uas ua xyem xyav “zoo ib yam li tej dej Hiavtxwv uas cua ntsawj ntas mus ntas los.” (Yakaunpaus 1:6) Tus neeg no yuav tsis muaj kev zoo siab xyiv fab hlo li.

16. Yog peb tseem ua xyem xyav txog ib yam twg, peb yuav tau ua li cas?

¹⁶ Nhriav kev los txhawb koj txojkev ntseeg kom koj thiaj tsis ua xyem xyav. Nyob rau Eliyas tiam, Eliyas hais rau Yehauvas cov neeg uas ua ob lub siab tias: “Nej tseem yuav ua neeg muaj ob lub siab mus txog thaum twg? Yog hais tias tus TSWV [“Yehauvas,” NWT ] yog Vajtswv tiag, sawvdaws cia li pehawm nws; tiamsis yog hais tias Npa-as yog Vajtswv, ces sawvdaws cia li pe Npa-as los mas!” (1 Vajntxwv 18:21) Nyob rau peb tiam los yeej zoo ib yam li ntawd thiab. Peb yuav tau mus tshawb nrhiav kom peb paub meej tias Yehauvas yog Vajtswv, phau Vajlugkub yog nws Txojlus, thiab Yehauvas Cov Timkhawv yog Vajtswv cov neeg. (1 Thexalaunikes 5:21) Yog peb ua li ntawd ces peb yuav tsis ua xyem xyav thiab peb txojkev ntseeg yuav ruaj khov. Tiamsis yog muaj tej yam uas peb tseem ua xyem xyav lossis tsis to taub zoo, cia li mus cuag cov txwj laus pab peb. Peb thiaj li yuav zoo siab hlo teev tiam Yehauvas.

17. Thaum peb qaug zog yuav ua li cas rau peb?

¹⁷ Thaum peb qaug zog, Vajtswv Txojlus hais li no: “Thaum peb tej kev ntxhov siab ua rau peb qaug zog, peb yuav tsis xav ua dabtsi.” (Pajlug 24:10, NWT ) Lo lus Henplais uas txhais tias “qaug zog” kuj txhais tau tias “siab yau lossis poob siab” thiab. Yog li ntawd,  thaum koj qaug zog lossis poob siab yuav ua rau koj tsis muaj kev kaj siab.

18. Piav seb qhov uas ua siab ntev nyiaj yog li cas.

¹⁸ Cia Yehauvas pab kom koj ua tau siab loj thev koj tej kev nyuaj siab. (Yakaunpaus 5:11) Lo lus “ua siab ntev nyiaj” uas Yakaunpaus siv hauv nws tsab ntawv ua rau peb xav txog tus tub rog uas txawm muaj kev sib ntaus sib tua hnyav npaum li cas los nws yeej tiv tuag nthi tsis thim li.

19. Peb kawm tau li cas los ntawm tus tubtxib Paulus?

¹⁹ Tus tubtxib Paulus tso tau ib tug qauv zoo rau peb xyaum. Muaj tej thaud nws yeej qaug zog kawg tiamsis nws ua tau siab ntev thev vim nws tso siab tias Yehauvas yuav txhawb nws lub zog. (2 Kauleethaus 4:7; 12:8-10) Yog peb txo hwjchim thiab tso siab rau Yehauvas ib yam li Paulus ces Yehauvas yeej yuav pab peb ua siab loj thiab ua siab ntev thev peb tej kev nyuaj siab.​—Yakaunpaus 4:10.

20-21. Peb paub li cas txog Yehauvas?

²⁰ Yakaunpaus hais tias: “Yog tej kev sim siab ntawd ua rau nws yuam kev ua txhaum, nws tsis txhob hais tias, ‘Yog Vajtswv sim kuv.’ Rau qhov tej kev phem ntxias tsis tau Vajtswv, thiab Vajtswv yeej tsis sim leejtwg siab li.” (Yakaunpaus 1:13) Yog li ntawd thaum peb muaj kev nyuaj siab ntxhov plawv, tsis yog Yehauvas rau txim rau peb. Yog peb paub li no ces peb haj yam yuav muaj kev sib raug zoo nrog Yehauvas, peb Leej Txi uas hlub peb heev.​—Yakaunpaus 4:8.

²¹ “Vajtswv yeej zoo Vajtswv li qub.” (Yakaunpaus 1:17) Yog Yehauvas twb pab cov Khixatia thaum ub nyiaj lawv tej kev nyuaj siab thiab kev tsim txom ces nimno los nws yeej yuav pab peb thiab. Yog li ntawd kav tsij rau siab ntso thov Yehauvas pub kom koj muaj laj lim tswvyim, muaj kev ntseeg, thiab muaj lub siab loj. Thaum koj muaj kev nyuaj siab, Yehauvas yeej yuav teb koj tej lus thov thiab nws yuav pab kom koj muaj kev zoo siab!