1. Ua ntej ib tug muam Khixatia yuav mus yuav txiv, nws yuav tsum nug nws tus kheej li cas?

TXHUA tus Khixatia yeej hwm thiab mloog Yexus lus. Tiamsis thaum ib tug pojniam mus yuav txiv, nws yuav tsum hwm thiab mloog nws tus txiv lus thiab. Qhov no yeej tsis yoojyim vim nws tus txiv yog neeg zoo tsis tiav. Yog li ntawd, ua ntej nws mus yuav txiv nws yuav tsum ua tib zoo xav li no: ‘Tus kwvtij uas kuv xav yuav puas yuav ua tau ib tug txiv tsev zoo? Nws puas muab Yehauvas tso ua ntej hauv nws lub neej? Yog nws twb tsis ua tamsim no, vim li cas kuv ho xav hais tias lwm hnub nws yuav ua? Ua li kuv ne, kuv puas yuav ua tau ib tug niam tsev zoo? Kuv puas siab ntev, siab dawb, thiab siab loj siab dav? Thiab kuv puas muaj kev sib raug zoo nrog Yehauvas?’ (Tej Lus Qhia 4:9, 12) Yog tus muam ua tib zoo xav ua ntej thiab ua tib zoo xaiv txiv ces nws yuav tau lub neej zoo thiab muaj kev zoo siab.

2. Hauv zaj no peb yuav kawm txog dabtsi?

² Niaj hnub nimno muaj cov muam Khixatia coob tus uas hwm thiab mloog lawv tus txiv lus. Yeej tsim nyog peb qhuas lawv kawg. Peb zoo siab heev uas peb tau nrog lawv teev tiam Yehauvas ua ke. Hauv zaj no peb yuav tham txog 3 lo lus nug no: (1) Cov pojniam uas muaj txiv lawm muaj kev nyuaj siab li cas? (2) Vim li cas ib txhia pojniam ho hwm lawv tus txiv? Thiab (3) Yexus, Anpinkayis, thiab Malis uas yog Yexus niam, lawv cov qauv yuav pab tau cov niam txiv kom paub hwm cov saib xyuas lawv li cas?

3. Vim li cas cov niam txiv thiaj muaj kev nyuaj siab?

³ Kev txij nkawm yeej yog ib yam zoo kawg nkaus uas Yehauvas muab rau peb tiamsis peb yog neeg zoo tsis tiav. (1 Yauhas 1:8) Yog li ntawd, Vajtswv Txojlus thiaj ceeb toom tias cov niam txiv yuav “muaj kev nyuaj siab.” (1 Kauleethaus 7:28) Cia peb tham txog yam puav kev nyuaj siab uas cov pojniam muaj.

4. Vim li cas muaj tej thaud thiaj nyuaj rau tus pojniam mloog nws tus txiv lus?

⁴ Yog tus pojniam loj hlob hauv lub tebchaws uas txivneej thiab pojniam muaj cai sib txig zos ces tej zaum yuav nyuaj rau nws mloog nws tus txiv lus. Malisaum (Marisol) uas loj hlob hauv tebchaws Mekas hais tias: “Kuv paub hais tias Yehauvas tsa tus txiv ua tus txiv tsev thiab ua tus coj ntawm nws tsev neeg. Yog li ntawd tus pojniam yuav tsum mloog thiab hwm nws tus txiv lus. Tiamsis Yehauvas kuj hais tias tus txiv yuav tsum saib taus nws tus pojniam thiab. Txawm li ntawd los muaj tej thaud yeej tseem nyuaj rau kuv hwm thiab mloog kuv tus txiv lus vim tebchaws hais tias pojniam thiab txivneej muaj cai sib txig zos.”

5. Muaj ib co txivneej saib pojniam zoo li cas?

⁵ Muaj tej tug pojniam ho yuav tau tus txiv uas saib pojniam tsis muaj nqis li txivneej. Tus muam hu ua Ivoos (Ivon) nyob Amelikas Qab Teb hais tias: “Nyob peb thaj tsam mas cov txivneej noj mov tag cov pojniam mam noj. Cov pojniam thiab cov ntxhais yog cov ua zaub ua mov noj, tu vaj tu tsev thiab ntxuav tais diav. Lawv yuav tsum tiam leej txiv thiab cov tub ib yam li tiam huab tais.” Tus muam hu ua Yeeb Leem (Yingling) nyob sab Axia hais tias: “Peb cov neeg ib txwm hais tias cov ntxhais tsis tas mus kawm ntawv thiab tsis tas txawj ib yam dabtsi los tau rau qhov lawv ua haujlwm hauv vaj hauv tsev xwb thiab lawv tsis muaj cai hais lawv tus txiv.” Tus txivneej uas coj li no, nws tsis hlub nws tus pojniam thiab tsis ua li phau Vajlugkub hais. Nws tsis xyaum Yexus tus qauv thiab ua tsis haum Yehauvas siab.​—Efexus 5:28, 29; 1 Petus 3:7.

6. Cov pojniam yuav ua li cas lawv thiaj muaj kev sib raug zoo nrog Yehauvas?

⁶ Zaj peb kawm tas los no hais tias tus txiv yog tus mus khwv los yug nws tsev neeg, pab kom lawv tsis txhob txhawj txog dabtsi, thiab pab lawv muaj kev sib raug zoo nrog Yehauvas. (1 Timautes 5:8) Tiamsis tus pojniam yuav tsum nrhiav sijhawm los nyeem phau Vajlugkub, ua zoo xav txog tej nws nyeem, thiab thov Yehauvas tsis tseg. Tej zaum nws yuav xav tias nws haujlwm ntau ua luaj es nws yuav muab sijhawm qhovtwg los ua tej no? Tiamsis yeej tseem ceeb heev rau nws ua tej no rau qhov Yehauvas xav kom peb txhua leej txhua tus muaj kev sib raug zoo nrog nws.​—Tes Haujlwm 17:27.

7. Yuav ua li cas thiaj yoojyim dua rau tus pojniam hwm thiab mloog nws tus txiv lus?

⁷ Yeej tsis yoojyim rau tus pojniam hwm thiab mloog nws tus txiv lus vim nws tus txiv yog neeg zoo tsis tiav. Tiamsis yog nws to taub Vajtswv Txojlus zoo thiab paub tias vim li cas Yehauvas thiaj kom nws ua li ntawd ces yuav yoojyim dua rau nws hwm thiab mloog nws tus txiv lus.

8. Raws li Efexus 5:22-24, vim li cas tus pojniam Khixatia thiaj hwm thiab mloog nws tus txiv lus?

⁸ Tus pojniam Khixatia hwm thiab mloog nws tus txiv lus vim Yehauvas xav kom nws ua li ntawd. (Nyeem Efexus 5:22-24.) Nws  ntseeg tias Yehauvas hlub nws thiab yeej tsis kom nws ua ib yam dabtsi uas yuav tsis zoo rau nws.​—2 Kevcai 6:24; 1 Yauhas 5:3.

9. Thaum tus pojniam mloog Yehauvas lus es hwm nws tus txiv, pab tau nws tsev neeg li cas?

⁹ Tibneeg feem coob hais tias qhov uas tus pojniam yuav tsum hwm thiab mloog nws tus txiv lus yog ib qho uas saib tsis taus pojniam. Tiamsis lawv tsis paub Vajtswv Yehauvas. Yehauvas hlub nws cov menyuam txhua leej txhua tus, nws yeej tsis hais kom nws cov ntxhais ua ib yam uas yuav ua rau luag saib tsis taus lawv. Tus pojniam uas hwm nws tus txiv li Yehauvas hais, txhua leej txhua tus hauv nws tsev neeg yuav muaj kev sib haum xeeb thiab muaj kev zoo siab.​—Phau Ntawv Nkauj 119:165.

10. Peb kawm tau li cas los ntawm tus muam Khalaum?

¹⁰ Tus pojniam uas hwm nws tus txiv ua li Yehauvas hais thiab hlub Yehauvas. Tus muam Khalaum (Carol) nyob Amelikas Qab Teb hais tias: “Kuv paub tias kuv tus txiv zoo tsis tiav ces nws yeej yuav ua yuam kev. Tej kuv hais thiab tej kuv ua rau nws thaum nws ua yuam kev qhia tias kuv hlub Yehauvas npaum li cas. Kuv hwm kuv tus txiv twb yog vim kuv xav ua haum Yehauvas siab.”

11. Vim li cas tus muam Asniv thiaj zam txim tau rau nws tus txiv thiab peb kawm tau li cas los ntawm nws?

¹¹ Yuav tsis yoojyim rau tus pojniam hwm thiab mloog tus txiv uas tsis hlub nws. Tus muam Asniv (Aneese) hais tias: “Thaum kuv tus txiv ua yuam kev kuv tsis chim thiab tsis cib nyeej rau nws rau qhov muaj tej thaud los kuv twb ua yuam kev thiab. Kuv thiaj zam txim rau nws ib yam li Yehauvas niaj hnub zam txim rau peb. Kuv ua li no kuv zoo siab dua.” (Phau Ntawv Nkauj 86:5) Tus pojniam uas ua li Asniv, yuav tsis nyuaj rau nws hwm nws tus txiv.

12. Muaj cov qauv zoo li cas nyob hauv phau Vajlugkub?

¹² Muaj ib txhia hais tias tsuas yog cov neeg uas tsis paub qab hau xwb thiaj li nyob hauv lwm tus qab kev tswjhwm tiamsis tsis yog li ntawd. Hauv phau Vajlugkub muaj coob tus neeg mloog lus uas txawj ntse thiab muaj peev xwm heev xws li Yexus, Anpinkayis, thiab Malis uas yog Yexus niam. Cia peb  tham seb peb yuav kawm tau li cas los ntawm lawv.

13. Vim li cas Yexus thiaj hwm thiab mloog Yehauvas lus?

¹³ Puas yog Yexus hwm thiab mloog Yehauvas lus vim rau qhov nws tsis paub dabtsi? Tsis yog. Yexus yeej ntse thiab muaj peev xwm heev. Twb yog vim li ntawd, Yehauvas thiaj cia Yexus nrog nws tsim ib puas tsav yam nyob saum ntuj thiab hauv ntiajteb. (Pajlug 8:30; Henplais 1:2-4) Thaum Yexus nyob hauv ntiajteb, nws paub muab tej yam nyuaj nyuaj thiab cov cov coj los qhia kom yoojyim rau peb to taub. (Yauhas 7:45, 46) Thiab thaum Yehauvas tsa Yexus sawv rov qab los, Yehauvas ‘muab hwjchim rau nws kav tagnrho ib puas tsav yam saum ntuj thiab hauv ntiajteb no.’ (Mathais 28:18) Yexus yeej ntse thiab muaj peev xwm heev tiamsis qhov uas nws mloog Yehauvas lus thiab cia Yehauvas pab nws los twb yog vim nws hlub nws Txiv Yehauvas.​—Yauhas 14:31.

14. (1) Cov txiv tsev kawm tau li cas txog pojniam los ntawm Yehauvas? (2) Cov txiv tsev kawm tau li cas txog pojniam los ntawm Pajlug 31?

¹⁴ Cov txiv kawm tau li cas? Yehauvas kom tus pojniam hwm thiab mloog nws tus txiv lus. Tsis yog vim tus pojniam zoo tsis npaum tus txiv. Peb paub li ntawd vim Yehauvas xaiv pojniam thiab txivneej mus nrog Yexus ua vajntxwv nyob saum ntuj. (Kalatias 3:26-29) Yehauvas muab hwjchim rau Yexus ua tus coj lub koom txoos vim nws tso siab rau Yexus. Tus txiv tsev zoo tso siab plhuav rau nws tus pojniam thiab cia nws tus pojniam ua li nws muaj cuab kav. Phau Vajlugkub hais tias tus niam tsev zoo saib xyuas haujlwm hauv vaj hauv tsev, yuav liaj yuav teb, thiab ua lag ua luam los pab nws tsev neeg. (Nyeem Pajlug 31:15, 16, 18.) Tus pojniam tsis yog tus qhev uas tsis muaj cai hais dabtsi. Yog li ntawd thaum tus pojniam muab tswvyim rau nws tus txiv los nws yuav tau mloog thiab. (Nyeem Pajlug 31:11, 26, 27.) Tus txiv uas hlub thiab ua zoo rau nws tus pojniam, nws tus pojniam yuav zoo siab hlo hwm thiab mloog nws lus.

15. Cov pojniam yuav xyaum Yexus tus qauv li cas?

¹⁵ Cov pojniam kawm tau li cas? Txawm Yexus muaj peev xwm heev los nws tsis xav tias yog nws hwm Yehauvas txojkev kav ces nws yuav tsis muaj nuj nqis dabtsi. (1 Kauleethaus 15:28; Filipis 2:5, 6, NWT ) Tus pojniam nquag thiab muaj peev xwm yuav xyaum Yexus tus qauv thiab hwm nws tus txiv. Nws yuav tsis xav hais tias yog nws hwm nws tus txiv ces nws yuav tsis muaj nuj nqis dabtsi. Nws hwm nws tus txiv tsis yog vim nws hlub nws tus txiv xwb tiamsis qhov tseem ceeb tshaj yog nws hlub thiab hwm Yehauvas.

16. Raws li 1 Xamuyees 25:3, 23-28, Anpinkayis ntsib teeb meem dabtsi? (Saib daim duab ntawm lub khaum.)

¹⁶ Anpinkayis tus txiv hu ua Nanpas. Nws yog ib tug neeg khav theeb, qia dub, thiab tsis paub ris leejtwg txiaj ntsig. Yog Anpinkayis tsis xav yuav nws es cia Daviv thiab nws cov tub rog tuaj tua nws tus txiv los yeej tau. Tiamsis Anpinkayis tsis ua li ntawd, nws npaj zaub mov thiab ua siab tawv qhawv mus ntsib Daviv thiab nws 400 tus tub rog. Anpinkayis thov Daviv tias nws lees ris tej kev txhaum uas nws tus txiv ua. (Nyeem 1 Xamuyees 25:3, 23-28.) Daviv ua li Anpinkayis hais thiab nws paub hais tias yeej yog Yehauvas xa Anpinkayis tuaj cheem tsis pub nws mus tua Nanpas thiab nws tsev neeg.

17. Tus txiv kawm tau li cas los ntawm Daviv thiab Anpinkayis nkawd?

¹⁷ Cov txiv kawm tau li cas? Anpinkayis yog ib tug pojniam uas ntse thiab thoob tsib to nrog. Vim Daviv mloog Anpinkayis lus nws  thiaj tsis mus tua cov neeg uas tsis tau ua txhaum dabtsi. Tus txiv uas thoob tsib to nrog yuav mloog nws tus pojniam hais ua ntej nws txiav txim siab ua ib yam dabtsi. Tej zaum nws tus pojniam cov lus yuav pab tau nws txiav txim siab zoo.

18. Cov pojniam yuav kawm tau li cas ntawm Anpinkayis?

¹⁸ Cov pojniam kawm tau li cas? Tus pojniam uas hwm Yehauvas thiab ua li phau Vajlugkub hais yuav pab tau nws tsev neeg. Txawm nws tus txiv tsis teev tiam Yehauvas los nws yuav tsis nrhiav nrhw kev nrauj nws tus txiv. Tiamsis nws yuav ua zoo seb nws tus txiv puas yuav los teev tiam Yehauvas. (1 Petus 3:1, 2) Txawm nws tus txiv tsis los los Yehauvas yeej pom thiab txaus siab rau nws vim nws hwm nws tus txiv thiab muab siab npuab Yehauvas.

19. Thaum tus txiv hais kom nws tus pojniam ua tej uas txhaum Vajtswv txojcai, tus pojniam puas yuav ua li nws hais?

¹⁹ Tus pojniam yuav tsum hwm thiab mloog nws tus txiv lus. Tiamsis yog nws tus txiv kom nws ua tej yam uas txhaum Vajtswv txojcai xws li kom nws dag lossis ua tub sab, nws yuav tsum tsis txhob ua. Txhua tus Khixatia yuav tsum mloog Yehauvas lus ua ntej tiamsis tus pojniam yuav tsum ua tib zoo qhia nws tus txiv tias yog vim li cas nws ua tsis tau li nws tus txiv hais.​—Tes Haujlwm 5:29.

20. Ua li cas peb thiaj paub hais tias Malis muaj kev sib raug zoo nrog Yehauvas?

²⁰ Malis uas yog Yexus niam paub Vajtswv Txojlus zoo thiab nws muaj kev sib raug zoo nrog Yehauvas. Thaum nws nrog Elixanpes uas yog Yauhas tus muab neeg ua kevcai raus dej niam tham, nws siv Vajtswv Txojlus tshaj li 20 zaus. (Lukas 1:46-55) Thiab txawm Yauxej twb qhaib Malis lawm los Yehauvas tus tubtxib saum ntuj tsis mus nrog Yauxej tham tiamsis nws ncaj qha mus qhia Malis tias Malis yuav xeeb tub thiab tus tub ntawd yog Vajtswv tus. (Lukas 1:26-33) Yehauvas paub Malis zoo thiab tso siab tias Malis yuav ua zoo tu nws tus Tub. Tom qab Yexus tuag thiab rov mus saum ntuj lawm los, Malis yeej tseem muaj kev sib raug zoo nrog Yehauvas.​—Tes Haujlwm 1:14.

21. Cov txiv kawm tau li cas los ntawm Malis?

 ²¹ Cov txiv kawm tau li cas? Tus txiv uas ntse yuav zoo siab heev yog tias nws tus pojniam paub Vajtswv Txojlus zoo. Nws yuav tsis ntshai tsam nws tus pojniam txeeb ua tus coj ntawm nws tsev neeg tiamsis nws zoo siab tias nws tus pojniam yuav pab tau nws tsev neeg. Thiab txawm nws tus pojniam kawm ntawv siab dua nws los nws paub tias nws yog tus uas yuav coj nws tsev neeg teev tiam Yehauvas.​—Efexus 6:4.

22. Cov pojniam kawm tau li cas los ntawm Malis?

²² Cov pojniam kawm tau li cas? Tus pojniam paub hais tias nws yuav tsum hwm thiab mloog nws tus txiv hais. Tiamsis nws txojkev sib raug zoo nrog Yehauvas nyob ntawm nws tus kheej. (Kalatias 6:5) Yog li ntawd nws yuav tsum nrhiav sijhawm los kawm Vajtswv Txojlus thiab ua zoo xav txog tej uas nws kawm. Yog nws ua li ntawd ces nws txojkev sib raug zoo nrog Yehauvas yuav ruaj khov. Nws yuav hlub thiab hwm Yehauvas thiab nws yuav zoo siab hlo hwm nws tus txiv.

23. Cov pojniam uas hwm lawv tus txiv yuav pab tau lawv, lawv tsev neeg, thiab lub koom txoos li cas?

²³ Cov pojniam uas hwm thiab mloog lawv tus txiv lus vim lawv hlub Yehauvas yuav muaj kev zoo siab dua li cov uas yuav lawv siab xwb. Niaj hnub no muaj cov pojniam uas teev tiam thiab muab siab npuab Yehauvas coob heev. (Phau Ntawv Nkauj 68:11, NWT ) Lawv tso tau qauv zoo rau cov tub hluas thiab ntxhais hluas xyaum. Tsis tas li ntawd xwb lawv yuav pab tau lawv tsev neeg thiab lub koom txoos muaj kev sib haum xeeb, ib leeg txawj hwm ib leeg thiab ib leeg txawj mloog ib leeg hais. (Titus 2:3-5) Tag nrho peb txhua leej txhua tus tsis hais pojniam lossis txivneej yeej txhawb tau lub koom txoos kom muaj kev sib haum xeeb thiab muaj kev zoo siab. Zaj tom ntej peb yuav tham seb yuav ua li cas peb thiaj ua tau li ntawd.