1. Cov tub hluas Khixatia ua tau dabtsi?

 COV tub hluas Khixatia, thaum nej tseem hluas thiab muaj zog zis, muaj ntau yam uas nej ua tau los pab lub koom txoos. (Pajlug 20:29) Tej zaum koj twb ua ntau yam los pab cov kwvtij nkauj muam lawm thiab tos tsis taus seb thaum twg koj mam li tau ua ib tug tub leg num. Tiamsis koj ho xav tias koj tseem hluas heev thiab twb tsis paub haujlwm dabtsi li es koj puas yuav ua tau los tsis txhob txhawj. Txawm hais tias koj tseem hluas los yeej muaj ntau tsav ntau yam uas koj ua tau tam sim no kom cov nyob hauv lub koom txoos tso siab tau rau koj.

2. Hauv zaj no peb yuav kawm txog dabtsi?

² Hauv zaj no peb yuav kawm seb cov tub hluas Khixatia yuav kawm tau li cas los ntawm Vajntxwv Daviv lub neej thiab tej uas los raug Yudas ob tug vajntxwv, Vajntxwv Axas thiab Yehausafas nkawd. Thiab peb yuav kawm seb 3 tug vajntxwv no ntsib tej teeb meem zoo li cas thiab lawv ho ua li cas los daws lawv tej teeb meem.

3. Cov tub hluas yuav pab tau cov laus li cas?

³ Thaum Daviv tseem hluas nws kawm tau ntau yam uas lwm tus neeg pom tias muaj nuj nqis heev. Daviv muaj kev sib raug zoo nrog Yehauvas thiab nws txawj ntaus nkauj nog ncas heev.  Twb yog li ntawd, Vajntxwv Xa-ules cov tubtxib thiaj hais kom Daviv mus ntaus nkauj nog ncas rau nws mloog thaum nws muaj kev nyuaj siab. (1 Xamuyees 16:16, 23) Cov tub hluas Khixatia, nej yeej txawj ntau tsav ntau yam. Xws li nej txawj siv koos pis tawj (computer) thiab tej twj ntawm tes. Nej puas siv tej no los pab cov kwvtij nkauj muam hauv lub koom txoos kom lawv paub siv lawv tej twj los kawm Vajlugkub thiab npaj rau tej kev sib txoos? Peb cov kwvtij nkauj muam coob tus uas muaj hnub nyoog lawm, lawv siv tsis kam koos pis tawj thiab tej twj ntawm tes. Yog nej pab kom lawv txawj siv lawv tej twj, lawv yuav zoo siab heev thiab nco nej txiaj ntsig.

4. Cov tub hluas Khixatia yuav xyaum Daviv tus qauv li cas? (Saib daim duab ntawm lub khaum.)

⁴ Daviv tes haujlwm qhia tias nws ua dabtsi yog dabtsi, lwm tus thiaj tso siab rau nws. Thaum Daviv tseem yog ib tug tub hluas nws ua tib zoo saib nws txiv pab yaj. Tes haujlwm no tsis yoojyim li. Daviv qhia rau Vajntxwv Xa-ules tias: “Vajntxwv, kuv ibtxwm yug kuv txiv pab yaj. Thaum muaj tsov ntxhuav lossis dais los tom ib tug menyuam yaj kwv mus lawm, kuv cia li raws qab mus ntaus thiab cawm tau tus yaj ntawd rov los. Yog hais tias tsov ntxhuav lossis dais tig los tom kuv, kuv cia li khawm nkaus cajdab qhau thiab muab ntaus tuag kiag.” (1 Xamuyees 17:34, 35) Daviv tsis ntshai tsov ntshai dais vim nws paub tias tiv thaiv nws txiv pab yaj yog nws tes haujlwm. Daviv tso tau ib tug qauv zoo rau cov tub hluas Khixatia xyaum tias lawv ua tes haujlwm twg los lawv yuav tsum rau siab ntso ua kom tiav.

5. Raws li Phau Ntawv Nkauj 25:14, yam uas tseem ceeb tshaj plaws uas cov tub hluas Khixatia ua tau tamsim no yog dabtsi?

⁵ Daviv yog ib tug neeg siab tawv thiab txawj ntaus nkauj nog ncas heev. Tiamsis qhov tseem ceeb tshaj yog nws txojkev sib raug zoo nrog Yehauvas. Rau qhov Yehauvas tsis yog Daviv tus Vajtswv xwb, nws yog Daviv tus phoojywg thiab. (Nyeem Phau Ntawv Nkauj 25:14.) Cov tub hluas Khixatia, qhov uas tseem ceeb tshaj plaws tamsim no yog ua kom nej txojkev sib raug zoo nrog Yehauvas ruaj khov. Yog nej ua li ntawd ces nej yuav ua tau haujlwm ntau ntxiv hauv lub koom txoos.

6. Ib txhia neeg xav li cas txog Daviv?

⁶ Ib qho teeb meem uas Daviv muaj yog ib txhia neeg saib tsis taus nws vim lawv  xav hais tias nws tseem hluas heev thiab tsis paub haujlwm. Xws li thaum Daviv hais tias nws yuav mus tua Nkauli-am, Vajntxwv Xa-ules cheem nws tias: “Koj tseem yog menyuam yaus xwb.” (1 Xamuyees 17:31-33) Ua ntej ntawd los Daviv tus tijlaug tseem cem thiab liam tias nws tsis ua nws tes haujlwm. (1 Xamuyees 17:26-30) Tiamsis Yehauvas paub Daviv zoo. Nws tsis xav hais tias Daviv tseem hluas heev lossis tsis paub haujlwm. Thiab Daviv tso siab rau Yehauvas, Yehauvas thiaj pab Daviv tua Nkauli-am tuag kiag.​—1 Xamuyees 17:45, 48-51.

7. Koj kawm tau li cas los ntawm Daviv?

⁷ Peb kawm tau li cas los ntawm Daviv? Peb kawm tau tias peb yuav tsum ua siab ntev. Muaj tej tug neeg lawv pom koj loj hlob ntawm lawv qhov muag ces yuav siv sijhawm ntev heev ua ntej lawv pom hais tias koj yog ib tug neeg paub tab thiab tiav hluas lawm. Txawm li ntawd los koj paub hais tias Yehauvas tsis saib koj lub cev sab nraud xwb tiamsis nws paub hais tias koj zoo li cas thiab muaj peev xwm ua tau dabtsi. (1 Xamuyees 16:7) Ua kom koj txojkev sib raug zoo nrog Yehauvas ruaj khov. Thaum Daviv ua zoo saib thiab ua zoo xav txog tej uas Yehauvas tsim, nws kawm tau ntau yam txog Yehauvas thiab nws tus yam ntxwv. (Phau Ntawv Nkauj 8:3, 4; 139:14; Loos 1:20) Koj los yuav muaj kev sib raug zoo nrog Yehauvas thiab, yog koj tso siab rau nws thiab thov nws pab koj. Piv txwv tias yog muaj lwm tus menyuam thuam koj tom tsev kawm ntawv vim koj yog Yehauvas ib tug Timkhawv, thov Yehauvas pab kom koj thev taus. Mus tshawb nrhiav peb cov ntaub ntawv thiab yeeb yaj kiab los pab koj seb lwm zaus koj yuav ua li cas. Txhua zaus uas Yehauvas pab koj peem dhau koj tej teeb meem yuav ua rau koj txojkev ntseeg ruaj khov dua qub tuaj. Tsis tas li ntawd xwb, thaum lwm tus pom tias koj muaj kev ntseeg ruaj khov rau Yehauvas ces lawv yuav tso siab rau koj.

8-9. (1) Dabtsi pab kom Daviv ua tau siab ntev thaum nws tseem tos ua vajntxwv? (2) Cov tub hluas Khixatia kawm tau li cas los ntawm Daviv tus qauv?

⁸ Thiab ib qho teeb meem uas Daviv muaj yog nws yuav tsum tau tos ntev heev nws mam li tau ua vajntxwv kav tebchaws Yudas. (1 Xamuyees 16:13; 2 Xamuyees 2:3, 4) Thaum Daviv tseem tos ua vajntxwv, nws ua dabtsi xwb? Txawm nws yuav tau tos los nws tsis qaug zog tiamsis nws ua li nws ua tau los tiv thaiv lub tebchaws Yudas. Xws li thaum Daviv khiav mus nkaum nyob tebchaws Filitees, nws siv lub sijhawm ntawd mus ua rog thiab tua Yixalayees cov yeeb ncuab. Nws ua li ntawd nws thiaj tiv thaiv tau Yudas tus ciam teb.​—1 Xamuyees 27:1-12.

⁹ Cov tub hluas Khixatia, nej kawm tau li cas los ntawm Daviv tus qauv? Kav tsij ua li nej ua tau tamsim no los pab nej cov kwvtij nkauj muam. Cia peb tham txog kwvtij Likadaum (Ricardo) seb nws ua li cas. b Thaum Likadaum muaj 10 tawm xyoo xwb nws twb xav ua ib tug tho kev lawm tiamsis cov txwj laus hais kom nws tos ib ntus tso. Txawm li ntawd los nws tsis tu siab tiamsis nws rau siab ntso mus tshaj tawm. Likadaum hais tias: “Nimno thaum kuv muab coj los xav, tseem muaj ntau yam uas kuv tsis tau paub thiab yuav tau kawm. Kuv thiaj rau siab ntso npaj thiab rov qab mus xyuas cov uas xav kawm Vajlugkub ntxiv. Ua li no kuv thiaj tau kawm Vajlugkub nrog ib tug thiab nimno kuv tsis ntshai mus tshaj tawm lawm.” Niaj hnub no Likadaum ua ib tug tho kev thiab yog ib tug tub leg num lawm.

10. Ua ntej Daviv thiab nws cov tub rog mus cawm lawv cov pojniam tub se, Daviv ua li cas?

 ¹⁰ Cia peb tham seb Daviv ua dabtsi ntxiv. Thaum Daviv thiab nws cov neeg khiav nkaum Xa-ules mus nyob rau cov Filitees tebchaws, muaj ib zaug Daviv thiab nws cov tub rog mus ua rog lawm, txawm muaj tub sab tuaj huab lawv tej qhov txhia chaw thiab coj lawv cov pojniam tub se mus lawm. Daviv yog ib tug tub rog ces nws yeej paub tias nws yuav ua li cas lawv thiaj mus cawm tau lawv cov pojniam menyuam. Tiamsis Daviv tsis ua li ntawd, nws thov Yehauvas pab nws. Daviv thiaj mus cuag tus cev Vajtswv lus Anpiyathas thiab nug Yehauvas tias: “Puas tsimnyog kuv mus caum cov neeg tubsab ntawd?” Yehauvas thiaj kom Daviv kav tsij mus, nws yeej yuav cawm tau cov neeg uas raug ntes lawm. (1 Xamuyees 30:7-10) Cov tub hluas, nej kawm tau li cas los ntawm qhov no?

11. Koj yuav ua li cas ua ntej koj txiav txim siab ua ib yam dabtsi?

¹¹ Mus sab laj nrog koj niam koj txiv ua ntej koj yuav ua ib yam dabtsi. Koj kuj mus sab laj tau nrog cov txwj laus thiab. Lawv yog cov uas Yehauvas muab los saib xyuas lub koom txoos. (Efexus 4:8, NWT ) Yog Yehauvas tso siab tau rau lawv, ces koj yeej tso siab tau rau lawv thiab. Yog koj xyaum lawv txojkev ntseeg thiab mloog lawv hais ces koj yuav paub txiav txim siab zoo. Cia peb mus kawm txog Vajntxwv Axas.

12. Thaum Vajntxwv Axas pib ua vajntxwv kav, nws yog tus neeg zoo li cas?

¹² Thaum Vajntxwv Axas tseem hluas, nws yog ib tug neeg txo hwjchim thiab siab tawv heev. Thaum nws txiv Anpiyas tuag es nws sawv ua vajntxwv kav nws txiv qhov chaw, nws rhuav tshem tej thaj teev dab thiab tej mlom pov tseg tag huv tibsi. “Axas hais kom cov Yudas mloog tus TSWV [“Yehauvas,” NWT ] uas yog lawv cov yawgkoob tus Vajtswv lus, thiab ua raws li tus TSWV [“Yehauvas,” NWT ] tej lus qhia thiab tej lus samhwm.” (2 Xwmtxheej Vajntxwv 14:1-7) Thiab thaum Zelas uas yog tebchaws Ethi-aupias tus thawj tub rog coj 1 plhom tus tub rog tuaj tua tebchaws Yudas, Axas mus cuag Yehauvas pab. Nws hais rau Yehauvas hais tias: “Tus TSWV [“Yehauvas,” NWT ], koj yog tus pab tau cov tubrog uas qaug zog tawmtsam yeej cov tubrog uas muaj zog.  Tus TSWV [“Yehauvas,” NWT ] uas yog peb tus Vajtswv, nimno thov koj cia li pab peb, peb tso siab rau koj.” Axas cov lus thov no qhia rau peb tias nws tso siab tias Yehauvas yuav cawm tau nws thiab nws cov neeg. Twb yog vim li ntawd Yehauvas thiaj ua rau cov tub rog Ethi-aupias swb kiag.​—2 Xwmtxheej Vajntxwv 14:8-12.

13. Tom qab no ua li cas rau Axas lawm xwb? Thiab yog vim li cas?

¹³ Thaum Zelas coj 1 plhom tus tub rog tuaj tua Axas lawv, yeej txaus ntshai kawg. Tiamsis Axas tua yeej vim nws tso siab rau Yehauvas. Tiamsis tom qab no, thaum cov Yixalayees tus Vajntxwv Npasas yuav tuaj ua rog rau nws, nws tsis tso siab rau Yehauvas lawm. Nws mus cuag Xilias tus vajntxwv pab. Vim li ntawd Yehauvas thiaj txib tus cev Vajtswv lus Hananis mus hais rau Axas tias: “Twb tsimnyog koj cia siab rau tus TSWV [“Yehauvas,” NWT ] uas yog koj tus Vajtswv, tiamsis koj ho cia siab rau tus vajntxwv uas kav tebchaws Xilias, vim li ntawd, tus vajntxwv uas kav tebchaws Xilias cov tubrog thiaj khiav dim ntawm koj mus lawm.” Txij thaum ntawd los Axas lub tebchaws thiaj muaj tsov muaj rog tas mus li. (2 Xwmtxheej Vajntxwv 16:7, 9; 1 Vajntxwv 15:32) Peb kawm tau dabtsi los ntawm qhov no?

14. (1) Yog koj tso siab rau Yehauvas, koj yuav ua li cas? (2) Yog koj ua raws li 1 Timautes 4:12, lwm tus yuav saib koj li cas?

¹⁴ Thaum koj ua kevcai raus dej koj qhia tias koj yeej tso siab thiab ntseeg Yehauvas. Kav tsij rau siab ntso ua li ntawd. Thaum koj yuav txiav txim siab ua ib yam dabtsi tseem ceeb, yeej yoojyim rau koj mus cuag Yehauvas. Tiamsis tej uas koj xav hais tias tsis tshua tseem ceeb ne, koj yuav ua li cas? Xws li thaum koj xaiv kev lomzem, kev khwv noj khwv haus thiab koj tej hom phiaj rau yav tom hauv ntej, koj puas nco ntsoov mus cuag Yehauvas? Thiab koj puas ua raws li Vajtswv tej hauv paus ntsiab lus hais? (Pajlug 3:5, 6) Yog koj ua li no ces cov nyob hauv koj lub koom txoos yuav tso siab rau koj thiab Yehauvas yuav zoo siab heev.​—Nyeem 1 Timautes 4:12.

15. Raws li 2 Xwmtxheej Vajntxwv 18:1-3; 19:2, Vajntxwv Yehausafas tau ua yuam kev li cas?

¹⁵ Zoo ib yam li peb sawvdaws, koj los yeej zoo tsis tiav thiab ces muaj tej thaud koj yeej yuav ua yuam kev. Txawm li ntawd los kav tsij teev tiam Yehauvas li koj ua tau.  Cia peb kawm txog Vajntxwv Yehausafas tus qauv. Thaum nws tseem hluas nws ua tau ntau yam zoo. “Nws pehawm nws txiv tus Vajtswv, thiab nws ua raws li Vajtswv tej lus samhwm.” Tsis tas li ntawd xwb, nws tseem xa cov nom tswv mus cob qhia txog Yehauvas rau cov Yudas nyob txhua lub nroog. (2 Xwmtxheej Vajntxwv 17:4, 7) Txawm li ntawd los, muaj ib zaug Yehausafas ua yuam kev loj heev. Twb yog vim li ntawd Yehauvas thiaj xa nws ib tug neeg mus ntuas Yehausafas. (Nyeem 2 Xwmtxheej Vajntxwv 18:1-3; 19:2.) Peb kawm tau li cas txog qhov no?

16. Koj kawm tau li cas los ntawm Laj Ntsim?

¹⁶ Thaum koj tseem hluas yeej tsis yoojyim rau koj ua li lwm tus qhuab qhia thiab qhuab ntuas thiab muab txojkev teev tiam Yehauvas ua yam uas tseem ceeb tshaj hauv koj lub neej. Txawm li ntawd los tsis txhob ntaus siab yau. Kwvtij Laj Ntsim (Rajeev) hais li no txog thaum nws tseem hluas: “Muaj tej thaud kuv yeej tsis paub xyov kuv yuav ua dabtsi. Kuv tsuas ua ib yam li tej hluas ua xwb. Kuv nyiam mus ncaws pob thiab ua si lomzem dua li mus tshaj tawm thiab mus kev sib txoos.” Tiamsis muaj ib tug txwj laus uas txhawj txog Laj Ntsim los ua tib zoo ntuas nws. Laj Ntsim hais tias: “Tus txwj laus ntawd hais kom kuv ua tib zoo xav txog 1 Timautes 4:8.” Laj Ntsim txo hwjchim thiab ua li tus txwj laus ntawd hais. Laj Ntsim hais ntxiv tias: “Kuv thiaj li txiav txim siab muab kev teev tiam Yehauvas ua yam uas tseem ceeb tshaj plaws hauv kuv lub neej. Ob peb xyoos tom qab tus txwj laus ntawd ntuas kuv, kuv tau ua ib tug tub leg num lawm.”

17. Cov laus xav li cas txog cov tub hluas uas rau siab ntso teev tiam Yehauvas?

¹⁷ Cov laus yeej zoo siab heev uas lawv tau nrog nej cov tub hluas pe hawm Yehauvas ua ke. (Xefaniyas 3:9) Thiab lawv zoo siab heev thaum lawv pom nej muaj siab zim mus tshaj tawm thiab rau siab ntso ua nej tes haujlwm rau Yehauvas.​—1 Yauhas 2:14.

18. Raws li Pajlug 27:11, Yehauvas xav li cas txog cov tub hluas uas teev tiam nws?

¹⁸ Cov tub hluas, nco ntsoov tias Yehauvas hlub nej thiab tso siab rau nej. Nws hais tias thaum lub sijhawm kawg, cov tub hluas uas teev tiam nws yuav coob heev, ib yam li cov lwg dej ntsu thaum sawv ntxov. (Phau Ntawv Nkauj 110:1-3) Yehauvas paub tias nej hlub nws thiab yeej xav teev tiam nws kawg siab kawg ntsws. Yog li ntawd ua siab ntev rau lwm tus thiab rau nej tus kheej. Thaum nej ua yuam kev es nej raug qhuab ntuas los xav hais tias yog Yehauvas qhuab ntuas nej xwb. (Henplais 12:6) Rau siab ntso ua tes haujlwm uas Yehauvas muab rau nej ua. Thiab qhov tseem ceeb tshaj, txhua yam uas nej ua, ua kom nej Leej Txiv nyob saum ntuj zoo siab rau nej.​—Nyeem Pajlug 27:11.