1. Yexus qhia nws cov thwj tim li cas thaum lub sim ceeb yuav kawg, thiab nws ceeb toom lawv li cas?

 OB PEB hnub ua ntej Yexus tsis tau tuag, nws plaub tug thwj tim txawm los nug nws tias: “Yuav muaj pov thawj dab tsi qhia tias twb txog lub sij hawm uas . . . lub sim ceeb yuav kawg?” (Mathais 24:3) Tej zaum cov thwj tim xav paub seb thaum twg lub nroog Yeluxalees thiab lub tuam tsev yuav raug puas tsuaj. Yexus cov lus uas teb lawv tsis yog hais txog lub nroog Yeluxalees thiab lub tuam tsev yuav raug puas tsuaj xwb tiam sis nws kuj hais txog “lub sim ceeb” uas peb nyob nim no thiab. Yexus hais li no txog tiam kawg tias: “Hais txog hnub ntawd thiab teev ntawd, tsis muaj leej twg paub. Txawm cov tub txib saum ntuj thiab Leej Tub los yeej tsis paub, tsuas yog Leej Txiv thiaj paub xwb.” Ces Yexus txawm ceeb toom nws cov thwj tim kom lawv tsis “txhob tsaug zog” thiab “ceev faj zov tos.”​—Malakaus 13:32-37.

2. Vim li cas ho tseem ceeb rau cov ntseeg nyob thawj 100 xyoo ua zoo zov tos?

² Nyob rau thawj 100 xyoo, cov ntseeg uas yog neeg Yudais yuav tau ua zoo zov tos xwv lawv thiaj cawm tau lawv txoj sia. Yexus qhia rau nws cov thwj tim tias lub nroog Yeluxalees thiab lub tuam tsev yuav raug puas tsuaj thaum lawv pom qho yam tshwm sim. Nws hais tias: “Thaum nej pom tubrog tuaj vij lub nroog Yeluxalees, nej paub hais tias, tsis ntev lub nroog yuav puastsuaj.” Thaum lawv pom tej no, lawv yuav tau ua raws li Yexus ceeb toom thiab “khiav mus rau pem tej roob.” (Lukas 21:20, 21) Cov uas mloog Yexus cov lus ceeb toom thiaj dim thaum cov Loos tuaj muab lub nroog Yeluxalees rhuav tshem.

3. Nyob rau hauv zaj kawm no yuav piav txog dab tsi?

 ³ Tam sim no peb nyob rau tiam uas lub qab ntuj phem yuav kawg. Yog li ntawd peb yuav tau ceev faj zov tos, tsis txhob nkees. Nyob rau hauv zaj kawm no yuav piav txog tias peb yuav tsum ceev faj zov zoo li cas tab txawm peb pom lub ntiaj teb no ua voj ua viag. Ntxiv ntawd, peb yuav tau ceev faj txog tej yam ntawm peb lub neej li cas thiab siv peb lub sij hawm kom muaj nuj nqis li cas rau li cas.

4. Vim li cas peb ho xav paub txog tej yam hauv lub ntiaj teb no uas muaj tshwm sim raws li tej lus faj lem hauv phau Vajlugkub?

⁴ Kuj zoo rau peb paub txog tej yam hauv lub ntiaj teb no uas muaj tshwm sim raws li tej lus faj lem hauv phau Vajlugkub. Xws li Yexus tau hais tias yuav muaj li cas rau li cas xwv peb thiaj paub hais tias Xatas lub sim ceeb tab tom yuav dua mus. (Mathais 24:3-14) Tus tub txib Petus txhawb kom peb cim ntsoov tej faj lem seb yuav muaj tshwm sim li cas rau li cas xwv thiaj tsav tau peb txoj kev ntseeg. (2 Petus 1:19-21) Cov lus uas nyob rau hauv phau Tshwmsim xub xub pib tias: “Phau ntawv no yog hais txog tej uas Yexus Khetos qhia rau Vajtswv cov tubtxib paub tej uas tshuav tsis ntev tom ntej no yuav muaj tshwm los.” (Tshwmsim 1:1) Yog li ntawd, peb thiaj xav paub tej yam uas muaj tshwm sim hauv lub qab ntuj no thiab seb tej ntawd ho raws li tej lus faj lem uas hais nyob hauv phau Vajlugkub li cas rau li cas. Ntxiv ntawd, peb ib leeg kuj tos tsis hnyu yuav piav qhia ib leeg.

5. Peb yuav tsum tsis txhob ua li cas tiam sis peb yuav tsum ua dab tsi? (Saib cov duab.)

⁵ Thaum peb piav txog tej lus faj lem hauv phau Vajlugkub, nco ntsoov tsis txhob lam kwv yees tias yuav muaj li no rau li no. Vim li cas peb yuav tau tsis txhob ua li ntawd? Yeeb vim yog peb tsis xav hais ib yam dab tsi kom ua rau lub koom txoos faib ua pab ua pawg. Xws li thaum peb hnov ib tug nom twg hais tias nws yuav kho ib qho kev cov nyom kom thiaj ua rau sawv daws nyob tiaj tus thiab tso siab plhuav. Thaum hnov tej xov hais li no, tsis txhob lam kwv yees hais tias muaj raws li tej lus faj lem uas hais nyob rau hauv 1 Thexalaunikes 5:3. Peb yuav tau nyeem seb Yehauvas lub koom haum tab tom tso tawm tej xov xwm zoo li cas rau li cas. Yog peb tej lus hais tau raws nkaus li tej ntaub ntawv lub koom haum luam tawm, peb thiaj yuav pab tau kom lub koom txoos sib koom siab thiab “muaj ib lub homphiaj xwb.”​—1 Kauleethaus 1:10; 4:6.

6. Peb khaws tau li cas los ntawm 2 Petus 3:11-13?

⁶ Nyeem 2 Petus 3:11-13. Tus tub txib Petus pab kom peb ua tib zoo tshuaj tej lus faj lem hauv phau Vajlugkub. Nws txhawb kom peb “niaj hnub tos hnub uas Vajtswv yuav los.” Vim li cas nws ho txhawb li no? Tos nws txhawb li no los tsis yog nws xav kom peb pheej xav txog hnub twg thiab teev twg Amankedoos mam li los tiam sis nws xav kom peb siv lub sij hawm uas peb tseem tshuav no los ua “lub neej kom dawbhuv thiab hwm Vajtswv.” (Mathais 24:36; Lukas 12:40) Qhov no txhais tias peb yuav tau ua qhov zoo qhov yog tas zaj tas zog thiab ua qhov twg rau Yehauvas los ua tawm plaws hauv lub siab dawb paug tuaj. Yuav kom peb ua tau li no, peb yuav tau ceev faj txog tej yam ntawm peb lub neej.

7. Peb qhia tau li cas tias peb yeej ceev faj lawm? (Lukas 21:34)

⁷ Tsis yog Yexus qhia kom ceev faj txog tej uas muaj tshwm sim hauv lub ntiaj teb no xwb tiam sis nws cov thwj tim yuav tau ceev faj txog tej yam ntawm lawv lub neej thiab. Qhov no Yexus yeej hais meej tseeb nyob rau ntawm Lukas 21:34. (Nyeem.) Nws cov lus hais tias: “Nej yuav tsum ceevfaj.” Ib tug tib neeg uas ceev faj, nws yeej tsis cia ib yam dab tsi los mus tav tau  nws txoj kev sib raug zoo nrog Yehauvas thiab nws yeej ua txhua yam kom zam dhau tej ntawd. Nws ua li no xwv nws thiaj muab siab npuab Vajtswv.​—Pajlug 22:3; Yudas 20, 21.

8. Tus tub txib Povlauj tau hais li cas rau cov ntseeg?

⁸ Tus tub txib Povlauj qhia cov ntseeg kom ceev faj txog tej yam ntawm lawv lub neej. Xws li nws hais rau cov ntseeg nyob hauv Efexus tias: “Nej yuav tsum ceevfaj thiab ua zoo. Tsis txhob ua li cov neeg ruam, tiamsis nej yuav tsum ua li cov neeg uas muaj tswvyim.” (Efexus 5:15, 16) Xatas yeej xav muab peb txoj kev sib raug zoo nrog Yehauvas rhuav tas zaj tas zog. Yog li ntawd, cov lus nyob hauv phau Vajlugkub thiaj ntuas kom peb “ua tib zoo saib, saib Vajtswv xav kom [peb] ua yam twg” xwv peb thiaj tiv thaiv tau peb tus kheej thaum Xatas tawm tsam.​—Efexus 5:17.

9. Yuav ua li cas peb thiaj paub seb Vajtswv xav kom peb ua yam twg?

⁹ Nyob rau hauv phau Vajlugkub tsis qhia txog txhua yam uas yuav los mus rhuav tau peb txoj kev sib raug zoo nrog Yehauvas. Peb yuav tau txiav txim siab seb yuav ua li cas txog tej yam uas hais tsis muaj nyob rau hauv phau Vajlugkub. Yuav kom peb txiav txim siab tau qhov zoo qhov yog, peb yuav tau ua zoo saib seb “Vajtswv xav kom [peb] ua yam twg.” Qhov uas peb ua tau li no yog nyeem Vajtswv Txoj Lus thiab ua zoo xav txog tej peb nyeem ntawd. Yog peb yim to taub seb Yehauvas xav kom peb ua yam twg thiab “muaj lub siab ib yam li Yexus Khetos” ces peb yuav yim “ua li cov neeg uas muaj tswvyim” tab txawm peb tsis muaj ib txog cai qhov twg los mus tswj peb. (1 Kauleethaus 2:14-16) Muaj qee zaug peb kuj paub tej yam uas peb yuav tsum tsis txhob ua tiam sis muaj qee zaug peb kuj tsis paub kiag li.

10. Peb yuav tau tsis txhob ua tej yam twg?

¹⁰ Tej yam uas peb yuav tsum tsis txhob ua yog sib tawb sib zeg, quav dej quav cawv, noj loj, hais lus ntsw ntsuav, saib tej yam sib ntaus sib tua, saib duab liab qab, thiab tej yam muaj ntsis zoo li no. (Phau Ntawv Nkauj 101:3) Nco ntsoov Xatas yeej nrhiav nrhw kev los ua rau kom peb txoj kev sib raug zoo nrog Yehauvas puas tsuaj mus. (1 Petus 5:8) Yog peb tsis ua zoo saib, Xatas yuav ua rau kom peb ntshaw luag tug, ua neeg dag, ua siab hlob, muaj kev ntxub ntxaug, ua neeg khav theeb, thiab cib nyeej. (Kalatias 5:19-21) Thaum thawj, tej yam zoo li hais tas los no kuj tsis ua luaj twg. Tiam sis yog peb tsis muab rho tawm ntawm peb lub siab mus ces ntev mus ntev tuaj yuav tsim tau ntau yam teeb meem rau peb.​—Yakaunpaus 1:14, 15.

11. Muaj ib yam uas peb yuav tau tsis txhob ua yog dab tsi, thiab yog vim li cas?

¹¹ Muaj tej thaud peb tsis nco ras txog txoj ke mus nrog luag ua npoj es yuav txw tau peb mus ua yuam kev. Muab ua piv txwv li no tias, koj ua hauj lwm nrog ib tug neeg uas tsis yog Yehauvas ib tug Tim Khawv. Koj xav kom nws nyiam Yehauvas Cov Tim Khawv ces koj thiaj ua zoo zoo thiab qhov twg los koj pab pes hlo. Muaj qee zaug koj kuj mus nrog nws noj sus ua ke thiab. Ntev mus ntev tuaj, koj txawm noj sus heev zuj zus nrog nws lawm. Nws txawm piav txog kev sib daj sib dee. Thaum thawj koj yeej tsis nyiam thiab tsis teb. Ntev mus ntev tuaj, koj txawm pib saib yam li tej lus ntawd tsis ua luaj twg lawm. Muaj ib hnub tus neeg koj nrog ua hauj lwm ntawd txawm caw kom koj mus nrog nws mus haus dej haus cawv tom qab neb ua hauj lwm tag ces koj txawm yeem nrog nws mus ua ke. Tsis ntev tom qab no xwb, koj txawm pib xav ib yam li tus neeg koj nrog ua hauj lwm ntawd thiab. Thaum zoo li no lawm, koj tus yam ntxwv yuav pib zoo li nws tus zuj zus. Nco ntsoov tias peb yuav tau ua zoo thiab saib taus txhua leej txhua tus tiam sis yog peb nrog ib tug twg ntau dhau lawm ces peb yuav pib coj ib yam li tus ntawd. (1 Kauleethaus 15:33) Yog tias peb ua tib zoo ceev faj yam li Yexus qhia tseg ces peb yuav tsis  nrog tej neeg uas tsis kam coj Yehauvas tej kev cai ua ke vim peb paub lawm tias tej ntawd yuav rhuav tau peb txoj kev sib raug zoo nrog Yehauvas.​—2 Kauleethaus 6:15.

12. Yexus cov thwj tim yuav tsum ua dab tsi cheem lub sim ceeb no tseem tsis tau kawg?

¹² Yexus xav kom nws cov thwj tim rau siab ntso ua hauj lwm cheem lub sim ceeb no tseem tsis tau kawg. Yexus muab hauj lwm ntau heev rau lawv ua. Nws sam hwm kom lawv mus qhia txoj xov zoo “hauv lub nroog Yeluxalees, hauv lub xeev Yudas, hauv lub xeev Xamalis thiab mus txog qab ntuj kawg.” (Tes Haujlwm 1:6-8) Yexus yeej muab hauj lwm ntau tiag tiag li rau lawv ua. Lawv yeej kub siab lug mus tshaj tawm txoj xov zoo rau lwm tus. Qhov no qhia tias lawv yeej siv lawv lub sij hawm kom muaj nuj nqis kawg li.

13. Vim li cas peb yuav tsum siv peb lub sij hawm kom muaj nuj nqis? (Kaulauxais 4:5)

¹³ Nyeem Kaulauxais 4:5. Yuav kom peb txawj ceev faj txog tej yam hauv peb lub neej, peb yuav tau siv peb lub sij hawm kom muaj nuj nqis. “Tsis muaj leejtwg paub hais tias kev puastsuaj yuav los raug nws thaum twg.” (Tej Lus Qhia 9:12) Tib ntsais muag xwb, peb txoj sia yaj ntshis lawm los kuj muaj.

14-15. Yuav ua li cas peb thiaj txawj siv peb lub sij hawm kom muaj nuj nqis? (Henplais 6:11, 12) (Saib daim duab.)

¹⁴ Thaum peb ua raws li Yehauvas lub siab  nyiam thiab tsav peb txoj kev sib raug zoo nrog nws ces twb yog peb siv peb lub sij hawm kom muaj nuj nqis. (Yauhas 14:21) Peb yuav tau “muab siab rau ntseeg, tsis txhob ua ywjfab ywjfwj . . . rau siab ntso ua tus Tswv tes haujlwm.” (1 Kauleethaus 15:58) Yog peb coj li no ces thaum peb txoj sia kawg los sis hnub kawg los txog, peb yuav tsis khuv xim ib yam dab tsi li.​—Mathais 24:13; Loos 14:8.

¹⁵ Niaj hnub no Yexus haj tseem yog tus uas coj nws cov thwj tim thaum mus tshaj tawm txoj xov zoo txog Vajtswv txoj kev kav thoob plaws ntiaj teb. Nws yeej ua raws nkaus li nws tau cog tseg. Yexus siv Yehauvas lub koom haum los cob qhia thiab npaj txhua yam txhij zog kom peb tau siv mus tshaj tawm txoj xov zoo. (Mathais 28:18-20) Yog li ntawd, peb feem yog kub siab lug mus tshaj tawm txoj xov zoo thiab cob qhia tib neeg li Yexus tau sam hwm tseg. Ntxiv ntawd, peb yuav tau ceev faj zov tos hnub Yehauvas rhuav tshem lub sim ceeb no. Yog peb coj raws li cov lus uas hais nyob rau hauv Henplais 6:11, 12 ces peb yuav muaj kev vam kev cia siab kom “mus txog hnub kawg.”​—Nyeem.

16. Peb yuav tau nco ntsoov li cas?

¹⁶ Yehauvas twb teem tseg tias thaum twg nws yuav muab Xatas lub sim ceeb rhuav pov tseg. Thaum hnub ntawd los txog, Yehauvas yuav ua raws li tej lus faj lem uas muaj nyob rau hauv nws Txoj Lus. Qee lub sij hawm yuav zoo yam nkaus li tseem tshuav ntev heev lub sim ceeb no mam kawg tiam sis peb yuav tau nco ntsoov tias Yehauvas hnub “yuav muaj los tiag thiab yuav tsis ncua sijhawm ntxiv li lawm.” (Hanpakus 2:3) Yog li ntawd, peb yuav tau “ntsia ntsoov” thiab “tos rawv Vajtswv, tus uas yuav los cawm kom [peb] dim.”​—Mikhas 7:7.