NYOB rau Mauxes Txoj Kevcai yog leejtwg xav siv tus nquab liab rwg lossis tus nquab nyeg coj los fij rau Yehauvas los yeej tau. Ob tug nquab no yeej siv mus mus los los hauv Mauxes Tej Kevcai coj los fij rau Yehauvas. (Levis Kevcai 1:14; 12:8; 14:30) Ua li cas ho siv 2 hom nquab no? Ib qho mas tus nquab liab rwg tsis tshua muaj pes tsawg. Cia peb mus tham seb muaj li cas.

Cov nquab liab rwg nyob tsis muaj chaw. Thaum lub caij ntuj sov cov noog ntawd nyob rau ntawm lub tebchaws Yixalayees. Tiamsis thaum txog caij ntuj no ces cov noog no ya mus rau nram qab teb kom thiaj sov tiamsis thaum caij nplooj ntoos hlav cov noog ntawd rov qab ya mus rau pem tebchaws Yixalayees. (Xalumoos Tej Nkauj 2:11, 12; Yelemis 8:7) Yog li ntawd txheej puag thaum ub cov Yixalayees thiaj nrhiav tsis tau cov nquab liab rwg los mus siv rau lub caij ntuj no.

Cov nquab nyeg nyob ruaj chaw tsis tsiv mus rau ub rau no. Yog li ntawd, cov nquab no thiaj muaj thawm niaj thawm xyoo hauv tebchaws Yixalayees. (Muab piv rau Yauhas 2:14, 16.) Muaj ib phau ntawv qhia txog tej nroj tsuag thiab tsiaj txhu nyob hauv phau Vajlugkub tau hais li no: “Tag nrho tej zej zog hauv lub tebchaws Palexatees (Palestine) muaj cov nquab nyeg nyob txwm chaw. Ib yim neeg twg lub tsev yeej muaj qhov rau ntawm phab ntsa rau tej nquab nyeg tau nyob.”​—Muab piv rau Yaxayas 60:8.

Yog li ntawd, Yehauvas yeej qhia rau cov Yixalayees hais tias nws hmov tshua lawv thiab txais yuav tej nquab uas lawv coj tuaj fij rau nws thawm niaj thawm xyoo.