1. Yehauvas cov neeg ntsib tej teeb meem zoo li cas?

 KOJ puas muaj kev nyuaj siab dabtsi? Xws li ib tug hauv lub koom txoos ua rau koj tu siab. (Yakaunpaus 3:2) Lossis cov neeg koj ua haujlwm nrog los yog cov koj kawm ntawv nrog thuam koj vim rau qhov koj teev tiam Yehauvas. (1 Petus 4:3, 4) Lossis koj tsev neeg lossis cov txheeb ze koj txwv tsis pub koj mus kev sib txoos los yog tsis pub koj tham txog koj txojkev ntseeg rau lwm tus. (Mathais 10:35, 36) Tej zaum tej no yuav ua nyuaj heev rau koj thiab koj yuav xav tias yuav zoo dua yog hais tias koj tsis teev tiam Yehauvas. Tiamsis nco ntsoov tias txawm koj tej teeb meem yuav loj npaum li cas los Yehauvas yuav muab laj lim tswvyim rau koj kom koj paub daws koj tej teeb meem thiab yuav pub dag zog kom koj nyiaj taus koj tej kev nyuaj siab.

2. Raws li Loos 15:4, thaum peb nyeem Vajtswv Txojlus, txhawb tau peb li cas?

² Yehauvas muab nws cov neeg thiab lawv tej teeb meem sau cia rau hauv phau Vajlugkub kom peb thiaj kawm tau lawv cov qauv. Nws thiaj tshoov tus tubtxib Paulus sau cov lus hauv Loos 15:4. (Nyeem.) Thaum peb nyeem txog lawv yeej txhawb tau peb lub zog kawg. Tiamsis yuav kom tej uas peb nyeem hauv Vajtswv Txojlus pab tau peb, peb yuav tsum hloov peb lub neej thiab peb txojkev xav raws li tej peb nyeem. Muaj 4 qho uas peb ua tau los pab peb daws peb tej teeb meem: (1) Thov Vajtswv, (2) Xav seb yog koj yog tus neeg uas koj nyeem txog hauv phau Vajlugkub koj yuav ua li cas, (3) Ua zoo xav txog tej koj nyeem, thiab (4) Xyaum ua li tej uas koj nyeem.  Peb yuav tham seb peb yuav ua 4 qhov no 1 qho zuj zus li cas. b Thiab peb yuav siv 4 qhov no los pab peb kawm txog tej uas los raug Vajntxwv Daviv thiab tus tubtxib Paulus.

3. Ua ntej koj nyeem phau Vajlugkub, koj yuav tau ua li cas thiab yog vim li cas?

³ (1) Thov Vajtswv. Ua ntej koj nyeem phau Vajlugkub, thov Vajtswv seb koj yuav ua li cas tej koj nyeem thiaj yuav pab tau koj. Yog koj muaj ib qho teeb meem es koj tsis paub xyov yuav daws li cas, thov Yehauvas pab kom koj nrhiav tau nqi Vajlugkub uas yuav pab tau koj.​—Filipis 4:6, 7; Yakaunpaus 1:5.

4. Yuav kom tej koj nyeem hauv phau Vajlugkub muaj tiag rau koj, koj yuav tau ua li cas?

⁴ Yehauvas tsim kom peb txawj xav. Yog li ntawd, (2) xav seb yog koj yog tus neeg uas koj nyeem txog hauv phau Vajlugkub koj yuav ua li cas. Koj pom tej nws pom thiab koj raug tej nws raug.

5. Koj yuav tau ua tib zoo xav txog dabtsi thiab koj yuav ua li ntawd li cas?

⁵ (3) Ua zoo xav txog tej uas koj nyeem. Thaum koj nyeem phau Vajlugkub, muab tej uas koj nyeem ntawd coj los ua tib zoo xav seb yuav pab tau koj li cas. Yog koj ua li no ces koj yuav to taub lub ntsiab uas koj nyeem ntawd zoo dua. Yog koj nyeem phau Vajlugkub tiamsis tsis muab coj los ua tib zoo xav ces zoo ib yam li ua paj ntaub. Txawm koj muaj khoom txhij txhua los ua daim paj ntaub los yog koj tsis siv sijhawm los ua kiag tej qauv paj ntaub rau ntawm daim ntaub ces koj yeej tsis tau ib daim paj ntaub zoo nkauj los siv. Thaum koj nyeem Vajlugkub, sim teb cov lus nug no: ‘Tus neeg uas kuv nyeem txog no ua li cas nws thiaj daws tau nws qhov teeb meem?’ ‘Yehauvas pab nws li cas?’ ‘Qhov kuv nyeem no yuav pab kuv nyiaj taus kuv tej teeb meem li cas?’

6. Vim li cas peb yuav tsum xyaum ua li tej peb kawm?

⁶ (4) Xyaum ua li tej uas koj nyeem. Yexus hais tias tus neeg uas tsis ua li tej nws kawm ces zoo li tus neeg uas ua nws lub tsev rau saum suab zeb. Nws khwv heev tiamsis thaum muaj cua daj cua dub los ntsawj nws lub tsev, nws lub tsev yuav puas tas. (Mathais 7:24-27) Zoo ib yam li ntawd, thaum peb kawm Vajlugkub es peb ua li thawj 3 qho lawm tiamsis ho tsis ua li tej peb kawm ces yuav nkim peb lub zog xwb. Thaum raug kev sim siab peb txojkev ntseeg yuav tsis khov. Tiamsis yog peb ua li tej peb kawm hauv phau Vajlugkub ces peb yuav paub txiav txim siab zoo, muaj kev thaj yeeb, thiab muaj txojkev ntseeg ruaj khov. (Yaxayas 48:17, 18) Cia peb muab 4 qho uas peb kawm no los pab peb seb peb yuav kawm tau li cas ntawm Vajntxwv Daviv lub neej.

7. Peb yuav tham txog leejtwg hauv phau Vajlugkub?

⁷ Puas tau muaj ib tug phoojywg lossis koj cov nruab ze ntxeev siab rau koj? Yog muaj ces tej uas Vajntxwv Daviv ua thaum nws tus tub Axaloos ntxeev siab rau nws thiab txeeb ua vajntxwv yuav pab tau koj.​—2 Xamuyees 15:5-14, 31; 18:6-14.

8. Koj yuav ua li cas Yehauvas thiaj pab tau koj?

⁸ (1) Thov Vajtswv. Thaum koj nyeem txog Vajntxwv Daviv tag lawm, qhia rau Yehauvas ntxaws ntxaws tias koj xav li cas txog koj qhov teeb meem. (Phau Ntawv Nkauj 6:6-9) Thiab thov Yehauvas pab kom koj nrhiav tau tej nqi Vajlugkub uas yuav pab tau koj.

9. Muaj dabtsi tshwm sim rau Vajntxwv Daviv thiab nws tus tub Axaloos?

⁹ (2) Xav seb yog koj yog Daviv no koj yuav ua li cas? Xav seb thaum Vajntxwv Daviv tus tub  Axaloos ntxeev siab rau nws, ua rau nws nyuaj siab npaum li cas. Tau ntau xyoo Axaloos ntxias kom cov pej xeem nyiam nws. (2 Xamuyees 15:7) Thaum muaj neeg coob nyiam nws lawm, nws txawm xa neeg mus thoob plaws Yixalayees thiab hais kom lawv yuav nws ua vajntxwv. Axaloos tseem ntxias tau Ahithaufees uas yog Daviv tus phoojywg zoo thiab tus tuav xam ntxeev siab rau Daviv thiab. Thaum Axaloos tshaj tawm rau sawvdaws tias nws ua vajntxwv kav lawm ces nws txawm npaj tswvyim yuav muab nws txiv tua. Lub sijhawm no tej zaum Daviv tabtom mob hnyav heev tom tsev. (Phau Ntawv Nkauj 41:1-9) Tiamsis Daviv ho paub txog Axaloos lub tswvyim phem nws thiaj khiav tawm hauv Yeluxalees lawm. Tom qab no Axaloos cov tub rog thiab Daviv cov tub rog sib tua. Axaloos cov tub rog swb thiab Axaloos raug tua tuag lawm.

10. Tej uas los raug Vajntxwv Daviv kuj yuav ua tau li cas rau nws?

¹⁰ Sim xav seb Vajntxwv Daviv tu siab npaum li cas thaum nws tus tub Axaloos uas nws hlub thiab nws tus phoojywg Ahithaufees uas nws ntseeg siab ntxeev siab rau nws thiab xav muab nws tua. Tej no puas ua rau Daviv tsis tso siab rau nws cov phoojywg ib tug li lawm nyob tsam lawv ho koom siab nrog Axaloos? Nws puas qaug zog thiab khiav tib leeg mus rau lwm lub tebchaws es kav liam nws cov neeg? Daviv tsis ua li ntawd. Nws peem dhau qhov teeb meem no.

11. Daviv ua li cas thaum nws raug teeb meem?

¹¹ (3) Ua zoo xav txog tej uas koj nyeem. Daviv daws nws qhov teeb meem li cas? Daviv tsis maj ntuj maj teb ua dabtsi los ua yuam kev tag lossis cia li kav liam tsis ua dabtsi li. Tiamsis nws thov Yehauvas thiab nws cov phoojywg pab nws. Thaum nws paub tias nws yuav ua li cas lawm, nws maj nroos ua. Txawm hais tias Daviv tu siab heev los nws tsis chim thiab tsis ntxub leejtwg, nws tseem tso siab rau nws cov phoojywg thiab rau Yehauvas.

12. Yehauvas pab Daviv li cas?

¹² Yehauvas pab Daviv li cas? Thaum peb tshawb nrhiav peb yuav pom tias Yehauvas yog tus pab Daviv thev taus nws qhov teeb meem. (Phau Ntawv Nkauj 3:1-8) Yehauvas pab Daviv ua tau li nws lub siab xav thiab pab Daviv cov phoojywg tiv thaiv Daviv.

13. Thaum muaj ib tug neeg ua rau koj chim lossis tu siab koj yuav xyaum Daviv li cas? (Mathais 18:15-17)

¹³ (4) Xyaum ua li tej uas koj nyeem. Thaum koj muaj teeb meem koj yuav tsum maj nrawm nroos daws. Nyob rau ntawm koj qhov teeb meem seb zoo li cas, tej zaum koj kuj siv tau Yexus cov lus hauv Mathais tshooj 18 los pab koj. (Nyeem Mathais 18:15-17.) Tsis txhob maj ua dabtsi thaum koj tseem chim siab tiamsis thov Yehauvas pab kom koj ua lub siab tus thiab muaj tswvyim los daws koj qhov teeb meem. Tso siab rau koj cov phoojywg thiab cia lawv pab koj. (Pajlug 17:17) Qhov tseem ceeb tshaj plaws, tso siab rau Yehauvas thiab nws Txojlus.​—Pajlug 3:5, 6.

14. Thaum twg zoo rau koj nyeem 2 Timautes 1:12-16 thiab 4:6-11, 17-22?

¹⁴ Yog koj tsev neeg tawm tsam koj vim koj yog Yehauvas ib tug Timkhawv lossis koj nyob rau lub tebchaws uas koj teev tiam tsis tau Yehauvas li koj lub siab nyiam lossis nom tswv txwv tsis pub ua Yehauvas tes haujlwm, koj yuav ua li cas xwb? Ob Timautes 1:12-16 thiab 4:6-11, 17-22 yuav txhawb tau koj lub zog. c Paulus sau cov nqi Vajlugkub no thaum nws tseem raug kaw hauv tsev loj cuj.

15. Koj thov tau Yehauvas txog dabtsi?

¹⁵ (1) Thov Vajtswv. Ua ntej koj nyeem cov  nqi Vajlugkub no qhia Yehauvas kom ntxaws ntxaws tias koj xav li cas txog koj qhov teeb meem. Thiab thov Yehauvas pab kom koj to taub tej uas los raug Paulus koj thiaj paub muab cov nqi Vajlugkub no los pab koj.

16. Zaum no Paulus raug teeb meem dabtsi?

¹⁶ (2) Xav seb yog koj yog Paulus no koj yuav ua li cas? Lub sijhawm ntawd luag muab saw hlau khi Paulus thiab muab nws kaw hauv Loos. Paulus twb raug kaw dua los lawm tiamsis zaum no nws paub hais tias nws yuav raug tua. Tsis tas li ntawd xwb nws ib co phoojywg tso nws tseg thiab nws lub zog los kuj ntaug tas lawm.​—2 Timautes 1:15.

17. Tej teeb meem uas Paulus raug tej zaum yuav ua tau rau Paulus xav li cas?

¹⁷ Tej teeb meem uas Paulus raug no puas ua rau nws xav tias yog nws tsis txhob kub siab mus tshaj tawm ces ntshe nws twb tsis raug ntes? Nws puas chim siab rau cov phoojywg hauv Axia uas tso nws tseg thiab tsis tso siab rau nws cov phoojywg ntxiv lawm? Paulus tsis ua li ntawd. Nws tseem tso siab rau nws cov phoojywg thiab tso siab tias Yehauvas yuav foom koob hmoov rau nws.

18. Paulus ua dabtsi xwb thaum nws ntsib kev nyuaj siab?

¹⁸ (3) Ua zoo xav txog tej uas koj nyeem. Paulus ua li cas xwb? Txawm Paulus paub hais tias tshuav tsis ntev xwb luag yuav muab nws tua los nws nco ntsoov tias qhov tseem ceeb tshaj plaws yog ua kom Yehauvas tau koob meej. Nws xav seb nws yuav ua li cas nws thiaj li txhawb tau lwm tus thiab nws niaj hnub thov Yehauvas pab nws. (2 Timautes 1:3) Nws tsis xav ntsoov txog cov uas tso nws tseg tiamsis nws ua nws cov phoojywg uas nrog nraim nws tsaug rau tej uas lawv ua los pab nws. Thiab Paulus rau siab ntso kawm Vajtswv Txojlus. (2 Timautes 3:16, 17; 4:13) Qhov tseem ceeb tshaj plaws, Paulus ntseeg tuag nthi tias Yehauvas thiab Yexus nkawd hlub nws, nkawd tsis tso nws tseg, thiab nkawd yuav pub nqi zog rau nws.

19. Yehauvas pab Paulus li cas?

¹⁹ Yehauvas twb ceeb toom Paulus ua ntej lawm tias nws yuav raug kev tawm tsam vim nws yog ib tug Khixatia. (Tes Haujlwm 21:11-13) Yehauvas pab Paulus li cas? Yehauvas teb Paulus tej lus thov thiab pub dag zog rau nws. (2 Timautes 4:17, TT ) Thiab Paulus paub tias nws yuav tau txais nqi zog rau nws tes haujlwm uas nws khwv khwv ua. Yehauvas kuj siv Paulus cov phoojywg mus pab nws thiab.

20. Loos 8:38, 39 pab kom peb xyaum ua li Paulus li cas?

²⁰ (4) Xyaum ua li tej uas koj nyeem. Nco ntsoov tias vim peb teev tiam Yehauvas yuav muaj neeg tsis nyiam peb thiab tawm tsam peb. (Malakaus 10:29, 30) Yog li ntawd peb yuav tsum niaj hnub nyeem Vajlugkub thiab thov Yehauvas pab peb es thaum muaj neeg tawm tsam peb, peb thiaj li thev taus. Thiab peb yuav tsum nco ntsoov tias qhov tseem ceeb tshaj plaws yog qhov uas peb ua kom Yehauvas tau koob meej. Yog peb ua li ntawd ces peb paub tias Yehauvas yuav tsis tso peb tseg thiab yuav tsis muaj dabtsi cais tau peb ntawm nws txojkev hlub.​—Nyeem Loos 8:38, 39; Henplais 13:5, 6.

21. Dabtsi pab tau Aya thiab Hev Tawj nkawd los teev tiam Yehauvas?

²¹ Txawm peb lub neej zoo li cas los cov qauv nyob hauv phau Vajlugkub yeej pab tau peb. Xws li Aya uas yog ib tug tho kev nyob tebchaws Nyiv Pooj. Nws hais tias zaj Yaunas hauv phau Vajlugkub pab tau nws tsis ntshai mus tshaj tawm rau cov neeg dua kev. Ib tug tub hluas uas nws niam nws txiv tsis teev tiam Yehauvas nyob tebchaws Idaunixias (Indonesia)  hu ua Hev Tawj (Hector) hais tias tej uas Luv ua pab kom nws xav paub txog Yehauvas thiab los teev tiam nws.

22. Koj yuav ua li cas cov yeeb yaj kiab, cov suab yeeb yam, thiab cov zaj hu ua “Xyaum Lawv Txojkev Ntseeg” thiaj li pab tau koj?

²² Koj yuav ua li cas koj thiaj nrhiav tau tej yam ntxwv hauv phau Vajlugkub los pab koj? Peb cov yeeb yaj kiab, cov suab yeeb yam, thiab tej zaj hu ua “Xyaum Lawv Txojkev Ntseeg” yuav pab tau koj thaum koj nyeem Vajlugkub. d Zoo rau koj thov Yehauvas thiab qhia rau nws tias koj xav kom nws pab koj li cas ua ntej koj saib, mloog, lossis nyeem txog tej yeeb yam no. Xav seb yog koj yog tus neeg uas koj nyeem txog hauv phau Vajlugkub koj yuav ua li cas. Ua tib zoo xav txog Yehauvas cov tub qhe ntawd seb lawv ua li cas daws lawv tej teeb meem thiab Yehauvas tau pab lawv li cas. Xav seb koj yuav muab tej uas koj kawm tau ntawd los pab daws koj tej teeb meem li cas. Ua Yehauvas tsaug rau tej uas nws twb pab koj lawm thiab ua zoo xav seb koj yuav ua li cas koj thiaj mus pab thiab txhawb tau lwm tus.

23. Raws li Yaxayas 41:10, 13, Yehauvas cog lus tias nws yuav pab peb li cas?

²³ Peb nyob hauv lub qab ntuj uas Xatas yog tus kav ces peb yeej yuav muaj kev ntxhov siab thiab ntsib teeb meem ntau tsav ntau yam. (2 Timautes 3:1) Txawm li ntawd los peb tsis txhob txhawj thiab tsis txhob ntshai. Yehauvas paub peb tej kev nyuaj siab. Thaum peb cheem tsum kev pab, nws cog lus tias nws sab tes xis yuav tuav rawv peb. (Nyeem Yaxayas 41:10, 13.) Peb tso siab tias txawm peb yuav raug teeb meem dabtsi thiab yuav muaj kev nyuaj siab npaum li cas los Yehauvas yuav pab peb thiab nws Txojlus yuav pab kom peb muaj lub siab ntev thev taus peb tej teeb meem.