1-2. Leejtwg yuav pab tau cov kawm Vajlugkub kom lawv los ua kevcai raus dej?

 TUS MUAM Emim (Amy) nyob tebchaws Fintsis (Fiji) hais tias: “Kuv yeej nyiam tej uas kuv kawm hauv phau Vajlugkub kawg thiab kuv paub tias tej uas kuv kawm ntawd yeej yog qhov tseeb tiamsis tsuas yog tom qab kuv pib tuaj nrog cov kwvtij nkauj muam ua ke kuv mam li hloov kuv lub neej thiab ua kevcai raus dej.” Emim tus qauv qhia rau peb tias peb txhua tus hauv lub koom txoos yuav pab tau cov kawm Vajlugkub los ua kevcai raus dej.

² Peb sawvdaws yuav tsum sib pab thiaj coj tau cov kawm Vajlugkub los ua ib tug hauv lub koom txoos. (Efexus 4:16) Tus muam Lelanim (Leilani) uas yog ib tug tho kev nyob tebchaws Va-uathus (Vanuatu) hais tias: “Muaj ib zaj lus hais tias ‘tagnrho ib zej zog sib pab tu, tus menyuam thiaj loj hlob.’ Kuv xav ib yam li ntawd txog cov kawm Vajlugkub thiab. Tag nrho cov nyob hauv lub koom txoos sib pab thiaj coj tau ib tug los rau qhov tseeb.” Thaum tus menyuam mus kawm ntawv, tag nrho nws tsev neeg, tej phoojywg, thiab cov xib hwb qhia ntawv yuav tsum pab tus menyuam ntawd, nws thiaj yuav loj hlob los ua ib tug neeg paub tab. Zoo ib yam li ntawd peb txhua tus nyob hauv lub koom txoos yuav tsum ua qauv zoo thiab pab txhawb tus kawm Vajlugkub nws thiaj yuav los ua kevcai raus dej.​—Pajlug 15:22.

3. Peb kawm tau li cas los ntawm tej uas Ana, Dualeem, thiab Lelanim lawv hais?

³ Vim li cas tus qhia Vajlugkub yuav tsum cia cov nyob hauv lub koom txoos pab tus nws qhia Vajlugkub rau thiab? Ana uas yog ib tug muam tho kev tshwj xeeb nyob tebchaws Maudauva (Moldova) hais tias: “Muaj ntau yam uas peb yuav tau pab tus  kawm Vajlugkub. Yeej tsis yoojyim rau tus qhia Vajlugkub tib leeg pab xwb.” Kwvtij Dualeem (Dorin) uas yog ib tug tho kev tshwj xeeb nyob Maudauva hais tias: “Muaj tej thaud, lwm tus kwvtij nkauj muam hais tau tej uas txhawb tau tus kawm Vajlugkub siab heev uas kuv tsis tau xav dua li.” Tus muam Lelanim uas peb nyuam qhuav tham tas los no hais ntxiv tias: “Thaum tus kawm Vajlugkub pom tias peb sawvdaws yeej hlub nws tiag ces nws yuav paub tias peb yeej yog Yehauvas cov neeg.”​—Yauhas 13:35.

4. Hauv zaj no peb yuav tham txog dabtsi?

⁴ Tej zaum koj yuav xav tias, ‘Kuv twb tsis yog tus uas qhia Vajlugkub rau nws, es kuv yuav ua li cas pab tau nws?’ Cia peb tham seb thaum muaj neeg caw peb nrog nws mus qhia Vajlugkub rau ib tug, peb yuav ua li cas peb thiaj li pab tau nws. Thiab thaum tus kawm Vajlugkub pib tuaj kev sib txoos lawm, peb yuav pab tau nws li cas. Peb kuj yuav tham seb cov txwj laus yuav pab cov kawm Vajlugkub li cas lawv thiaj los ua kevcai raus dej thiab.

5. Thaum koj nrog ib tug mus qhia Vajlugkub rau lwm tus, koj lub luag haujlwm yog dabtsi?

⁵ Thaum ib tug caw koj nrog nws mus qhia Vajlugkub rau lwm tus neeg, koj tsuas yog mus pab nws xwb. (Tej Lus Qhia 4:9, 10) Yog li ntawd, koj yuav ua li cas koj thiaj li pab tau nws?

6. Thaum koj yuav nrog ib tug mus qhia Vajlugkub rau lwm tus, koj yuav ua li Pajlug 20:18 hais li cas?

⁶ Ua zoo npaj ua ntej. Ua ntej koj nrog ib tug mus qhia Vajlugkub, hais kom nws qhia mentsis txog tus kawm Vajlugkub rau koj. (Nyeem Pajlug 20:18.) Tej zaum koj kuj nug tus qhia Vajlugkub li no: “Lub ntsiab neb yuav kawm yog dabtsi? Koj xav kom nws kawm tau dabtsi ntawm lub ntsiab no? Puas muaj tej yam uas koj tsis xav kom kuv hais? Koj xav kom kuv txhawb nws li cas?” Tej uas nws qhia rau koj yuav pab koj tawm tswvyim li cas koj thiaj pab tau nws thiab tus kawm Vajlugkub. Tus muam Ntsais (Joy) uas yog ib tug tshaj tawm txawv tebchaws hais tias: “Thaum kuv tuav tswvyim nrog cov nrog kuv mus qhia Vajlugkub li no pab tau lawv paub npaj ua ntej tias lawv yuav hais dabtsi thiab yuav pab tus kawm Vajlugkub li cas.”

7. Vim li cas thaum koj nrog ib tug mus qhia Vajlugkub rau lwm tus koj yuav tsum ua tib zoo npaj ua ntej?

⁷ Yog hais tias muaj ib tug caw koj nrog nws mus qhia Vajlugkub rau lwm tus yeej zoo rau koj npaj zaj nej yuav kawm ntawd ua ntej. (Exalas 7:10) Dualeem hais tias: “Kuv zoo siab heev thaum tus nrog kuv mus qhia Vajlugkub ua tib zoo npaj ua ntej seb nws yuav ua li cas nws thiaj txhawb tau tus kawm Vajlugkub.” Tsis tas li ntawd xwb, thaum tus kawm Vajlugkub pom hais tias neb ob leeg puav leej npaj zoo zoo ua ntej neb mus qhia Vajlugkub rau nws, nws yuav xyaum ua li neb ua. Txawm hais tias koj tsis muaj sijhawm npaj zaj neb yuav mus kawm  ntawd kom zoo los koj yuav tsum xyuas kom koj paub seb lub ntsiab neb yuav mus tham ntawd yog dabtsi.

8. Koj yuav ua li cas koj thiaj txhawb tau tus kawm Vajlugkub thaum koj thov Vajtswv rau nej?

⁸ Kev thov Vajtswv thaum kawm Vajlugkub tseem ceeb heev. Yog li ntawd ua tib zoo xav ua ntej seb koj yuav hais li cas yog tus qhia Vajlugkub hais kom koj thov Vajtswv rau nej, koj thiaj thov tau zoo. (Phau Ntawv Nkauj 141:2) Tus muam Hana-es (Hanae) nyob tebchaws Nyiv Pooj hais tias nws tseem nco qab tus muam uas nrog tus qhia Vajlugkub rau nws cov lus thov. Hana-es hais tias: “Nws tej lus thov qhia rau kuv hais tias nws muaj kev sib raug zoo heev nrog Yehauvas. Twb yog vim li ntawd kuv thiaj xav xyaum ua li nws. Thiab thaum nws tuav kuv npe nkaus thov Vajtswv mas ua rau kuv zoo siab kawg.”

9. Raws li Yakaunpaus 1:19, thaum koj nrog ib tug mus qhia Vajlugkub rau lwm tus koj yuav ua li cas koj thiaj pab tau nws?

⁹ Pab tus qhia Vajlugkub. Koj yuav pab tus qhia Vajlugkub li cas? Tus muam Omamuyovais (Omamuyovbi) uas yog ib tug tho kev tshwj xeeb nyob Nai Ntsaw Lia (Nigeria) hais tias: “Tus uas nrog kuv mus qhia Vajlugkub pab tau kuv heev thaum nws ua tib zoo mloog thaum peb kawm Vajlugkub. Thaum nws hais lus los nws tsis hais lus ntau ntau rau qhov nws paub hais tias kuv yog tus qhia Vajlugkub rau tus ntawd.” Yog li ntawd, koj yuav ua li cas koj thiaj paub hais tias thaum twg zoo rau koj hais lus? (Pajlug 25:11) Ua tib zoo mloog seb nkawd tham txog dabtsi. (Nyeem Yakaunpaus 1:19.) Yog koj ua li ntawd ces koj yuav paub hais tias thaum twg zoo rau koj hais lus. Txawm li cas los tsis zoo rau koj hais ntau ntau thiab tshuam tus qhia Vajlugkub lus lossis mus tham txog lwm yam. Thaum zoo hais los piav ib zaj lus piv txwv txog lub ntsiab ntawd lossis nug seb nws puas to taub lub ntsiab ntawd zoo. Txawm koj pab tsis tau tus kawm Vajlugkub ntau los yog koj nco ntsoov qhuas nws thiab qhia tias koj xav pab nws ces yuav ua rau nws muaj siab kawm ntxiv.

10. Thaum koj qhia mentsis txog koj rau tus kawm Vajlugkub yuav pab tau nws li cas?

¹⁰ Qhia mentsis txog koj rau tus kawm Vajlugkub. Xws li koj los paub qhov tseeb li cas, koj ntsib tej teeb meem zoo li cas thiab Yehauvas tau pab koj li cas. (Phau Ntawv Nkauj 78:4, 7) Qhov no yuav txhawb tau nws txojkev ntseeg thiab pab kom nws ua tau siab ntev thev tej teeb meem uas nws ntsib tamsim no. (1 Petus 5:9) Kuj pab tau kom nws muaj siab kawm ntxiv nws thiaj ua tau kevcai raus dej. Nkanpli-aus (Gabriel) uas yog ib tug tho kev nyob tebchaws Nplaxi (Brazil) hais tias: “Thaum kuv hnov txog tej teeb meem uas cov kwvtij raug ua rau kuv pom tias Yehauvas yeej pom tej lawv raug thiab pab lawv. Kuv thiaj xav tias yog Yehauvas twb pab lawv thev dhau lawv tej teeb meem ces nws yeej yuav pab kuv thiab.”

11-12. Vim li cas peb yuav tsum zoo siab hlo tos txais tus kawm Vajlugkub thaum nws tuaj kev sib txoos?

¹¹ Yuav kom tus kawm Vajlugkub to taub phau Vajlugkub zoo thiab ua kevcai raus dej, nws yuav tsum tuaj koom peb tej kev sib txoos. (Henplais 10:24, 25) Niaj zaus yeej yog tus qhia Vajlugkub rau nws caw nws tuaj kev sib txoos. Thaum nws tuaj kev sib txoos peb yuav ua li cas peb thiaj txhawb tau kom nws rov qab tuaj dua?

¹² Zoo siab hlo tos txais tus kawm Vajlugkub. (Loos 15:7) Yog hais tias tus qhia Vajlugkub rau nws tuaj tsis tau txog lub Tsev Nceeg Vaj lossis nws tsis khoom ces kav tsij coj nws mus ntsib lwm tus thiab nrog lawv tham kom nws tsis txhob txaj muag. Kwvtij Dimiv-rhim (Dmitrii) uas ua kevcai raus dej tau ob peb xyoos los no thiab tamsim no yog ib tug tub leg num lawm hais tias: “Kuv nco qab thawj zaug kuv mus txog tom Tsev Nceeg Vaj es ib tug kwvtij pom kuv nyob nraum zoo tos. Nws txawm tuaj nrog kuv tham thiab coj kuv mus rau hauv lub Tsev Nceeg Vaj. Muaj coob tus los hu kuv thiab nrog kuv tham. Ua rau kuv xav tsis thoob li. Kuv xav kom muaj kev sib txoos li no txhua txhua hnub rau qhov kuv tsis tau pom muaj li no nyob lwm qhov li.” Zoo ib yam li Dimiv-rhim tus qauv, yog peb ua zoo tos txais cov kawm Vajlugkub ces lawv yuav xav tuaj kev sib txoos.

13. Yog peb ua qauv zoo, yuav pab tau tus kawm Vajlugkub li cas?

¹³ Ua qauv zoo rau tus kawm Vajlugkub. Yog koj ua qauv zoo ces lawv yuav pom tias lawv nrhiav tau qhov tseeb lawm tiag. (Mathais 5:16) Kwvtij Vitalis (Vitalii) uas yog ib tug tho kev nyob tebchaws Maudauva hais tias: “Thaum kuv pom tias cov kwvtij nkauj muam ua lub neej zoo li cas, lawv txojkev xav zoo li cas, thiab lawv coj tus cwjpwm zoo li cas kuv thiaj paub tias Yehauvas Cov Timkhawv txojkev ntseeg yog qhov tseeb.”

14. Yog peb ua qauv zoo ces yuav pab tau tus kawm Vajlugkub muab tej nws kawm coj los siv rau nws lub neej li cas?

¹⁴ Tus kawm Vajlugkub yuav tsum muab tej uas nws kawm coj los siv rau nws lub neej nws thiaj ua tau kevcai raus dej. Yeej tsis yoojyim rau nws ua li no tiamsis thaum nws pom tias phau Vajlugkub pab tau koj ces nws yuav xav xyaum ua li koj. (1 Kauleethaus 11:1) Tus muam Hana-es uas peb tham tas los lawm hais tias: “Cov kwvtij nkauj muam ua ib yam li tej uas kuv tabtom kawm. Lawv cov qauv pab kom kuv paub txhawb, paub zam txim, thiab paub hlub lwm tus. Lawv puavleej hais zoo txog lwm tus xwb. Kuv kuj xav xyaum ua li no thiab.”

15. Raws li Pajlug 27:17, vim li cas peb yuav tsum ua phoojywg nrog tus kawm Vajlugkub thaum nws pib tuaj kev sib txoos?

¹⁵ Ua phoojywg nrog tus kawm Vajlugkub.  Thaum tus kawm Vajlugkub pib tuaj kev sib txoos, mus nrog nws tham kom koj paub nws zoo. (Filipis 2:4) Qhia rau nws tias koj zoo siab heev uas nws muab tej nws kawm coj los siv rau hauv nws lub neej. Tej zaum koj kuj nrog nws tham txog nws txojkev kawm Vajlugkub, nws tsev neeg, thiab nws txoj haujlwm. Tiamsis nco ntsoov tsis txhob nug tej yam uas yuav ua rau nws txaj muag. Yog peb ua phoojywg nrog nws ces yuav pab tau nws xav los ua kevcai raus dej. (Nyeem Pajlug 27:17.) Tus muam Hana-es tamsim no yog ib tug tho kev. Nws nco txog thaum nws nyuam qhuav pib tuaj kev sib txoos. Nws hais tias: “Thaum kuv muaj phoojywg hauv lub koom txoos ua rau kuv xav mus kev sib txoos. Txawm kuv sab sab lim lim los kuv yuav mus kom tau. Kuv cov phoojywg hauv lub koom txoos pab kom kuv tso tau kuv cov phoojywg qub uas tsis teev tiam Yehauvas tseg. Kuv xav muaj kev sib raug zoo nrog Yehauvas thiab cov kwvtij nkauj muam kuv thiaj txiav txim siab ua kevcai raus dej.”

16. Koj yuav pab tus kawm Vajlugkub li cas ntxiv nws thiaj li ncawg lub koom txoos?

¹⁶ Pab tus kawm Vajlugkub pom tias nws yeej muaj nqis heev hauv lub koom txoos. Hu nws tuaj xyuas nej. (Henplais 13:2) Kwvtij Denis hais li no txog thaum nws tseem kawm Vajlugkub tias: “Muaj ntau zaus thaum cov kwvtij nkauj muam caw kuv pojniam wb mus xyuas lawv es lawv qhia wb txog tej uas Yehauvas tau pab lawv, kuj pab tau wb xav los teev tiam Yehauvas. Thiab yog wb xyaum ua li lawv ces Yehauvas yuav pub wb muaj ib lub neej zoo ib yam li lawv thiab.” Thaum tus kawm Vajlugkub los ua ib tug tshaj tawm lawm koj kuj caw nws nrog koj mus qhia Vajlugkub ua ke. Ib tug tshaj tawm nyob tebchaws Nplaxi hu Dis Ev Nkaum (Diego) hais tias: “Muaj coob tus kwvtij caw kuv nrog lawv mus qhia Vajlugkub. Thaum kuv nrog lawv, tsis yog pab kom kuv paub lawv zoo xwb tiamsis kuv kuj kawm tau ntau tsav ntau yam los ntawm lawv, thiab pab kom kuv muaj kev sib raug zoo nrog Yehauvas thiab Yexus.”

17. Cov txwj laus pab tau cov kawm Vajlugkub li cas?

¹⁷ Cov txwj laus, nrhiav sijhawm los nrog cov kawm Vajlugkub tham kom nej paub lawv. Thaum lawv tsa tes teb, hu lawv tuav npe nkaus thiab teem sijhawm mus qhia Vajlugkub nrog cov uas mus qhia Vajlugkub rau lwm tus. Yog nej ua li no ces nej yuav pab tau cov kawm Vajlugkub xav los ua kevcai raus dej. Tus muam Ntsav Kim (Jackie) uas yog ib tug tho kev nyob Nai Ntsaw Lia hais li no txog cov txwj laus uas nrog lwm tus mus qhia Vajlugkub. Nws hais tias: “Muaj coob tus kawm Vajlugkub xav tsis thoob li thaum lawv paub tias tus ua nrog tus qhia Vajlugkub tuaj yog ib tug txwj laus. Muaj ib tug kawm Vajlugkub hais tias: ‘Peb tus xibhwb yeej tsis ua li ntawd ib zaug li. Nws tsuas  mus xyuas cov neeg muaj nyiaj thiab cov uas them nws xwb.’” Tus kawm Vajlugkub ntawd nimno pib tuaj kev sib txoos lawm.

18. Cov txwj laus yuav ua kom lawv tes haujlwm tiav raws li Tes Haujlwm 20:28 hais li cas?

¹⁸ Cov txwj laus, cob qhia cov tshaj tawm kom txawj qhia Vajlugkub rau lwm tus. Tes haujlwm no yeej tsis yog ib tes haujlwm sib. (Nyeem Tes Haujlwm 20:28.) Yog tus tshaj tawm txaj muag qhia Vajlugkub thaum koj nyob ntawd, nug nws seb nws puas xav kom koj pab ua tus qhia. Tus muam Ntsav Kim puag ta hais tias: “Cov txwj laus ib sij nug kuv txog cov kuv qhia Vajlugkub rau. Thaum kuv tsis paub yuav ua li cas los lawv kuj pab tswvyim rau kuv.” Cov txwj laus, nej yeej pab thiab txhawb tau cov qhia Vajlugkub rau lwm tus kom lawv rau siab ntso qhia. (1 Thexalaunikes 5:11) Ntsav Kim hais ntxiv tias: “Kuv zoo siab heev thaum cov txwj laus qhuas kuv thiab ua kuv tsaug tias kuv rau siab ua kuv tes haujlwm. Lawv cov lus cuab tau kuv lub zog kawg thiab ua rau kuv muaj siab zim mus qhia Vajlugkub rau lwm tus. Lawv tej lus qhuas zoo ib yam li ib khob dej txias uas kuv haus laj siab zim thaum tshav ntuj kub kub.”​—Pajlug 25:25.

19. Peb sawvdaws muaj feem ua dabtsi?

¹⁹ Yog koj tsis muaj ib tug uas koj qhia Vajlugkub rau tamsim no los koj yeej tseem pab tau cov kawm Vajlugkub los ua kevcai raus dej. Thaum koj nrog ib tug mus qhia Vajlugkub rau lwm tus tsis txhob hais lus ntau ntau tiamsis ua tib zoo npaj seb koj yuav pab nws li cas. Thaum cov kawm Vajlugkub tuaj peb tej kev sib txoos nco ntsoov mus hu lawv thiab nrog lawv tham, ua phoojywg nrog lawv thiab ua qauv zoo rau lawv. Cov txwj laus los kuj pab tau cov kawm Vajlugkub thiab cov qhia Vajlugkub rau lawv. Cov txwj laus yuav tsum nco ntsoov qhuas lawv rau tej uas lawv ua tau zoo thiab. Tej zaum tej peb ua me me xwb tiamsis yeej tsis muaj ib yam dabtsi uas zoo tshaj li qhov uas peb pab tau ib tug los hlub thiab teev tiam peb Leej Txiv Yehauvas!