1-2. Feem ntau muaj li cas xwb thaum tib neeg ua kev cai raus dej, thiab koj yuav tau xav li cas?

 KOJ puas tau pom thaum tib neeg ua kev cai raus dej? Koj yeej hnov lawv txaus siab hlo teb ob nqe lus nug ua ntej lawv ua kev cai raus dej. Koj pom hais tias lawv tsev neeg thiab tej phooj ywg zoo siab kawg nkaus li rau lawv. Thaum lawv tawm plaws hauv dej los, lawv luag ntxhi zoo siab heev thiab koj yeej hnov txhua leej txhua tus npuaj teg zoo siab rau lawv. Txhua lub lim tiam, muaj txhiab txhiab leej yeej ua kev cai raus dej kom lawv tau ua Yehauvas ib tug Tim Khawv.

² Ua li koj puas tau xav dua tias yuav ua kev cai raus dej? Yog tias koj xav ces koj yog ib tug neeg tshwj xeeb tshaj plaws nyob hauv lub qab ntuj phem no vim koj txiav txim siab los “pehawm [Yehauvas].” (Phau Ntawv Nkauj 14:1, 2) Tab txawm koj yuav laus yuav hluas los xij peem, zaj kawm no yog sau rau koj kiag. Tiam sis cov uas twb ua kev cai raus dej lawm los zaj kawm no yuav tsav tau lawv txoj kev ntseeg kom kub siab lug teev tiam Yehauvas mus ib txhis. Cia peb txhua tus los mus kawm ua ke peb lub ntsiab lus seb vim li cas peb ho xav teev tiam Yehauvas.

3. Vim li cas Yehauvas cov tib neeg nyiam qhov tseeb thiab kev ncaj ncees? (Phau Ntawv Nkauj 119:128, 163)

³ Yehauvas sam hwm kom nws cov tib neeg “nyiam qhov tseeb.” (Xakhaliyas 8:19) Yexus txhawb kom nws cov thwj tim muaj kev ncaj ncees. (Mathais 5:6) Qhov no txhais tias kom ib tug twg yuav tsum muaj lub siab ntshaw ua qhov yog, qhov zoo, thiab ua lub neej dawb huv li Vajtswv pom zoo. Koj puas nyiam qhov tseeb thiab kev ncaj ncees? Peb yeej paub zoo tias koj yeej nyiam. Koj ntxub tej lus dag, txhua yam uas tsis ncaj thiab kev lim hiam. (Nyeem Phau Ntawv Nkauj 119:128, 163.) Yog leej twg dag, tus ntawd ua raws li Xatas tus uas kav lub qab  ntuj no lub siab nyiam. (Yauhas 8:44; 12:31) Xatas lub hom phiaj yog dag kom Vajtswv Yehauvas puas koob puas npe. Xatas twb pib dag txog Vajtswv puag thaum nyob hauv lub vaj Edees los lawm. Nws ua rau kom tib neeg xav tias Yehauvas yog ib tug uas cuaj khaum, tsis coj ncaj, thiab muab tej yam zoo npog ntawm tib neeg. (Chivkeeb 3:1, 4, 5) Xatas txoj kev dag txog Yehauvas no haj tseem ntxias tau tib neeg ntseeg quj qees. Thaum tib neeg tsis “nyiam qhov tseeb” ces Xatas ntxias tau lawv mus ua tej yam tsis ncaj thiab ua kev phem kev qias.​—Loos 1:25-31.

4. Yehauvas tau ua li cas los qhia tias nws yog “tus Vajtswv tseeb”? (Saib daim duab.)

⁴ Yehauvas yog “tus Vajtswv tseeb,” thiab nws txaus siab hlo qhia qhov tseeb rau cov uas muaj lub siab xib nws. (Phau Ntawv Nkauj 31:5) Qhov uas nws ua li no txhawb tau lawv kom tsis txhob mloog Xatas tej lus dag. Yehauvas kuj qhia kom nws cov tib neeg hais lus tseeb thiab ua ncaj. Qhov no pab tau kom lawv muaj ntsej muaj muag thiab muaj lub siab kaj. (Pajlug 13:5, 6) Koj puas pom tias muaj li no thiab, thaum koj kawm phau Vajlugkub? Koj kawm tias Yehauvas txoj kev yeej zoo dua rau noob neej thiab koj taug. (Phau Ntawv Nkauj 77:13) Koj thiaj xav ua lub neej ncaj ncees li Vajtswv pom zoo. (Mathais 6:33) Tsis tas li ntawd, koj xav ua npaum li koj ua tau los qhia qhov tseeb rau lwm tus thiab qhia tias tej lus uas Xatas hais txog Vajtswv Yehauvas yog dag xwb. Ua li koj yuav qhia li cas?

5. Koj yuav txhawb nqa qhov tseeb thiab kev ncaj ncees li cas?

⁵ Koj yeej ua tau ib lub neej uas qhia meej tseeb tias koj tsis txhawb nqa Xatas tej lus dag tiam sis koj nyiam tej yam tseeb xwb. Koj yeej qhia tau tias koj xav yuav Yehauvas ua tus kav thiab koj xav ua tej yam uas Yehauvas xam pom tias zoo. Ua li koj ho ua tau li cas los qhia xwb? Thov Yehauvas, muab koj lub neej cob rau nws, thiab ua kev cai raus dej. Qhov uas koj nyiam qhov tseeb thiab qhov yog yeej zoo txaus rau koj txiav txim siab ua kev cai raus dej lawm.

6. Vim li cas nyob hauv Phau Ntawv Nkauj 45:4 ho pab tau kom koj hlub Yexus Khetos?

⁶ Vim li cas koj ho hlub Yexus Khetos? Yeeb vim yog cov lus nyob rau hauv Phau Ntawv Nkauj 45:4. (Nyeem. b) Yexus nyiam qhia  qhov tseeb, kev txo hwj chim thiab kev ncaj ncees. Yog tias koj nyiam kev ncaj ncees thiab qhov tseeb ces koj yeej yuav hlub Yexus Khetos tib yam nkaus. Muaj ib zaug Yexus muaj lub siab tawv qhawv hais daws nws zaj vim nws nyiam qhov tseeb thiab qhov yog. (Yauhas 18:37) Ua li Yexus ho txo hwj chim li cas?

7. Koj nyiam li cas txog qhov uas Yexus txo hwj chim?

⁷ Yexus yeej ua qhia kiag tias nws yog ib tug uas txo hwj chim heev. Xws li nws tsis cia leej twg qhuas nws tiam sis nws tsuas ua kom txhua tus qhuas nws Leej Txiv xwb. (Malakaus 10:17, 18; Yauhas 5:19) Raws li hais tas los no, qhov uas Yexus txo hwj chim ua rau peb hlub nws thiab xav xyaum nws tus cwj pwm. Tos Yexus txo hwj chim los, yeeb vim yog nws xyaum coj raws li nws Txiv. (Phau Ntawv Nkauj 18:35; Henplais 1:3) Vim Yexus coj tau raws nkaus li Yehauvas, ua li koj puas xav paub Yexus thiab?

8. Vim li cas peb ho zoo siab tias Yexus yog peb tus Vaj Ntxwv?

⁸ Peb nyiam Yexus ua Vaj Ntxwv heev rau qhov nws yog tus txawj kav tshaj. Yehauvas yog tus cob qhia nws tus Tub kom txawj kav thiab Yehauvas yog tus tsa nws tus Tub ua tus Vaj. (Yaxayas 50:4, 5) Zoo rau peb ua tib zoo xav txog qhov uas Yexus txaus siab hlo ua txhua yam los pab peb vim nws hlub peb. (Yauhas 13:1) Yog li ntawd, koj yuav tau txhawb nqa Yexus vim nws yog koj tus Vaj Ntxwv. Yexus qhia hais tias cov uas hlub nws tiag tiag, yeej yog nws cov phooj ywg kwv luag thiab cov ntawd yeej txaus siab hlo mloog nws tej lus sam hwm. (Yauhas 14:15; 15:14, 15) Yeej yog ib qho txiaj ntsig zoo kawg uas tau los ua Yehauvas tus Tub cov phooj ywg kwv luag.

9. Qhov uas cov ntseeg ua kev cai raus dej zoo xws li Yexus Khetos txoj li cas?

⁹ Yexus cov lus sam hwm ib qho yog kom cov uas raws nws qab ua kev cai raus dej. (Mathais 28:19, 20) Yexus ntaus thawj hlo ua kev cai raus dej. Muaj tej qhov mas nws qhov kev cai raus dej yuav txawv tiam sis dua li ntawd, kuj zoo ib yam. (Saib lub ntsiab “ Yexus Thiab Cov Uas Raws Nws Txoj Kev Cai Raus Dej Ho Sib Txawv Txav Li Cas?”) Thaum Yexus ua kev cai raus dej, nws muab nws tus kheej cob ua Yehauvas tes hauj lwm. (Henplais 10:7) Zoo ib yam li ntawd, cov uas raws Yexus qab yuav tau ua kev cai raus dej tab meeg qhia rau lwm tus paub tias lawv muab lawv lub neej rau Yehauvas tib yam nkaus. Lawv lub neej yog ua raws li Yehauvas lub siab nyiam, tsis yog ua raws li lawv lub siab nyiam. Yog li ntawd, lawv yeej ua raws li Yexus hais tseg lawm tiag.

10. Vim li cas qhov uas koj hlub Yexus ho rub tau koj lub siab los ua kev cai raus dej?

¹⁰ Koj yeej ntseeg tias Yexus yog Yehauvas tib leeg Tub thiab ntseeg tias Yexus yog tus Vaj Ntxwv uas Yehauvas tau tsa los kav peb. Koj yeej paub tias Yexus txo hwj chim thiab coj tib yam nkaus li nws Txiv ntag. Koj tau kawm hais tias nws tau pub zaub mov rau cov tshaib plab, txhawb cov uas qaug zog, thiab kho cov neeg muaj mob. (Mathais 14:14-21) Koj yeej pom ntsoov tias nws coj nws lub koom txoos niaj hnub no li cas rau li cas. (Mathais 23:10) Thiab koj paub hais tias yav tom ntej no, nws tseem yuav ua ntau tshaj thaum los kav Vajtswv lub Nceeg Vaj. Qhov uas koj qhia tias koj hlub Yexus yog xyaum nws tus yam ntxwv. (Yauhas 14:21) Ib yam ntawd yog muab koj lub neej cob rau Yehauvas thiab ua kev cai raus dej.

11. Qhov uas tseem ceeb rau koj ua kev cai raus dej yog dab tsi, thiab yog vim li cas?

¹¹ Qhov uas tseem ceeb rau koj ua kev cai raus dej yog dab tsi? Yexus hais tias Vajtswv txoj kev cai uas tseem ceeb dua ntais yog li no: “Koj yuav tsum hlub Yehauvas uas yog koj tus Vajtswv kawg siab kawg ntsws, kawg dag kawg zog, kawg laj lim tswv yim.” (Malakaus 12:30)  Cov lus no puas hais tau raug nkaus koj txoj kev hlub rau Vajtswv?

12. Vim li cas koj ho hlub Yehauvas? (Saib daim duab.)

¹² Yeej muaj ntau txoj hau kev ua tau rau peb hlub Yehauvas. Xws li koj tau kawm tias Yehauvas yog “txoj hauv paus siav” thiab nws yog tus muab “ib puas tsav yam uas zoo thiab ib puas tsav yam koob hmoov uas zoo kawg nkaus.” (Phau Ntawv Nkauj 36:9; Yakaunpaus 1:17) Txhua yam zoo uas koj nyiam puav leej yog Vajtswv muab.

13. Vim li cas Yexus tus nqe theej txhoj ho yog ib yam uas zoo tshaj plaws?

¹³ Yexus tus nqe theej txhoj yog ib yam zoo tshaj plaws Yehauvas tau muab los pab peb. Vim li cas peb ho hais tau li ntawd? Cia peb mam li mus tham seb Yehauvas thiab Yexus nkawd sib raug zoo npaum li cas. Yexus hais tias: “Leej Txiv hlub kuv” thiab “kuv hlub Leej Txiv.” (Yauhas 10:17; 14:31) Tos nkawd sib raug zoo li no los, yeeb vim yog nkawd yeej nyob ua ke tau qas txhiab qas vam xyoo dhau los lawm. (Pajlug 8:22, 23, 30) Yog peb muab ua tib zoo xav mas ntshe thaum Vajtswv pom nws tus Tub raug txom nyem thiab tuag yuav hlais kiag nws nplooj siab ib rhe ib rhe. Yehauvas hlub noob neej thiab koj kawg nkaus li, nws thiaj yeem cia nws tus Tub los tuag theej xwv koj thiab lwm tus thiaj tau nyob mus ib txhis. (Yauhas 3:16; Kalatias 2:20) Yog li ntawd, tsim nyog rau peb yuav tsum tau hlub Vajtswv rov qab.

14. Lub hom phiaj zoo tshaj plaws uas koj xaiv tau yog dab tsi?

¹⁴ Koj yim kawm txog Yehauvas ces koj txoj kev hlub rau nws yim loj. Tej zaum koj yeej muaj lub siab xav nrog nws sib raug zoo tam sim no thiab mus lawm ib txhis. Txhob tag kev cia siab, koj yeej nrog tau nws sib raug zoo xwb xwb li. Nws yeej xav kom koj ua qhov zoo qhov yog, nws lub siab thiaj kaj. (Pajlug 23:15, 16) Tos koj ua tau li no los twb yog tej koj tau ua lawm, tsis yog tej koj hais xwb. Qhov uas koj ua koj lub neej yeej qhia meej tseeb tias koj hlub Yehauvas tiag. (1 Yauhas 5:3) Lub hom phiaj uas koj xaiv tau no yeej yog ib lub uas zoo tshaj plaws, tsis muaj dab tsi yuav pauv tau.

15. Yuav ua li cas koj thiaj qhia tau tias koj hlub Yehauvas?

¹⁵ Yuav ua li cas koj thiaj qhia tau tias koj hlub Yehauvas? Qhov uas koj qhia tau ntawd yog koj thov thiab muab koj lub neej cob rau nws. (Phau Ntawv Nkauj 40:8) Tom qab ntawd, koj ua kev cai raus dej tab meeg sawv daws pom. Raws li peb tham dhau los lawm, lub caij koj ua kev cai raus dej no yog ib lub sij hawm tseem ceeb thiab zoo siab heev hauv koj lub neej. Txij ntawd mus koj pib ua lub neej raws li Yehauvas lub siab nyiam. (Loos 14:8; 1 Petus 4:1, 2) Qhov no yog ib txoj kev txiav txim siab loj kawg li tiam sis yuav qhib tau ntau txoj hau kev rau koj ua neej kaj siab lug. Ua cas ho ua tau li ntawd?

16. Raws li Phau Ntawv Nkauj 41:12 tau hais, Yehauvas yuav muab nqi zog li cas rau cov uas muab lawv lub neej los teev tiam nws?

¹⁶ Yehauvas yog ib tug uas siab dawb tshaj plaws. Txawm koj muab ntau npaum li cas rau nws los nws yeej muab ntau tshaj qhov ntawd rov rau koj. (Malakaus 10:29, 30) Txawm peb nyob rau lub qab ntuj phem no los nws yuav pub kom koj ua lub neej vam meej ntxhias. Thaum koj ua kev cai raus dej, tsis yog koj lub neej xaus li ntawd tiam sis nyuam qhuav pib tshiab tshiab xwb. Koj muaj rab peev xwm teev tiam tau koj Leej Txiv Yehauvas mus ib txhiab ib txhis. Txoj kev sib hlub tam li txiv tub ntawm koj thiab Yehauvas yuav tawg paj txi txiv thiab koj lub hnub nyoog yuav ntev npaum li Yehauvas lub.​—Nyeem Phau Ntawv Nkauj 41:12.

17. Koj ua tau dab tsi rau Yehauvas?

¹⁷ Thaum koj txiav txim siab muab koj lub neej cob rau Yehauvas thiab ua kev cai raus dej, twb yog koj muab tau ib yam uas zoo tshaj plaws rau nws. Yehauvas muab txhua yam zoo pub rau koj lawm. Yog li ntawd, qhov uas Yehauvas xav kom koj ua yog muab siab npuab nws mus li. (Yauj 1:8; 41:11; Pajlug 27:11) Lub neej uas koj tau los teev tiam Yehauvas no, yeej zoo thiab tsis muaj dab tsi yuav pauv tau. Qhov uas koj hlub Yehauvas yeej tsim nyog rau koj ua kev cai raus dej pub rau nws.

18. Tej zaum zoo rau koj rov tshuaj koj tus kheej li cas?

¹⁸ Koj tib leeg nkaus nkaus xwb thiaj paub tias koj yuav ua kev cai raus dej los tsis ua. Qhov uas yuav pab tau koj zoo dua yog zaum tsaws xav li no tias, ‘Vim li cas kuv pheej tos tsis ua kev cai raus dej?’ (Tes Haujlwm 8:36) Nco ntsoov peb yam uas tau hais hauv zaj kawm no. Thawj yam, koj nyiam qhov tseeb thiab kev ncaj ncees. Rov tshuaj koj li no tias, ‘Kuv puas xav pom hnub uas txhua leej txhua tus hais lus tseeb thiab ua qhov zoo qhov yog xwb?’ Yam ob, koj hlub Yexus Khetos. Rov tshuaj koj li no tias, ‘Kuv puas xav kom Vajtswv Leej Tub ua Vaj Ntxwv kav kuv, thiab kuv puas kam xyaum nws lub neej?’ Yam peb, koj hlub Yehauvas. Rov tshuaj koj li no tias, ‘Kuv puas xav kom Yehauvas txaus siab tias kuv teev tiam nws?’ Yog koj pom zoo li peb qho lus nug no ces tsis txhob ua siab deb, kav tsij ua kev cai raus dej.​—Tes Haujlwm 16:33.

19. Piav seb thaum hais txog ua kev cai raus dej, vim li cas koj yuav tau tsis txhob ua xyem xyav. (Yauhas 4:34)

¹⁹ Yog koj pheej ua xyem xyav tsis ua kev cai raus dej, ua tib zoo xav txog Yexus qhov lus piv txwv. (Nyeem Yauhas 4:34.) Yexus muab qhov ua raws li nws Txiv lub siab nyiam piv rau zaub mov. Vim li cas nws ho muab piv li ntawd? Yeeb vim yog zaub mov noj mus yug peb lub cev. Yexus paub zoo tias txhua yam uas Yehauvas hais kom peb ua yeej zoo rau peb. Yehauvas yeej tsis ua ib yam twg kom peb raug mob. Yog li ntawd, Yehauvas thiaj xav kom peb ua kev cai raus dej. (Tes Haujlwm 2:38) Cia li tso siab plhuav tias ua kev cai raus dej yeej yuav tsav tau koj lub neej lawm hov ntau tuaj. Yog koj twb tsis yig ib pluag zaub mov qab qab twg ces tsis txhob yig ua kev cai raus dej.

20. Nyob rau zaj kawm tom ntej yuav piav txog dab tsi?

²⁰ Vim li cas ib txhia pheej tos tsis ua kev cai raus dej? Muaj ib txhia hais tias, “Kuv tsis tau npaj txhij ua kev cai raus dej.” Yeej muaj tseeb tiag, peb yuav tau txiav txim siab zoo zoo ua ntej peb muab peb tus kheej cob rau Yehauvas thiab ua kev cai raus dej. Yog li ntawd, yeej yuav laug sij hawm me ntsis rau koj ua tib zoo txiav txim siab thiab npaj kom txhij thiaj ua tau kev cai raus dej. Tiam sis yog koj muaj ib lub siab ntshaw plias xav ua kev cai raus dej, koj yuav tau ua li cas los npaj xwv koj thiaj ua tau? Nyob rau zaj txuas ntxiv tom ntej no, peb mam li kawm txog.