ZAJ KAWM 10
Muab Koj “Lub Siab Qub” Tso Pov Tseg
“Muab nej lub siab qub thiab tej kev phem uas nej ibtxwm ua tso povtseg.”—KAULAUXAIS 3:9.
ZAJ NKAUJ 29 Ua Lub Neej Kom Phim Peb Lub Npe
ZAJ NO THAM TXOG DAB TSI? a
1. Piav seb ua ntej koj kawm Vajlugkub, koj ua lub neej zoo li cas.
UA NTEJ koj kawm Vajlugkub nrog Yehauvas Cov Tim Khawv, koj lub neej zoo li cas xwb? Rau peb ib txhia, hais txog lub neej qub mas peb twb tsis xav hais txog kiag li vim peb lub neej qub ntawd coj raws li lub qab ntuj tej kev coj noj coj ua. Yog li ntawd, peb lub neej thiaj zoo raws li Efexus 2:12 uas hais tias: “Nej tsis muaj chaw cia siab thiab nej tsis paub Vajtswv.” Tiam sis thaum koj kawm Vajlugkub ua rau txhua yam txauv tag nrho.
2. Thaum koj kawm Vajlugkub, muaj li cas?
2 Thaum koj pib kawm Vajlugkub, koj txawm paub tias Vajtswv tus uas nyob saum ntuj ceeb tsheej hlub koj kawg nkaus li. Tsis tas li ntawd, koj mam li nkag siab tias yog koj xav ua kom haum Yehauvas siab thiab xav los nyob hauv nws tsev tib neeg teev tiam nws, koj yuav tau muab koj lub neej qub tso pov tseg. Ntxiv ntawd, koj yuav tau xyaum coj raws li Yehauvas tej kev coj noj coj ua.—Efexus 5:3-5.
3. Raws li Kaulauxais 3:9, 10, Yehauvas xav kom peb ua li cas, thiab nyob hauv zaj kawm no yuav piav txog dab tsi?
3 Yehauvas tus uas tsim ib puas tsav yam yeej muaj cai los hais nws cov tib neeg kom coj li cas rau li cas. Tsis tas li ntawd, nws yuav kom peb muab “lub siab qub” tso pov tseg ua ntej peb ua kev cai raus dej thiab peem kam tiag kom tsis txhob rov mus coj lub siab qub lawm. b (Nyeem Kaulauxais 3:9, 10.) Yog muaj ib tug twg xav ua kev cai raus dej, zaj kawm no yuav pab kom nws rov tshuaj nws tus kheej li no: (1) “Lub siab qub” yog li cas tiag? (2) Vim li cas Yehauvas xav kom peb muab lub siab qub tso pov tseg? (3) Yuav ua li cas peb thiaj tso tau lub siab qub? Tsis tas li ntawd, zaj kawm no yuav pab kom cov uas twb ua kev cai raus dej tag lawd, tsis txhob rov mus coj lub siab qub.
“LUB SIAB QUB” YOG LI CAS TIAG?
4. Tus tib neeg uas coj lub siab qub kheev coj li cas xwb?
4 Tus tib neeg uas coj “lub siab qub”, kheev coj li neeg lub siab ntshaw. Nws yuav xav txog nws tus kheej, siab heev, tsis ris luag txiaj ntsig, thiab tsab hlob. Nws yuav nyiam saib tej duab liab qab thiab saib tej yeeb yaj kiab uas nyiam sib ntaus sib tua los sis ua kev nkauj kev nraug. Tej zaum, nws lub siab yuav rov qab nkaug nws tias tej nws ua tsis yog lawm. Tiam sis nws tsis kam hloov nws tus cwj pwm.—Kalatias 5:19-21; 2 Timautes 3:2-5.
Yog peb muab “lub siab qub” tso pov tseg ces peb tus cwj pwm los sis tej yam uas peb niaj zaus ua yuav yuam tsis tau peb ntxiv lawm (Saib nqe 5) g
5. Peb puas yuav muab tau tag nrho lub siab qub tso pov tseg?
5 Peb yog noob txaug neeg txhaum. Ces yog li ntawd, peb yuav muab tsis tau tag nrho tej kev xav thiab tej peb lub siab ntshaw rho tawm hauv peb lub siab lub ntsws mus. Muaj qho lub sij hawm, peb yeej yuav ua tau los sis hais tau tej yam uas ua rau peb xav txog lig. (Yelemis 17:9; Yakaunpaus 3:2) Tiam sis yog peb muab lub siab qub tso pov tseg ces peb tus cwj pwm los sis tej yam uas peb niaj zaus ua yuav yuam tsis tau peb ntxiv lawm. Peb yuav tsis coj lub qub siab tiam sis peb yuav coj tau lub siab tshiab.—Yaxayas 55:7; nyeem Tes Haujlwm 3:19.
6. Ua li cas Yehauvas xav kom peb muab lub siab qub thiab tus cwj pwm qub tso pov tseg?
6 Yehauvas xav kom peb muab lub siab qub thiab tus cwj pwm qub tso pov tseg vim hais tias nws hmov tshua peb thiab xav kom peb tau zoo ua neej nyob. (Yaxayas 48:17, 18) Nws paub hais tias cov thim rov qab mus ua kev txaug kev txhaum tsuas tsub kev nyuaj siab rov qab rau lawv tus kheej thiab cov niaj hnub poo lawv. Thaum Yehauvas pom peb thim rov mus ua tej yam tsis zoo thiab ua rau cov neeg peb paub nyuaj siab ntsuav, mas ua rau Yehauvas ntxhov siab hnyo.
7. Raws li Loos 12:1, 2, piav seb peb muaj rab peev xwm xaiv tau li cas.
7 Peb ib txhia muaj tej phooj ywg kwv luag thiab peb tsev neeg kuj thuam luag peb thaum peb hloov tsis coj lub siab qub lawm. (1 Petus 4:3, 4) Tej zaum lawv yuav hais rau peb tias tsis txhob cia lwm tus cob cob peb ua li ub li no. Tiam sis cov tsis coj li Yehauvas kab lig kevcai los yeej tsis muaj kev ywj pheej ua luaj twg. Qhov tseeb tiag, lawv twb cia Dab Ntxwg Nyoog lub tswvyim los mus tswj hwm lawv. (Nyeem Loos 12:1, 2.) Txawm li cas los, peb yuav tau xaiv seb peb yuav ua zaj twg tsav twg. Xws li, lub siab qub uas coj raws li Dab Ntxwg Nyoog lub siab xav los sis cia Yehauvas hloov kom peb muaj lub siab tshiab.—Yaxayas 64:8.
YUAV UA LI CAS PEB THIAJ TSO TAU “LUB SIAB QUB”?
8. Muaj tej twg pab peb kom tsis txhob xav zaj phem thiab coj tsis zoo?
8 Yehauvas paub hais tias yuav tau siv sij hawm me ntsis peb thiaj hloov tau tsis txhob xav zaj phem thiab coj tsis zoo. (Phau Ntawv Nkauj 103:13, 14) Yehauvas muab nws Txoj lus, nws lub hwj huam dawb huv, thiab nws lub koom haum los pab peb kom txawj xav, thiab pab peb kom peb thiaj hloov tau. Muaj qee zaug peb twb ras tsis txog tiam sis nws twb xub pab peb lawm. Cia peb ho mus piav seb muaj tej yam twg peb yuav tau hloov zuj zus kom peb thiaj ua tau kev cai raus dej.
9. Nyob hauv Vajtswv Txoj Lus, muaj tej twg pab tau peb?
9 Muab phau Vajlugkub coj los tsom koj tus kheej. Vajtswv Txoj Lus zoo yam nkaus li daim tsom iav uas pab tau koj rov tshuaj koj tus kheej, xws li koj tej kev xav, tej yam koj hais thiab tej koj ua. (Yakaunpaus 1:22-25) Tus qhia Vajlugkub rau koj thiab lwm tus ntseeg uas paub tab, kuj pab tau koj tib yam nkaus thiab. Xws li, lawv kuj nyeem tau tej nqe Vajlugkub los pab koj seb yam twg koj tseem tsis tau hloov los sis yam twg koj twb hloov lawm. Lawv kuj pab tau koj tshawb nrhiav tej ntaub ntawv los sis tej yeeb yaj kiab uas Yehauvas Cov Tim Khawv luam tawm los pab koj txiav txim siab ua qhov zoo qhov yog. Tsis tas li ntawd, Yehauvas yeej maj nroos xav pab koj. Yehauvas thiaj yog tus pab tau koj tiag tiag vim nws tshuaj tau koj lub siab lub ntsws. (Pajlug 14:10; 15:11) Yog li ntawd, nco ntsoov kawm nws Txoj Lus thiab thov nws txhua txhua hnub.
10. Elis tus yam ntxwv qhia tau koj li cas?
10 Nco ntsoov tias Yehauvas tej kev cai yeej yog tej zoo tshaj. Yehauvas tsuas xav kom peb ua tej yam zoo rau peb xwb. Cov uas coj li Yehauvas qhia, lawv muaj ntsej muaj muag, muaj lub neej zoo, thiab muaj kev zoo siab tiag tiag. (Phau Ntawv Nkauj 19:7-11) Tiam sis cov uas tsis kam mloog Yehauvas tej kev cai, ntsib ntau yam kev nyuaj siab ntxhov plawv. Xws li, muaj ib tug txiv neej npe hu ua Elis (Elie). Nws tawv ncauj tsis kam mloog Yehauvas tej kev cai. Nws loj hlob ntawm ib tse tib neeg uas teev tiam Yehauvas. Tiam sis thaum nws tiav hluas, Elis txawm mus poo tej npoj tsis zoo. Nws txawm mus ua ib lub neej quav yeeb quav tshuaj, sib daj sib dee, thiab ua tub sab tub nyiag. Elis hais tias nws txawm rais mus ua ib tug neeg nyaum thiab tsiv tsaim kawg nkaus li. Nws lees hlo hais tias: “Tej yam uas kuv twb kawm hauv phau Vajlugkub kom tsis txhob ua los kuv mus ua huv tib si.” Txawm nws mus ua tau lub neej ua dog ua dig los nws tseem nco ntsoov tej uas nws kawm hauv phau Vajlugkub thaum nws tseem yau. Nws txawm thim xav thiab pib rov qab kawm Vajlugkub dua. Nws rau siab ntso hloov nws tej cwj pwm thiab ua kev cai raus dej rau thaum xyoo 2000. Thaum nws tig rov qab los coj raws li Yehauvas tej kev cai, pab tau nws li cas? Elis thiaj hais tias: “Kuv ua neej kaj siab lug thiab tsis ntxhov siab li lawm.” c Elis tus yam ntxwv qhia rau peb tias cov uas tsis mloog Yehauvas tej kev cai tsuas rov qab tsub kev nyuaj siab rau lawv tus kheej. Txawm lawv ua tau tej yam tsis yog zoo li nws los Yehauvas yeej txaus siab hlo pab lawv hloov.
11. Yehauvas ntxub tej yam twg?
11 Cia li ntxub tej yam uas Yehauvas ntxub. (Phau Ntawv Nkauj 97:10) Nyob hauv phau Vajlugkub, qhia tias Yehauvas ntxub tus neeg “ua qhovmuag qaujles, tus nplaig uas hais lus dag, ob txhais tes uas tua tej neeg tsis muaj txim.” (Pajlug 6:16-19) Tsis tas li ntawd, nws “ntxub cov neeg limhiam, thiab cov neeg ntxeev ntxias.” (Phau Ntawv Nkauj 5:6) Yehauvas ntxub cov neeg uas coj tej cwj pwm no kawg nkaus li, nws thiaj muab cov neeg phem nyob rau Nau-es lub caij rhuav tshem huv tib si mus kom tsis txhob muaj neeg phem lawm. (Chivkeeb 6:13) Xws li muaj ib zaug, Yehauvas hais rau tus cev lus Malakis li no tias Yehauvas ntxub cov uas nrhiav nrhw kev los rhuav lawv lub neej ntawm lawv tus txwj nkawm mus. Vajtswv tsis lees yuav lawv txoj kev teev tiam nws, thiab yuav teem txim rau lawv tej cwj pwm tsis zoo.—Malakis 2:13-16; Henplais 13:4.
Tej yam uas Yehauvas hais tias tsis zoo, peb yuav tsum xeev siab fo (Saib nqe 11-12)
12. “Ntxub txojkev ua phem ua qias” yog li cas tiag?
12 Yehauvas xav kom peb “ntxub txojkev ua phem ua qias.” (Loos 12:9) Lo lus “ntxub” txhais hais tias yus ntxub ntxaug ib yam twg uas tsis xav pom tsis xav ntsia ntxiv. Muab piv yam li no tias, zoo li ib tug neeg muab ib taig mov ua kas dhi los rau koj noj. Txawm tsw laum loos mas ua rau koj xeev siab fo. Zoo ib yam li ntawd, thaum xav txog tej yam uas Yehauvas hais tias tsis zoo, peb yuav tsum xeev siab fo.
13. Ua li cas peb yuav tau ceev peb tej kev xav?
13 Ceev peb tej kev xav. Yog peb xav ntsoov yam twg peb yuav ua yam ntawd. Yog li ntawd, Yexus thiaj qhia kom peb tsis txhob xav txog tej yam uas yuav coj tau peb mus ua txhaum. (Mathais 5:21, 22, 28, 29) Thaum peb xav zoj tau ib yam phem ces cia li xav kiag dua lwm yam vim peb xav ua txhua yam kom haum Yehauvas siab.
14. Tej lus peb hais qhia tau li cas txog peb thiab peb yuav tau xav txog tej lus nug twg?
14 Tswj peb tej lus. Yexus hais li no: “Tej lus uas neeg lub qhovncauj hais, yog tawm hauv neeg lub siab los.” (Mathais 15:18) Muaj tseeb tiag, tej lus peb hais yeej qhia tau tej peb xav nraim nkoos hauv nruab siab. Cia li zaum tsaws xav li no: ‘Kuv puas dag kom thiaj li dim dawb dim do? Yog tias kuv muaj txwj nkawm lawm, kuv puas yuav tso dag tso luag nrog lwm tus uas tsis yog kuv tus txwj nkawm? Ua li kuv puas hais lus dev lus npua? Thaum ib tug twg ua rau kuv chim, kuv puas mam xav mam hais?’ Yog peb ua tib zoo xav txog tej lus nug no, yuav pab tau peb heev. Peb tej lus zoo nkaus li tej tsos xov xaws kom tuav cev khaub ncaws. Yog tias peb hloov tsis hais lus phem, lus dag, thiab lus dev lus npua ces yuav pab tau peb kom tsis txhob rov mus coj lub siab qub.
15. Qhov uas muab peb lub siab qub ntsia rau saum “tus ntoo” yog li cas tiag?
15 Cia li maj nrawm nroos hloov. Tus tubtxib Paulus siv ib qho lus piv txwv los mus qhia peb txog kom hloov li cas. Nws sau tias kom peb muab lub siab qub ntsia rau saum “tus ntoo.” (Loos 6:6) Qhov no txhais hais tias kom peb cia li xyaum Yexus. Peb yuav tau txaus siab hlo tso tej cwj pwm uas Yehauvas ntxub pov tseg. Yog peb coj yam nkaus li no, peb lub siab yuav kaj lug thiab ib hnub qab nram ntsis peb yuav tau txoj sia ntev dhawv mus ib txhis. (Yauhas 17:3; 1 Petus 3:21) Nco ntsoov hais tias tsis yog Yehauvas yuav hloov nws tej kev cai los mus haum peb. Tiam sis peb yuav tau hloov peb tus kheej los mus coj kom haum Yehauvas tej kev cai.—Yaxayas 1:16-18; 55:9.
16. Vim li cas peb yuav tau tswj tiag kom tsis txhob ntshaw ua tej yam tsis zoo?
16 Tswj tiag tiag, txhob ntshaw ua tej yam tsis zoo. Tab txawm hais tias tom qab peb ua kev cai raus dej tag lawm los, tswj tiag tiag peb lub siab uas ntshaw mus ua tej yam tsis zoo. Xws li muaj ib tug txiv neej npe hu ua Malixiyaus (Maurício). Thaum nws tseem hluas, nws nyiam nyob lub neej uas ib tug txiv neej deev txiv neej. Tom qab no, nws txawm ntsib Yehauvas Cov Tim Khawv thiab txawm pib kawm Vajlugkub. Thaum nws hloov tau nws lub neej lawm, nws txawm ua kev cai raus dej rau xyoo 2002. Tab txawm hais tias nws twb teev tiam Yehauvas tau ntau ntau xyoo lawm los, Malixiyaus hais li no tias: “Muaj ntau ntau zaus, kuv haj tseem tswj kuv lub siab quj qees kom tsis txhob ntshaw mus ua tej yam tsis zoo.” Txawm nws pheej xav tej no los nws tsis cia qhov ntawd txo tau nws lub zog. Nws hais li no ntxiv tias: “Qhov uas cuab tau kuv lub zog tshaj plaws yog qhov kuv tsis mus ua raws li kuv lub siab ntshaw tiam sis yog ua kom haum Yehauvas siab.” d
17. Nanpihas tus yam ntxwv txhawb tau peb li cas?
17 Nco ntsoov thov Yehauvas thiab tso siab tias nws yuav muab nws lub hwj huam dawb huv los pab. Txhob tso siab rau peb lub tswv yim. (Kalatias 5:22; Filipis 4:6) Peb yuav tau ua npaum li peb ua tau los muab lub siab qub tso pov tseg. Xws li, muaj ib tug poj niam npe hu ua Nanpihas (Nabiha). Thaum nws muaj 6 xyoo, nws txiv uas yug nws tau muab nws tso pov tseg ua ntsuag. Nws hais tias: “Kuv mas nyuaj los nyuaj siab, ntxhov los ntxhov siab.” Thaum Nanpihas hlob zuj zus tuaj, nws coj tau nyaum thiab tsiv tsaim kawg li. Nws txawm pib muag yeeb muag tshuaj thiab raug ntes mus kaw. Yehauvas Cov Tim Khawv mus qhia Vajlugkub rau hauv tej tsev kaw neeg ces lawv thiaj li kawm Vajlugkub nrog nws. Nanpihas lub neej txawm ntxeev npho. Nws hais tias: “Kuj tsis nyuaj ua luaj twg los hloov tej yam uas kuv ib txwm ua tsis zoo. Tiam sis thum luam yeeb mas txhob hais txog kiag li.” Ntev tshaj li 1 lub xyoos, Nanpihas thiaj li thum tau luam yeeb. Ua li cas nws thiaj thum tau? Nws teb li no: “Twb yog kuv sib zog ntsos thov Yehauvas pab, kuv thiaj thum tau. Yog kuv tus no twb hloov tau ua haum Yehauvas siab, leej twg los yeej ua tau.” e
KOJ YEEJ UA TAU KEV CAI RAUS DEJ LAWM
18. Raws li 1 Kauleethaus 6:9-11, piav seb muaj coob leej ntau tus ntseeg tau ua li cas.
18 Nyob rau thawj 100 xyoo, muaj ib txhia tib neeg yeej tsis coj lub neej raug ntsej muag. Xws li, lawv yeej tau ua lub neej deev luag poj luag txiv, txiv neej deev txiv neej, poj niam deev poj niam, thiab ua tub sab. Tos lawv hloov tau lawv lub neej los yeeb vim yog Vajtswv tau muab nws lub hwj huam dawb huv los pab lawv hloov. Tom qab lawv los ntseeg lawd, Yehauvas thiaj xaiv lawv los nrog Yexus ua cov kav noob neej. (Nyeem 1 Kauleethaus 6:9-11.) Zoo tib yam nkaus li ntawd, niaj hnub niam no Vajtswv Txoj Lus kuj pab tau qas txhiab qas vam tus tib neeg hloov lawv lub neej. f Yog li ntawd, lawv thiaj tso tau txhua yam kev phem uas lawv niaj hnub ua pov tseg. Lawv cov yam ntxwv qhia tau tias koj yeej muaj peev xwm hloov tau koj lub neej thiab ua kev cai raus dej.
19. Zaj tom ntej no yuav piav txog dab tsi?
19 Yog leej twg xav ua kev cai raus dej, nws yuav tau coj lub siab tshiab thiab yuav tau muab lub siab qub tso pov tseg tiag tiag. Zaj txuas ntxiv tom ntej mam li piav txog lub ntsiab no thiab seb lwm tus ho pab tau peb li cas.
ZAJ NKAUJ 41 Tig Ntsej Mloog Kuv Yehauvas
a Yog peb ib tug twg yuav ua kev cai raus dej, peb yuav tau muab peb lub siab qub tso pov tseg. Nyob rau hauv zaj kawm no, peb yuav mus kawm txog seb peb lub siab qub yog li cas tiag, vim li cas peb yuav tau muab lub siab qub no tso pov tseg, thiab seb peb yuav muab tso tseg li cas thiaj tau. Zaj kawm txuas ntxiv zaj no, mam li pab peb tshuaj peb tus kheej kom muaj lub siab tshiab tom qab peb ua kevcai raus dej tag lawm.
b TXHAIS TAWM: “Lub siab qub” yog muab tej cwj pwm uas tsis haum Yehauvas siab tso pov tseg ua ntej yuav los ua kev cai raus dej.—Efexus 4:22.
c Yog xav paub ntxiv, mus saib Phau Tsom Faj lub 4 Hlis tim 1 xyoo 2012, ntawm lub ntsiab “Vajlugkub Kho Tau Lub Neej—‘Kuv Yuav Tau Rov Qab Los Cuag Yehauvas’” (‘I Needed to Return to Jehovah’) ua lus Askiv.
d Yog xav paub ntxiv, mus saib Phau Tsom Faj lub 5 Hlis tim 1 xyoo 2012, ntawm lub ntsiab “Vajlugkub Kho Tau Lub Neej—‘Yehauvas Cov Tim Khawv Siab Zoo Kawg Li Rau Kuv’” (‘They Were Very Kind to Me’) ua lus Askiv.
e Yog xav paub ntxiv, mus saib Phau Tsom Faj lub 10 Hli tim 1 xyoo 2012, ntawm lub ntsiab “Vajlugkub Kho Tau Lub Neej—‘Kuv Txawm Ua Ib Tug Neeg Nyaum Thiab Tsiv Tsaim Kawg Li’” (‘I Became an Angry, Aggressive Young Woman’) ua lus Askiv.
f Saib lub ntsiab “ Vajlugkub Kho Tau Lub Neej.”
g DAIM DUAB: Thaum peb muab tus cwj pwm los sis tej yam tsis zoo uas peb ib txwm ua tso pov tseg, zoo yam li peb hle ib ce qub tsoos tsho pov tseg.
