1. Yog ib tug neeg xav mus cuag huab tais Pawxias, nws yuav tsum tau ua li cas?

PUAG THAUM UB, hauv tebchaws Pawxias yog ib tug neeg xav mus cuag huab tais, nws yuav tau mus rau hauv lub tuam ceeb nroog Susas uas huab tais nyob. Tiamsis yog huab tais tsis tso cai ces nws yeej mus cuag tsis tau. Yog nws cia li mus xwb ces nws yuav plam nws txojsia los muaj.​—Exethaws 4:11.

2. Yehauvas puas xav kom peb mus cuag nws?

² Peb zoo siab heev uas Yehauvas tsis zoo li huab tais Pawxias. Yehauvas muaj hwjchim tshaj tibneeg tej nom tswv. Tsis tas li ntawd, Yehauvas yog tus tsim txhua yam, yog tus muaj hwjchim loj kawg nkaus, thiab yog tus kav ib puas tsav yam. Txawm li ntawd los nws tseem cia peb mus cuag nws thaum twg los tau thiab hu nws ua “Txiv.” (Mathais 6:9) Peb zoo siab heev uas Yehauvas xav kom peb mus cuag nws.

3. (1) Ua cas thiaj tsim nyog peb muab Yehauvas hu ua peb “Leej Txiv”? (2) Zaj kawm no peb yuav tham txog dabtsi?

³ Yehauvas yog tus pub txojsia rau peb, yog li ntawd yeej tsim nyog peb muab nws hu ua peb “Leej Txiv.” (Phau Ntawv Nkauj 36:9) Rau qhov nws yog peb Txiv, peb yuav tsum mloog nws lus. Yog peb mloog nws lus ces peb yuav tau txais ntau yam koob hmoov zoo xws li txojsia ntev dhawv mus ib txhis hauv ntiajteb no lossis mus nyob saum ntuj. (Henplais 12:9) Niaj hnub no los peb yeej tau txais koob hmoov ntau yam thiab. Zaj kawm no peb yuav tham tias Yehauvas yog ib Leej Txiv uas hlub peb thiab nws yuav tsis tso peb tseg ib zaug li. Ua  ntej no, cia peb tham seb vim li cas peb thiaj paub tias peb Leej Txiv Yehauvas hlub peb tiag thiab xav pab peb.

4. Ua cas thiaj tsis yoojyim rau ib txhia muab Yehauvas hu ua lawv Txiv?

⁴ Puas yoojyim rau koj muab Vajtswv hu ua koj Txiv? Muaj ib txhia xav tias Yehauvas muaj hwjchim heev, lawv yeej tsis tseem ceeb dabtsi li. Lawv tsis xav tias Vajtswv yuav hmov tshua txog lawv. Tiamsis peb Leej Txiv Yehauvas tsis xav kom peb xav li ntawd. Yehauvas yog tus muab txojsia rau peb thiab nws xav kom peb mus cuag nws. Thaum tus tubtxib Paulus qhia li ntawd tag rau cov uas mloog nws hauv lub nroog Athees, nws hais ntxiv tias “Vajtswv yeej nyob tsis deb ntawm peb txhua tug.” (Tes Haujlwm 17:24-29) Vajtswv xav kom peb mus cuag nws ib yam li tus menyuam yaus uas mus cuag nws niam nws txiv.

5. Tus muam no tus qauv qhia li cas rau peb?

⁵ Muaj ib txhia, nyuaj heev rau lawv muab Yehauvas hu ua Txiv rau qhov lawv txiv kiag los twb tsis hlub lawv. Ib tug muam hais tias: “Kuv txiv ib txwm cem cem kuv xwb. Twb yog vim li ntawd thaum kuv pib kawm Vajlugkub thiaj nyuaj heev rau kuv txav ze rau Leej Txiv saum ntuj. Tiamsis thaum kuv los paub Yehauvas zoo, kuv tsis xav li ntawd lawm.” Koj puas zoo li ntawd thiab? Yog koj zoo li ntawd los tsis txhob poob siab, koj yeej yuav pom tias Yehauvas yog ib Leej Txiv uas zoo tshaj plaws.

6. Raws li Mathais 11:27, Yehauvas ua li cas peb thiaj paub tias nws yog ib Leej Txiv uas hlub peb heev?

⁶ Yehauvas tau muab tej Yexus hais thiab ua sau cia rau hauv phau Vajlugkub kom peb thiaj paub tias Yehauvas yog Leej Txiv uas hlub peb heev. (Nyeem Mathais 11:27.) Yexus coj ib yam li nws Txiv. Yexus thiaj hais tau tias: “Tus uas pom kuv, tus ntawd twb pom Leej Txiv lawm.” (Yauhas 14:9) Hauv phau Mathais, Malakaus, Lukas, thiab Yauhas, Yexus muab Yehauvas hu ua “Leej Txiv” ntau zaus. Ua cas Yexus thiaj nquag qhia tias Yehauvas yog peb Leej Txiv? Ib qho yog vim nws xav kom tibneeg paub tias Yehauvas yog ib Leej Txiv uas hlub peb heev.​—Yauhas 17:25, 26.

7. Yehauvas coj li cas nrog nws tus Tub?

⁷ Yehauvas coj li cas nrog nws tus Tub Yexus? Yexus thov Yehauvas thaum twg los Yehauvas yeej hnov. Nws tsis yog hnov xwb tiamsis nws kuj teb Yexus tej lus thov thiab. (Yauhas 11:41, 42) Txawm Yexus ntsib kev nyuaj siab li cas los Yexus paub tias nws Txiv yeej hlub thiab txhawb nws zog.​—Lukas 22:42, 43.

8. Yehauvas pab Yexus li cas?

⁸ Yexus hais tias: “Kuv muaj txojsia vim yog muaj leej Txiv.” (Yauhas 6:57, TT ) Yexus hais li no rau qhov nws pom tias nws Txiv yog tus muab txojsia rau nws thiab yog tus yug nws txojsia. Yexus tso siab plhuav rau nws Txiv Yehauvas. Thiab Yehauvas yeej tsis pub Yexus tu ncua ib yam dabtsi li. Qhov tseem ceeb tshaj, Yehauvas pab Yexus kom Yexus npuab siab rawv rau nws.​—Mathais 4:4.

9. Yehauvas qhia tias nws hlub Yexus li cas?

⁹ Vim Yehauvas hlub nws tus Tub Yexus heev, Yexus thiaj tso siab tau tias nws Txiv yeej nrog nraim nws. (Mathais 26:53; Yauhas 8:16) Txawm Yehauvas tsis tiv thaiv txhua yam phem uas los raug Yexus los Yehauvas pab kom Yexus thev taus. Yexus yeej paub lawm tias txawm nws raug dabtsi los tsuas yog ib nyuag ntu xwb. (Henplais 12:2) Yehauvas qhia tias nws hlub Yexus li cas ntxiv? Yehauvas  mloog Yexus tej lus thov, tsis pub nws tu ncua ib yam dabtsi, cob qhia nws, thiab pab nws. (Yauhas 5:20; 8:28) Nimno cia peb tham seb peb Leej Txiv Yehauvas pab peb li cas.

10. Raws li Phau Ntawv Nkauj 66:19, 20, Yehauvas qhia tias nws hlub peb li cas?

¹⁰ Yehauvas mloog peb tej lus thov. (Nyeem Phau Ntawv Nkauj 66:19, 20.) Yehauvas txhawb kom peb thov nws ib hnub pes tsawg zaus los tau. (1 Thexalaunikes 5:17) Peb nyob qhovtwg thiab peb ua dabtsi los peb thov tau Yehauvas. Nws yeej tos ntsoov mloog peb tej lus thov. Yog peb ntseeg tias Yehauvas yeej mloog peb tej lus thov ces peb yuav txav ze nws dua. Ib tug sau nkauj sau tias: “Kuv hlub tus TSWV [“Yehauvas,” NWT], vim nws hnov kuv tej lus.”​—Phau Ntawv Nkauj 116:1.

11. Yehauvas teb peb tej lus thov li cas?

¹¹ Peb Leej Txiv tsis yog mloog peb tej lus thov xwb tiamsis nws kuj teb peb tej lus thov thiab. Tus tubtxib Yauhas qhia peb tias: “Yog peb thov tej uas raws li Vajtswv lub siab nyiam, Vajtswv yeej yuav mloog peb tej lus thov.” (1 Yauhas 5:14, 15) Tiamsis Yehauvas paub tias yam twg zoo dua rau peb. Yog li ntawd, muaj tej zaum nws yuav tsis teb peb raws li peb lub siab xav hos muaj tej zaum nws xav kom peb ua siab ntev tos.​—2 Kauleethaus 12:7-9.

12, 13. Yehauvas saib xyuas peb li cas?

¹² Yehauvas saib xyuas peb. Yehauvas yeej yuav yug peb ib yam li nws hais kom cov txiv tsev yug lawv tsev neeg. (1 Timautes 5:8) Nws yuav tsis pub nws cov menyuam tu ncua ib yam dabtsi li. Nws tsis xav kom peb txhawj tias peb yuav noj dabtsi yuav hnav dabtsi lossis yuav nyob qhovtwg. (Mathais 6:32, 33; 7:11) Peb Leej Txiv Yehauvas hlub peb heev, nws twb npaj tau txhua yam zoo rau peb rau yav tom hauv ntej lawm.

¹³ Qhov tseem ceeb tshaj, Yehauvas pab kom peb muaj kev sib raug zoo nrog nws. Hauv phau Vajlugkub nws qhia peb tias nws zoo li cas, nws lub ntsiab thaum xub thawj yog dabtsi, vim li cas nws thiaj tsim muaj tibneeg, thiab yav tom hauv ntej yuav zoo li cas. Nws siv peb niam peb txiv lossis lwm tus los pab peb paub txog nws. Thiab nws siv cov txwj laus thiab cov kwvtij nkauj muam hauv lub koom txoos los pab peb txav ze rau nws. Tsis tas li ntawd xwb, Yehauvas tseem siv cov kev sib txoos los cob qhia peb thiab peb cov kwvtij nkauj muam. Tej no qhia tias Yehauvas hlub tshua peb txhua leej txhua tus.​—Phau Ntawv Nkauj 32:8.

14. (1) Ua cas Yehauvas thiaj cob qhia peb? (2) Yehauvas cob qhia peb li cas?

¹⁴ Yehauvas cob qhia peb. Peb zoo tsis tiav li Yexus. Yog li ntawd, tej zaum Yehauvas yuav tau qhuab ntuas peb kom thiaj cob qhia tau peb. Vajtswv Txojlus hais tias: “Tus Tswv [“Yehauvas,” NWT] qhuab ntuas txhua tus uas nws hlub.” (Henplais 12:6, 7) Yehauvas qhuab ntuas peb li cas? Tej zaum tej peb nyeem hauv phau Vajlugkub lossis tej peb hnov tom kev sib txoos ua rau peb ras tias muaj tej yam peb yuav tau hloov. Lossis tej zaum Yehauvas siv cov txwj laus los qhuab ntuas peb. Txawm li cas los, Yehauvas qhuab ntuas peb rau qhov nws hlub peb xwb.​—Yelemis 30:11.

15. Yehauvas pab peb li cas?

¹⁵ Yehauvas pab peb thev peb tej kev nyuaj siab. Zoo ib yam li ib leej txiv pab nws cov menyuam uas muaj kev nyuaj siab, peb Leej Txiv Yehauvas yuav pab peb ib yam nkaus. Nws pub nws lub hwj huam dawb huv los pab tiv thaiv peb ntawm tej uas yuav rhuav tau peb  txojkev sib raug zoo nrog nws. (Lukas 11:13) Yehauvas kuj pab peb thaum peb qaug zog lossis muaj kev txhawj xeeb. Nws pab peb li cas? Nws muab ib txojkev cia siab uas zoo heev rau peb. Txojkev cia siab ntawd pab peb thev taus peb tej kev nyuaj siab. Muab xav li no: Txawm peb raug li cas los, yav tom hauv ntej peb Leej Txiv Yehauvas yuav muab tej ntawd rhuav tshem kom tag mus. Peb tej teeb meem, peb tej kev nyuaj siab ntxhov plawv, tsuas yog ib ntu xwb tiamsis tej koob hmoov uas Yehauvas yuav muab rau peb yuav kav mus ib txhis.​—2 Kauleethaus 4:16-18.

16. Tau muaj li cas thaum Adas tsis mloog nws Leej Txiv saum ntuj lus?

¹⁶ Tej uas Yehauvas ua thaum Adas tsis mloog nws lus qhia tias Yehauvas hlub peb heev. Thaum Adas tsis mloog nws Leej Txiv saum ntuj lus, Adas thiab nws cov xeeb leej xeeb ntxwv tsis tau ua Yehauvas tsev neeg lawm. (Loos 5:12; 7:14) Tiamsis Yehauvas tau ua ib yam los pab Adas cov xeeb ntxwv.

17. Yehauvas ua li cas xwb, tom qab Adas fav xeeb rau nws?

¹⁷ Yehauvas rau txim rau Adas tiamsis nws cog lus tias nws yuav cawm Adas cov xeeb leej xeeb ntxwv. Cov uas mloog Yehauvas lus, Yehauvas yuav coj lawv rov los ua nws tsev neeg. (Chivkeeb 3:15; Loos 8:20, 21) Nws ua li ntawd li cas? Yehauvas muab nws tus Tub Yexus uas nws hlub tshaj plaws los ua tus nqi txhiv peb. Qhov uas Yehauvas ua no qhia tias nws hlub peb heev.​—Yauhas 3:16.

18. Txawm tias peb ncaim Yehauvas lawm los, ua cas peb thiaj paub tias nws tseem xav yuav peb rov los ua nws cov menyuam?

¹⁸ Txawm peb yog noob txaug neeg txhaum los Yehauvas tseem yuav peb los ua nws tsev neeg. Yehauvas tsis tau xav ib zaug tias peb  yog ib qho chaw tab kaum rau nws. Txawm peb yuam kev thiab nrug ntawm Yehauvas lawm los Yehauvas yeej tos ntsoov seb thaum twg peb yuav rov qab los. Yexus zaj lus piv txwv txog tus tub uas ncaim nws tsev neeg ib ntus qhia txog Yehauvas txojkev hlub rau peb. (Lukas 15:11-32) Leej txiv hauv zaj lus piv txwv no yeej tos ntsoov seb thaum twg nws tus tub yuav rov qab los. Thaum nws pom nws tus tub rov los, nws maj nroos mus coj nws tus tub los tsev. Yog peb ncaim Yehauvas ib ntus tiamsis ho hloov siab xav rov qab los, Yehauvas yuav zoo siab hlo txais yuav peb.

19. Yehauvas yuav kho tej uas Adas muab ua plam lawm li cas?

¹⁹ Peb Leej Txiv yuav kho tej uas Adas muab ua plam lawm. Tom qab Adas fav xeeb rau Yehauvas, Yehauvas npaj tseg tias nws yuav xaiv 144,000 tus tibneeg mus ua pov thawj thiab vajntxwv kav saum ntuj nrog nws Leej Tub Yexus. Hauv lub qab ntuj tshiab, Yexus thiab cov nrog nws kav saum ntuj yuav pab kom cov neeg uas muab siab npuab Yehauvas rov zoo tiav log. Thaum kev raug sim zaum kawg tas lawm, cov muab siab npuab Vajtswv yuav tau txojsia ntev dhawv mus ib txhis. Peb Leej Txiv saum ntuj yuav zoo siab heev thaum nws pom tag nrho nws cov tub cov ntxhais nyob puv nkaus hauv ntiajteb no. Thaum no yuav yog lub caij zoo kawg nkaus li!

20. (1) Yehauvas qhia tias nws hlub peb li cas? (2) Peb yuav kawm txog dabtsi zaj tom ntej?

²⁰ Yehauvas yeej hlub peb kawg nkaus li. Nws yog peb Leej Txiv uas zoo tshaj plaws. Nws hnov peb tej lus thov thiab tsis pub peb tus ncua ib yam dabtsi li. Nws muab tej uas peb cheem tsum rau peb thiab nws pab peb muaj kev sib raug zoo nrog nws. Nws cob qhia peb thiab pab peb thev peb tej kev nyuaj siab. Nws tseem yuav ua ntau yam zoo tshaj no rau peb yav tom hauv ntej. Thaum peb paub tias peb Leej Txiv Yehauvas hlub thiab hmov tshua peb, ua rau peb zoo siab kawg li. Zaj tom ntej peb yuav tham seb peb yuav ua li cas qhia Yehauvas tias peb nco Yehauvas txiaj ntsig rau nws txojkev hlub.