Thaum ib tug neeg twg twv ntuj twv teb, yog nws qhia rau ib zej tsoom paub hais tias lub ntuj thiab daim av ua tim khawv tias txhua yam nws ua thiab hais yeej puav leej tseeb.

Muaj ib txhia tib neeg tau hais tias kom tsis txhob twv ntuj twv teb rau qhov Yexus tau hais li no: “Tsis txhob lam tau lam twv li ub li no . . . Yog koj hais tias koj yuav ua yam twg ces cia li ua xwb. Yog koj hais tias koj tsis ua ces txhob ua li. Tus uas hais tshaj no yog ua raws li Ntxwg Nyoog lub tswv yim xwb.” (Mathais 5:33-37) Yexus yeej paub tias nyob rau Mauxes Txoj Kev Cai, muaj tej thaud cov Ixayees uas nyob puag txheej thaum ub yeej tau tsa tes twv ntuj twv teb dua los lawm. (Chivkeeb 14:22, 23; Khiav Dim 22:10, 11) Yexus yeej hnov Yehauvas tau twv tib yam nkaus. (Henplais 6:13-17) Raws li hais no, Yexus tsis tau hais kom peb tsis txhob twv ntuj twv teb tiam sis nws ceeb toom kom peb tsis txhob twv tej yam tsis muaj hauv paus hauv ntsis. Thaum peb tsa ncauj twv txog ib yam twg, peb yuav tau ua raws li tej lus peb tau hais thiaj haum Yehauvas siab.

Peb yuav ua li cas yog hais tias lwm tus yuav kom peb twv ntuj twv teb? Peb yuav tau nco ntsoov tias mam xav mam hais nyob tsam peb ho lam twv tau tej yam tsis xav ua. Yog peb paub tsis tseeb tias peb yuav ua los tsis ua ces peb tsis txhob twv zoo dua. Vajtswv Txoj Lus ceeb toom li no: “Yog koj ua tsis tau li koj hais, mas zoo dua li uas koj tsis txhob coglus.” (Tej Lus Qhia 5:5) Ntxiv li hais no, peb yuav tau zaum tsaws xav zoo zoo ua ntej seb tej lus twv ntawd puas hla Vajtswv tej kev cai. Cia peb mus piav ob peb yam kom peb thiaj nkag siab zoo.

Muaj tej co lus cog tseg yeej raws li Vajtswv lub siab nyiam. Xws li Yehauvas Cov Tim Khawv yeej cog lus thaum sib sau los ua neej. Yam kev cog lus no yeej yog kev twv. Tus nkauj nyab thiab nraug vauv yeej tab meeg cog lus rau Vajtswv thiab sawv daws tias nkawv yuav sib hlub sib hwm thiab ib leeg saib taus ib leeg mus kom txog hnub tuag. (Muaj ib txhia txij nkawm yeej tsis tau hais cov lus no los thaum nkawv sib sau los ua neej qhia tias nkawv yeej cog lus rau Vajtswv tib yam nkaus.) Qhov uas nkawv sib sau los ua txij nkawm li no, yeej yog mus tas sim neej. (Chivkeeb 2:24; 1 Kauleethaus 7:39) Yog li ntawd, qhov kev sib cog lus no yeej zoo, tsim nyog, thiab raws li Vajtswv lub siab nyiam.

Muaj tej co lus cog tseg uas tsis raws li Vajtswv lub siab nyiam. Tus neeg uas ntseeg Vajtswv tiag tiag, yeej tsis cog lus xws li yuav mus ntaus teb ntaus chaw los sis lees tab meeg tias nws tsis ntseeg Vajtswv. Yog nws thim lus ces twb yog nws rhuav Vajtswv tej lus sam hwm. Cov ntseeg “tsis nyiam ua raws li neeg ntiajteb ua.” Yog li ntawd, peb tsis txhob sib cav txog tej yam zoo li no thiab  tsis txhob mus ua tsov ua rog.​—Yauhas 15:19; Yaxayas 2:4; Yakaunpaus 1:27.

Muaj tej co lus cog tseg yog nyob ntawm nyias txiav txim rau nyias tus kheej. Muaj qee lub sij hawm, peb yuav tau luj peb tej lus twv zoo zoo seb peb puas ua raws li Yexus tau hais tias: “Yam uas yog Xixas li, nej cia li muab rau Xixas, thiab yam uas yog Vajtswv li, nej cia li muab rau Vajtswv.”​—Lukas 20:25.

Muab piv txwv zoo li no hais tias muaj ib tug ntseeg twg yuav tau mus ua xam xaj los sis phau me nyuam ntawv nqa mus txawv teb chaws lus Askiv hu ua phav xes poj (passport). Nws hnov hais tias nws yuav tau tsa tes cog lus rau ntawm lub teb chaws nws nyob. Nyob rau lub teb chaws ntawd, yog tej lus nws twv ntawd yuav cuam tshuam Vajtswv tej kev cai ces yuav tsis zoo rau nws cog lus. Tej zaud, tej nom tswv kuj tso cai me ntsis rau nws hloov qho yam kom nws thiaj ua tau li nws cog lus.

Qhov uas nom tswv tso cai hloov me ntsis no kuj muaj raws li hais hauv Loos 13:1 uas hais tias: “Sawvdaws yuav tsum mloog nomtswv lus.” Yog li ntawd, tus ntseeg kuj pom zoo cog lus vim nws paub tias nws tsis cov nyom Vajtswv tej kev cai.

Nyob rau ntau lub teb chaws, lawv siv tej txhiam laj txhiam xwm coj los twv ntuj twv teb los sis tsa tes rau lub ntuj daim av twv. Xws li cov tib neeg Loos thiab cov tib neeg Xithia. Lawv siv ntaj coj los twv ntuj twv teb vim lawv tso siab rau tus tim tswv ua tsov ua rog kom nrog pom. Hos cov tib neeg Kilis tsa tes rau lub ntuj thaum lawv twv lus. Lawv ntseeg hais tias muaj ib tug tswv ntuj nyob saum ntuj pom txhua yam uas neeg tau ua thiab yuav rau txim rau neeg. Yog li ntawd, ua ntej peb yuav siv tej txhiam laj txhiam xwm los twv ntuj twv teb los sis tsa tes rau lub ntuj twv, peb yuav tau nco ntsoov txog tej yam uas peb tau kawm nyob hauv Vajtswv Txoj Lus seb ua li cas thiaj haum Vajtswv siab.

Yehauvas cov tib neeg yeej tsis kam siv tej moj zeej los sis lwm yam uas yog piv txwv txog lub teb chaws ntawd coj los twv vim hais tias tej no suav tam li kev teev tiam. Thaum peb mus rau hauv tej tsev txiav txim, tej nom tej tswv yuav kom peb tso tes rau saum phau Vajlugkub twv tias tej lus peb hais puav leej muaj tseeb ces peb ua li ntawd los tau rau qhov cov ntseeg nyob puag txheej thaum ub los kuj tau twv lus dua los lawm. (Chivkeeb 24:2, 3, 9; 47:29-31) Nco ntsoov tias thaum peb tsa tes twv lus, peb cog lus rau Vajtswv tias peb yuav qhia qhov tseeb. Thaum peb cog lus tag lawm, luag nug li cas peb yuav tsum teb tseeb tseeb rau luag.

Nyob hauv peb lub neej, peb saib txoj kev teev tiam Yehauvas tseem ceeb tshaj plaws. Yog li ntawd, peb yuav tau ua zoo xav thiab thov Yehauvas pab ua ntej peb yuav twv lus rau ib txoj ke twg vim peb xav ua raws li Vajtswv lub siab nyiam thiab tsis xav hla nws tej kev cai nyob hauv nws Txoj Lus. Yog peb yuav tau twv lus, peb yuav tau ua raws li peb tau twv ntawd.​—1 Petus 2:12.