Koj Puas Paub?
Vim li cas Daviv ib txhia tub rog ho tsis yog tib neeg Ixayees?
IB TXHIA tub rog uas nrog Daviv tsis yog neeg Ixayees. Xws li Xeleb uas yog neeg Amoos, Uliyas uas yog neeg Hitis, thiab Ima uas yog neeg Mau-am. a (1 Xwmtxheej Vajntxwv 11:39, 41, 46) Txuas ntxiv ntawd, Daviv cov tub rog kuj muaj cov “Khelethi thiab cov Pelethi sawvdaws thiab cov neeg Ka.” (2 Xamuyees 15:18) Cov Khelethi thiab Pelethi kuj txheeb ze rau cov Filitees. (Exekees 25:16) Cov Ka yeej ib txwm nyob hauv cov Filitees lub nroog Nkas.—Yausuas 13:2, 3; 1 Xamuyees 6:17, 18.
Vim li cas Daviv ho cia cov txiv neej no ua nws cov tub rog? Nws tso siab tias cov txiv neej yeej tsis ntxeev siab rau nws thiab rau Yehauvas. Xws li ib phau ntawv uas txhais phau Vajlugkub hais txog cov Khelethi thiab Pelethi tias: “Thaum Daviv ua vaj ntxwv, lawv yeej tsis ntxeev siab rau nws tab txawm muaj ntau yam kev nyuaj siab nyob rau hauv Daviv lub neej.” Lawv tau ua li cas los qhia tias lawv tsis ntxeev siab rau Daviv? Thaum tag nrho cov txiv neej Ixayees tso Daviv tseg mus tuaj “ib tug txivneej hu ua Senpas” uas yog “ib tug neeg siab phem heev” tog, cov Khelethi thiab Pelethi haj tseem nrog nraim Daviv thiab pab kom Senpas txhob ua tau raws li tej uas nws xav tseg. (2 Xamuyees 20:1, 2, 7) Hos muaj ib zaug Daviv tus tub Adauniyas xav tsa nws tus kheej kom ua vaj ntxwv. Tiam sis cov Khelethi thiab Pelethi haj tseem nrog nraim Daviv thiab pab muab Xalumoos tsa ua vaj ntxwv vim Xalumoos yog tus Yehauvas xaiv.—1 Vajntxwv 1:24-27, 38, 39.
Ib tug uas tsis ntxeev siab rau Daviv yog Ithais uas yog neeg Ka. Ithais thiab nws 600 leej tub rog yeej txhawb nqa Daviv thaum Daviv tus tub Axaloos sawv tawm tsam nws thiab ntxias tau cov Ixayees tawm tsam Daviv. Daviv hais rau Ithais tias vim Ithais tsis yog Daviv haiv neeg ces Ithais tsis tas pab Daviv los tau. Tiam sis Ithais hais tias: “Vajntxwv, kuv thov tuav [Yehauvas] lub npe coglus rau koj hais tias, koj mus qhov twg kuv yuav nrog koj mus qhov ntawd, txawm yog yuav ciaj thiab tuag los xij peem.”—2 Xamuyees 15:6, 18-21.
Ithais tsis ntxeev siab rau Daviv tus uas Yehauvas xaiv ua vaj ntxwv
Txawm tias cov Khelethi, Pelethi, thiab Ka yog lwm haiv neeg xwb los lawv yeej xam pom tias Yehauvas yog tus tseem Vajtswv thiab saib taus Daviv tias nws yog tus Yehauvas xaiv ua vaj ntxwv. Daviv ris txiaj ntsig kawg li uas muaj cov txiv neej no tuaj nws tog!
a Vajtswv txoj cai nyob rau hauv 2 Kevcai 23:3-6 txwv tsis pub cov Amoos los sis cov Mau-am los txuam nrog cov Ixayees. Tsab cai ntawd tsis pub kom lawv los ua pej xeem tiam sis kuj pub lawv xyaw los sis pub txum chaw nrog Vajtswv cov tib neeg nyob. Mus saib phau Insight on the Scriptures, Volume 1, sab 95 ua lus Askiv.
