1, 2. Ua cas peb thiaj tau los ua Yehauvas tsev neeg?

YEHAUVAS caw peb los koom ua nws tsev neeg pe hawm nws. Peb zoo siab kawg uas Yehauvas caw peb li no. Txhua tus hauv tsev neeg no puavleej muab lawv lub neej cob rau Yehauvas thiab tso siab rau nws Leej Tub tus nqi txhiv. Peb yog ib tse neeg uas muaj kev zoo siab heev. Peb ua neej muaj qab hau thiab muaj kev cia siab tias peb yuav tau nyob mus ib txhis saum ntuj lossis hauv ntiajteb no.

² Ua cas peb thiaj tau los ua Yehauvas tsev neeg? Vim nws hlub peb heev nws thiaj txib nws Leej Tub los tuag txhiv peb “kim kawg li.” (1 Kauleethaus 6:20; Yauhas 3:16) Twb yog vim muaj tus nqi txhiv no, peb thiaj li muaj kev sib raug zoo nrog Yehauvas tus uas muaj hwjchim loj kawg nkaus thiab hu nws ua peb Txiv. Zoo li zaj kawm tag los no hais, Yehauvas yeej yog peb Leej Txiv uas zoo tshaj plaws.

3. Thaum peb xav txog txhua yam zoo uas Yehauvas tau ua rau peb, yuav ua rau peb xav li cas? (Saib lub ntsiab me “ Yehauvas Puas Pom Kuv?”)

³ Tej zaum peb yuav xav ib yam li tus sau phau Vajlugkub hais no: “Tus TSWV [“Yehauvas,” NWT] ua txhua yam zoo rau kuv, kuv yuav muab dabtsi pauj nws txiaj ntsig?” (Phau Ntawv Nkauj 116:12) Qhov tseeb tiag, peb yeej pauj tsis tau peb Leej Txiv uas nyob saum ntuj tej txiaj ntsig rov qab tiamsis peb hlub tau nws. Peb hlub Vajtswv rau qhov “Vajtswv twb xub hlub peb” ua ntej lawm. (1 Yauhas 4:19) Peb yuav qhia tias peb hlub Yehauvas li cas?

4. Raws li Yakaunpaus 4:8, vim li cas peb yuav tsum txav los ze Yehauvas?

⁴ Yehauvas xav kom peb txav los ze nws thiab nrog nws tham. (Nyeem Yakaunpaus 4:8.) Nws yeej yuav mloog peb tej lus thov thiab nws xav kom peb thov nws “tsis tseg tsis tu.” (Loos 12:12) Yeej tsis muaj ib zaug uas Yehauvas tsis khoom lossis sab dhau hwv lawm los mloog peb. Yog li ntawd, peb yuav tau mloog nws lus thiab. Peb mloog nws lus thaum peb nyeem phau Vajlugkub thiab nyeem peb tej ntaub ntawv Vajlugkub. Tsis tas li ntawd xwb, peb kuj mloog nws lus thaum peb ua tib zoo mloog tom tej kev sib txoos. Cov menyuam uas niaj hnub nrog lawv niam lawv txiv tham yeej ncawg lawv niam lawv txiv dua, zoo ib yam li ntawd yog peb niaj hnub nrog Yehauvas tham ces peb yuav ncawg nws thiab.

5. Peb yuav thov Yehauvas li cas?

⁵ Yehauvas xav kom peb qhia siab rau nws. (Phau Ntawv Nkauj 62:8) Thaum koj thov Yehauvas, koj thov nws li cas xwb? Puas yog koj lam tau lam thov thiab hais qhov qub tas mus li xwb los yog koj thov nws tuaj nruab siab tuaj? Peb yeej hlub Yehauvas kawg li thiab xav kom peb txojkev sib raug zoo nrog nws ruaj khov. Yog li ntawd, kav tsij nrog Yehauvas tham tsis tu ncua. Qhia txhua yam rau nws. Qhia koj tej kev zoo siab thiab kev nyuaj siab rau nws. Peb tso siab tau tias peb yeej mus cuag tau nws.

6. Yuav kom peb nyob nrog nraim peb Leej Txiv peb yuav tsum ua li cas?

⁶ Yuav kom peb nyob nrog nraim peb Leej Txiv peb yuav tsum nco nws txiaj ntsig. Peb xav ib yam li tus sau nkauj no hais: “Tus TSWV [“Yehauvas,” NWT], peb tus Vajtswv, koj tau ua ntau yam txujci pab peb los lawm; yeej tsis muaj ib tug zoo li koj! Koj npaj ntau yam zoo rau peb. Kuv yeej piav tsis tau tej ntawd, rau qhov tej ntawd muaj ntau heev.” (Phau Ntawv Nkauj 40:5) Tsis yog tias peb tsuas ua Yehauvas tsaug xwb tiamsis tej peb ua thiab tej peb hais yuav tsum qhia tias peb nco nws txiaj ntsim. Vim peb coj li no peb thiaj tsis zoo li cov neeg niaj hnub nimno uas tsis nco Vajtswv txiaj ntsig. Qhov uas neeg feem coob tsis nco luag txiaj ntsig yog ib qho uas qhia tias peb nyob rau tiam kawg lawm. (2 Timautes 3:1, 2) Peb yuav tsum tsis txhob coj li ntawd.

7. (1) Yehauvas xav kom peb ua dabtsi? (2) Vim li cas Yehauvas xav kom peb ua li ntawd?

⁷ Cov niam cov txiv yeej tsis xav kom lawv cov menyuam sib cav sib ceg tiamsis xav kom lawv paub sib hlub. Yehauvas los yeej xav kom cov uas pe hawm nws, ib leeg hlub ib leeg. Qhov uas peb paub sib hlub li no qhia tias peb yog cov tseem Khixatia. (Yauhas 13:35) Peb xav ib yam li tus sau nkauj no hais: “Qhov uas Vajtswv haivneeg los nyob ua ke li tej kwvtij yog ib qhov uas zoo thiab ua rau lawv muaj kev zoo siab heev!” (Phau Ntawv Nkauj 133:1) Thaum peb hlub peb cov kwvtij nkauj muam li no ces qhia tias peb hlub Yehauvas thiab. (1 Yauhas 4:20) Qhov uas peb tau los ua ib tse neeg uas “siab dawb siab zoo, ib tug hlub ib tug” yog ib qho uas zoo kawg nkaus li!​—Efexus 4:32.

8. Raws li 1 Yauhas 5:3, yog vim li cas peb thiaj mloog Yehauvas lus?

⁸ Yehauvas xav kom metub menyuam mloog niam thiab txiv lus. (Efexus 6:1) Nws kuj xav kom peb mloog nws lus thiab. Yeej tsim nyog peb mloog Yehauvas lus vim nws yog tus tsim peb, nws yog tus yug peb txojsia, thiab nws txawj ntse tshaj txhua leej txiv hauv ntiajteb no. Txawm li ntawd los, nws tsis yuam kom peb mloog nws lus. Nws muab kev ywj pheej rau peb seb peb yuav ua li cas. Thaum peb mloog nws lus vim peb hlub nws thiaj ua rau nws zoo siab heev. Qhov uas peb mloog nws  lus vim peb hlub nws yog qhov uas tseem ceeb tshaj plaws.​—Nyeem 1 Yauhas 5:3.

9, 10. Vim li cas thiaj tsim nyog peb mloog Vajtswv lus thiab ua raws li nws tej kevcai?

⁹ Cov niam cov txiv yeej tsis xav kom lawv cov menyuam raug teeb meem dabtsi. Vim li ntawd lawv thiaj cob qhia lawv cov menyuam. Thaum cov menyuam mloog lus ces qhia tias lawv hwm thiab tso siab rau lawv niam lawv txiv. Yog li ntawd, haj yam tsim nyog rau peb mloog peb Leej Txiv Yehauvas lus thiab ua raws li nws tej kevcai. Yog peb ua li no ces qhia tias peb hlub thiab hwm nws. Tsis tas li ntawd xwb, kuj yuav pab tau peb thiab. (Yaxayas 48:17, 18) Tiamsis yog peb tsis mloog Yehauvas lus ces peb yuav raug kev phom sij.​—Kalatias 6:7, 8.

¹⁰ Yehauvas paub tias qhovtwg zoo tshaj rau peb. Yog peb ua peb lub neej kom haum Yehauvas siab ces yuav tiv thaiv tau peb ntawm tej yam uas yuav ua rau peb raug mob lossis muaj kev nyuaj siab lossis plam peb txojkev sib raug zoo nrog Yehauvas. Alaula (Aurora) uas nyob tebchaws Amelikas hais tias: “Raws li kuv pom mas thaum peb mloog Yehauvas lus, peb tau lub neej zoo dua.” Rau peb los yeej ib yam thiab. Puas muaj ib zaug uas koj mloog Yehauvas lus es ho pab tau koj thiab?

11. Kev thov Vajtswv yuav pab tau peb li cas?

¹¹ Kev thov Vajtswv yuav pab peb mloog Vajtswv lus. Muaj tej zaum nyuaj heev rau peb mloog Vajtswv lus vim peb yog noob txaug neeg txhaum. Txawm li ntawd los peb yuav tsum sib zog peem peb thiaj tsis mus  ua txhaum. Ib tug sau nkauj thov Vajtswv li no: “Thov koj pab kom kuv txawj mloog koj lus.” (Phau Ntawv Nkauj 51:12) Deniv (Denise) uas yog ib tug tho kev hais tias: “Thaum nyuaj heev rau kuv ua raws li Yehauvas hais, kuv thov kom nws pab kuv.” Yog peb thov Vajtswv pab peb mloog nws lus ces nws yeej yuav pab peb.​—Lukas 11:9-13.

12. Raws li Efexus 5:1, peb yuav tsum ua dabtsi?

¹² Nyeem Efexus 5:1. Vim peb yog “Vajtswv cov menyuam uas Vajtswv hlub,” peb thiaj xyaum nws tus yam ntxwv. Yog peb xyaum Yehauvas ces peb yuav paub hlub thiab paub ua zoo rau lwm tus. Peb kuj yuav paub zam txim rau lawv thiab. Yog peb coj zoo ces yuav ua rau cov uas tsis paub Vajtswv xav paub txog nws. (1 Petus 2:12) Yog cov niam cov txiv Khixatia xyaum coj li Yehauvas thaum lawv cob qhia lawv cov menyuam ces yuav pab kom lawv cov menyuam muaj kev sib raug zoo nrog Yehauvas.

13. Peb yuav ua li cas peb thiaj muaj lub siab tawv?

¹³ Menyuam yaus kheev qhuas thiab tham txog lawv txiv rau lwm tus. Ib yam li ntawd, peb yeej xav qhuas peb Leej Txiv Yehauvas thiab xav kom lwm tus paub txog nws. Peb xav ib yam li Vajntxwv Daviv cov lus no: “Kuv yuav qhuas [Yehauvas].” (Phau Ntawv Nkauj 34:2) Tiamsis yog peb txaj muag tham txog Yehauvas nev? Peb yuav ua li cas peb thiaj muaj lub siab tawv? Xav seb Yehauvas yuav zoo siab  npaum li cas thaum peb qhia lwm tus txog nws thiab xav seb yuav pab tau lawv lub neej npaum li cas. Yog peb muab xav li no ces yuav pab kom peb muaj lub siab tawv. Yehauvas twb pab cov Khixatia thawj 100 xyoo muaj lub siab tawv, nws yeej yuav pab peb thiab.​—1 Thexalaunikes 2:2.

14. Ua li cas thiaj tseem ceeb ua luaj rau peb coj tibneeg los ua Yexus cov thwjtim?

¹⁴ Yehauvas tsis xaiv ntsej xaiv muag. Nws zoo siab heev thaum nws pom peb hlub lwm tus, txawm lawv yog haivneeg twg los xij. (Tes Haujlwm 10:34, 35) Peb qhia tias peb hlub lwm leej lwm tus thaum peb tshaj tawm txoj xov zoo. (Mathais 28:19, 20) Qhov no yuav pab tau lawv li cas? Yog lawv mloog txoj xov zoo ces yuav pab tau lawv lub neej tamsim no thiab yav tom hauv ntej lawv yuav tau nyob mus ib txhis hauv lub Vaj Kaj Siab.​—1 Timautes 4:16.

15, 16. Vim li cas peb thiaj muaj kev zoo siab?

¹⁵ Yehauvas hlub nws tsev neeg thiab xav kom lawv muaj kev zoo siab. (Yaxayas 65:14) Txawm peb muaj kev nyuaj siab ntxhov plawv los peb yeej tseem muaj tau kev zoo siab thiab. Yog vim li cas? Vim peb paub tias peb Leej Txiv saum ntuj hlub peb heev thiab peb paub qhov tseeb txog nws Txojlus. (Yelemis 15:16) Tsis tas li ntawd xwb, peb yog ib tse neeg uas hlub Vajtswv, nyiam nws tej kevcai, thiab ib leeg txawj hlub ib leeg.​—Phau Ntawv Nkauj 106:4, 5.

¹⁶ Peb muaj kev zoo siab rau qhov peb paub tias yav tom hauv ntej lub neej tseem yuav zoo tshaj no. Tsis ntev tom ntej no Yehauvas yuav tshem tag nrho tej kev phem kev limhiam huv tibsi mus. Nws yuav siv nws lub Nceeg Vaj los kho lub ntiajteb no kom rov ua ib lub vaj kaj siab dua. Peb kuj muaj kev vam kev cia siab tias cov tas sim neej lawm yuav ciaj sawv rov los nrog peb nyob. (Yauhas 5:28, 29) Thaum ntawd peb yuav zoo siab tshaj plaws li! Qhov tseem ceeb tshaj, yav tom hauv ntej txhua leej txhua tus tsis hais cov nyob saum ntuj los yog nyob hauv ntiajteb yuav hwm, yuav qhuas, thiab yuav pe hawm peb Leej Txiv Yehauvas li nws tsim nyog tau.