1-2. Vim li cas koj yuav tsum tsis txhob rawm maj tag kev cia siab yog tias ib tug twg tseem tsis tau kam koj ua kev cai raus dej? (Saib daim duab ntawm lub khaum.)

 YOG tias koj muaj siab xav ua kev cai raus dej ces yeej yog ib lub hom phiaj zoo heev. Yog tias koj npaj txhij thiab cov txwj laus pom zoo lawm ces kav tsij ua kev cai raus dej thaum txog lub caij muab neeg ua kev cai raus dej. Yog koj ua li no, koj yuav ua tau ntau yam hauv koj lub neej rau Yehauvas.

² Tiam sis puas tau muaj ib tug twg hais rau koj tias tos kom koj paub me ntsis tso mam ua kev cai raus dej? Los sis koj yeej paub tias koj yuav tau kawm kom paub me ntsis tso mam ua? Txawm li cas los xij peem, tsis txhob tag kev cia siab. Tsis hais tus laus tus hluas, ib hnub twg koj yeej yuav tau ua kev cai raus dej xwb.

3. Tus txiv neej Ethi-aupias nug Filis li cas, thiab muaj lus nug li cas ntxiv? (Tes Haujlwm 8:36, 38)

³ Nyeem Tes Haujlwm 8:36, 38. Tus txiv neej uas tuaj hauv teb chaws Ethi-aupias tuaj nug Filis tias: “Koj muab kuv ua kevcai raus dej puas tau?” Tus txiv neej Ethi-aupias no xav ua kev cai raus dej tiam sis nws puas npaj tau txhij ua kev cai raus dej tiag tiag?

4. Tus txiv neej Ethi-aupias tau ua qhia tias nws kub siab lug kawm li cas?

⁴ Tus txiv neej Ethi-aupias “mus pehawm Vajtswv hauv lub nroog Yeluxalees.” (Tes Haujlwm 8:27) Tej zaum nws kuj coj cov neeg Yudais txoj kev cai lawm. Txawm nws nyeem Cov Nqe Lus Henplais thiab paub txog Yehauvas lawm los nws haj tseem kub siab lug xav paub ntxiv. Thaum Filis mus caum cuag tus txiv neej Ethi-aupias no ntawm kev, Filis pom nws nyeem kauj ntawv uas Yaxayas uas yog tus cev Vajtswv lus sau tseg. (Tes Haujlwm 8:28) Cov lus hauv kauj ntawv no tej ntsiab lus tob heev. Tus txiv neej Ethi-aupias tsis xav kawm txog tej yam ntiav ntiav xwb tiam sis nws xav kawm seb tej lus tob tob ntawd muaj li cas tiag.

5. Tus txiv neej Ethi-aupias ua li cas txog tej uas nws tau kawm?

⁵ Tus txiv neej Ethi-aupias no yog ib tug nom tswv uas “saib niam Vajntxwv Kadakes uas kav tebchaws Ethi-aupias lub txhab nyiaj.” (Tes Haujlwm 8:27) Yog li ntawd, nws tuav dej num ntau heev thiab tsis xyeej kiag li. Txawm li ntawd los nws yeej lauj sij hawm kom tau teev tiam Yehauvas. Nws tsis yog txaus siab rau qhov uas nws kawm kom paub qhov tseeb xwb tiam sis nws ua raws li tej nws tau kawm. Nws thiaj tuaj puag nram teb chaws Ethi-aupias tuaj rau puag pem lub nroog Yeluxalees xwv thiaj tau tuaj pe hawm Yehauvas rau ntawm lub tuam tsev. Tus txiv neej no tuaj deb npaum li no mas yeej siv nyiaj txiag thiab sij hawm ntau heev tiam sis nws yeej txaus siab hlo tuaj, yeeb vim yog nws xav pe hawm Yehauvas.

6-7. Tus txiv neej Ethi-aupias txoj kev hlub rau Yehauvas loj zuj zus li cas ntxiv?

⁶ Tus txiv neej Ethi-aupias kawm tau ntau yam ntawm Filis xws li Yexus yog tus Mexiyas. (Tes Haujlwm 8:34, 35) Tus txiv neej no txaus siab kawg li rau tej uas nws tau kawm txog Yexus thiab tej uas Yexus tau ua. Tom qab tus txiv neej no paub lawm, nws ua li cas xwb? Nws tsis xav ua dab tsi es coj cov Yudais txoj kev cai xwb los tau tiam sis nws hlub Yehauvas thiab Yexus nkawd heev, nws thiaj txiav txim siab ua kev cai raus dej kom tau ua Yexus Khetos ib tug thwj tim. Filis pom hais tias tus txiv neej no yeej tsim nyog ua kev cai raus dej lawm. Yog li ntawd, Filis thiaj muab nws ua kev cai raus dej.

⁷ Yog tias koj xyaum tus txiv neej Ethi-aupias no ces koj yeej ua tau kev cai raus dej tib yam nkaus. Koj yuav hais tau li no tias, “Kuv ua kevcai raus dej puas tau?” Cia peb mam li mus kawm txog tej uas tus txiv neej Ethi-aupias no tau ua: Nws rau siab ntso kawm, nws ua raws li tej nws kawm, thiab nws txoj kev hlub rau Vajtswv loj zuj zus ntxiv.

8. Nyob rau hauv Yauhas 17:3 hais kom koj yuav tau ua dab tsi?

⁸ Nyeem Yauhas 17:3. Yexus cov lus no puas pab tau kom koj txiav txim siab kawm phau Vajlugkub? Nws cov lus yeej pab tau peb coob leej ntau tus. Peb yeej yuav kawm txog Yehauvas kam tiag kom “paub hais tias [nws] tib leeg thiaj yog Vajtswv.” (Tej Lus Qhia 3:11) Txawm kawm tag ib txhiab ib txhis los peb yeej yuav kawm mus li. Yog peb yim kawm ces peb yim nrog Yehauvas sib raug zoo.​—Phau Ntawv Nkauj 73:28.

9. Peb yuav tau ua dab tsi ntxiv tom qab peb paub txog tej yam hauv phau Vajlugkub uas ntiav ntiav?

⁹ Thaum peb pib kawm txog Yehauvas, peb tsuas kawm txog tej yam ntiav ntiav hauv phau Vajlugkub xwb. Nyob rau hauv tsab ntawv uas tus tub txib Povlauj sau rau cov Henplais, nws hais tias tej yam ntiav ntiav ntawd zoo yam li  cov kua mis uas pub me nyuam. (Henplais 5:12; 6:1) Nws tsis tau hais tias cov lus ntawd tsis tseem ceeb tiam sis nws txhawb kom txhua tus ntseeg yuav tau kawm tej yam tob tob hauv Vajtswv Txoj Lus. Ua li koj puas muaj siab kub lug xav kawm txog tej yam tob tob hauv phau Vajlugkub? Koj puas kawm tiag kom koj paub txog Yehauvas thiab nws lub ntsiab ntxiv zuj zus?

10. Vim li cas ho nyuaj rau ib txhia tib neeg kawm txog phau Vajlugkub?

¹⁰ Peb muaj coob leej ntau tus tsis muaj lub siab xav kawm txog tej lus nyob hauv phau Vajlugkub. Ua li koj puas muaj siab kawm tiag? Thaum koj tseem mus kawm ntawv, koj puas kawm thiab nyeem tau ntawv zoo zoo? Koj puas xis thiab qab siab kawm ntawv? Los sis koj yuav teb tias koj kawm tsis tau ntawv? Yog tias muaj tseeb li no ces tsis yog koj ib leeg xwb. Nco ntsoov tias Yehauvas yeej yuav pab tau koj, yeeb vim yog nws zoo tiav tiav thiab yog tus xib hwb uas keej tshaj plaws.

11. Yehauvas qhia li cas tias nws yog “tus Xibhwb” uas keej tshaj plaws?

¹¹ Yehauvas tau hais tias nws yog “nej tus Xibhwb” uas keej tshaj plaws. (Yaxayas 30:20, 21) Nws yog ib tug xib hwb uas siab ntev, siab zoo thiab nkag siab heev. Nws tsuas saib qhov zoo ntawm cov me nyuam kawm ntawv xwb. (Phau Ntawv Nkauj 130:3) Nws yeej tsis kom peb ua ntau tshaj li qhov uas peb ua tau. Nco ntsoov tias nws yog tus tsim peb tej paj hlwb zoo heev. (Phau Ntawv Nkauj 139:14) Peb muaj ib lub siab ntshaw plias xav kawm yam ub yam no. Tus uas tsim ib puas tsav yam yeej xav kom peb kawm tas zaj tas zog mus ib txhis thiab txaus siab rau tej ntawd. Yog li ntawd, thiaj li tsim nyog rau peb yuav tsum “ntshaw” plias xav paub qhov tseeb uas nyob hauv phau Vajlugkub tam sim no. (1 Petus 2:2) Teem kom muaj hom phiaj uas koj yuav ua tau thiab nco ntsoov ua raws li tej caij nyoog koj teem yuav nyeem Vajlugkub thiab kawm Vajlugkub. (Yausuas 1:8) Yog twb muaj Yehauvas ua tus pab lawm, koj yeej yuav txaus siab kawm thiab nyeem ntxiv zuj zus txog nws.

12. Vim li cas peb ho yuav tau kawm Yexus lub neej thiab nws tes hauj lwm tshaj tawm txoj xov zoo?

¹² Peb yuav tau lauj sij hawm tsis so los xav txog Yexus lub neej thiab nws tes hauj lwm uas tshaj tawm txoj xov zoo. Yog peb xav teev tiam Yehauvas nyob rau lub sim ceeb uas muaj kev nyuaj siab ntxhov plawv no ces peb yuav tau rau siab ntso kawm xwv peb thiaj taug tau Yexus qab. (1 Petus 2:21) Yexus yeej qhia rau nws cov thwj tim lawm tias lawv yuav raug ntau yam kev nyuaj siab ntxhov plawv. (Lukas 14:27, 28) Txawm li ntawd los nws yeej tso siab plhuav tias lawv yuav thev taus txhua yam tib yam nkaus li nws. (Yauhas 16:33) Yog li ntawd, peb yuav tau kawm kom paub Yexus lub neej zoo zoo thiab teem hom phiaj tias peb yuav xyaum Yexus li cas rau li cas hauv peb lub neej.

13. Koj yuav tau thov Yehauvas tsis so txog dab tsi, thiab yog vim li cas?

¹³ Tej uas koj paub xwb zoo tsis txaus. Txoj kev kawm kom paub yog los mus pab kom koj paub Yehauvas zoo ntxiv zuj zus thiab muaj kev hlub thiab kev ntseeg rau nws. (1 Kauleethaus 8:1-3) Lub caij koj kawm txog Yehauvas ntawd, kav tsij thov kom Yehauvas tsav koj txoj kev ntseeg tsis so. (Lukas 17:5) Nws siab dawb siab zoo kawg nkaus li, nws yeej yuav teb koj tej lus thov. Yog koj paub Vajtswv zoo zoo lawm ces koj yuav muaj kev ntseeg thiab yuav pab tau kom koj ua tau qhov zoo ntxiv zuj zus.​—Yakaunpaus 2:26.

14. Tus tub txib Petus tau hais li cas xwv peb thiaj paub tias tseem ceeb rau peb siv tej peb kawm? (Saib daim duab.)

¹⁴ Tus tub txib Petus hais ua ntu zus tias tseem ceeb heev rau Yexus cov thwj tim siv tej  uas lawv kawm hauv lub neej. Nws thiaj li muab Nau-as zaj los ua piv txwv. Yehauvas hais rau Nau-as tias nws yuav tso dej los nyab ntiaj teb thiab nws yuav muab tej tib neeg phem nyob rau Nau-as tiam rhuav pov tseg. Qhov uas Nau-as paub hais tias dej yuav los nyab ntiaj teb xwb, cawm tsis tau nws tsev neeg. Lub sij hawm uas Petus hais no yog hais txog ua ntej dej tseem tsis tau los nyab thiab “lub sijhawm uas Nau-es txua nkoj.” (1 Petus 3:20) Yog li ntawd, Nau-as thiab nws tsev neeg thiaj li ua raws li Vajtswv qhia rau lawv es mus txua ib lub nkoj loj loj heev. (Henplais 11:7) Petus muab qhov ua kev cai raus dej piv rau tej uas Nau-as ua tias: “Txoj kevcai raus dej no pab tau nej dim.” (1 Petus 3:21) Yog li no thiaj li muab qhov uas koj npaj ua kev cai raus dej piv rau Nau-as thiab nws tsev neeg tes hauj lwm uas lawv tau ua lub nkoj tau ntau ntau xyoo. Ua li koj yuav tau ua dab tsi xwv koj thiaj npaj txhij ua kev cai raus dej?

15. Ntxeev dua siab tshiab yog li cas tiag?

¹⁵ Ib yam uas peb yuav tau ua tawm plaws hauv nruab siab tuaj yog tso peb tej kev txhaum tseg es ntxeev dua siab tshiab. (Tes Haujlwm 2:37, 38) Yog peb ntxeev dua siab tshiab ces peb yeej yuav hloov peb lub neej tiag tiag. Ua li koj puas tau muab tej yam uas tsis haum Yehauvas siab tso pov tseg, xws li kev plees kev yis, siv yeeb siv tshuaj, tej lus phem los sis lus vuab tsuab? (1 Kauleethaus 6:9, 10; 2 Kauleethaus 7:1; Efexus 4:29) Yog koj haj tseem hloov tsis tau tau ces kav tsij xyaum hloov kam tiag lawm yav tom ntej. Qhia rau tus uas tuaj qhia Vajlugkub rau koj paub los sis mus hais cov txwj laus hauv koj lub koom txoos kom pab koj seb yuav ua li cas rau li cas. Yog tias koj yog ib tug hluas thiab tseem nrog koj niam thiab koj txiv nyob ua ib tse, nug kom nkawd pab koj tswj tej yam uas tsis zoo xwv koj thiaj ua tau kev cai raus dej.

16. Yog peb xav teev tiam Yehauvas tsis tu ncua, peb yuav tau ua dab tsi?

¹⁶ Yuav kom koj teev tiam tau Yehauvas tsis tu ncua, koj yuav tau mus tej kev sib txoos thiab txhawb nqa tej kev sib txoos. (Henplais 10:24, 25) Thaum koj mus tshaj tawm tau txoj xov zoo lawm los, koj yuav tau mus tsis tu ncua. Yog koj yim mus, koj yuav yim nyiam. (2 Timautes 4:5) Yog koj haj tseem yog ib tug hluas uas nrog koj niam thiab koj txiv nyob, ua  zoo tshuaj koj tus kheej li no tias: ‘Puas yog kuv niam thiab kuv txiv pheej yuav tau hais kom kuv npaj mus kev sib txoos los sis mus tshaj tawm txoj xov zoo xwb? Los sis kuv tsis tos leej twg hais?’ Yog koj tsis tos leej twg ces yuav qhia tias koj yeej muaj kev ntseeg thiab koj yeej qhia tau tias koj hlub thiab ris Yehauvas txiaj ntsig. Tej yam no yog “hwm Vajtswv” thiab yog tej yam uas koj muab pub rau Yehauvas. (2 Petus 3:11; Henplais 13:15) Tej yam uas txaus siab hlo muab pub rau Yehauvas es tsis muaj leej twg yuam, yuav ua rau Yehauvas zoo siab heev. (Muab piv rau 2 Kauleethaus 9:7.) Tos peb ua npaum li no rau Yehauvas los, yeeb vim yog ua rau peb zoo siab.

17-18. Dab tsi yuav pab tau koj xwv koj thiaj xav ua kev cai raus dej, thiab vim li cas ho pab tau? (Pajlug 3:3-6)

¹⁷ Thaum koj paub zuj zus tuaj es xav ua kev cai raus dej, koj yuav raug ntau yam kev sim siab. Muaj ib txhia yuav thuam luag koj txog koj txoj kev ntseeg. Lawv yuav tawm tsam los sis tsim txom koj. (2 Timautes 3:12) Txawm koj twb xyaum ua qhov zoo xwb los, muaj tej thaum koj tseem rov mus ua tau tej qhov phem uas ib txwm ua tag los lawm. Los sis tej thaum koj yuav saib yam li tseem tshuav ntev heev koj mam li ua tau kev cai raus dej ces koj yuav tos tsis taus thiab ntxhov siab heev. Muaj dab tsi pab tau kom koj thiaj li thev taus? Qhov uas yuav pab tau koj ntawd yog kev hlub rau Yehauvas.

¹⁸ Koj txoj kev hlub rau Yehauvas yog ib yam zoo kawg nkaus uas koj muaj. (Nyeem Pajlug 3:3-6.) Yog koj txoj kev hlub rau Vajtswv ruaj khov khwb kho lawm ces koj yuav thev taus txhua yam uas los raug koj. Nyob rau hauv phau Vajlugkub yeej hais ntau ntau zaus txog Yehauvas txoj kev hlub uas nyob mus ib txhis rau cov uas teev tiam nws. Txoj kev hlub no yuav ua rau nws tsis ncaim tsis nrug cov uas teev tiam nws thiab nws txoj kev hlub yuav tsis muaj hnub xaus. (Phau Ntawv Nkauj 100:5) Vajtswv tsim koj muaj nws tus yam ntxwv. (Chivkeeb 1:26) Yog li ntawd, koj yuav ua li cas koj thiaj xyaum tau nws txoj kev hlub?

19. Yuav ua li cas koj thiaj li ris txiaj ntsig rau txhua yam uas Yehauvas tau ua rau koj? (Kalatias 2:20)

¹⁹ Koj yuav tau xyaum kom paub ris lwm tus txiaj ntsig. (1 Thexalaunikes 5:18) Hnub tas hnub tuaj, nco ntsoov nug koj tus kheej li no tias, ‘Yehauvas tau qhia nws txoj kev hlub li cas rau kuv?’ Ces tom qab ntawd, thov Yehauvas  thiab ua nws tsaug rau yam uas nws tau ua rau koj. Nco ntsoov tias tos Yehauvas ua zoo rau koj los yeeb vim yog nws hlub koj. Tus tub txib Povlauj kuj pom txog Yehauvas txoj kev hlub no tib yam nkaus. (Nyeem Kalatias 2:20.) Tshuaj koj tus kheej li no tias, ‘Kuv puas kam qhia kuv txoj kev hlub rov rau nws?’ Yog koj txoj kev hlub rau Yehauvas tawg paj txi txiv lawm ces koj yuav tsis rov mus ua tej yam tsis zoo thiab koj yuav thev taus txhua yam uas los raug koj. Tsis tas li ntawd, yuav ua rau koj tau hau ntsoov teev tiam Yehauvas tsis tseg tsis tu thiab qhia tias koj yeej hlub nws tiag tiag li.

20. Koj yuav tau ua li cas koj thiaj muab tau koj tus kheej cob rau Yehauvas, thiab qhov uas koj txiav txim siab no tseem ceeb npaum li cas?

²⁰ Ntev mus ntev tuaj, koj txoj kev hlub rau Yehauvas yuav loj zuj zus ces koj yuav thov tias koj xav muab koj lub neej cob rau nws. Nco ntsoov tias thaum koj muab koj lub neej cob rau Yehauvas, koj yuav muaj txoj kev cia siab no: Koj yuav yog nws teej nws tug mus ib txhiab ib txhis. Thaum koj muab koj lub neej cob rau Yehauvas lawm, koj cog lus tias txawm zoo txawm phem los koj yuav teev tiam nws mus li. Tsis tas li ntawd koj yuav tsis ua rov ua rais, tsuas cog lus ib zaug xwb. Yeej yog ib txoj kev txiav txim siab loj heev thaum peb muab peb tus kheej cob rau Yehauvas. Nco ntsoov li no tias: Nyob rau hauv koj lub neej, koj yeej txiav txim siab ua ntau ntau yam. Ib txhia yeej zoo tiam sis qhov uas koj txiav txim siab muab koj lub neej cob rau Yehauvas yog qhov zoo tshaj. (Phau Ntawv Nkauj 50:14) Xatas yuav sim koj txoj kev hlub rau Yehauvas. Nws vam tias koj yuav tso Yehauvas tseg. Tsis txhob swb rau Xatas kiag li. (Yauj 27:5) Txoj kev hlub rau Yehauvas uas koj cog ruaj khov khwb kho yuav pab tau koj ua raws li tej lus koj tau cog rau Yehauvas lawm thiab koj tseem yuav huab yam nrog Yehauvas sib raug zoo dua qub.

21. Vim li cas peb ho hais tias ua kev cai raus dej tsis yog qhov xaus tiam sis yog qhov pib ntawm koj lub neej?

²¹ Tom qab koj muab koj lub neej cob rau Yehauvas tag lawm, mus nrog txwj laus hauv koj lub koom txoos tham seb koj yuav ua li cas ntxiv. Nco ntsoov tias ua kev cai raus dej tsis yog qhov xaus tiam sis yog qhov pib ntawm koj lub neej teev tiam Yehauvas. Yog li ntawd, kav tsij tsav koj txoj kev hlub rau Yehauvas tam sim no. Teem kom muaj hom phiaj xwv koj txoj kev hlub thiaj yuav tawg paj txi txiv hnub tas hnub tuaj. Yog koj ua li no ces yuav rub tau koj lub siab kom ua kev cai raus dej. Hnub ntawd yuav tshwj xeeb heev rau koj. Tiam sis tsuas yog koj nyuam qhuav pib ua neej rau Yehauvas xwb. Cia koj txoj kev hlub rau Yehauvas thiab nws tus Tub hlob mos nyoos mus ib txhis.