1. Yehauvas cov tib neeg nyob thawj 100 xyoo khiav hauj lwm li cas?

 THAUM Yehauvas muab ib tes hauj lwm rau nws cov tib neeg ua, nws xav kom lawv ua muaj hauv paus hauv ntsis. (1 Kauleethaus 14:33) Vajtswv lub siab nyiam yog kom qhia txoj xov zoo mus thoob plaws lub ntiaj teb. (Mathais 24:14) Yehauvas muab tes hauj lwm no rau Yexus tuav. Yog li ntawd, Yexus yeej saib xyuas kom tes hauj lwm no ntws zoo. Nyob rau thawj 100 xyoo hauv Yeluxalees, yeej muaj ib pab txwj laus uas yog cov tub txib thiab ib co laus neeg ua cov uas txiav txim siab rau tej koom txoos. Thaum tsa tau ib lub koom txoos tshiab twg, cov txwj laus hauv lub koom txoos ntawd mam qhia cov kwv tij nkauj muam txog tej uas pab txwj laus hauv Yeluxalees tau txiav txim siab. (Tes Haujlwm 14:23; 15:2; 16:4) Vim cov kwv tij nkauj muam coj raws li tej uas pab txwj laus txiav txim siab, “cov ntseeg thiaj muaj zog heev thiab niaj hnub muaj neeg los ntseeg coob zuj zus ntxiv.”​—Tes Haujlwm 16:5.

2. Yehauvas coj thiab cob qhia nws cov tib neeg li cas txij xyoo 1919 los?

² Niaj hnub nim no los Yehauvas yeej tseem qhia nws cov tib neeg ua txhua yam kom muaj hauv paus hauv ntsis. Txij xyoo 1919 los, Yexus tau siv cov xaiv tseg qho leej los saib xyuas tes hauj lwm tshaj tawm txoj xov zoo thiab los muab Vajtswv Txoj Lus qhia cov ntseeg kom raws caij raws nyoog. a (Lukas 12:42) Yehauvas yeej foom koob hmoov rau lawv tes hauj lwm kawg li.​—Yaxayas 60:22; 65:13, 14.

3-4. (1) Piav seb qhov uas lub koom haum ua Vajtswv tes hauj lwm muaj hauv paus hauv ntsis pab tau peb li cas. (2) Peb yuav kawm txog dab tsi hauv zaj no?

 ³ Yog peb ua Yehauvas tes hauj lwm ua dog ua dig xwb ces peb yeej ua tsis tau tes hauj lwm uas Yexus muab tso rau peb ua. (Mathais 28:19, 20) Piv txwv tias yog cov kwv tij tsis muab thaj tsam uas tau tu rau peb lub koom txoos faib ua tej koog ces ntshe nyias yuav lam tau lam mus qhia. Tej zaud sawv daws yuav mus qhia rau tib koog tas mus li es tseg lwm koog ho tsis mus qhia. Koj puas pom lwm yam uas peb ua tau uas muaj hauv paus hauv ntsis thiab?

⁴ Thaum Yexus nyob hauv ntiaj teb, nws coj nws cov thwj tim kom muaj hauv paus hauv ntsis li cas ces thaum nws mus saum ntuj lawm los, nws yeej coj Vajtswv cov tib neeg ib yam li ntawd thiab. Nyob rau zaj no, peb yuav kawm txog Yexus tus yam ntxwv thiab seb lub koom haum coj raws li Yexus tus yam ntxwv li cas. Peb kuj yuav kawm seb peb yuav qhia li cas tias peb tso siab rau Yehauvas lub koom haum.

PEB LUB KOOM HAUM COJ RAWS LI YEXUS

5. Peb xyaum Yexus rau txoj ke twg? (Yauhas 8:28)

⁵ Yexus cia Yehauvas qhia nws txog tej nws yuav ua thiab tej nws yuav hais. Yehauvas lub koom haum xyaum li Yexus es siv phau Vajlugkub los pab kom peb paub qhov zoo thiab qhov tsis zoo thiab kom peb paub ua neej. (Nyeem Yauhas 8:28; 2 Timautes 3:16, 17) Yehauvas lub koom haum yeej niaj hnub qhia kom peb nyeem thiab ua raws li nws Txoj Lus. Ua li qhov no ho pab tau peb li cas?

6. Yog peb kawm phau Vajlugkub yuav pab tau peb li cas?

⁶ Yog peb siv peb tej ntaub ntawv los kawm Vajlugkub ces peb yuav kawm tau zoo heev. Xws li peb muab tej uas Yehauvas lub koom haum qhia piv rau tej uas nyob hauv phau Vajlugkub. Thaum peb pom tias tej uas lub koom haum qhia yeej mus raws li tej uas hais hauv phau Vajlugkub ces peb yuav haj yam tso siab rau Yehauvas lub koom haum.​—Loos 12:2.

7. Yexus tshaj tawm txog dab tsi, thiab Yehauvas lub koom haum xyaum Yexus li cas?

⁷ Yexus tshaj tawm txoj xov zoo “txog Vajtswv txoj kev kav.” (Lukas 4:43, 44) Yexus kuj sam hwm kom nws cov thwj tim tshaj tawm txog Vajtswv txoj kev kav thiab. (Lukas 9:1, 2; 10:8, 9) Niaj hnub nim no txhua tus uas nyob hauv Yehauvas lub koom haum yeej tshaj tawm txoj xov zoo txog Vajtswv txoj kev kav, tsis hais lawv nyob rau qhov twg los sis tuav hauj lwm ntau npaum li cas hauv Yehauvas lub koom haum.

8. Peb muaj txoj koob hmoov twg?

⁸ Yog ib txoj koob hmoov zoo heev uas peb tau qhia Vajtswv txoj kev kav rau lwm tus! Tsis yog txhua leej txhua tus yuav muaj txoj koob hmoov no. Xws li thaum Yexus tseem nyob hauv ntiaj teb no, nws tsis pub dab ua tim khawv txog nws. (Lukas 4:41) Niaj hnub nim no ua ntej ib tug twg nrog Yehauvas Cov Tim Khawv mus tshaj tawm txoj xov zoo, nws yuav tsum ua nws lub neej kom raws li Yehauvas lub siab nyiam. Thaum peb tshaj tawm txoj xov zoo txog Vajtswv lub Nceeg Vaj rau txhua qhov thiab txhua lub sij hawm ces qhia tias peb ris txiaj ntsig heev rau txoj koob hmoov uas peb muaj. Peb xav ua ib yam li Yexus es mus qhia qhov tseeb rau lwm tus li peb ua tau.​—Mathais 13:3, 23; 1 Kauleethaus 3:6.

9. Lub koom haum tau muab Vajtswv lub npe qhia rau tib neeg li cas?

⁹ Yexus qhia Vajtswv lub npe rau tib neeg. Yexus thov nws Leej Txiv tias: “Kuv twb qhia koj lub npe rau lawv paub lawm.” (Yauhas 17:26) Yehauvas lub koom haum xyaum Yexus tus  yam ntxwv es qhia Vajtswv lub npe rau lwm tus. Ib txoj kev uas Yehauvas lub koom haum ua los qhia Vajtswv lub npe yog muab Vajtswv lub npe rov tso rau hauv phau Vajlugkub Vajtswv Txoj Lus Rau Cov Nyob Lub Qab Ntuj Tshiab. Phau Vajlugkub no tau muab txhais ua tshaj li 270 yam lus. Tej yam lus twb muab txhais tag lawm hos tej yam lus tsuas txhais txog nrab xwb. Yog koj xav paub ntxiv seb tau muab Vajtswv lub npe rov tso rau hauv phau Vajlugkub li cas, mus saib Phau Vajlugkub Qhia Txog Dabtsi Tiag? ntawm Cov Lus Qhia Ntxiv ntawm zaj hu ua “Paub Thiab Siv Vajtswv Lub Npe.”

10. Tus niam tais Phab Mab cov lus pab tau koj li cas?

¹⁰ Peb xyaum Yexus es muab Vajtswv lub npe qhia rau tib neeg coob li coob tau. Thaum ib tug niam tais uas muaj 67 xyoo nyob hauv teb chaws Phab Mab hnov txog Vajtswv lub npe, nws teev tsis taus kua muag li. Nws hais tias: “Zaum no yog thawj zaug hauv kuv lub neej uas kuv hnov tias Vajtswv hu ua Yehauvas. . . . Koj qhia tau ib yam tseem ceeb tshaj plaws uas kuv tsis tau hnov dua li rau kuv.” Zoo li zaj no, thaum tib neeg hnov Vajtswv lub npe ces yeej hloov hlo lawv lub neej!

TSO SIAB RAU YEHAUVAS LUB KOOM HAUM MUS LI

11. Cov txwj laus tso siab rau Yehauvas lub koom haum li cas? (Saib daim duab.)

¹¹ Ib txoj ke uas cov txwj laus ua tau los qhia tias lawv tso siab rau Vajtswv lub koom haum yog dab tsi? Thaum lub koom haum sau ntawv tuaj rau cov txwj laus, lawv yuav tsum ua tib zoo nyeem thiab coj raws li ntawd. Xws li lub koom haum qhia kom cov txwj laus txawj cev lus qhuab qhia thiab txawj thov Vajtswv thaum muaj kev sib txoos. Tsis tas li ntawd xwb, lub koom haum kuj qhia kom cov txwj laus paub saib xyuas thiab tiv thaiv Khetos cov yaj. Thaum cov txwj laus coj raws li lub koom haum qhia ces cov kwv tij nkauj muam yuav pom Yehauvas txoj kev hlub thiab yuav pom tias Yehauvas tsom kwm lawv zoo kawg li.

12. (1) Vim li cas zoo rau peb mloog cov ua thawj? (Henplais 13:7, 17) (2) Vim li cas peb yuav tsum xav txog qhov zoo ntawm cov ua thawj?

¹² Cov txwj laus hais kom peb ua ib yam dab tsi, peb yuav tsum zoo siab hlo mloog. Yog peb ua li ntawd ces yuav yooj yim rau cov txwj laus ua lawv tes hauj lwm. Phau Vajlugkub txhawb kom peb mloog cov ua thawj thiab ua raws li lawv hais. (Nyeem Henplais 13:7, 17.) Tej thaud yeej tsis yooj yim mloog lawv hais vim lawv yog noob txaug neeg txhaum. Yog peb tsuas pom qhov tsis zoo uas lawv ua xwb es tsis pom qhov zoo ces peb tsuas ua rau peb cov yeeb ncuab zoo siab xwb. Vim li cas peb thiaj hais li no? Peb cov yeeb ncuab tsis xav kom peb tso siab rau Yehauvas lub koom haum. Yog peb pheej xav tsis zoo txog cov txwj laus ces peb yuav xav tsis zoo thiab tsis tso siab rau Yehauvas lub koom haum. Yuav ua li cas peb thiaj paub peb cov yeeb ncuab tej lus dag?

TXHOB CIA LUAG UA RAU KOJ TSIS TSO SIAB RAU LUB KOOM HAUM

13. Yehauvas cov yeeb ncuab hais tsis zoo txog Yehauvas lub koom haum li cas?

¹³ Cov uas tawm tsam Yehauvas muab tej yam zoo ntawm Yehauvas lub koom haum ntxeev ua qhov phem. Xws li Yehauvas xav kom peb tu ntshis peb lub cev, coj cwj pwm zoo, thiab pe hawm nws raws li nws pom zoo. Yehauvas hais tias tus uas pheej ua tej uas tsis huv thiab tsis kam hloov ces tsis tsim nyog nyob hauv lub koom txoos lawm. (1 Kauleethaus 5:11-13; 6:9, 10) Peb yeej coj raws li phau Vajlugkub cov lus sam hwm ntawd. Tiam  sis cov uas tawm tsam peb liam tias peb coj li ntawd twb yog peb tsis hlub tib neeg, txiav txim rau tib neeg, thiab tsis nyiam cov uas tsis coj li peb.

14. Leej twg yog tus rhawv tej lus dag txog Yehauvas lub koom haum?

¹⁴ Paub tus uas tawm tsam peb. Xatas yog tus rhawv tej lus dag txog Yehauvas lub koom haum. Nws yog “txhua tus uas dag leej txiv.” (Yauhas 8:44; Chivkeeb 3:1-5) Yog li ntawd, peb yeej paub tias Xatas yuav siv cov uas tuaj nws tog los dag txog Yehauvas lub koom haum. Tau muaj li no nyob rau thawj 100 xyoo.

15. Cov thawj coj tau ua li cas rau Yexus thiab nws cov thwj tim?

¹⁵ Nyob rau thawj 100 xyoo, txawm Vajtswv Leej Tub Yexus yog ib tug neeg zoo tiav tiav thiab ua ntau yam txuj ci los Xatas tseem siv tib neeg los dag ntau yam txog Yexus. Xws li nws siv cov thawj coj los dag cov tib neeg tias “dab tus thawj” yog tus pub hwj chim rau Yexus ntiab dab. (Malakaus 3:22) Thaum hais plaub, cov thawj coj liam tias Yexus hais lus tuam mom Vajtswv thiab txw kom cov pej xeem muab Yexus tua. (Mathais 27:20) Tom qab no thaum Yexus cov thwj tim tshaj tawm txoj xov zoo, cov uas tawm tsam lawv “ntxias kom lwm Haivneeg” tsim txom cov Khixatias. (Tes Haujlwm 14:2, 19) Phau Tsom Faj lub 12 Hlis tim 1 xyoo 1998 hais txog Tes Haujlwm 14:2 tias: “Cov uas tuaj Xatas tog tsis kam mloog txoj xov zoo uas cov Khixatias qhia thiab tau hais ntau yam phem txog lawv kom cov pej xeem ntxub lawv es txhob mloog lawv.”

16. Thaum peb hnov tej lus dag, zoo rau peb nco ntsoov li cas?

¹⁶ Xatas tsis yog dag rau thaum thawj 100  xyoo xwb. Niaj hnub no los nws tseem “dag ntxias neeg ntiajteb.” (Tshwmsim 12:9) Yog koj hnov tib neeg hais tsis zoo txog Yehauvas lub koom haum thiab cov kwv tij uas ua cov coj, nco ntsoov tias Yehauvas cov yeeb ncuab twb ua li ntawd rau Yexus thiab nws cov thwj tim uas nyob thawj 100 xyoo. Niaj hnub nim no Yehauvas cov tib neeg yeej raug tsim txom thiab raug iab hiam raws li Yexus tau hais tseg. (Mathais 5:11, 12) Peb yeej tsis ntseeg tej lus dag yog peb nco ntsoov tias tus uas rhawv tej lus dag ntawd yog leej twg thiab yog peb tiv thaiv peb tus kheej thaum peb hnov kiag tej lus dag ntawd. Ua li peb yuav tiv thaiv peb tus kheej li cas?

17. Yuav ua li cas peb thiaj tsis mus mloog tej zaj uas tsis tseeb? (2 Timautes 1:13) (Mus saib lub ntsiab “ Thaum Hnov Tej Zaj Tsis Tseeb Ua Li No.”)

¹⁷ Txhob mloog tej zaj uas tsis tseeb. Povlauj qhia tias thaum peb hnov tej zaj uas tsis tseeb zoo rau peb ua li cas. Nws hais rau Timautes tias tsis txhob mloog “tej zaj uas tsis tseeb” thiab “tsis txhob mloog tej dabneeg uas . . . tsis muaj qabhau dabtsi.” (1 Timautes 1:3, 4; 4:7) Tej me nyuam yaus tej thaud yuav cia li khaws tej khoom uas poob rau hauv av los noj tiam sis ib tug neeg laus yuav tsis ua li ntawd rau qhov nws paub tias yuav ua rau nws mob. Zoo tib yam li ntawd, peb tsis mloog tej zaj uas tsis tseeb rau qhov peb paub tias tus uas hais tej zaj ntawd yog leej twg. Peb tsuas mloog “tej lus tseeb” xwb.​—Nyeem 2 Timautes 1:13.

18. Peb yuav qhia li cas tias peb tso siab rau Yehauvas lub koom haum?

¹⁸ Peb tau tham txog peb txoj ke uas Vajtswv lub koom haum coj zoo li Yexus. Thaum koj kawm phau Vajlugkub, ua tib zoo kawm kom koj pom tias tej uas lub koom haum qhia yeej yog tej uas Yexus qhia tiag. Pab lwm tus hauv lub koom txoos tso siab rau Yehauvas lub koom haum. Rau siab ntso teev tiam Yehauvas thiab muab siab npuab nws thiab lub koom haum uas nws siv los ua nws tes hauj lwm. (Phau Ntawv Nkauj 37:28) Cia peb ris txiaj ntsig rau qhov koob hmoov uas peb muaj los teev tiam Yehauvas nrog cov neeg uas hlub nws thiab muab siab npuab nws.