1. (1) Muaj tej yam twg ua rau peb txhawj? (2) Yog peb txhawj, yuav ua rau peb xav li cas?

PUAS tau muaj ib zaug uas koj txhawj * heev txog ib yam twg? Tej zaum muaj neeg hais lossis ua tau tej yam uas ua rau koj txhawj. Lossis tej zaum koj ho txhawj txog tej yam uas koj hais lossis ua lawm. Xws li, tej zaum koj tau ua ib yam yuam kev es koj xav tias Yehauvas yeej yuav tsis zam txim rau koj li. Tsis tas li ntawd xwb koj tseem xav tias koj muaj kev txhawj xeeb ntau los yog vim koj muaj kev ntseeg tsis txaus thiab tsis yog ib tug neeg zoo. Tiamsis puas muaj li ntawd tiag?

2. (1) Peb yuav tham txog 3 tug qauv twg hauv phau Vajlugkub? (2) Puas yog lawv muaj kev txhawj xeeb vim lawv tsis muaj kev ntseeg txaus?

² Peb yuav tham txog 3 tug qauv hauv phau Vajlugkub. Hanas yog Xamuyees uas yog tus cev Vajtswv lus niam. Hanas yeej muaj kev ntseeg heev tiamsis nws ntxhov siab heev thaum ib tug hauv nws tsev neeg ua phem phem rau nws. (1 Xamuyees 1:7) Tus tubtxib Paulus txojkev ntseeg yeej ruaj khov tiamsis nws “niaj hnub niaj hmo txhawj cov ntseeg uas nyob qhov txhia chaw.” (2 Kauleethaus 11:28) Vajntxwv Daviv los muaj kev ntseeg ruaj khov thiab Yehauvas hlub nws kawg li. (Tes Haujlwm 13:22) Txawm li ntawd los thaum Daviv ua yuam kev ua rau nws nyuaj siab heev. (Phau Ntawv Nkauj 38:4) Yehauvas nplig lawv txhua leej txhua tus. Peb yuav kawm seb lawv 3 tug qauv pab tau peb li cas.

3. Ua cas tej uas luag hais thiaj ua rau peb ntxhov siab?

³ Thaum luag hais lus nchav thiab ua tsis zoo rau peb, yuav ua rau peb ntxhov siab. Yog tus ntawd yog ib tug phoojywg lossis ib tug txheeb ze ces hajyam mob peb. Peb txhawj tsam peb yuav plam peb txojkev sib raug zoo nrog tus ntawd. Tej zaum tsis yog nws txhob txwm hais lus phem rau yus tiamsis tej nws hais ntawd mob yus siab heev. (Pajlug 12:18) Lossis tej zaum muaj tej tug neeg txhob txwm hais kom chob yus. Tau muaj li no rau ib tug muam. Nws hais tias: “Ob peb xyoo dhau los no, kuv ib tug phoojywg zoo xyav kuv moo hauv Is Taws Nej. Nws ua mob kuv siab thiab ua rau kuv ntxhov siab heev. Kuv tsis to taub tias yog vim li cas nws thiaj ua li ntawd.” Yog tias koj ib tug phoojywg zoo lossis ib tug txheeb ze ua mob koj li no, Hanas tus qauv yuav pab tau koj.

4. Hanas muaj kev ntxhov siab li cas?

⁴ Hanas muaj kev ntxhov siab li cas? Twb tau ntau xyoo lawm los Hanas tsis muaj menyuam li. (1 Xamuyees 1:2) Yav thaud, yog ib tug pojniam Yixalayees twg tsis muaj menyuam, luag yuav xav tias nws khaum lawm. Qhov no ua rau nws txaj muag heev. (Chivkeeb 30:1, 2) Tsis tas li ntawd xwb, nws tus txiv muaj dua ib tug pojniam hu ua Peninas thiab. Peninas yug tau menyuam coob tus rau nws tus txiv. Peninas khib Hanas heev nws thiaj “txob thuam thiab rhuav Hanas ntsejmuag.” (1 Xamuyees 1:6) Qhov no ua rau Hanas “nyuaj siab thiab quaj tsis xav noj mov.” (1 Xamuyees 1:7, 10) Ua li cas Hanas siab thiaj tus lawm?

5. Kev thov Vajtswv pab Hanas li cas?

⁵ Hanas thov Yehauvas thiab qhia Yehauvas tias nws tu siab thiab mob siab npaum li cas. Thaum nws thov Yehauvas tag nws qhia nws tej kev nyuaj siab rau tus pov thawj hlob Elis. Elis hais rau Hanas tias: “Koj cia li mus tsev kaj siab lug, thiab thov tus TSWV [“Yehauvas,” NWT] uas yog cov Yixalayees tus Vajtswv pub rau koj raws koj tau thov nws lawm.” Tom qab ntawd Hanas “txawm mus noj mov thiab tsis nyuaj siab lawm.” (1 Xamuyees 1:17, 18) Kev thov Vajtswv pab Hanas muaj lub siab tus.

6. (1) Peb kawm tau li cas los ntawm Hanas tej lus thov? (2) Filipis 4:6, 7 hais li cas txog kev thov Vajtswv?

⁶ Yog peb thov Yehauvas tsis tu ncua peb yuav muaj lub siab tus. Hanas thov nws Leej  Txiv ntev loo. (1 Xamuyees 1:12) Peb los yeej tham tau ntev loo nrog peb Leej Txiv Yehauvas txog peb tej kev txhawj xeeb, peb tej kev nyuaj siab, thiab tej uas peb tsis txawj. Txawm peb tsis paub hais lus cuag li tej paj huam rau Yehauvas los nws yeej tsis xav li cas. Muaj tej zaum peb yuav hais tej lus ntsawv siab thiab quaj ncia dhawv los Yehauvas yeej mloog peb tej lus thov. Tsis tas li ntawd xwb peb yuav tsum nco ntsoov Paulus cov lus hauv Filipis 4:6, 7. (Nyeem.) Paulus hais tias thaum peb thov Vajtswv peb yuav tsum nco ntsoov ua Yehauvas tsaug rau tej uas peb muaj. Xws li, ua nws tsaug rau txojsia uas nws muab pub rau peb, tej uas nws tsim, nws txojkev hlub uas nyob mus ib txhis, thiab tej koob hmoov rau yav tom hauv ntej. Hanas tus qauv pab tau peb li cas ntxiv?

7. Hanas thiab nws tus txiv niaj xyoo ua dabtsi?

⁷ Txawm Hanas muaj kev ntxhov siab heev los nws niaj xyoo nrog nws tus txiv mus pe hawm Yehauvas hauv lub nroog Silaus. (1 Xamuyees 1:1-5) Twb yog thaum Hanas nyob tom lub Tuam Tsev uas tus pov thawj hlob Elis nplig nws siab thiab hais tias, “thov tus TSWV [“Yehauvas,” NWT] . . . pub rau koj raws koj tau thov nws lawm.”​—1 Xamuyees 1:9, 10, 17.

8. Kev sib txoos pab tau peb li cas?

⁸ Yog peb mus kev sib txoos tsis tu ncua ces peb yuav muaj kev kaj siab. Ua ntej kev sib txoos pib, muaj ib tug kwvtij thov Vajtswv kom nws lub hwj huam dawb huv nrog nraim peb txojkev sib txoos. Lub siab kaj siab tus yog ib qho ntawm Yehauvas lub hwj huam uas nws pub rau peb. (Kalatias 5:22) Thaum peb tuaj kev sib txoos, txawm hais tias peb muaj kev ntxhov siab kev txhawj xeeb dabtsi los peb cov kwvtij nkauj muam yuav txhawb thiab nplig tau peb lub siab. Yog peb thov Vajtswv thiab mus kev sib txoos ces Yehauvas yuav pab kom peb muaj lub siab kaj siab tus. (Henplais 10:24, 25) Cia peb kawm seb Hanas tus qauv pab tau peb li cas ntxiv.

9. (1) Hanas tej teeb meem puas cia li ploj mus? (2) Ua cas Hanas thiaj tsis chim thiab tsis txhawj lawm?

⁹ Hanas tej teeb meem yeej tsis cia li ploj kiag mus. Thaum Hanas rov tom lub Tuam Tsev los nws tseem nrog Peninas nyob ua ke hauv tib lub tsev. Phau Vajlugkub tsis qhia tias Peninas hloov nws tus cwj pwm. Yog li ntawd Hanas yuav tau niaj hnub mloog Peninas tej lus ntsw. Tiamsis Hanas tsis chim thiab tsis txhawj rau qhov nws tso siab tias Yehauvas twb hnov nws tej lus thov lawm. Hanas cia Yehauvas nplig thiab pab nws ua siab tus. Ib ntu tom qab no, Yehauvas foom koob hmoov rau Hanas, nws thiaj muaj taus menyuam lawm.​—1 Xamuyees 1:19, 20; 2:21.

10. Peb kawm tau li cas los ntawm Hanas tus qauv?

¹⁰ Txawm peb tej teeb meem tsis ploj los peb yeej ua tau siab tus. Txawm peb thov Vajtswv thiab mus kev sib txoos tsis tu ncua los tej zaum peb ib co teeb meem yuav tsis ploj mus. Tiamsis raws li peb kawm txog Hanas, tsis muaj ib yam dabtsi uas yuav cheem tau qhov uas Yehauvas nplig peb lub siab. Yehauvas yuav tsis tso peb tseg thiab yog peb ua siab ntev thev nws yuav muab nqi zog rau peb.​—Henplais 11:6.

11. Ua li cas Paulus thiaj muaj kev txhawj xeeb?

¹¹ Paulus muaj kev txhawj xeeb ntau yam. Xws li nws txhawj txog cov kwvtij nkauj muam tej teeb meem rau qhov nws hlub lawv heev. (2 Kauleethaus 2:4; 11:28) Ntau zaus thaum Paulus mus tshaj tawm, cov neeg uas tawm tsam nws muab nws ntau thiab coj nws mus kaw. Muaj tej zaum nws kuj txhawj “thaum  tsis muaj noj tsis muaj hnav.” (Filipis 4:12) Thiab thaum twg Paulus yuav tau caij nkoj, ntshe nws yuav txhawj heev rau qhov nws twb caij nkoj tog 3 zaug lawm. (2 Kauleethaus 11:23-27) Thaum Paulus muaj kev txhawj xeeb nws ua li cas xwb?

12. Paulus ua li cas thiaj pab tau nws txojkev txhawj xeeb?

¹² Paulus yeej txhawj txog tej teeb meem uas cov kwvtij nkauj muam muaj tiamsis nws tsis cia nws tib leeg ua tus tu lawv tej teeb meem xwb. Nws paub tias nws ib leeg xwb, nws yuav ua tsis tau ib puas tsav yam. Nws thiaj faib haujlwm rau lwm tus los pab lub koom txoos. Xws li, nws muab haujlwm rau Timautes thiab Titus ua vim nws tso siab tau rau nkawd. Qhov uas nws faib haujlwm rau nkawd pab tau nws txojkev txhawj xeeb lawm ntau.​—Filipis 2:19, 20; Titus 1:1, 4, 5.

13. Cov txwj laus xyaum tau Paulus tus qauv li cas?

¹³ Thov lwm tus pab koj. Zoo ib yam li Paulus, muaj coob tus txwj laus txhawj txog cov kwvtij nkauj muam uas muaj teeb meem. Tiamsis ib tug txwj laus xwb yuav pab tsis tau tag nrho sawvdaws hauv lub koom txoos. Yog nws paub li ntawd ces nws yuav thov lwm tus kwvtij pab. Nws kuj yuav pab qhia cov tub hluas kom paub saib xyuas Vajtswv pab yaj thiab.​—2 Timautes 2:2.

14. (1) Paulus puas ntshai tsam luag saib tsis taus nws? (2) Peb kawm tau li cas los ntawm Paulus tus qauv?

¹⁴ Cia lwm tus nplig thiab txhawb koj. Paulus txo hwjchim thiab paub tias nws yuav tsum tau kev txhawb zog ntawm nws cov phoojywg. Nws tsis ntshai tsam luag saib tsis taus nws yog nws cia lwm tus nplig nws siab. Thaum Paulus sau ntawv mus rau Filemoos, Paulus hais tias: “Qhov uas koj muaj lub siab hlub cov ntseeg Vajtswv, . . . qhov ntawd txhawb tau kuv lub zog thiab ua rau kuv zoo siab kawg li.” (Filemoos 7) Paulus kuj hais tuav npe nkaus cov kwvtij uas tau pab nws thaum nws muaj kev nyuaj siab. (Kaulauxais 4:7-11) Thaum peb txo hwjchim thiab cia lwm tus pab peb ces peb cov kwvtij nkauj muam yuav zoo siab hlo pab thiab txhawb peb lub zog.

15. Thaum Paulus ntsib kev nyuaj siab nws ua li cas xwb?

¹⁵ Cia Vajtswv Txojlus pab koj. Paulus paub tias Vajtswv Txojlus yuav txhawb tau nws lub zog. (Loos 15:4) Thiab nws paub tias Vajtswv Txojlus yuav pab tau nws muaj laj lim tswvyim thaum nws muaj kev nyuaj siab. (2 Timautes 3:15, 16) Thaum Paulus raug kaw zaum 2 hauv  lub nroog Loos, nws xav tias tshuav tsis ntev xwb luag yuav muab nws tua. Thaum nws ntsib kev nyuaj siab li no nws ua li cas xwb? Nws hais kom Timautes maj nroos tuaj xyuas nws thiab pab nqa nws cov ntawv tuaj. (2 Timautes 4:6, 7, 9, 13) Cov ntawv no tej zaum yog ib co Nqi Lus Henplais uas Paulus siv los kawm Vajtswv Txojlus. Yog peb niaj hnub kawm Vajtswv Txojlus li Paulus ces txawm peb ntsib kev nyuaj siab li cas los Yehauvas yuav siv nws Txojlus los nplig peb.

16. Daviv txob tau kev ntxhov siab li cas?

¹⁶ Daviv tau ua yuam kev loj heev. Nws ua kev nkauj kev nraug nrog Npasenpas thiab tseem nrhiav kev los tua Npasenpas tus txiv tuag lawm thiab npog nws txojkev txhaum. (2 Xamuyees 12:9) Vim Daviv tsis lees nws tej kev txhaum, thiaj ua rau nws mob thiab nyuaj siab heev thiab nws txojkev sib raug zoo nrog Yehauvas tsis zoo li qub lawm. (Phau Ntawv Nkauj 32:3, 4) Daviv ua li cas xwb thaum nws txob tau kev ntxhov siab li ntawd? Thiab peb yuav ua li cas yog tias peb tau ua yuam kev loj heev lawm?

17. Raws li Phau Ntawv Nkauj 51:1-4, ua cas peb thiaj paub tias Daviv yeej tu siab rau nws tej kev txhaum?

¹⁷ Thov Vajtswv zam txim. Daviv quaj thov Yehauvas thiab lees nws lub txim txhaum. (Nyeem Phau Ntawv Nkauj 51:1-4.) Thaum nws ua li no nws siab thiaj kaj thiab tus lawm. (Phau Ntawv Nkauj 32:1, 2, 4, 5) Yog koj tau ua ib yam dabtsi txhaum loj heev, tsis txhob muab npog cia. Cia li thov Yehauvas thiab lees koj txojkev txhaum rau nws. Yog koj ua li no ces koj yuav kaj siab tuaj thiab koj lub siab yuav tsis nkaug koj heev npaum li qub lawm. Tiamsis yog koj xav kom koj muaj kev sib raug zoo nrog Yehauvas li qub, tseem tshuav lwm yam uas koj yuav tau ua thiab.

18. Daviv puas txais yuav kev qhuab ntuas?

¹⁸ Cia Yehauvas qhuab ntuas koj. Thaum Yehauvas xa Nathas mus qhia Daviv txog Daviv tej kev txhaum, Daviv yeej tsis cam nws zaj lossis hais tias qhov nws ua ntawd yeej tsis phem ua luaj twg. Daviv lees hlo tias nws tau ua txhaum rau Npasenpas tus txiv lawm thiab tshaj qhov ntawd, nws tau ua txhaum rau Yehauvas. Daviv cia Yehauvas qhuab ntuas nws. Yehauvas los kuj zam txim rau Daviv thiab. (2 Xamuyees 12:10-14) Yog peb ua txhaum loj heev lawd peb yuav tau mus cuag cov uas  Yehauvas tsa los saib xyuas peb. (Yakaunpaus 5:14, 15) Thiab peb yuav tsum tsis txhob cam peb zaj tias yog tim li ub li no. Thaum twg peb txais yuav kev qhuab ntuas ces thaum ntawd peb yuav rov muaj lub siab kaj siab tus.

19. Peb yuav tsum zam dabtsi?

¹⁹ Sib zog zam tsis txhob rov mus ua txhaum li qub. Vajntxwv Daviv paub tias yuav tsum muaj Yehauvas pab, Daviv thiaj tsis rov qab mus ua txhaum li qub. (Phau Ntawv Nkauj 51:7, 10, 12) Thaum Yehauvas zam txim rau Daviv lawm, Daviv txiav txim siab tuag nthi tias nws yuav tsum zam tsis txhob xav txog tej uas yuav coj nws mus ua txhaum. Twb yog li no nws thiaj rov kaj siab dua.

20. Peb yuav tsum ua li cas yog tias peb saib Yehauvas txojkev zam txim rau nqi?

²⁰ Peb yuav tsum ua li cas yog tias peb saib Yehauvas txojkev zam txim rau nqi? Peb yuav tau thov Vajtswv zam txim rau peb, txais yuav nws tej kev qhuab ntuas, thiab sib zog zam tsis txhob rov mus ua txhaum li qub. Yog peb ua li no ces peb yuav rov muaj lub siab kaj siab tus. Ib tug kwvtij hu ua Yakaunpaus (James) pom tias yeej muaj tseeb li no. Nws tau ua txhaum loj heev thiab mus cuag cov txwj laus. Nws hais tias: “Thaum kuv mus qhia kuv txojkev txhaum rau cov txwj laus tag mas cuag li muab lub nra txo kiag ntawm kuv nraub qaum lawm. Kuv lub siab kaj lawm ntau.” Yeej txhawb tau peb lub zog kawg li thaum peb paub tias peb “tus TSWV [“Yehauvas,” NWT] nyob ze cov neeg uas tas kev cia siab, nws cawm cov neeg uas tsis muaj chaw vamkhom.”​—Phau Ntawv Nkauj 34:18.

21. Peb yuav tau ua li cas Yehauvas thiaj nplig tau peb?

²¹ Vim peb nyob rau lub sijhawm kawg peb yuav muaj kev txhawj xeeb ntau yam. Yog thaum twg koj txhawj txog ib yam dabtsi, cia li thov Yehauvas pab thaum ntawd. Kawm Vajlugkub tsis tu ncua thiab xyaum Hanas, Paulus, thiab Daviv tus qauv. Thov Yehauvas pab koj to taub txog koj tej kev txhawj xeeb. (Phau Ntawv Nkauj 139:23) Muab koj tej kev txhawj kev ntxhov siab tso rau Yehauvas. Tej kev txhawj xeeb uas koj ua tsis tau dabtsi rau los tso rau Yehauvas pab thiab. Yog koj cia Yehauvas pab koj ces yuav zoo li tus sau nkauj cov lus uas nws hu rau Yehauvas: “Thaum kuv lub siab muaj kev txhawj xeeb ntau, koj kuj nplij kuv lub siab kom xyiv fab.”​—Phau Ntawv Nkauj 94:19, TT.