1. Vim li cas Yexus thiaj thov kom Yehauvas tsom kwm nws cov thwjtim?

 HMO UA NTEJ Yexus tuag, nws xav txog ntau yam uas yuav los raug nws cov thwjtim, nws thiaj thov nws Txiv kom “tsomkwm lawv kom lawv tsis txhob raug dab Ntxwgnyoog dag ntxias.” (Yauhas 17:14, 15) Yexus paub tias thaum nws rov qab mus saum ntuj lawm Xatas yuav tawm tsam cov uas xav teev tiam Yehauvas. Yog li ntawd lawv thiaj cheem tsum Yehauvas txojkev tiv thaiv.

2. Ua li cas peb thiaj paub tias Yehauvas yuav teb peb tej lus thov?

² Yehauvas teb Yexus tej lus thov vim nws hlub Yexus. Yog peb rau siab ntso ua li Yehauvas lub siab nyiam ces nws yeej yuav hlub peb, pab peb, thiab tiv thaiv peb thaum peb thov nws. Yehauvas yog ib Leej Txiv zoo, nws yeej yuav ua zoo saib xyuas nws cov menyuam. Yog nws tsis ua li ntawd ces yuav ua rau nws puas koob puas npe.

3. Vim li cas niaj hnub no peb cheem tsum Yehauvas txojkev tiv thaiv?

³ Niaj hnub no peb haj yam cheem tsum Yehauvas txojkev tiv thaiv rau qhov Xatas raug muab pov los rau hauv ntiajteb no lawm. Nws “chim kawg li.” (Tshwmsim 12:12) Nws tseem dag tau ib co ntseeg tias thaum lawv tawm tsam peb ces twb yog “lawv ua Vajtswv tes haujlwm.” (Yauhas 16:2) Hos cov neeg uas tsis ntseeg Vajtswv, lawv tawm tsam peb vim peb tsis zoo li lawv. Txawm yog tim li cas lawv thiaj ntxub peb los peb tsis ntshai rau qhov Vajtswv Txojlus hais tias ‘Vajtswv yog tus uas ncaj ncees, nws yuav txhawb peb lub zog thiab tsis pub dab Ntxwgnyoog ua phem rau peb.’ (2 Thexalaunikes 3:3) Cia peb tham txog 2 yam uas Yehauvas muab los tiv thaiv peb.

4. Raws li Efexus 6:13-17, Yehauvas muab tej cuab yeej twg los rau peb siv tiv thaiv peb?

⁴ Yehauvas muab tej cuab yeej txhij txhua los pab tiv thaiv peb ntawm Xatas txojkev tawm tsam. (Nyeem Efexus 6:13-17.) Tej cuab yeej uas Yehauvas muab rau peb no ruaj khov heev thiab yuav tiv thaiv tau peb yog peb muab txhua yam coj los siv. Cov cuab yeej no yog dabtsi?

5. Txoj siv piv txwv txog dabtsi thiab yog vim li cas peb yuav tsum sia rawv txoj siv no?

⁵ Txoj siv yog piv txwv txog qhov tseeb hauv Vajtswv Txojlus. Peb yuav tsum sia rawv txoj siv no rau qhov Xatas “yog txhua tus uas dag leej txiv.” (Yauhas 8:44) Thiab Xatas twb dag neeg thoob ntiajteb tsheej txhiab xyoo los lawm. (Tshwmsim 12:9) Tiamsis qhov tseeb hauv phau Vajlugkub yuav tiv thaiv peb ntawm Xatas tej lus dag. Yog li ntawd peb yuav tsum kawm kom peb paub qhov tseeb txog Yehauvas es pe hawm nws raws li qhov tseeb uas peb tau kawm thiab txhua yam uas peb hais thiab peb ua los yuav tsum yog qhov tseeb xwb.​—Yauhas 4:24; Efexus 4:25; Henplais 13:18.

6. Daim hlau thaiv hauv siab piv txwv txog dabtsi thiab vim li cas peb yuav tsum muab coj los hnav rawv?

⁶ Daim hlau thaiv hauv siab yog piv txwv txog Yehauvas txoj kevcai ncaj ncees. Vim li cas peb yuav tsum hnav rawv daim hlau thaiv hauv siab no? Zoo ib yam li daim hlau thaiv hauv siab tiv thaiv tus tub rog lub hauv siab kom txhob raug nkaug, Yehauvas txoj kevcai ncaj ncees yuav tiv thaiv peb lub siab kom peb tsis txhob mus qaug rau tej kev phem hauv lub ntiajteb no. (Pajlug 4:23) Yehauvas xav kom peb teev tiam nws kawg peb lub siab lub ntsws. (Mathais 22:36, 37) Tiamsis Xatas tsis xav kom peb teev tiam Yehauvas. Yog li ntawd Xatas yuav dag ntxias peb lub siab kom mus ntshaw tej uas nyob hauv ntiajteb no thiab mus ua tej yam uas Yehauvas ntxub. (Yakaunpaus 4:4; 1 Yauhas 2:15, 16) Thiab yog hais tias nws dag ntxias tsis tau peb ces nws yuav tawm tsam peb kom peb ua tsis tau li Yehauvas tej kevcai.

7. Peb yuav muab daim hlau thaiv hauv siab coj los hnav li cas?

⁷ Yog peb hnav daim hlau thaiv hauv siab uas yog Vajtswv txoj kevcai ncaj ncees ces peb yuav ua li Vajtswv txoj kevcai hais tias qhov twg zoo qhov twg phem. (Phau Ntawv Nkauj 97:10) Muaj ib txhia neeg xav tias Yehauvas tej kevcai nruj dhau lawm. Tiamsis yog peb tso tseg tsis ua peb lub neej raws li Yehauvas tej kevcai ces yuav zoo ib yam li tus tub rog uas muab nws daim hlau thaiv hauv siab hle thaum nws tseem tabtom ntaus rog vim nws xav hais tias daim hlau hnyav dhau lawm. Yog nws ua li ntawd ces daim hlau yeej thaiv tsis tau nws. Yog peb hlub Yehauvas ces Yehauvas tej kevcai yeej tsis nyuaj rau peb coj thiab yuav cawm tau peb txojsia.​—1 Yauhas 5:3.

8. Vim li cas peb yuav tsum muab qhov uas npaj txhij vog mus tshaj tawm txoj xov zoo los ua khau rau?

⁸ Paulus txhawb kom peb muab txojkev kub siab lug mus qhia txoj xov zoo uas hais txog txojkev kaj siab los ua khau rau. Qhov no qhia tias peb yuav tsum npaj txhij vog mus tshaj tawm txog Vajtswv lub Nceeg Vaj txhua lub sijhawm. Thaum peb mus qhia lwm tus txog txoj xov zoo kuj pab tau peb txojkev ntseeg kom ruaj khov dua qub. Peb zoo siab kawg uas peb cov kwvtij nkauj muam thoob ntiajteb rau siab ntso mus tshaj tawm rau qhov txhia chaw, xws li tom haujlwm, tom tsev kawm ntawv, tej chaw ua lag luam, tom kiab khw, mus tsev rau tsev, thiab thaum lawv nrog cov kwvtij neej tsa lossis cov neeg uas lawv paub uas tsis yog Yehauvas Cov Timkhawv tham. Yog hais tias thaum twg peb muab ntshai dhau es peb tso tseg tsis mus tshaj tawm lawm ces peb yuav zoo li tus tub rog uas muab nws nkawm khau hle thaum nws tseem  tabtom ntaus rog. Yog nws ua li ntawd ces yuav tsis muaj dabtsi tiv thaiv nws kotaw. Nws yuav raug mob ces nws yuav ntaus tsis tau rog raws li tus thawj tub rog tej lus sam hwm.

9. Yog vim li cas peb yuav tsum nqa rawv daim hlau loj thaiv hniav ntaj uas yog peb txojkev ntseeg nrog nraim peb?

⁹ Daim hlau loj thaiv hniav ntaj yog piv txwv txog peb txojkev ntseeg rau Yehauvas. Peb tso siab tias Yehauvas yeej yuav ua li nws tej lus cog tseg thiab peb txojkev ntseeg yuav pab peb ‘tua tau dab Ntxwgnyoog tej xibxub hluavtaws uas nws tua tuaj’ rau peb. Peb yuav tsum nqa rawv peb daim hlau loj thaiv hniav ntaj nrog nraim peb, peb txojkev ntseeg rau Yehauvas thiaj yuav tiv thaiv tau peb ntawm cov neeg fav xeeb tej lus dag thiab yuav pab kom peb tsis txhob qaug zog thaum muaj neeg thuam peb txojkev ntseeg. Yog peb tsis muaj kev ntseeg ces yuav yoojyim rau lwm tus dag ntxias kom peb tsis txhob ua li Yehauvas tej kevcai. Txhua zaus uas peb mus ua haujlwm lossis mus kawm ntawv es peb tsis kam ua tej uas peb paub hais tias Yehauvas tsis nyiam ces twb yog peb txojkev ntseeg tiv thaiv peb. (1 Petus 3:15) Thiab thaum peb tsis kam ua ib txoj haujlwm uas them nyiaj ntau dua tiamsis ho yuav cuam tshuam peb txojkev teev tiam  Yehauvas ces twb yog peb txojkev ntseeg tiv thaiv peb. (Henplais 13:5, 6) Thiab txhua zaus uas muaj neeg tawm tsam peb los peb tseem teev tiam Yehauvas tsis tso tseg ces twb yog peb txojkev ntseeg tiv thaiv peb.​—1 Thexalaunikes 2:2.

10. Lub kaus mom hlau piv txwv txog dabtsi thiab vim li cas peb yuav tsum ntoo rawv lub kaus mom hlau ntawd?

¹⁰ Lub kaus mom hlau yog piv txwv txog peb txojkev cawm dim uas Yehauvas pub rau peb. Qhov no yog peb txojkev vam kev cia siab tias Yehauvas yuav pub nqi zog rau peb thiab txawm peb tuag lawm los Yehauvas yuav tsa peb sawv rov qab los. (1 Thexalaunikes 5:8; 1 Timautes 4:10; Titus 1:1, 2) Zoo ib yam li lub kaus mom hlau tiv thaiv tus tub rog lub taubhau, peb txojkev vam kev cia siab tiv thaiv peb txojkev xav kom peb nco ntsoov Yehauvas tej lus cog tseg thiab kom peb tsis txhob txhawj ntau dhau lawm. Peb yuav ntoo lub kaus mom hlau li cas? Peb txojkev xav yuav tsum zoo li Vajtswv txoj. Xws li peb tsis cia siab rau nyiaj txiag thiab qhov txhia chaw tiamsis peb cia siab rau Yehauvas tib leeg xwb.​—Phau Ntawv Nkauj 26:2; 104:34; 1 Timautes 6:17.

11. Rab ntaj uas yog Vajtswv lub hwj huam dawb huv pub rau peb yog dabtsi thiab yog vim li cas peb yuav tsum siv rab ntaj ntawd?

¹¹ Rab ntaj uas yog Vajtswv lub hwj huam dawb huv pub rau peb yog phau Vajlugkub. Vajtswv Txojlus cawm tau peb dim ntawm tej kevcai cuav thiab tej yam tsis zoo. (2 Kauleethaus 10:4, 5; 2 Timautes 3:16, 17; Henplais 4:12) Peb yuav tsum rau siab kawm Vajlugkub thiab cia Vajtswv lub koom haum qhuab qhia peb, peb thiaj li paub siv Vajtswv Txojlus. (2 Timautes 2:15) Yehauvas tsis yog muab tej cuab yeej no los tiv thaiv peb xwb.

12. Yehauvas pab peb li cas ntxiv thiab yog vim li cas?

¹² Txawm tus tub rog txawj sib ntaus sib tua heev los nws yeej paub hais tias nws yuav kov tsis yeej ib pab tub rog coob coob yog hais tias nws tsis muaj ib pab tub rog pab nws. Peb los yeej zoo ib yam li ntawd thiab, yog peb ib leeg xwb es tsis muaj cov kwvtij nkauj muam pab peb ces peb yeej yuav kov tsis yeej Xatas thiab nws cov neeg. Yog li ntawd Yehauvas thiaj muab “cov ntseeg” uas yog cov kwvtij nkauj muam thoob plaws ntiajteb los pab peb.​—1 Petus 2:17.

13. Raws li Henplais 10:24, 25, tej kev sib txoos yuav pab tau peb li cas?

¹³ Ib qho uas peb tau txais kev pab yog thaum peb mus kev sib txoos. (Nyeem Henplais 10:24, 25.) Muaj tej lub caij peb yuav qaug zog. Yog li ntawd thaum peb mus kev sib txoos es peb hnov tej lus qhuab qhia, saib tej yeeb yam uas cov kwvtij nkauj muam ua los qhia peb, hnov peb cov kwvtij nkauj muam tej lus teb thiab nrog lawv tham ua ntej thiab tom qab kev sib txoos, yuav txhawb tau peb zog heev. (1 Thexalaunikes 5:14) Thaum peb mus kev sib txoos es peb ho pab tau lwm tus los yeej ua rau peb zoo siab kawg thiab. (Tes Haujlwm 20:35; Loos 1:11, 12) Tej kev sib txoos kuj pab kom peb txawj qhia lwm tus. Xws li peb kawm kom peb txawj siv tej ntaub ntawv uas peb coj mus qhia lwm tus hauv peb Cov Twj Mus Ua Vajtswv Tes Num. Yog li ntawd ua tib zoo npaj ua ntej mus kev sib txoos thiab ua tib zoo mloog thaum kev sib txoos pib. Tom qab kev sib txoos, nco ntsoov ua li tej koj kawm. Yog koj ua li ntawd ces koj yuav ua tau Yexus Khetos ib tug tub rog zoo.​—2 Timautes 2:3.

14. Yehauvas pab peb li cas ntxiv?

¹⁴ Yehauvas kuj muab cov tubtxib saum ntuj coob coob los pab peb thiab. Lawv muaj hwjchim thiab muaj zog heev. (Yaxayas 37:36) Yog peb muaj ib pab tubtxib saum ntuj tuaj peb tog ces yeej tsis muaj neeg lossis dab yuav kov yeej peb li. Yehauvas yog tus muaj hwjchim thiab  muaj zog tshaj. Yog hais tias Yehauvas tuaj peb tog lawm ces txawm hais tias peb cov yeeb ncuab yuav coob npaum li cas los lawv yeej yuav kov tsis yeej peb. (Cov Thawjtswj 6:16) Thaum muaj ib tug tom haujlwm, tom tsev kawm ntawv, lossis ib tug txheeb ze ua rau koj txhawj thiab koj ntshai, nco ntsoov tias Yehauvas yuav pab koj yog koj ua li nws hais.

15. Raws li Yaxayas 54:15, 17, vim li cas thiaj tsis muaj leejtwg txwv tau Vajtswv cov neeg kom tsis txhob mus tshaj tawm txoj xov zoo?

¹⁵ Xatas lub qab ntuj ntxub peb heev vim peb mloog Vajtswv lus, peb tsis txhawb ib tug nom tswv twg thiab tsis koom tes nrog lawv ua tsov ua rog. Peb mus tshaj tawm txog Vajtswv lub npe thiab qhia tias tsuas yog Vajtswv lub Nceeg Vaj xwb thiaj coj tau kev thaj yeeb los rau ntiajteb. Peb qhia rau sawvdaws paub tias Xatas yog tus kav lub ntiajteb no. Nws phem heev, nws dag thiab tua neeg. (Yauhas 8:44) Thiab peb tshaj tawm tias Vajtswv yuav rhuav tshem Xatas lub qab ntuj kom puas tsuaj tag mus. Peb yuav ua ib puas tsav yam uas peb ua tau los qhuas Yehauvas. Peb paub hais tias Xatas yeej muaj hwjchim thiab muaj zog kawg tiamsis nws thiab cov tuaj nws tog yeej txwv tsis tau peb kom tsis txhob mus tshaj tawm txog Vajtswv lub Nceeg Vaj thoob ntiajteb. Qhov uas peb mus tshaj tawm tau rau tibneeg thoob plaws ntiajteb los twb yog Yehauvas tiv thaiv peb thiab pab peb.​—Nyeem Yaxayas 54:15, 17.

16. Yav tom hauv ntej Yehauvas yuav cawm nws cov neeg li cas?

¹⁶ Yav tom hauv ntej yuav zoo li cas? Thaum lub sijhawm uas muaj kev ceeblaj txom nyem kawg nkaus los txog, Yehauvas yuav tshoov cov nom tswv hauv ntiajteb no kom mus rhuav tshem lub nroog Npanpiloos uas loj dua ntais uas yog tag nrho tej kev ntseeg cuav hauv ntiajteb no. Tiamsis Yehauvas yuav cawm nws cov tub qhe uas muab siab npuab nws. (Tshwmsim 17:16-18; 18:2, 4) Thaum Yehauvas rhuav tshem Xatas lub qab ntuj hauv ntsuj rog Amankedoos los nws yuav cawm nws cov neeg dim thiab.​—Tshwmsim 7:9, 10; 16:14, 16.

17. Qhov uas peb muab siab npuab thiab nrog nraim Yehauvas pab tau peb li cas?

¹⁷ Yog peb nrog nraim Yehauvas ces txawm yog Xatas txo tau peb txojsia los Yehauvas yuav tsa peb sawv rov los nyob mus ib txhis tsis kawg. Tiamsis Yehauvas yuav ua kom Xatas puas tsuaj mus ib txhis. (Loos 16:20) Yog li ntawd peb yuav tsum txawj siv tej cuab yeej uas Yehauvas muab los tiv thaiv peb thiab coj nrog nraim peb tsis txhob muab hle cia! Tsis txhob kom koj ib leeg xwb thaum dab Ntxwgnyoog thiab nws lub qab ntuj tawm tsam koj. Nco ntsoov txhawb koj cov kwvtij nkauj muam thiab mloog Yehauvas lus. Yog koj ua li ntawd ces koj yeej tso siab tau tias koj Leej Txi uas nyob saum ntuj yuav txhawb koj thiab tiv thaiv koj.​—Yaxayas 41:10.