1. Lub vaj kaj siab ntawm sab kev ntseeg yog dab tsi, thiab peb yuav tsum txiav txim siab ua li cas?

 NIAJ hnub nim no twb muaj ib lub vaj kaj siab hauv lub ntiaj teb no uas muaj qas txhiab qas vam leej nyob kaj siab lug zoo siab hlo thiab rau siab ntso ua qhov zoo qhov yog. Cov uas nyob hauv lub vaj kaj siab ntawd yeej txiav txim siab nyob rau hauv mus li. Lawv yeej xav kom muaj neeg coob li coob tau nrog lawv nyob rau hauv thiab. Lub vaj kaj siab no yog lub vaj kaj siab ntawm sab kev ntseeg! a

2. Lub vaj kaj siab ntawm sab kev ntseeg zoo npaum li cas?

² Txawm Yehauvas cov tib neeg nyob hauv Xatas lub qab ntuj uas phom sij heev thiab muaj kev ntxub ntxaug kawg li los lawv tseem nyob tso siab plhuav thiab sib koom siab vim lawv nyob hauv lub vaj kaj siab ntawm sab kev ntseeg. (1 Yauhas 5:19; Tshwmsim 12:12) Peb tus Vajtswv pom tias lub qab ntuj no phem kawg li, nws thiaj npaj lub vaj kaj siab ntawm sab kev ntseeg kom nws cov tib neeg tau teev tiam nws zoo siab hlo. Vajtswv Txoj Lus piav tias lub vaj kaj siab ntawm sab kev ntseeg yog “lub chaw nraim cev” thiab “lub vaj uas muaj dej ywg tsis tseg.” (Yaxayas 4:6; 58:11) Vim Yehauvas foom koob hmoov rau cov uas nyob hauv lub vaj kaj siab ntawm sab kev ntseeg, lawv thiaj muaj kev zoo siab thiab nyob tso siab plhuav txawm lawv nyob rau tiam kawg.​—Yaxayas 54:14; 2 Timautes 3:1.

3. Zaj faj lem hauv Yaxayas tshooj 65 xub muaj tiav li cas?

³ Yehauvas siv tus cev nws lus Yaxayas los piav tias lub neej yuav zoo li cas rau cov uas yuav nyob hauv lub vaj kaj siab ntawm sab kev ntseeg. Cov lus ntawd nyob rau ntawm Yaxayas  tshooj 65 uas xub muaj tiav rau xyoo 537 ua ntej Yexus. Lub sij hawm ntawd, Yehauvas tau tso cov neeg Yudais rov tim Npanpiloos los rau lawv lub qub teb qub chaw. Yehauvas foom koob hmoov rau nws cov tib neeg thiab tau pab lawv kho lub nroog Yeluxalees uas puas tsuaj tag lawm kom rov zoo nkauj li qub thiab rov kho lub tuam tsev kom lawv tau pe hawm Yehauvas.​—Yaxayas 51:11; Xakhaliyas 8:3.

4. Niaj hnub nim no zaj lus faj lem hauv Yaxayas tshooj 65 muaj tiav li cas?

⁴ Yaxayas zaj lus faj lem muaj tiav zaum ob rau xyoo 1919 tom qab Yexus uas yog thaum Yehauvas tau tso nws cov tib neeg niaj hnub nim no tawm hauv lub nroog Npanpiloos uas loj dua ntais. Tom qab ntawd, lub vaj kaj siab ntawm sab kev ntseeg thiaj nthuav zuj zus mus thoob plaws lub ntiaj teb. Cov tshaj tawm uas kub siab ua Vajtswv tes hauj lwm thiaj mus tsa tau ntau lub koom txoos thiab pab tau cov koom txoos ntawd coj yam ntxwv li ib tug Khixatias. Cov txiv neej thiab poj niam uas yav tas los ua phem ua qias kuj muaj “lub siab tshiab . . . zoo li Vajtswv tus yam ntxwv.” (Efexus 4:24) Tej uas Yaxayas tau sau tseg ntawd feem ntau mam li muaj tiav thaum nyob hauv lub qab ntuj tshiab. Tiam sis yeej muaj ntau yam uas Yaxayas tau sau tseg uas pab tau peb vim peb nyob hauv lub vaj kaj siab ntawm sab kev ntseeg. Peb yuav tham seb lub vaj kaj siab ntawm sab kev ntseeg ho pab tau peb li cas thiab vim li cas peb yuav tsum tsis txhob tawm.

COV UAS NYOB HAUV LUB VAJ KAJ SIAB NTAWM SAB KEV NTSEEG ZOO LI CAS?

5. Raws li Yaxayas 65:13, peb muaj dab tsi hauv lub vaj kaj siab ntawm sab kev ntseeg?

⁵ Noj seem noj so thiab nyob kaj siab lug. Yaxayas zaj lus faj lem pab peb pom tias cov uas nyob hauv lub vaj kaj siab ntawm sab kev ntseeg txawv cov uas tsis nyob npaum li cas. (Nyeem Yaxayas 65.13.) Yehauvas muab ntau yam los pab kom cov uas pe hawm nws tuav rawv lawv txoj kev sib raug zoo nrog nws. Xws li Yehauvas muab nws lub hwj huam dawb huv, nws Txoj Lus, thiab tej ntaub ntawv Vajlugkub rau peb kom peb “muaj noj muaj haus, . . . [thiab] zoo siab.” (Muab piv rau Tshwmsim 22:17.) Tiam sis cov uas tsis nyob hauv lub vaj kaj siab ntawm sab kev ntseeg tsis zoo li peb. Lawv “tshaib nqhis . . . [thiab] poob ntsej muag.” Lawv kuj tsis muaj ib txoj kev sib raug zoo nrog Vajtswv.​—Amaus 8:11.

6. Yau-ees 2:21-24 qhia txog tej uas Yehauvas muab rau peb twg, thiab tej ntawd pab tau peb li cas?

⁶ Hauv Yau-ees zaj faj lem, nws siv qoob, cawv txiv hmab, thiab roj txiv aulib los qhia tias Yehauvas yeej muab txhua yam uas peb yuav tsum tau kom peb txoj kev ntseeg ruaj khov. (Yau-ees 2:21-24) Xws li Yehauvas muab phau Vajlugkub, cov ntaub ntawv Vajlugkub, peb lub vej xaij, tej kev sib txoos, thiab tej rooj sib txoos ib hnub thiab peb hnub rau peb. Tej no yeej pab tau peb txhua txhua hnub thiab yeej ua rau peb noj seem noj so thiab nyob kaj siab lug.

7. Dab tsi ua rau peb “zoo siab”? (Yaxayas 65:14)

⁷ Zoo siab thiab txaus siab. Vajtswv cov tib neeg yuav “hu nkauj zoo siab” vim lawv ris txiaj ntsig rau tej uas Yehauvas tau muab rau lawv. (Nyeem Yaxayas 65:14.) Qhov tseeb hauv Vajtswv Txoj Lus, nws tej lus cog tseg, thiab peb txoj kev vam kev cia siab vim muaj tus nqe txhiv ua rau peb “zoo siab.” Thaum peb nrog peb cov kwv tij nkauj muam tham txog tej no, yeej ua rau peb zoo siab kawg li!​—Phau Ntawv Nkauj 34:8; 133:1-3.

8. Ob yam tseem ceeb uas nyob hauv lub vaj kaj siab ntawm sab kev ntseeg yog dab tsi?

⁸ Nyob hauv lub vaj kaj siab ntawm sab kev ntseeg, kev hlub thiab kev koom siab yog ob  yam tseem ceeb uas Yehauvas cov tib neeg muaj. Qhov uas Yehauvas cov tib neeg “nyob taus ua ke” pab peb pom tias thaum nyob hauv lub qab ntuj tshiab Yehauvas cov tib neeg yuav haj yam txawj sib hlub thiab sib koom siab. (Kaulauxais 3:14) Ib tug muam piav txog thawj zaug nws ntsib Yehauvas cov tib neeg li no: “Thawj zaug kuv pom tib neeg muaj kev zoo siab yog thaum kuv ntsib Yehauvas Cov Tim Khawv. Lawv muaj kev zoo siab vim lawv ib leeg hlub ib leeg. Txawm kuv tsev neeg kiag los peb yeej tsis txawj sib hlub npaum li no.” Yog leej twg xav muaj kev zoo siab thiab kev txaus siab, tus ntawd yuav tau nrog peb nyob hauv lub vaj kaj siab ntawm sab kev ntseeg. Txawm lub qab ntuj no yuav xav li cas txog cov uas teev tiam Yehauvas los lawv yeej muaj nqis rau Yehauvas thiab Yehauvas cov tib neeg.​—Yaxayas 65:15.

9. Yaxayas 65:16, 17 tau hais li cas txog tej teeb meem uas peb muaj?

⁹ Ua siab kaj siab tus. Yaxayas 65:14 hais tias cov uas tsis nyob hauv lub vaj kaj siab ntawm sab kev ntseeg yuav “quaj qw vim yog tu siab thiab yuav quaj nyiav vim yog lwj siab.” Ua li txhua yam uas ua rau Vajtswv cov tib neeg txom nyem nyuaj siab ne? Ntev mus peb yuav “tsis nco txog tej kev txomnyem uas [peb] raug los lawm.” (Nyeem Yaxayas 65:16, 17.) Yehauvas yuav muab peb tej teeb meem rhuav tshem du lug mus ces tsis ntev xwb peb yeej yuav tsis nco txog tej teeb meem ntawd li lawm.

10. Vim li cas ho yog ib qho koob hmoov zoo heev uas koj tau nrog koj cov kwv tij nkauj muam? (Saib daim duab.)

¹⁰ Txawm niaj hnub nim no los peb yeej kaj siab dua thaum peb mus peb tej kev sib txoos vim lub sij hawm ntawd peb xav tsis txog tej teeb meem uas peb muaj. Peb kuj pab tau cov kwv tij nkauj muam muaj lub siab kaj siab tus thaum lawv pom tias peb hlub lawv, muaj kev zoo siab, nyob sib haum xeeb, ua siab dawb siab zoo, thiab muaj lub siab mos siab muag. (Kalatias 5:22, 23) Yog ib txoj koob hmoov zoo kawg li uas peb tau nyob hauv Vajtswv lub koom haum! Cov uas nyob twj ywm hauv lub vaj kaj siab ntawm sab kev ntseeg yuav pom lub sij hawm thaum Vajtswv tsim “lub ntuj tshiab thiab lub ntiajteb tshiab.”

11. Raws li Yaxayas 65:18, 19, peb xav li cas txog lub vaj kaj siab ntawm sab kev ntseeg uas Yehauvas tau tsim?

¹¹ Zoo siab thiab ris txiaj ntsig. Yaxayas piav tias vim li cas peb yuav tsum “zoo siab” nyob hauv lub vaj kaj siab ntawm sab kev ntseeg. Yehauvas yog tus tsim lub vaj kaj siab ntawm sab kev ntseeg no. (Nyeem Yaxayas  65:18, 19.) Yog li ntawd, nws thiaj siv peb los qhia qhov tseeb txog nws thiab coj tib neeg los nyob hauv lub vaj kaj siab ntawm sab kev ntseeg. Vim peb paub qhov tseeb, peb tau txais koob hmoov ntau heev ua rau peb zoo siab kawg li thiab xav muab tej no qhia rau lwm tus.​—Yelemis 31:12.

12. Koj xav li cas txog cov lus cog tseg hauv Yaxayas 65:20-24, thiab yog vim li cas?

¹² Peb ris txiaj ntsig thiab zoo siab heev rau txoj kev vam kev cia siab uas peb muaj vim peb nrog Yehauvas sib raug zoo. Xav txog txhua yam uas peb yuav pom thiab yuav ua hauv Vajtswv lub qab ntuj tshiab! Phau Vajlugkub cog tseg tias: “Cov menyuam mos yuav tsis muaj kev ploj kev tuag, thiab txhua tus neeg yuav muaj sia nyob ntev. . . . Cov neeg ua tsev yuav tau nyob hauv tej tsev ntawd, tsis yog lwm tus yuav tau nyob. Lawv yuav cog txiv hmab thiab yuav tau haus tej cawv txiv hmab ntawd.” Txhua yam peb ua “yeej yuav tiav” vim Yehauvas yuav “foom koob hmoov.” Yehauvas cog lus rau peb tias peb yuav tau lub neej ruaj khov thiab nyob tso siab plhuav. “Thaum lawv tseem thov,” Yehauvas twb paub tej uas lawv cheem tsum lawm thiab yuav “pub rau lawv muaj txaus nkaus.”​—Yaxayas 65:20-24; Phau Ntawv Nkauj 145:16.

13. Yaxayas 65:25 piav li cas txog cov uas los teev tiam Yehauvas es tau hloov lawv lub neej?

¹³ Sib haum xeeb thiab nyab xeeb. Vim muaj Vajtswv lub hwj huam dawb huv pab, coob tus uas yav tas los yog neeg tsiv tsaim, siab heev, los sis coj tsis ncaj tau hloov lawv lub neej. (Nyeem Yaxayas 65:25.) Lawv sib zog hloov lawv thiaj hloov tau tej cwj pwm ntawd. (Loos 12:2; Efexus 4:22-24) Tiam sis nco ntsoov tias Vajtswv cov tib neeg yeej tseem yog neeg zoo tsis tiav ces peb yuav niaj hnub ua yuam kev. Txawm li ntawd los Yehauvas tseem coj “txhua tus” uas hlub nws thiab nws cov tib neeg los nyob ua ke. Vim li no lawv thiaj nyob sib haum xeeb thiab muaj kev sib koom siab. (Titus 2:11) Tsuas yog Yehauvas uas yog tus Vajtswv loj dua ntais thiaj ua tau li no xwb!

14. Ib tug kwv tij lub neej mus raws li Yaxayas 65:25 li cas?

¹⁴ Tib neeg puas hloov tau lawv tus cwj pwm tiag? Cia peb mus tham txog ib tug hluas uas muaj 20 xyoo xwb, nws twb raug kaw ntau zaus lawm. Nws raug kaw vim nws ua tub sab, tsoo vaj tsoo tsev, thiab ua ntau yam txhaum kev cai. Nws yog ib tug neeg tsiv tsaim thiab nyiam sib ntaus. Thaum nws hnov qhov tseeb hauv phau Vajlugkub thiab pib mus kev sib txoos, nws ntseeg tias nws nrhiav tau lub neej uas muaj qab hau uas yog lub vaj kaj siab ntawm sab kev ntseeg. Tom qab nws ua kev cai raus dej, nws pheej xav tias nqe Vajlugkub hauv Yaxayas 65:25 yog hais txog nws. Nws tau hloov tus cwj pwm uas zoo li tus tsov ntxhuav uas yog tus neeg tsiv tsaim, los ua tus cwj pwm uas zoo li tus yaj uas yog tus neeg sib haum xeeb.

15. Vim li cas peb thiaj mus coj tib neeg los nrog peb nyob hauv lub vaj kaj siab ntawm sab kev ntseeg, thiab peb ua tau li ntawd li cas?

¹⁵ Nyob hauv Yaxayas 65:13 hais tias: “[Yehauvas] thiaj hais li no tias.” Thiab nqe 25 xaus tias “[Yehauvas] hais li no ntag.” Qhov no qhia tias Yehauvas tej lus cog tseg yeej yuav muaj tiav xwb xwb li. (Yaxayas 55:10, 11) Twb muaj lub vaj kaj siab ntawm sab kev ntseeg tam sim no lawm. Yehauvas npaj tseg tau ib tsev neeg uas zoo kawg nkaus li los pe hawm nws. Vim peb nrog tsev neeg no, peb thiaj muaj kev sib haum xeeb thiab nyob nyab xeeb txawm peb nyob hauv lub qab ntuj uas phem kawg li. (Phau Ntawv Nkauj 72:7) Vim li no peb thiaj xav pab coob tus li coob tau los koom nrog peb tsev neeg. Peb ua tau li no yog  peb tau hau ntsoov mus coj tib neeg los ua Yexus cov thwj tim.​—Mathais 28:19, 20.

MUS PAB LWM TUS LOS KOOM LUB VAJ KAJ SIAB NTAWM SAB KEV NTSEEG

16. Dab tsi yuav pab tau tib neeg los rau hauv lub vaj kaj siab ntawm sab kev ntseeg?

¹⁶ Peb txhua tus yeej pab tau lwm tus pom tias lub vaj kaj siab ntawm sab kev ntseeg zoo npaum li cas. Ib qho uas peb ua tau li no yog xyaum Yehauvas. Yehauvas tsis yuam tib neeg los rau hauv nws lub koom haum. Nws tsuas maj mam “rub” lawv los xwb. (Yauhas 6:44; Yelemis 31:3) Cov tib neeg uas muaj lub siab xib Yehauvas thiab nyiam tej yeeb yam uas nws muaj yeej yuav los teev tiam nws. Yog peb muaj yeeb yam zoo thiab cwj pwm zoo ho yuav pab tau tib neeg los rau hauv lub vaj kaj siab ntawm sab kev ntseeg li cas?

17. Peb yuav pab lwm tus los rau hauv lub vaj kaj siab ntawm sab kev ntseeg li cas?

¹⁷ Ib yam uas peb ua tau los pab tib neeg los rau hauv lub vaj kaj siab ntawm sab kev ntseeg yog hlub thiab ua zoo rau peb cov kwv tij nkauj muam. Thaum cov tshiab tuaj koom peb tej kev sib txoos, peb xav kom lawv pom ib yam li cov nyob txheej thaum ub uas mus koom kev sib txoos thawj zaug hauv Kauleethaus. Cov ntawd hais tias: “Vajtswv nrog nej nyob ntawm no tiag lauj!” (1 Kauleethaus 14:24, 25; Xakhaliyas 8:23) Yog li ntawd, cia peb rau siab ntso “nyob sib haumxeeb thiab sib hlub sib pab.”​—1 Thexalaunikes 5:13.

18. Dab tsi yuav pab tau tib neeg los rau hauv peb lub koom haum?

¹⁸ Peb yuav tsum saib peb cov kwv tij nkauj muam ib yam li Yehauvas saib. Peb yuav tsum pom lawv qhov zoo, tsis yog lawv qhov phem rau qhov yav tom ntej peb yuav tsis muaj qhov phem lawm. Txawm peb ib leeg ua yuam kev rau ib leeg los cia peb “ua siab dawb siab zoo, ib tug hlub ib tug, thiab ib tug zam txim  rau ib tug.” (Efexus 4:32) Cov uas nyiam qhov zoo yeej yuav xav los nrog peb nyob hauv lub vaj kaj siab ntawm sab kev ntseeg. b

TXHOB TAWM HAUV LUB VAJ KAJ SIAB NTAWM SAB KEV NTSEEG

19. (1) Nyob rau hauv lub ntsiab “ Lawv Tawm Thiab Rov Los,” ib txhia tau hais li cas tom qab lawv rov los rau hauv lub vaj kaj siab ntawm sab kev ntseeg? (2) Peb yuav tau txiav txim siab ua dab tsi? (Saib daim duab.)

¹⁹ Peb zoo siab tias muaj lub vaj kaj siab ntawm sab kev ntseeg! Niaj hnub nim no lub vaj kaj siab ntawd tseem zoo nkauj tshaj thaum ub, thiab muaj coob tus uas teev tiam Yehauvas nyob rau hauv. Cia peb ris txiaj ntsig rau lub vaj kaj siab ntawm sab kev ntseeg uas Yehauvas tau tsim rau peb. Txhua tus uas xav kom muaj kev kaj siab, kev txaus siab, lub siab tus, thiab nyob nyab xeeb yuav tau los nyob rau hauv lub vaj kaj siab ntawm sab kev ntseeg thiab tsis txhob tawm li! Peb yuav tau ceev faj rau qhov Xatas yeej ua txhua yam los ntxias kom peb tawm. (1 Petus 5:8; Tshwmsim 12:9) Peb yuav tsum tsis txhob cia Xatas ntxias tau peb. Cia peb rau siab ntso tiv thaiv lub vaj kaj siab ntawm sab kev ntseeg kom nws zoo nkauj, kom nws huv, thiab kom sawv daws nyob sib haum xeeb.