Vim li cas “tus txivneej” ho hais tias nws tej qub txeeg qub teg yuav “poob” yog tias nws yuav Luv? (Luv 4:1, 6)

Nyob hauv phau Vajlugkub, yav thaum ub yog ib tug txiv neej muaj poj niam tiam sis nws ho nruam sim es tsis muaj tub muaj ki, yuav ua rau ib txhia xav li no: Yuav ua li cas rau nws tej liaj tej teb? Lawv caj ces puas yuav tu noob? Nyob rau hauv Mauxes Txoj Kev Cai yuav pab kom peb nkag siab txog tej no.

Yuav ua li cas rau tej liaj tej teb yog hais tias ib tug txiv neej nruam sim los sis nws ho muab nws thaj av muag vim nws txom txom nyem? Nws ib tug kwv tij los sis ib tug nruab ze yuav los sis txhiv thaj av ntawd los kuj tau. Ua li no thaj av thiaj tseem yog lawv tsev neeg ntiag tug.​—Levis Kevcai 25:23-28; Teev Npe 27:8-11.

Yuav ua li cas tus txiv neej uas nruam sim lawm caj ces thiaj tseem muaj ntxiv? Yuav tau muab nws tus poj niam txis rau ib tug kwv tij. Tus txiv neej uas yuav tus poj ntsuam ntawd thawj tug tub yuav tsum muab ua tus poj ntsuam ntawd thawj tug txiv tus tub. Tus tub no yuav saws tus poj ntsuam thawj tug txiv tej qub txeeg qub teg thiab lub koob lub npe. Ua li no tus poj ntsuam thiaj tsis txom nyem.​—2 Kevcai 25:5-7; Mathais 22:23-28.

Cia peb mus tham txog Na-aumis tus yam ntxwv. Nws tus txiv npe hu ua Elimelej. Thaum nws tus txiv thiab nws ob tug tub tag sim neej lawm, tsis muaj leej twg los ntaus thawj thiab saib xyuas nws. (Luv 1:1-5) Thaum nws rov qab los txog hauv teb chaws Yudas, Na-aumis hais kom nws tus nyab uas hu ua Luv mus nug Npau-am yuav lawv daim teb rov qab. Npau-am yog ib tug nruab ze rau Na-aumis tus txiv. (Luv 2:1, 19, 20; 3:1-4) Tiam sis Npau-am paub hais tias muaj ib tug nruab ze tseem txheeb tshaj nws lawm thiab. Nyob hauv phau Vajlugkub, tus nruab ze no hu ua “tus txivneej.” Nws muaj cai yuav ua ntej Npau-am.​—Luv 3:9, 12, 13.

Thaum thawj, “tus txivneej” no txau siab hlo pab nkawd. (Luv 4:1-4) Txawm yuav tag nyiaj txiag me ntsis los nws paub tias Na-aumis yuav yug tsis tau ib tug tub los tuav nws tus txiv caj ces lawm. Yog tus txiv neej no yuav thaj av ces yuav yog ib feem txhab rau nws ntiag tug rau yav tom ntej ces nws kuj pom zoo yuav ua li ntawd thiab.

Tiam sis tus txiv neej no hloov siab lawm tom qab nws paub tias Luv haj tseem yuav tau txiv. Nws hais tias: “Yog li ntawd, kuv yuav tso tseg tsis yuav thaj teb ntawd, rau qhov thaum dua kuv lawm, thaj teb ntawd yuav tsis yog kuv cov menyuam qubtxeeg qubteg.” (Luv 4:5, 6) Vim li cas nws ho hloov siab li no?

Yog hais tias tus txiv neej los sis lwm tus yuav Luv es tom qab ntawd yug tau ib tug tub ces Elimelej thaj av yuav yog tus tub ntawd ntiag tug. Tej no ho ua rau tus txiv neej tej qub txeeg qub teg poob tau li cas? Nyob hauv phau Vajlugkub tsis qhia tshab tshab tiam sis tej zaum yuav yog raws li hais no.

• Thawj yam yog nws saib tias nkim nws cov nyiaj mus yuav Elimelej thaj av vim nws saws tsis tau los ua nws ntiag tug. Yog Luv muaj tub ces yuav ua nws tus tub li ntiag tug.

• Yam ob yog nws yuav tau thaj tsob Na-aumis thiab Luv nkawd.

• Yam peb, yog tus txiv neej ntawd thiab Luv nkawd muaj me nyuam ua ke ces tej me tub me nyuam yuav koom qub txeeg qub teg nrog tus txiv neej ntawd tej me nyuam thiab.

• Yam plaub, yog tus txiv neej ntawd tsis muaj me nyuam ces tus tub uas Luv yug ntawd yuav tau tag nrho Elimelej thiab tus txiv neej ntawd ob thaj av. Tus txiv neej ntawd thaj av yuav poob mus rau tus tub uas Luv yug los ua Elimelej caj ces, ces tus txiv neej ntawd yuav tsis muaj feem xyuam dab tsi. Yog li ntawd, tus txiv neej thiaj tsis kam pab Na-aumis. Nws thiaj li muab tso mus rau Npau-am ua tus yuav. Npau-am thiaj li yuav vim nws xav kom “muaj tus los tuav tus uas tuag lawm lub cuabtam.”​—Luv 4:10.

Tus txiv neej ntawd tsuas xav txog nws lub koob lub npe thiab nws tej cuab txhiaj cuab tam xwb. Nws yog ib tug neeg qia qub. Txawm tus txiv neej no ua npaum li nws ua tau kom muaj suab muaj npe los peb pom tias niaj hnub nim no txawm nws lub npe xwb los tsis muaj neeg paub lawm. Nws kuj tsis tau txais qhov koob hmoov li Npau-am uas tau los ua Yexus Khetos uas yog tus Mexiyas tus yawg koob. Yog li ntawd, vim tus txiv neej no txoj ke qia dub es tsis tuaj yeem pab lwm tus ces nws thiaj tsis tau koob hmoov.​—Mathais 1:5; Lukas 3:23, 32.