1. Niam txiv xav kom me nyuam tau dab tsi xwb?

 COV niam txiv, peb paub tias koj yeej xav kom koj cov me nyuam ntseeg thiab hlub Yehauvas. Tiam sis peb pom tsis tau Yehauvas. Yog li ntawd, yuav ua li cas koj thiaj li yuav pab tau koj cov me nyuam kom nrog Yehauvas sib raug zoo thiab paub tias yeej muaj nws tiag?​—Yakaunpaus 4:8.

2. Yuav ua li cas niam txiv thiaj cob qhia tau me nyuam txog Yehauvas tej yeeb yam qhuas lug?

² Ib yam uas niam txiv pab tau me nyuam kom nrog Yehauvas sib raug zoo yog kawm Vajlugkub nrog lawv. (2 Timautes 3:14-17) Txawm li ntawd los nyob hauv phau Vajlugkub qhia tias muaj dua ib txoj hau kev uas niam txiv cob qhia tau me nyuam txog Yehauvas thiab. Nyob rau hauv phau Pajlug, ib leeg txi hais rau nws tus tub tias kom nco ntsoov Yehauvas tej yeeb yam qhuas lug thaum saib tej uas Yehauvas tsim. (Pajlug 3:19-21) Peb yuav mus piav ob peb txoj hau kev uas niam txiv siv tau tej uas Yehauvas tsim los qhia lawv cov me nyuam kawm txog Yehauvas tus xeeb ceem.

3. Niam txiv yuav pab me nyuam li cas?

³ Nyob hauv phau Vajlugkub hais tias “txawm neeg tsis pom Vajtswv los yog lawv saib tej uas Vajtswv tsim txij thaum ntuj tsim teb raug los, lawv yeej paub tias Vajtswv zoo li cas.” (Loos 1:20) Cov niam txiv, tej zaum nej yuav coj nej cov me nyuam mus yos ua si. Siv lub sij hawm no los qhia me nyuam txog “tej uas Vajtswv tsim” seb qhia li cas txog Vajtswv tej yeeb yam qhuas lug. Cia peb mus kawm ntxiv seb cov niam txiv ho khaws tau Yexus tus yam ntxwv li cas.

4. Yexus siv tej uas Vajtswv tsim los mus qhia nws cov thwj tim li cas? (Lukas 12:24, 27-30)

 ⁴ Cia peb saib seb Yexus siv tej uas Vajtswv tsim los mus cob qhia li cas. Muaj ib zaug, Yexus hais kom nws cov thwj tim saib tej uab lag thiab tej paj hmab paj ntoos. (Nyeem Lukas 12:24, 27-30.) Yog Yexus xav piav txog tej tsiaj los sis tej nroj tsuag los yeej tau tiam sis nws siv noog thiab paj hmab paj ntoos los qhia rau nws cov thwj tim vim lawv paub tej ntawd zoo dua. Tej zaum cov thwj tim yeej pom uab lag ya mus mus los los thiab tej paj hmab paj ntoos tawg ntsa paug hauv tej tiaj nrag. Thaum Yexus piav txog tej no, ntshe nws kuj taw tes mus rau tej ntawd thiab. Tom qab Yexus qhia tej no tag, nws qhia rau nws cov thwj tim paub tias lawv Leej Txiv uas nyob saum ntuj ceeb tsheej mas yeej muaj siab dawb siab zoo thiab pub rau luag tiag tiag. Yehauvas yeej yuav pub rau cov uas teev tiam nws kom muaj noj muaj hnav ib yam li nws pub rau tej uab lag thiab tej paj uas tawg nra paug hauv tej tiaj nrag.

5. Cov niam txiv siv tej uas Yehauvas tsim los cob qhia lawv cov me nyuam txog Yehauvas li cas?

⁵ Cov niam txiv, nej yuav cob qhia nej cov me nyuam ib yam li Yexus li cas? Tej zaum kuj zoo rau koj qhia koj tus me nyuam txog ib yam tsiaj los sis tej nroj tsuag uas koj nyiam. Thaum koj qhia rau nws, nco ntsoov qhia seb tej koj nyiam ntawd ho qhia li cas txog Yehauvas. Tom qab ntawd, ho nug koj tus me nyuam seb nws ho nyiam tus tsiaj twg los sis tej nroj tsuag twg. Yog koj hais tau raug tej yam uas koj tus me nyuam nyiam ces nws yuav kheev mloog koj piav dua thaum koj qhia txog Yehauvas tej yeeb yam qhuas lug rau nws mloog.

6. Peb khaws tau li cas los ntawm Khixatafaw niam tus yam ntxwv?

⁶ Cov niam txiv puas yuav tau lauj sij hawm los mus tshawb nrhiav qho tus tsiaj los sis tej nroj tsuag xwv lawv thiaj qhia tau lawv cov me nyuam txog Yehauvas? Tsis tas cov niam txiv yuav ua li ntawd. Txawm Yexus los nws twb tsis piav ntev piav ntau txog tej uab lag yuav noj nyob li cas los sis tej paj hmab paj ntoos nrhau cag li cas thiaj loj. Tej zaum koj cov me nyuam nyiam kawm txog qho yam uas Yehauvas tsim los qhov uas koj piav ob peb nyuag lo txog tej ntawd xwb twb txaus lawm. Muaj ib tug kwv tij npe hu ua Khixatafaw (Christopher) hais txog nws tseem yau li no tias: “Kuv niam tsuas hais ob peb nyuag lo xwb los twb pab tau peb ris txiaj ntsig rau tej yam Vajtswv tsim nyob puag ncig peb lawm. Xws li thaum peb mus ze tej toj roob hauv pes, nws tsuas hais tias: ‘Saib seb lub roob ntawd loj ua luaj! Yehauvas mas zoo tiag tiag li puas yog?’ Los sis thaum peb mus ze rau ntawm hiav txwv, nws tsuas hais tias: ‘Saib seb dej hiav txwv nphau tej niag nphwv muaj zog kawg! Ntshe Vajtswv muaj zog kawg li puas yog?’” Khixatafaw hais tias: “Kuv niam hais ob peb nyuag lo yooj yooj yim li no twb raug peb siab kawg li lawm.”

7. Koj yuav cob qhia koj cov me nyuam kom txawj xav txog tej uas Vajtswv tsim li cas?

⁷ Thaum koj cov me nyuam loj zuj zus tuaj lawm, koj yeej cob qhia tau koj cov me nyuam kom xav txog tej uas Yehauvas tsim thiab seb lawv khaws tau dab tsi los ntawm tej ntawd txog Yehauvas. Koj xaiv ib yam uas Yehauvas tau tsim thiab nug koj cov me nyuam li no tias, “Yam no qhia koj dab tsi txog Yehauvas?” Ntshe koj yuav xav tsis thoob li thaum lawv teb.​—Mathais 21:16.

8. Thaum cov niam txiv “taug kev,” lawv muaj lub cij fim los qhia lawv cov me nyuam txog dab tsi?

⁸ Cov niam txiv Ixayees yuav tau qhia lawv tej me nyuam txog Yehauvas tej lus sam hwm thaum lawv “taug kev.” (2 Kevcai 11:19) Nyob rau hauv teb chaws Ixayees, yeej muaj ntau txoj kev rau tib neeg taug. Thaum lawv taug tej kev ntawd, lawv yeej pom tsiaj txhu, noog, thiab paj tawg ua nrw niab. Yog li ntawd, thaum cov Ixayees taug tej kev ntawd, lawv muaj rab peev xwm qhia tau lawv cov me nyuam txog tej uas Yehauvas tsim.  Niaj hnub nim no nej cov ua niam ua txiv los yeej muaj rab peev xwm qhia tau nej tej me tub me nyuam txog tej uas Yehauvas tsim tib yam nkaus. Cia peb piav txog ib co niam txiv uas tau ua li no lawm.

9. Koj khaws tau dab tsi los ntawm Punitha thiab Kayas?

⁹ Nyob rau teb chaws Eedias (India) ntawm ib lub nroog loj loj, muaj ib leej niam npe hu ua Punitha hais tias: “Thaum peb mus xyuas tej nruab ze rau pem toj siab, wb ob niam txiv siv lub sij hawm no los cob qhia wb cov me nyuam txog tej uas Yehauvas tsim. Kuv xam pom tias wb cov me nyuam yeej nkag siab dua thaum peb tsis nyob hauv nroog.” Cov niam txiv, nej tej me nyuam yeej yuav nco ntsoov lub sij hawm uas nej nrog lawv ua ke rau tej thaj chaw zoo zoo nkauj. Hos nyob rau teb chaws Maudauva (Moldova), muaj ib tug muam npe hu ua Kayas (Katya) hais tias: “Tej uas kuv nco txog thaum tseem me nyuam yaus yog nrog kuv niam thiab kuv txiv nkawd mus rau pem yaj sab. Kuv ris nkawd txiaj ntsig kawg li uas nkawd tau cob qhia kuv thaum yau yau tuaj kom nco ntsoov saib tej uas Yehauvas tau tsim thiab seb tej ntawd qhia li cas txog Yehauvas.”

10. Cov niam txiv ua tau li cas xwb yog tias coj tsis tau tej me nyuam mus xyuas pem yaj sab? (Saib lub ntsiab “ Tej Yam Pab Tau Niam Txiv.”)

¹⁰ Koj yuav ua li cas yog koj coj tsis tau koj cov me nyuam mus rau pem yaj sab? Nyob rau teb chaws Eedias, muaj ib tug hu ua Amos (Amol) hais tias: “Thaj chaw uas kuv nyob no, cov niam txiv khwv ib hnub ib hnub thiab hais txog qhov uas yuav coj me nyuam mus saib pem yaj sab mas kim kawg li. Tiam sis yog cov niam txiv coj lawv cov me nyuam mus ncig tej chaw ua si los sis nce mus nyob txheej las tshav saum ru tsev ces lawv cov me nyuam yuav pom tej uas Yehauvas tau tsim thiab yuav piav tau txog Yehauvas tej yeeb yam qhuas lug.” Thaum koj ua tib zoo soj ntsuas, koj yeej pom tej uas Yehauvas tsim nyob puag ncig koj lub vaj lub tsev es muab coj los qhia koj cov me nyuam. (Phau Ntawv Nkauj 104:24) Xws li koj yuav pom tej me kab me noog, tej nroj ntsuag, thiab lwm yam uas hais tsis txhij tsis txhua. Muaj ib tug poj niam nyob rau teb  chaws Ntsaws Mes Nis (Germany) npe hu ua Kalina (Karina) hais tias: “Kuv niam yeej ib txwm nyiam nyiam tej paj hmab paj ntoos. Thaum kuv tseem yog ib tug me nyuam ntxhais hluas, kuv niam wb taug kev mus rau ub rau no, kuv niam yeej taw tes rau tej paj hmab paj ntoos ntawd los qhia kuv.” Cov niam txiv, nco ntsoov nej yeej siv tau tej yeeb yaj kiab thiab ntaub ntawv uas lub koom haum luam tawm los mus cob qhia nej tej me tub me nyuam txog tej uas Yehauvas tsim. Yog li ntawd, txawm nej yuav nyob rau rooj teb twg los xij peem, nej yeej cob qhia tau nej cov me nyuam kom lawv nco ntsoov saib tej uas Vajtswv tsim. Txuas ntxiv no, cia peb tham txog Yehauvas tej yeeb yam qhuas lug ib txhia xwv nej thiaj paub muab piav qhia rau nej cov me nyuam.

11. Cov niam txiv pab tau cov me nyuam pom Yehauvas txoj kev hlub li cas?

¹¹ Yuav kom pab tau koj cov me nyuam pom Yehauvas txoj kev hlub ces qhia kom koj cov me nyuam saib tej tsiaj seb lawv tu lawv tej me nyuam li cas. (Mathais 23:37) Koj kuj qhia tau ntau ntau yam uas Vajtswv tsim zoo nkauj zoo saib huv tib si. Kalina hais ntxiv tias: “Thaum kuv niam wb taug kev mas kuv niam yeej hais kom kuv nres thiab ua tib zoo saib tej paj. Nyias tawg nyias lawm ib yam zoo nkauj heev mas ua rau kuv pom Yehauvas txoj kev hlub. Tom qab no kuv pom tej paj nyias tawg nyias ib lub zoo tsis xws ib lub. Tej no qhia tias Yehauvas txoj kev hlub rau peb loj heev.”

12. Cov niam txiv pab tau lawv cov me nyuam xam pom Vajtswv lub tswv yim li cas? (Phau Ntawv Nkauj 139:14) (Saib daim duab.)

¹² Pab koj cov me nyuam xam pom Vajtswv lub tswv yim. Yehauvas lub tswv yim tob tshaj peb lub. (Loos 11:33) Xws li koj qhia tau rau koj cov me nyuam tias dej yaj tau mus ua huab ces huab txawm nqa tau dej ib qho mus rau ib qho. (Yauj 38:36, 37) Tsis tas li ntawd, koj kuj piav tau tias tib neeg lub cev ntaj ntsug tsim tau zoo li cas rau li cas. (Nyeem Phau Ntawv Nkauj 139:14.) Muaj ib leej txiv npe hu ua Vadamias (Vladimir) tau hais tias: “Muaj ib hnub wb tus me tub caij tsheb kauj vab vau raug nws. Ob peb hnub tom qab, lub qhov nqaij txawm rov nqawm zuj zus tuaj. Kuv tus poj niam wb thiaj li qhia rau nws tias Yehauvas tsim tau tej keeb hauv peb lub cev kom txawj hlav tuaj sib tuav. Wb qhia rau nws tias tej uas tib neeg tsim tau yeej ua tsis tau li ntawd. Xws li, yog muaj ib lub tsheb sib nraus ces lub tsheb ntawd yeej rov kho tsis tau kom zoo li qub. Qhov uas wb piav li no thiaj ua rau wb  tus me tub xam pom tias Yehauvas lub tswv yim zoo tshaj plaws li.”

13. Cov niam txiv pab tau lawv cov me nyuam xam pom Vajtswv lub zog loj zog nchav li cas? (Yaxayas 40:26)

¹³ Yehauvas xav kom peb txhua leej txhua tus ntsia lub ntuj thiab ua zoo xav txog nws lub zog loj zog nchav uas tuav tej yam saum nruab ntug cia kom nyias nyob muaj nyias chaw. (Nyeem Yaxayas 40:26.) Nco ntsoov qhia rau koj tej me tub me nyuam kom saib lub ntuj thiab ua zoo xav txog tej yam lawv pom. Nyob rau teb chaws Tais Vam (Taiwan), muaj ib tug muam npe hu ua Thees Thees (Tingting) nco txog thaum nws tseem yog me nyuam yaus tias: “Muaj ib zaug kuv niam coj wb mus pw tom hav zoov thiab thaum wb ntsia rau saum nruab ntug, wb pom hnub qub ntau heev, yeeb vim yog tsis muaj tej teeb hauv nroog ci. Lub sij hawm ntawd, kuv txhawj tias xyov kuv puas yuav teev tiam tau Yehauvas mus ntxiv vim tej tub ntxhais nrog kuv kawm ntawv ua ke pheej ntxias kom kuv ua tej yam tsis zoo. Kuv niam txhawb kom kuv xav txog Yehauvas lub dag lub zog uas nws siv los mus tsim tej hnub qub ntawd thiab kom kuv nco ntsoov tias nws yeej yuav siv nws lub dag zog los mus pab kuv kov yeej txhua yam kev sim siab uas kuv raug. Tom qab wb mus los, tej kuv pom ntawd ua rau kuv xav paub Yehauvas zuj zus ntxiv thiab ua rau kuv kub siab lug xav teev tiam Yehauvas ntxiv lawm xwb.”

14. Cov niam txiv siv tau tej uas Vajtswv tsim los qhia lawv cov me nyuam kom xam pom tias Yehauvas yog ib tug Vajtswv uas muaj kev zoo siab li cas?

¹⁴ Tej yam uas Yehauvas tsim qhia tias nws yog ib tug Vajtswv muaj kev zoo siab thiab nws xav kom peb muaj kev zoo siab tib yam nkaus. Cov neeg tshawb txuj ci tau soj ntsuas tias ib txhia tsiaj txhu nyiam dhia ua si, tsis hais nas noog los sis ntses. (Yauj 40:20) Thaum koj cov me nyuam saib tej tsiaj txhu dhia ua si, lawv puas tuaj dab ros? Xws li thaum lawv pom qaib rheeb kab los sis thaum me nyuam npua da av. Lwm zaus yog koj cov me nyuam pom tej tsiaj txhu dhia ua si es ua rau lawv tuaj dab ros, cia li qhia rau lawv tias peb teev tiam ib tug Vajtswv uas muaj kev zoo siab heev.​—1 Timautes 1:11.

15. Yuav ua li cas cov niam txiv thiaj li paub tej uas me nyuam lub siab xav? (Pajlug 20:5) (Saib daim duab.)

¹⁵ Muaj qee lub sij hawm yeej tsis yooj yim rau cov me nyuam qhib siab rau cov niam txiv. Yog  tias muaj li no rau koj cuab yim neeg, koj yuav tau nrhiav txoj hau kev los mus nrog koj cov me nyuam sib txuas lus kom lawv qhib siab rau koj. (Nyeem Pajlug 20:5.) Muaj ib txhia niam txiv xam pom tias yeej yooj yim dua rau lawv sib txuas lus nrog lawv cov me nyuam yog lawv mus ncig xyuas tej uas Vajtswv tsim, yeeb vim yog tsis muaj tej ub tej no los tab kaum lawv thiab lawv cov me nyuam. Nyob rau lub teb chaws Tais Vam, muaj ib leej txiv npe hu ua Maxahikaum (Masahiko) hais tias: “Thaum wb coj wb cov me nyuam mus ncig toj roob hauv pes los sis mus taug kev ntawm ntug dej ces ua rau wb cov me nyuam lub siab tus tus. Ces yooj yooj yim rau wb nug seb tej uas lawv lub siab xav yog li cas rau li cas.” Hos Kayas hais li no tias: “Tom qab kawm ntawv tas, kuv niam coj kuv mus ncig tej chaw ua si zoo zoo nkauj. Vim qhov chaw no ua rau kuv lub siab nyob tus yees, thiaj tsis nyuaj rau kuv piav txog tej yam uas muaj nyob hauv tsev kawm ntawv los sis kuv tej kev txhawj xeeb rau kuv niam mloog.”

16. Yuav ua li cas tsev neeg thiaj so tau los siav thiab muaj kev lom zem thaum mus saib tej uas Vajtswv tsim?

¹⁶ Thaum ib tse tib neeg twg mus xyuas tej uas Yehauvas tsim, kuj zoo rau lawv so kom los siav thiab muaj kev lom zem ua si. Yog lawv ua li no, lawv ib leeg yuav hlub ib leeg dua. Nyob hauv phau Vajlugkub hais tias “muaj sijhawm zoo siab” thiab “muaj sijhawm seevcev lomzem.” (Tej Lus Qhia 3:1, 4) Yehauvas tsim tau ntau ntau yam zoo nkauj zoo saib hauv ntiaj teb no ces yeej muaj ntau yam rau sawv daws mus ua. Muaj ntau tsev tib neeg nyiam mus ncig hav zoov hav tsuag, mus pem yaj sab, mus ncig toj roob hauv pes los sis mus ncig tej ntug dej ua si. Ib txhia me nyuam kuj nyiam mus dhia ua si ntawm tej qho chaw zoo zoo nkauj, nyiam saib tsiaj txhu los sis nyiam ua luam dej ntawm tej pas dej. Yehauvas tsim tau ntau ntau yam rau sawv daws tau mus ncig saib thiab mus ua.

17. Vim li cas cov niam txiv yuav tau pab lawv cov me nyuam kom nyiam tej uas Vajtswv tsim?

¹⁷ Thaum nyob rau hauv lub qab ntuj tshiab, cov niam txiv nrog rau lawv cov me tub me nyuam yuav txaus siab heev rau tej uas Vajtswv tsim. Thaum ntawd peb los yuav tsis ntshai tsiaj thiab tej tsiaj los yuav tsis ntshai peb lawm. (Yaxayas 11:6-9) Peb yuav txaus siab rau tej uas Vajtswv tsim ntawd mus ib txhis. (Phau Ntawv Nkauj 22:26) Cheem lub sij hawm ntawd tseem tsis tau los txog, cov niam txiv kav tsij pab nej cov me nyuam kom txaus siab rau tej uas Vajtswv tsim niaj hnub nim no. Yog tias nej siv tej uas Vajtswv tsim los mus qhia nej cov me nyuam tam sim no txog Vajtswv ces lawv yuav xav tib yam li Vaj Ntxwv Daviv tias: “[Yehauvas] . . . tsis muaj leejtwg txawj ua tau tej txujci zoo li koj ua.”​—Phau Ntawv Nkauj 86:8.