Thaum ib txhia nyeem txog zoo li zaj hais tas los no, ua rau lawv xav tsis thoob li. Tiam sis nej puas tau hnov dua tias muaj ob tug txiv neej hu ua Mefinpauses? Cia peb mam ua tib zoo kawm seb muaj li cas tiag thiab seb peb khaws tau li cas los ntawm zaj no.

Vaj Ntxwv Xa-ules muaj 7 leej tub thiab ob tug ntxhais. Xa-ules tus tub hlob npe hu ua Yaunathas. Tom qab no Xa-ules tus niam yau Lixepas txawm yug tau ib tug tub muab tis npe hu ua Mefinpauses. Tsis tas li ntawd, Yaunathas uas yog Xa-ules tus tub hlob kuj muaj ib tug tub npe hu ua Mefinpauses thiab. Yog li ntawd, Vaj Ntxwv Xa-ules muaj ib tug tub npe ua Mefinpauses thiab ib tug tub xeeb ntxwv hu ua Mefinpauses tib yam nkaus.

Muaj ib ncuas sij hawm, Vaj Ntxwv Xa-ules txawm pib ntxub cov Nkinpe-oos thiab xav muab lawv tua kom tu noob nrho. Nws coj li no mas tsis yog kev yog cai lawm vim nyob puag thaum Yausuas lub caij, Ixayees tej thawj coj tau nrog cov Nkinpe-oos sib cog phooj ywg ua ke lawm.​—Yausuas 9:3-27.

Nyob rau Vaj Ntxwv Xa-ules tiam los, txoj kev sib cog lus no tseem nyob li qub. Tiam sis Vaj Ntxwv Xa-ules tsis quav ntsej txog qhov kev sib cog lus no kiag li. Nws xav muab lawv ntxuav pov tseg huv tib si. Twb yog vim li ntawd, ‘lub txim uas tua neeg poob rau saum Xa-ules thiab Xa-ules caj ces.’ (2 Xamuyees 21:1) Tom qab no, Daviv tau los ua vaj ntxwv. Cov Nkinpe-oos uas tseem ua neej nyob, thiaj tuaj cuag Daviv txog qhov kev tsis ncaj ncees uas hais tas no. Daviv thiaj nug lawv seb yuav ua li cas thiaj pauj tau tej uas Xa-ules tau ua tag los lawm rau lawv. Cov Nkinpe-oos tsis kom Daviv them nqe taub hau rau lawv tiam sis cov Nkinpe-oos xav tau Xa-ules 7 leej tub los txhaws lawv txoj kev ntsim siab. (Teev Npe 35:30, 31) Daviv thiaj ua raws li lawv pom zoo.​—2 Xamuyees 21:2-6.

Nyob rau ncua sij hawm no, Xa-ules thiab nws tus tub Yaunathas nkawv kuj tau tuag nyob rau hauv tshav rog lawm. Tiam sis tseem tshuav Yaunathas tus tub Mefinpauses ua neej nyob. Thaum Mefinpauses tseem yau, nws sav ceg lawm. Tsis tas li ntawd, nws kuj tsis tau nrog nws yawg mus tua cov Nkinpe-oos. Qhov uas Daviv thiab Yaunathas sib cog kev phooj ywg kuj pab tau Yaunathas caj ceg xws li Mefinpauses. (1 Xamuyees 18:1; 20:42) Nyob rau hauv Vajtswv Txoj Lus thiaj piav li no: “Daviv thiab Yaunathas tau coglus khov heev rau [Yehauvas] lawm, Daviv thiaj tseg Yaunathas tus tub Mefinpauses uas yog Xa-ules tus tub xeebntxwv cia.”​—2 Xamuyees 21:7.

Daviv ua li cov Nkinpe-oos tau thov nws. Nws thiaj muab Xa-ules ob tug tub coj mus cob rau cov Nkinpe-oos, ib tug yog Mefinpauses. Hos 5 tug yog cov tub xeeb ntxwv. (2 Xamuyees 21:8, 9) Daviv ua li no, lub txim tua neeg thiaj li haim ntawm lawv lub teb chaws mus.

Zaj hais tas los no zoo rau peb ua kev kawm kev taug. Vajtswv tej kev cai yeej hais phua plhawv tias: “Yog niamtxiv ua txhaum, tsis txhob muab menyuam tua theej niamtxiv.” (2 Kevcai 24:16) Yog hais tias Xa-ules ob tug tub thiab 5 tug tub xeeb ntxwv tsis tau ua txhaum ces Yehauvas yeej tsis pom zoo cia lawv tuag. Nws tej kev cai kuj hais ntxiv li no: “Tus twg ua txhaum tsuas cia tus ntawd tuag xwb.” Yog li ntawd, Xa-ules ob tug tub thiab 5 tug xeeb ntxwv yuav tsum tau raus tes nrog Xa-ules tua cov Nkinpe-oos lawm. Lawv 7 leej no thiaj tau them lub txim tuag.

Peb khaws tau zaj no hais tias thaum ib tug twg ua tau txhaum, nws liam tsis tau tias yog lwm tus kom nws ua, nws thiaj ua. Nyob rau hauv Vajtswv Txoj Lus tau hais tias: “Ua tib zoo xav ua ntej uas koj yuav ua ib yam dabtsi, mas koj thiaj ua tau qhov zoo.”​—Pajlug 4:24-27; Efexus 5:15.