Kuv yug rau xyoo 1955. Peb muaj peb kwv tij hos kuv yog tus yau. Kuv loj hlob rau hauv qab teb Filees uas yog ntawm lub nroog Vatas (Vantaa).

Kuv niam ua kev cai raus dej ob peb xyoos ua ntej yug kuv los. Hos kuv txiv tsis ntseeg Yehauvas thiab nws tawm tsam tsis pub kuv niam kawm Vajlugkub nrog peb thiab tsis pub coj peb mus kev sib txoos. Thaum kuv txiv tsis nyob tsev lawm ces kuv niam kuj qhia Vajlugkub rau peb.

Thaum kuv tseem yog me nyuam yaus, kuv mloog Yehauvas lus heev. Xws li thaum kuv muaj xya xyoo, kuv tus xib hwb chim heev rau kuv vim kuv tsis kam noj cov ncuav ntshav uas peb haiv neeg ib txwm noj. Nws muab ib sab tes coj los zawm kuv ob sab kaum ncauj kom qhib ces nws muab rab rawg nkaug lub ncuav ntshav ntsaws rau hauv kuv qhov ncauj. Kuv nti tis nti, thawb tis thawb ua rau rab rawg plam kiag ntawm xib hwb txhais tes lawm.

Thaum kuv muaj 12 xyoos, kuv txiv kuj tau tag sim neej lawm. Tom qab ntawd, tsis muaj leej twg txwv kuv mus kev sib txoos. Cov kwv tij hauv lub koom txoos hlub kuv kawg li thiab pab kom kuv teev tiam Yehauvas. Kuv nyeem phau Vajlugkub txhua txhua hnub thiab nyeem tej ntaub ntawv uas Yehauvas lub koom haum luam tawm tsis so. Vim kuv ua li no kuv thiaj ua tau kev cai raus dej rau thaum lub 8 Hli tim 8 xyoo 1969 thaum kuv muaj 14 xyoos.

 Tsis ntev tom qab kuv kawm ntawv tag, kuv txawm pib ua ib tug tho kev. Ob peb lub lim tiam tom qab ntawd, kuv tsiv mus pab tej thaj tsam uas tsis muaj cov Tim Khawv coob pes tsawg. Kuv mus nyob rau hauv lub zos Phailavexis (Pielavesi) uas nyob hauv plawv Filees.

Nyob rau hauv Phailavexis, kuv ntsib ib tug hluas nkauj hu ua Xawkas (Sirkka) uas tom qab no kuj tau los ua kuv poj niam. Kuv nyiam nws heev vim nws txo hwj chim thiab hlub Yehauvas kawg nkaus li. Nws tsis ntshaw kom muaj txiag nplua nuj los sis muaj yam ub yam no zoo zoo. Wb ob leeg txaus siab hlo ua npaum li wb ua tau rau Yehauvas. Wb sib yuav thaum lub 3 Hlis tim 23 xyoo 1974. Tom qab ntawd, wb cia li ncaj qha mus rau ntawm lub me nyuam zos Khatulas (Karttula) uas nyob hauv Filees. Nyob rau hauv lub zos ntawd tsis tshua muaj cov Tim Khawv coob pes tsawg.

Thaum wb nyuam qhuav pib sib sau ua neej, wb yeej pom tias Yehauvas yeej yuav saib xyuas wb yog wb txhawb Vajtswv txoj kev kav. (Mathais 6:33) Xws li nyob hauv Khatulas, wb tsis muaj tsheb tsav. Wb mus qhov twg los wb tsuas caij tsheb kauj vab xwb. Thaum lub caij ntuj no mas qhov txhia qhov chaw khov tag li. Yuav kom mus qhia tau txoj xov zoo rau lub koom txoos thaj tsam, wb yuav tsum muaj ib lub tsheb tsav. Tiam sis wb tsis muaj nyiaj yuav ib lub tsheb.

Ib sij huam, kuv tus tij laug txawm tuaj xyuas wb. Nws muab nws ib lub tsheb rau wb tau tsav. Txhua yam ntawm lub tsheb them tag lawm, wb tsuas sam roj rau lub tsheb xwb. Tam sim no wb muaj ib lub tsheb los tsav.

Qhov no Yehauvas qhia tau tias nws yeej saib xyuas wb yog wb tsis muaj qhov twg txawm peem. Wb tes hauj lwm tsuas yog txhawb nqa Vajtswv txoj kev kav xwb.

Nyob rau xyoo 1978 thaum wb mus kawm txoj Kev Kawm Rau Cov Tho Kev, tus kwv tij uas qhia peb hu ua Laimaus Khukanees (Raimo Kuokkanen) a txhawb kom wb mus kawm Kile-a. Yog li ntawd, wb thiaj li rau siab ntso kawm lus Askiv tsam muaj ib hnub twg wb ho tau mus. Nyob rau xyoo 1980, ua ntej wb rau npe mus kawm Kile-a, lawv kuj caw kom wb mus ua hauj lwm nyob rau ceg Npe-ee hauv Filees. Lub sij hawm ntawd, cov ua hauj lwm hauv Npe-ee, lawv tsis pub rau npe mus kawm Kile-a. Wb xav ua hauj lwm rau thaj chaw uas Yehauvas pom zoo rau wb ua, wb thiaj li  mus raws li lawv caw kom wb mus. Txawm li ntawd los wb haj tseem rau siab ntso kawm lus Askiv tas zaj tas zog tsam ib hnub twg wb ho tau mus.

Tau ob peb xyoos tom qab ntawd, Pab Uas Ntaus Thawj kuj cia cov ua hauj lwm hauv Npe-ee mus kawm Kile-a lawm thiab. Wb maj nrawm nroos rau npe mus kawm, tiam sis tsis yog tias wb tsis xav nyob hauv Npe-ee. Wb lam rau npe nyob tsam ho muaj lwm thaj chaw uas xav tau tej tug mus pab. Lawv kuj cia wb mus kawm Kile-a thiab wb kawm tag rau thaum lub 9 Hlis xyoo 1985 uas yog pab 79. Lawv kuj xa wb mus rau teb chaws Khauloonpia.

Lawv xa wb mus ua hauj lwm rau ceg Npe-ee hauv teb chaws Khauloonpia. Kuv yeej ua li kuv ua tau rau tes hauj lwm lawv muab rau kuv ua tiam sis tom qab ua hauj lwm tau ib xyoos hauv Npe-ee, kuv txawm nug kom lawv muab dua ib txoj hauj lwm tshiab rau kuv ua. Yog li ntawd, lawv thiaj li muab wb xa mus ua ob tug tub txib tshaj tawm txawv teb chaws rau hauv lub nroog Nevas (Neiva) hauv thaj tsam Hulas (Huila).

Kuv nyiam mus qhia txoj xov zoo kawg nkaus li. Thaum kuv ua ib tug tho kev nyob rau Filees, kuv yeej mus qhia txoj xov zoo thaum sawv ntxov mus txog ntua tsaus ntuj. Thaum Xawkas wb sib yuav lawd, wb mus qhia Vajlugkub ib hnub tsaus ntuj ntais mam li los tsev. Yog wb mus qhia rau tej thaj chaw uas deb vaj deb tsev lawd, ces wb pw hauv wb lub tsheb kom hnub tom qab wb thiaj li tsis tau tsav tsheb mus deb deb thiab wb thiaj mus tshaj tawm tau ntxov ntxov.

Thaum wb ua ob tug tub txib tshaj tawm txawv teb chaws, wb txawm kub siab lug ib yam li yav thaum ub uas wb mus qhia Vajlugkub. Peb lub koom txoos txawm muaj neeg los ntseeg coob zuj zus thiab cov kwv tij nkauj muam nyob rau hauv Khauloonpia yeej yog neeg paub cai, muaj kev hlub, thiab ris lwm tus txiaj ntsig.

Nyob tsis deb ntawm thaj tsam uas wb mus qhia txoj xov zoo hauv Nevas, muaj tej me nyuam zos uas tsis muaj cov Tim Khawv nyob rau hauv. Kuv yeej txhawj tias xyov yuav ua li cas txoj xov zoo thiaj li mus txog lawv. Vim nom tswv thiab cov neeg tawm tsam nom tswv pheej sib tua ces tej thaj tsam no yeej txaus ntshai heev. Kuv thiaj li thov Vajtswv kom cia ib tug nyob hauv tej me nyuam zos ntawd los ua ib tug Tim Khawv. Kuv xav tias tus ntawd yuav tsum tau tuaj nyob rau hauv lub nroog Nevas kom nws thiaj paub Vajlugkub. Tsis tas li ntawd, tom qab nws ua kev cai raus dej lawm, kom nws ua ib tug Khixatias uas paub tab thiab rov qab mus qhia txoj xov zoo rau hauv nws tej zej zog. Kuv thov li ntawd tiam sis Yehauvas tseem ua zoo tshaj li kuv xav tseg.

Tsis ntev tom qab ntawd, kuv txawm pib kawm Vajlugkub nrog ib tug tub hluas npe hu ua Fenadaus Nkoxales (Fernando González). Nws nyob hauv lub zos hu ua Ahexilas (Algeciras) uas tsis muaj ib tug Tim Khawv hlo li. Fenadaus niaj hnub tuaj ua hauj lwm deb li 50 kilumev (30 mais) rau hauv lub nroog Nevas. Nws yeej npaj zoo zoo ua ntej wb yuav kawm Vajlugkub thiab yeej tuaj tag nrho tej kev sib txoos. Thawj lub lim tiam uas Fenadaus kawm Vajlugkub, nws txawm mus sau cov tib neeg hauv nws zej zog thiab qhia tej uas nws kawm tau rau lawv mloog.

Rau lub hlis tom qab Fenadaus kawm Vajlugkub, nws txawm ua kev cai raus dej rau thaum lub 1 Hlis xyoo 1990. Tom qab ntawd, nws txawm ua ib tug  tho kev. Thaum Yehauvas lub koom haum pom tias muaj ib tug Tim Khawv nyob rau hauv Ahexilas ces lawv thiaj li xa cov tho kev tshwj xeeb mus rau thaj tsam ntawd. Nyob rau thaum lub 2 Hlis xyoo 1992, txawm muaj ib lub koom txoos nyob rau lub zos ntawd lawm.

Fenadaus tsis yog qhia Vajlugkub rau nws lub zos xwb. Tom qab nws yuav poj niam tas, ob tug txawm tsiv mus nyob rau Xees Vixetes Des Khavas (San Vicente del Caguán) uas yog ib lub me nyuam zos uas tsis muaj cov Tim Khawv nyob rau hauv. Nkawd txawm pab tsa tau ib lub koom txoos nyob rau hauv lub zos ntawd thiab. Xyoo 2002, Fenadaus tau ua ib tug saib xyuas thaj tsam. Nws thiab nws poj niam nkawd haj tseem ua tes hauj lwm no los txog niaj hnub nim no.

Tej uas kuv ntsib tas no ua rau kuv xam pom tias peb yuav tau thov tsi ntsees rau tes hauj lwm peb ua rau Yehauvas. Yehauvas yeej ua tau tej yam peb ua tsis tau. Tsis tas li ntawd, tes hauj lwm sau qoob loo no yog nws tes hauj lwm, tsis yog peb tes.​—Mathais 9:38.

Nyob rau xyoo 1990, wb tau ua tes hauj lwm saib xyuas thaj tsam. Thaj tsam wb xub mus saib nyob hauv lub nroog Nponkotas (Bogotá). Wb ntshai nyob tsam wb tsis paub ua wb tes hauj lwm. Wb ob niam txiv tsis txawj ib yam dab tsi li, thiab wb tsis tau nyob rau tej nroog loj loj. Tiam sis Yehauvas ua raws li nws tau cog lus nyob rau hauv Filipis 2:13 tias: “Vajtswv yog tus pub dag pub zog rau nej kom nej thiaj ua tau haum nws siab. Nws ua kom nej muaj lub siab kub lug thiab muaj zog npho ua raws li nws siab nyiam.”

Tom qab ntawd, wb kuj mus saib thaj tsam nyob rau hauv lub nroog Medelias uas kuv xub piav txog. Cov tib neeg nyob rau ntawd sib ntaus sib tua heev, cia li tsis ua rau tej neeg ceeb sob li lawm. Xws li muaj ib zaug thaum kuv tseem tab tom qhia rau ib tug kawm Vajlugkub, tib neeg cia li sib tua nphawv nphoov cuag cas sab nraum lub tsev uas kuv mus xyuas ntawd. Kuv twb yuav luag vau nrov poog rau hauv pem teb tiam sis tus uas kawm Vajlugkub haj tseem nyeem ntawv nyuj nyos tsis ua suab sab li cas. Tom qab nws nyeem ntawv tas, nws txawm hais kom kuv tos thiab nws txawm tawm mus nraum zoov lawm. Tom qab me ntsis ntawd, nws txawm coj ob tug me nyuam rov qab los thiab hais tias, “Thov txim, twb yog kuv mus coj kuv ob tug me nyuam.”

Muaj qho zaug mas phom sij rau wb kawg li. Muaj ib zaug kuv poj niam wb mus qhia Vajlugkub ib lub qhov rooj rau ib lub qhov rooj. Kuv poj niam txawm dhia ceev ceev ua ntsej muag thim xem tag los rau ntawm kuv. Nws hais tias muaj leej twg tua phom tuaj rau nws. Ua rau kuv ntshai kawg li. Tom qab ntawd, wb mam li paub tias yog lawv tua tus txiv neej uas los dhau ntawm kuv poj niam ib sab.

Ntev mus ntev tuaj wb tsis tshua ntshai lawm. Cov kwv tij nkauj muam los yeej txhawb tias lawv kuj raug tej yam zoo li no thiab lawv kuj raug tej yam phem tshaj no los kuj muaj. Wb xam pom tias yog Yehauvas twb pab tau lawv ces Yehauvas yeej yuav pab wb thiab. Wb mloog cov txwj laus qhia seb yuav ua li cas rau li cas, wb yuav tau xyuam xim, ces dhau li ntawd wb cia Yehauvas ua tus pab wb.

 Tsis yog txhua txhua zaus yuav phom sij li peb xav. Muaj ib zaug kuv hnov ob tug poj niam sib ceg heev kawg li ntawm lub tsev kuv mus xyuas ntawd sab nraud. Kuv tsis xav pom tib neeg sib cav sib ceg tiam sis tus tswv tsev hais tias kom kuv tawm mus sab nraud mus saib seb yog ua li cas. Kuv pom tias tsis yog ob tug poj niam “sib ceg” tiam sis yog ob tug noog leeb nkaub pheej qog lwm tus sib ceg xwb.

Nyob rau xyoo 1997, kuv tau mus ua ib tug uas qhia rau txoj kev kawm rau cov kwv tij uas leg hauj lwm (Ministerial Training School). b Kuv yeej ib txwm nyiam mus kawm cov tsev kawm ntawv uas Yehauvas lub koom haum tsa muaj, tiam sis kuv tsis tau xav dua hais tias kuv yuav tau ua tus qhia ib lub.

Tom qab no kuv mus ua ib tug saib xyuas cheeb tsam. Thaum tsis muaj tes hauj lwm no lawm ces kuv rov qab mus ua ib tug saib xyuas thaj tsam. Tshaj li 30 lub xyoos, kuv ua ib tug qhia ntawv thiab saib xyuas thaj tsam. Cov hauj lwm no yog ib qho koob hmoov uas zoo kawg nkaus li. Txawm li ntawd los txhua yam yeej tsis yooj yim. Cia kuv mam li piav qhia ntxiv.

Kuv yog ib tug neeg muaj lub siab tawv heev. Qhov uas kuv zoo li no pab tau kuv thev taus ntau yam. Tiam sis qho zaus kuv kub kub siab kho tej teeb meem uas muaj hauv tej koom txoos. Muaj tej zaud kuv qhuab ntuas kom ib txhia sib hlub thiab ua siab ntev rau lwm tus. Txawm kuv ntuas lawv li no los kuv yuav tau coj li kuv tau ntuas thiab.​—Loos 7:21-23.

Kuv pheej ua tsis tau zoo mas ua rau kuv mluas mluas. (Loos 7:24) Muaj ib zaug kuv thov rau Yehauvas tias ntshe zoo dua yog tias kuv tsis txhob ua ib tug tub txib tshaj tawm txawv teb chaws lawm es rov qab mus nyob rau teb chaws Filees. Hmo ntawd kuv mus kev sib txoos mas tej kuv hnov txhawb kom kuv ua twj ywm kuv tes hauj lwm thiab hloov kuv tus kheej. Los txog niaj hnub nim no, kuv yeej zoo siab kawg li uas Yehauvas teb kuv cov lus thov. Ntxiv ntawd, kuv ris txiaj ntsig kawg li uas Yehauvas pab tau kom kuv txawj kho kuv tus yam ntxwv.

Kuv poj niam wb ris txiaj ntsig kawg li uas Yehauvas cia wb ua hauj lwm puv ntoob rau nws tau ntau ntau xyoo. Tsis tas li ntawd, kuv ris txiaj ntsig rau Yehauvas vim nws muab tau ib tug poj niam zoo heev rau kuv.

Tsis ntev no kuv twb yuav muaj 70 xyoo ces kuv yuav tsis ua ib tug qhia ntawv thiab ib tug saib xyuas thaj tsam ntxiv lawm. Txawm li ntawd los kuv tsis tu siab dab tsi vim kuv ntseeg tias qhov uas ua rau Yehauvas tau koob meej yog teev tiam nws thiab qhuas nws tawm plaws hauv nruab siab tuaj. (Mikhas 6:8; Malakaus 12:32-34) Ua kom Yehauvas tau koob meej tsis yog peb yuav tsum muaj ib teg hauj lwm muaj koob nto npe.

Thaum kuv rov qab ua tib zoo xav txog tej hauj lwm kuv ua mas kuv zoo siab ua kawg li. Kuv tau tej hauj lwm tsis yog kuv txawj ib yam dab tsi los sis zoo dua lwm tus. Tos kuv tau tej hauj lwm no los twb yog Yehauvas muaj kev hlub nplua mias rau kuv. Kuv ua tau tej yam tsis zoo los Yehauvas haj tseem muab tej hauj lwm ntawd rau kuv ua. Yog tsis muaj Yehauvas pab ces kuv yeej ua tsis tau tej hauj lwm uas nws muab rau kuv ua ntawd. Yog li ntawd, tej yam uas kuv ua tsis tau los Vajtswv yeej tso nws lub hwj chim los pab kuv.​—2 Kauleethaus 12:9.