1. Yam uas yuav los tswj tau peb tus cwj pwm yog dab tsi?

 TSIS hais peb nyuam qhuav ua kev cai raus dej los yog peb twb ua kev cai raus dej tau ntev xyoo lawm, peb yuav tau coj tus cwj pwm uas ntxim Yehauvas nyiam. Yuav kom peb coj tau li no, peb yuav tsum tswj peb tej kev xav. Vim li cas peb yuav tau tswj? Rau qhov tej nyob nraim nkoos hauv peb nruab siab xav li cas ces peb tus cwj pwm zoo li ntawd. Yog peb lub siab pheej xav zaj phem ces peb lub ncauj thiab tus yam ntxwv yuav ua li ntawd. (Efexus 4:17-19) Tiam sis yog peb lub siab pheej xav qhov zoo ces peb lub ncauj yuav tawm tej lus zoo thiab peb tus yam ntxwv yuav zoo tau raug Yehauvas lub siab.​—Kalatias 5:16.

2. Nyob rau hauv zaj kawm no yuav teb cov lus nug twg?

² Zoo li nyob rau zaj kawm tag los lawm, peb yuav cheem tsis tau kom tsis txhob xav txog zaj phem. Tiam sis peb yeej tswj tau kom peb tsis txhob ua li tej peb xav. Ua ntej peb yuav ua kev cai raus dej, peb yuav tau tswj tej lus peb hais los sis tej yam peb ua uas Yehauvas ntxub. Tej tau hais no yog thawj yam peb yuav tau muab hle cuam pov tseg. Yuav kom peb coj tau raug Yehauvas siab, peb yuav tau coj tej lus sam hwm uas hais no: “Nimno nej twb ua neeg tshiab lawm.” (Kaulauxais 3:10) Nyob rau hauv zaj kawm no, yuav teb cov lus nug no: Lub siab tshiab yog li cas tiag? Ua li cas peb thiaj li yuav coj tau lub siab tshiab thiab coj lub siab tshiab ntawd mus li?

3. Raws li Kalatias 5:22, 23, piav seb lub siab tshiab yog li cas tiag thiab yuav muab coj li cas rau lub neej?

³ Lub siab tshiab yog txoj kev xav los sis txoj kev coj noj coj ua zoo xws nkaus li Yehauvas txoj. Tus uas coj lub siab tshiab yuav cia Vajtswv lub hwj huam dawb huv tswj hwm nws tej kev xav  thiab tej nws ua. (Nyeem Kalatias 5:22, 23.) Tus neeg ntawd yuav txawj hlub Yehauvas cov tib neeg thiab Yehauvas. (Mathais 22:36-39) Txawm nws raug kev sim siab los nws yuav thev taus nws tej kev sim siab ntawd thiab nyob kaj siab lug. (Yakaunpaus 1:2-4) Nws tsis nrog luag ntau xaiv ntau lus. (Mathais 5:9) Nws ua lub siab ntev thiab ua zoo rau txhua leej txhua tus. (Kaulauxais 3:13) Nws ua zoo thiab nyiam zaj zoo. (Lukas 6:35) Nws tsis yog hais xwb tiam sis nws yeej ua qhia tias nws muaj kev ntseeg rau Yehauvas tiag tiag. (Yakaunpaus 2:18) Thaum muaj ib tug twg ua nruj ua tsiv rau nws, nws yeej ua siab tus tus thiab thaum raug kev sim siab nws tswj rawv nws lub siab.​—1 Kauleethaus 9:25, 27; Titus 3:2.

4. Yuav kom peb coj tau lub siab tshiab, piav seb puas yog peb yuav tau coj raws li tau hais hauv Kalatias 5:22, 23 ib qho zuj zus.

⁴ Yuav kom coj tau lub siab tshiab, peb yuav tau hloov peb tus xeeb ceem kom coj raws li tau hais nyob hauv Kalatias 5:22, 23 thiab raws li lwm cov nqe Vajlugkub. b Cov cwj pwm tau hais no tsis zoo li tej tsoos es peb yuav hnav ib daig yaj ib daig yeeb tiam sis peb yuav tau hnav kom tag nrho ib ce. Cov cwj pwm no ib qho yeej zoo phim ib qho. Xws li tus neeg hlub tshua kwv tij zej zog tiag, yuav ua siab ntev thiab ua zoo rau lawv. Tsis tas li ntawd, tus neeg coj zoo yeej txawj hais lus mos lus muag thiab tswj nws lub siab.

5. “Muaj lub siab ib yam li Yexus Khetos lub” yog li cas tiag, thiab vim li cas peb ho xav paub txog nws lub neej? (1 Kauleethaus 2:16)

⁵ Nyeem 1 Kauleethaus 2:16. Yuav kom peb coj tau lub siab tshiab, peb yuav tau “muaj lub siab ib yam li Yexus Khetos lub.” Qhov no yog txhais hais tias peb yuav tau xav ib yam li Yexus xav thiab taug nraim nws tus hneev tus lw. Yexus cia Vajtswv lub hwj huam dawb huv tswj hwm nws tej kev xav thiab tej nws ua. Yexus coj tau raws nraim li Yehauvas. (Henplais 1:3) Yog peb yim xav li Yexus ces peb yuav yim coj tau raws li nws coj thiab peb yuav muaj lub siab ib yam li Yexus lub.​—Filipis 2:5.

6. Peb yuav tau nco ntsoov li cas peb thiaj li coj tau lub siab tshiab?

⁶ Ua li peb puas yuav taug nraim tau Yexus tus hneev tus lw tiag? Tej zaum peb yuav hais li no: ‘Yexus yog neeg dawb neeg huv. Kuv yeej yuav coj tsis tau zoo li nws hlo.’ Yog peb tau  xav li no lawm, nco ntsoov tias (1) Yehauvas tsim kom peb muaj yam ntxwv zoo li nws thiab Yexus. Ces yog li ntawd, peb yeej muaj peev xwm yoog tau nkawv. (Chivkeeb 1:26) (2) Vajtswv lub hwj huam dawb huv yog lub zog loj tshaj txhua tsav txhua yam. Yog tau Vajtswv lub hwj huam dawb huv pab lawm, peb yeej ua tau txhua yam. (3) Yehauvas yeej paub zoo tias peb yeej coj tsis txhij tsis txhua tej cwj pwm li lub hwj huam dawb huv pab peb. Yog li ntawd, Vajtswv Yehauvas thiaj li npaj tseg 1,000 xyoo rau cov uas muaj kev vam kev cia siab rau hauv ntiaj teb xyaum kom coj tau lub siab tshiab, lawv thiaj ua neeg dawb neeg huv. (Tshwmsim 20:1-3) Niaj hnub niam no, Yehauvas tsuas xav kom peb ua li peb ua tau los coj li nws qhia thiab yog qhov twg ua tsis tau los nws mam li pab peb.

7. Piav seb tom ntej no peb yuav tham txog dab tsi?

⁷ Peb yuav ua li cas thiaj taug tau Yexus tus hneev tus lw? Peb yuav mus piav txog 4 tug cwj pwm uas Vajtswv lub hwj huam dawb huv pab tau peb coj. Thaum peb mus piav txog tej no, peb yuav ua zoo tshuaj seb peb puas coj tau lub siab tshiab.

8. Yexus qhia nws txoj kev hlub li cas?

⁸ Yexus ua ib puas tsav yam raws li Yehauvas kom nws ua vim nws hlub tshua nws Txiv thiab peb. (Yauhas 14:31; 15:13) Thaum Yexus tseem ua neej nyob hauv ntiaj teb no, nws lub neej qhia tias nws hmov tshua tib neeg heev. Txawm yuav muaj neeg tawm tsam nws npaum twg, los ib hnub dhau ib hnub nws yeej qhia tias nws muaj kev hlub rau tib neeg. Ib yam uas nws qhia nws txoj kev hlub ntawd yog nws pab kom tib neeg paub txog Vajtswv lub Nceeg Vaj. (Lukas 4:43, 44) Yexus txaus siab hlo tuag txom nyem ntsuav kom thiaj qhib tau txoj hau kev rau peb muaj txoj sia ntev dhawv mus ib txhis.

9. Peb yuav xyaum tau Yexus txoj kev hlub li cas?

⁹ Peb hlub tshua peb Leej Txiv Yehauvas heev, peb thiaj muab peb lub neej cob rau nws thiab ua kev cai raus dej. Zoo tib yam nkaus li Yexus, yog peb hlub tshua Yehauvas ces peb yuav coj zoo rau tib neeg. Tus tub txib Yauhas sau tseg li no: “Yog nws twb tsis hlub nws kwv nws tij tus uas nws qhovmuag pom, nws yuav ua li cas hlub Vajtswv tus uas nws qhovmuag tsis pom.” (1 Yauhas 4:20) Cia peb zaum tsaws xav li no: ‘Kuv puas hmov tshua tib neeg tawm plaws nruab siab tuaj? Yog lwm tus ua saib tsis taus kuv, kuv puas tseem ua zoo rau nws? Txawm yuav siv sij hawm thiab dag zog npaum twg los kuv puas txaus siab hlo mus pab kom tib neeg los paub Yehauvas? Txawm muaj ib txhia tib neeg tsis nyiam thiab tawm tsam kuv los kuv puas mus qhia tiag tsis cia chaw so? Kuv puas nrhiav txhua txoj kev los mus tshaj tawm txoj moo zoo rau tib neeg?​—Efexus 5:15, 16.

10. Piav seb vim li cas Yexus nyiam kom muaj kev sib haum xeeb.

¹⁰ Yexus nyiam kom muaj kev sib haum xeeb. Thaum luag ua saib tsis taus Yexus los nws tsis ua phem pauj phem. Tiam sis nws txhim kho kom txhua tus rov nyob sib haum xeeb thiab nws pab kom ib leeg txawj hais ib leeg. Xws li nws qhia rau txhua leej txhua tus tias yog lawv xav pe hawm Yehauvas, lawv ib leeg yuav tsum muaj kev sib haum xeeb nrog ib leeg. (Mathais 5:9, 23, 24) Tsis tas li ntawd, nws ntuas cov tub txib tas zaj tas zog tias kom cia li muab lawv tej kev sib cov nyom tias tus twg yuav ua tus loj tso pov tseg.​—Lukas 9:46-48; 22:24-27.

11. Piav seb peb ua neeg nyob sib haum xeeb li cas.

¹¹ Ua neeg nyob sib haum xeeb tsis yog hais tias peb tsis nyiam tsim kev kub ntxhov xwb. Peb yuav tau ua npaum li peb ua tau los nrog lwm tus kom nyob sib haum xeeb, thiab pab kom cov kwv tij nkauj muam ntseeg ib leeg txawj hais ib leeg. (Filipis 4:2, 3; Yakaunpaus 3:17, 18) Cia peb zaum tsaws xav li no: ‘Kuv puas yeem ua tus swb kom thiaj li muaj kev sib haum  xeeb nrog lwm tus? Kuv puas ua ntsej muag dub doog thaum ib tug kwv tij nkauj muam ntseeg twg ua rau kuv chim? Kuv puas tos lwm tus los nrog kuv sib tham kom muaj kev haum xeeb los sis kuv yuav ua tus ntaus thawj hlo mus nrog tus tod tham, tab txawm hais tias tus tod yog tus pib tej kev sib cov nyom? Thaum muaj lub caij lub nyoog zoo, kuv puas txhawb kom ob tog rov sib kho kom muaj kev haum xeeb?’

12. Yexus muaj siab mos siab muag li cas?

¹² Yexus muaj siab mos siab muag. (Mathais 11:28-30) Nws qhia nws txoj kev siab mos siab muag ntawd los ntawm qhov nws ua zoo thiab zam luag. Xws li thaum muaj ib tug poj niam Finixias thov kom Yexus pab kho nws tus me nyuam. Thaum thawj Yexus tsis kam tiam sis tus poj niam pheej thov mus thov los. Yexus pom tias nws muaj kev ntseeg heev, thiaj rub tau Yexus lub siab kho nws tus me nyuam. (Mathais 15:22-28) Txawm Yexus muaj siab mos siab muag los tej thaud nws kuj yuav tau ntuas lwm tus thiab. Nws hlub nws thiaj ntuas. Xws li thaum Petus hais kom Yexus txhob ua li Yehauvas lub siab nyiam, Yexus thiaj li tab meeg ntuas nws ntawm cov thwj tim xub ntiag. (Malakaus 8:32, 33) Tos Yexus ua li no los tsis yog nws xav rhuav Petus ntsej muag tiam sis nws xav cob qhia Petus thiab cov thwj tim kom tsis txhob ua neeg khav theeb. Thaum lub caij lub nyoog ntawd, Petus txaj muag kawg nkaus li tiam sis tej Yexus hais ntawd kuj pab tau nws lawm hov ntau.

13. Peb yuav ua siab mos siab muag li cas?

¹³ Cov neeg uas peb hlub, peb yeej yuav tsa ncauj ntuas lawv. Thaum peb tsa ncauj ntuas lawv, nco ntsoov xyaum Yexus es siv Vajtswv Txoj Lus los ntuas. Nco ntsoov ua siab mos siab muag. Xav qhov zoo txog lawv. Tso siab tias cov muaj kev hlub rau Yehauvas thiab rau koj yuav mloog koj tej lus qhuab ntuas. Zaum tsaws xav txog cov lus nug no: ‘Thaum kuv pom ib tug neeg uas kuv hlub tshua tau ua tej yam tsis yog, kuv puas tsa ncauj hais nws? Yog kuv yuav ntuas nws, kuv yuav ua zoo hais los kuv yuav hais hnyav ncawv? Yog vim li cas tiag, kuv thiaj qhuab ntuas nws? Puas yog kuv ntuas vim nws xeeb txob kuv, los yog kuv ntuas vim kuv xav pab nws?’

14. Yexus coj ncaj li cas?

¹⁴ Tsis yog Yexus paub qhov twg ncaj xwb tiam sis nws yeej coj ncaj. Yexus txoj kev hlub rau nws Txiv loj heev. Yog li ntawd, nws thiaj ua qhov zoo qhov yog tawm ntawm lub siab dawb paug tuaj. Tus neeg coj ncaj yeej ib txwm ua ncaj thiab ua zoo rau lwm tus. Muaj tej zaud qho leej yuav xav tias, ‘Ua li ib tug neeg twg puas ua tau ntsej muag ncaj siab nkhaus?’ Yeej ua tau. Puag thaum ub Yexus twb tau hais txog cov tib neeg zoo li no uas tau pub yam ub yam no rau cov neeg txom nyem. Lawv yeej tab meeg ua rau neeg qhuas. Cov tib neeg no txawm ua txij ntuj txij teb los, tsis muaj qab hau dab tsi rau Yehauvas.​—Mathais 6:1-4.

15. Piav seb coj ncaj yog li cas tiag tiag.

¹⁵ Peb tsis txhob ua rau luag qhuas, yog peb coj ncaj tiag tiag. Cia peb zaum tsaws xav li no: ‘Yog tias kuv paub hauv nruab siab qhov twg zoo qhov twg ncaj, kuv puas ua li ntawd? Thaum kuv ua ib yam zoo twg, puas yog ua tawm nruab siab tuaj?’

16. Txhua txhua hnub peb yuav tau coj li cas, thiab vim li cas peb yuav tau coj li ntawd?

¹⁶ Cia peb tsis txhob xav hais tias thaum peb ua kev cai raus dej ces peb twb coj tau lub siab tshiab lawm. Lub siab tshiab muab piv yam nkaus li cev tsoos peb yuav tau txuag zam, zam thiaj tshiab. Txhua txhua hnub, peb yuav tau xyaum coj tej cwj pwm raws li Vajtswv lub siab nyiam. Vim li cas peb ho yuav tau xyaum coj li  ntawd? Yog peb yim coj tej cwj pwm no ces Vajtswv lub hwj huam yuav yim pab peb kom coj tau zoo ntxiv tuaj. Vajtswv hais tau lawm, nws yeej ua tau. Thiab nws lub hwj huam dawb huv yeej ua tau txhua yam. (Chivkeeb 1:2) Yog li ntawd, thaum peb hais tau lawm peb yuav tsum ua tau thiab. Tus thwj tim Yakaunpaus tau sau tseg li no: “Txojkev ntseeg uas tsis ua haujlwm yog txojkev ntseeg uas tuag lawm.” (Yakaunpaus 2:26) Zoo tib yam li ntawd, thaum peb tsis coj tej cwj pwm zoo ces kuj ib yam li tuag lawm thiab.

17. Peb yuav ua li cas yog tias peb coj tsis tau tej cwj pwm uas haum Vajtswv siab?

¹⁷ Muaj qee zaug tej co ntseeg twb ua kev cai raus dej tau ntev xyoo lawm los lawv tseem tsis nco qab coj tej cwj pwm uas haum Vajtswv siab. Txhob tag kev cia siab, rau siab ntso xyaum tiag. Muab ua piv txwv li no. Yog tias koj cev tsoos uas koj xis hnav ntshi ib qho lawm, koj puas cia li muab laim pov tseg? Koj yeej tsis ua li ntawd. Koj yeej yuav muab ntxiv qhov ntuag kom rov zoo li zoo tau. Tom qab ntawd, koj yeej yuav txuag zias koj cev tsoos. Zoo tib yam li ntawd, thaum peb hais tau siab tau qes rau ib tug twg lawm, tsis txhob tag kev cia siab. Cia li lees lus rau tus ntawd thiab kho kom rov sib haum xeeb. Nco ntsoov mam xav mam hais lawm yav tom ntej.

18. Peb paub meej tseeb li cas yog peb coj lub siab tshiab?

¹⁸ Peb ua tsaug tsis txawj tag uas Yexus tso tseg tus yam ntxwv zoo kawg nkaus li rau peb tau xyaum. Yog peb yim xyaum nws tus cwj pwm thiab xav li nws xav ces peb yim taug tau nws tus hneev tus lw. Yog peb xyaum Yexus tsis tseg tsis tu ces peb yuav coj tau lub siab tshiab. Nyob rau hauv zaj kawm no, tsuas piav txog 4 tug cwj pwm uas raws li Vajtswv lub siab nyiam. Thov lauj sij hawm mus saib lwm cov cwj pwm uas piav tsis txog kom thiaj paub tshab. Nyob rau hauv Yehauvas Cov Timkhawv Phau Ntawv Tshawb Nrhiav Vajlugkub ntawm lub ntsiab “Cov Khixatia Coj Li Cas” ces mus rau “Lub Hwj Huam Txi Txiv,” peb yuav pom muaj ntau ntau zaj yuav piav qhia tej cwj pwm no. Yog hais tias peb ua npaum li peb ua tau lawm, Yehauvas yeej yuav pab kom peb coj tau lub siab tshiab mus li.