1, 2. Vim li cas Yexus thiaj ntxhov siab?

HNUB kawg uas Yexus nyob hauv ntiajteb no, nws ntxhov siab heev. Tshuav tsis ntev xwb nws yuav raug tsim txom thiab raug tua. Tiamsis tsis yog Yexus ntxhov siab qhov ntawd xwb. Nws hlub Vajtswv heev thiab xav ua haum nws Leej Txiv siab. Nws paub tias yog nws muab siab npuab Yehauvas es thev kev tsim txom mus txog thaum kawg, nws yuav txhawb nqa nws Leej Txiv lub npe. Yexus kuj hlub tibneeg kawg li thiab. Nws paub tias yog nws muab siab npuab Yehauvas mus txog thaum nws tuag ces noob neej yuav tau txojsia ib txhis tsis kawg.

² Txawm Yexus nyuaj siab heev los nws tseem muaj lub siab tus. Nws hais rau nws cov tubtxib tias: “Kuv pub kuv txojkev siab tus rau nej.” (Yauhas 14:27, NW) Yexus muaj “Vajtswv txojkev siab tus.” Txojkev siab tus no yog Yehauvas pub rau cov uas nrog nws sib raug zoo xwb. Vim Yexus muaj kev sib raug zoo nrog Yehauvas, nws thiaj ua tau siab tus.​—Filipi 4:6, 7.

3. Peb yuav kawm txog dabtsi hauv zaj no?

³ Peb yeej tsis muaj ib tug uas yuav raug kev tsim txom hnyav npaum li Yexus, tiamsis Yexus cov thwjtim txhua tus yeej yuav raug kev sim siab. (Mathai 16:24, 25; Yauhas 15:20) Tej thaud peb kuj muaj kev ntxhov siab ib yam li Yexus thiab. Yog li ntawd, yuav ua li cas peb thiaj tsis txhawj dhau es ua rau peb tsis muaj lub siab tus? Cia peb kawm txog 3 yam uas Yexus tau ua thaum nws ua Vajtswv tes haujlwm hauv ntiajteb no seb pab tau peb li cas thaum peb raug kev sim siab.

4. Ua cas peb thiaj paub tias hnub Yexus tuag, nws thov Vajtswv heev? Muab piv rau 1 Thexalaunika 5:17.

⁴ Nyeem 1 Thexalaunika 5:17. Hnub kawg uas Yexus nyob hauv ntiajteb no, nws thov Vajtswv tsis tu ncua. Nws thov Vajtswv rau lub ncuav thiab khob cawv txiv hmab thaum nws ua kevcai nco txog nws txojkev tuag. (1 Khaulee 11:23-25) Yexus nrog nws cov thwjtim thov Vajtswv ua ke ua ntej lawv sawv kev ntawm qhov chaw ua Kevcai Hla Dhau mus. (Yauhas 17:1-26) Yexus siv zog thov Vajtswv thaum lawv mus txog saum Roob Txiv Aulib. (Mathai 26:36-39, 42, 44) Thiab Yexus kuj thov Vajtswv ob peb los ua ntej nws tu siav. (Luka 23:46) Yexus thov Vajtswv pab txhua yam uas nws ua rau hnub kawg ntawd.

5. Vim li cas cov tubtxib thiaj ntshai thiab khiav tag lawm?

⁵ Ib qho uas pab tau Yexus nyiaj dhau kev sim siab yog nws thov Vajtswv pab tsis tseg. Nws tso siab plhuav rau nws Leej Txiv. Tiamsis hmo ntawd cov tubtxib tsis ua li Yexus, lawv tsis thov Vajtswv pab lawv. Thaum lawv raug kev sim siab lawv thiaj ntshai thiab khiav tag lawm. (Mathai 26:40, 41, 43, 45, 56) Thaum peb raug kev sim siab yog peb ua li Yexus es “thov Vajtswv” pab tsis tseg ces peb yeej yuav muab siab npuab Yehauvas. Peb yuav thov Vajtswv rau tej yam twg?

6. Kev ntseeg yuav pab peb muaj lub siab tus li cas?

⁶ Zoo rau peb thov kom Yehauvas “tsav kev ntseeg rau peb ntau zuj zus.” (Luka 17:5; Yauhas 14:1) Peb yuav tsum muaj kev ntseeg vim Xatas yuav sim Yexus cov thwjtim txhua tus huvsi. (Luka 22:31) Yog peb ntsib teeb meem ib qho tag ib qho tuaj, kev ntseeg yuav pab kom peb ua tau siab tus li cas? Kev ntseeg yuav pab peb muab qhov teeb meem tso plhuav rau  Yehauvas. Peb kuj ua li peb ua tau los daws peb qhov teeb meem, tiamsis peb paub tias Yehauvas yog tus muaj tswvyim dua, peb thiaj tso siab plhuav rau nws thiab muaj lub siab tus.​—1 Petus 5:6, 7.

7. Lanpaw cov lus pab tau koj li cas?

⁷ Yog peb thov Vajtswv thaum peb raug kev sim siab ces yuav pab tau peb muaj lub siab tus. Cia peb mus tham txog Lanpaw (Robert). Nws yog ib tug txwj laus uas twb muaj 80 tawm xyoo lawm. Nws hais tias: “Cov lus ntuas hauv Filipi 4:6, 7 pab tau kuv nyiaj dhau tej kev ntxhov siab uas kuv raug. Yav thaud kuv muaj teeb meem txog nyiaj txiag thiab kuv kuj tsis tau ua txwj laus tau ib ntus.” Dabtsi pab tau Lanpaw muaj lub siab tus? Nws hais tias: “Thaum twg kuv pib txhawj ces kuv thov Vajtswv. Kuv yimhuab thov Vajtswv kuv lub siab yimhuab tus.”

8. Raws li Yauhas 8:29, ib yam uas kuj ua rau Yexus muaj lub siab tus yog dabtsi?

⁸ Nyeem Yauhas 8:29. Thaum Yexus raug tsim txom, nws ua tau siab tus vim nws paub tias nws ua rau nws Leej Txiv zoo siab. Txawm nyuaj npaum li cas los nws yeej zoo siab hlo mloog nws Leej Txiv lus. Nws hlub nws Leej Txiv heev nws thiaj muab hlo nws lub neej los ua nws Leej Txiv tes haujlwm. Ua ntej Yexus los rau hauv ntiajteb, nws zoo ib yam li Vajtswv “tus Kws ua tsev.” Thaum nws nyob hauv ntiajteb no, nws kub siab lug qhia nws Leej Txiv rau lwm tus. (Mathai 6:9; Yauhas 5:17)  Tes haujlwm no ua rau Yexus zoo siab xyiv fab kawg li.​—Yauhas 4:34-36.

9. Vim li cas qhov uas peb rau siab ntso mus ua Vajtswv tes haujlwm ho pab tau peb muaj lub siab tus?

⁹ Peb xyaum tau Yexus thaum peb mloog Yehauvas lus thiab “ua tus Tswv tes haujlwm puv npo txhua lub sijhawm.” (1 Khaulee 15:58) Thaum peb “rau siab ntso qhia txoj xov zoo,” peb pom tias tej teeb meem uas peb raug kuj tsis loj ua luaj twg. (Tubtxib Tes Haujlwm 18:5) Cov tibneeg uas peb niaj hnub ntsib feem coob kuj muaj kev nyuaj siab hnyav tshaj peb. Tiamsis thaum lawv hlub Yehauvas thiab pib ua raws li nws tej lus qhuab qhia zuj zus pab tau lawv lub neej thiab ua rau lawv muaj kev zoo siab dua. Tej no ua rau peb hajyam tso siab rau Yehauvas tias nws yuav tsom kwm peb thiab, puas yog? Thaum peb tso siab plhuav rau Yehauvas, peb yuav muaj lub siab tus. Ib tug muam uas muaj kev nyuaj siab heev pom tias yeej muaj tseeb li no. Nws pheej xav tias nws tsis muaj nuj nqes dabtsi li tiamsis nws hais tias: “Thaum kuv rau siab ntso ua Vajtswv tes haujlwm, kuv yeej muaj lub siab tus thiab muaj kev zoo siab dua. Kuv pom tias thaum kuv mus qhia Vajlugkub, kuv nyob ze Yehauvas dua.”

10. Npleedam cov lus pab tau koj li cas?

¹⁰ Cia peb mus tham txog ib tug muam hu ua Npleedam (Brenda). Npleedam thiab nws tus ntxhais nkawd muaj ib tug mob loj heev. Npleedam nyob hauv laub lawm xwb, thiab nws tsis muaj ib lub zog li. Thaum nws mus taus, nws kuj mus qhia Vajlugkub ib lub qhov rooj rau ib lub thiab, tiamsis feem ntau nws sau ntawv qhia Vajlugkub xwb. Nws hais tias: “Thaum kuv pom tias tsis muaj dabtsi yuav kho tau kuv tus mob lawm, kuv thiaj tau hau ntsoov rau Vajtswv tes haujlwm lawm xwb. Vajtswv tes haujlwm pab tau kuv tsis niaj hnub txhawj txog kuv tus mob tiamsis pab tau kuv xav txog cov uas kuv ntsib thaum kuv mus qhia Vajlugkub thiab cov uas kuv sau ntawv rau. Vajtswv tes haujlwm kuj pab tau kuv xav ntsoov txog txojkev vam kev cia siab rau yav tom hauv ntej.”

11-13. (1) Yexus cov tubtxib thiab lwm tus tau ua ib tug zoo phoojywg rau Yexus li cas? (2) Yexus cov phoojywg pab tau nws li cas?

¹¹ Thaum Yexus ua Vajtswv tes haujlwm hauv ntiajteb no, yeej tsis yoojyim rau nws li tiamsis muaj nws cov tubtxib nrog nraim nws. Lawv ua raws nkaus li Paj Lug 18:24 tau hais no: “Muaj ib tug phoojywg uas sib raug zoo heev dua tej kwvtij txheeb.” Yexus suav tias tej phoojywg zoo li no muaj nqes heev. Thaum nws ua Vajtswv tes haujlwm, nws cov kwv uas yog niam txiv ib plab yug tsis muaj ib tug ntseeg nws li. (Yauhas 7:3-5) Lawv tseem xav tias nws vwm thiab. (Malakau 3:21) Tiamsis nws cov tubtxib tsis coj li ntawd. Hmo ua ntej Yexus tuag, nws thiaj hais rau lawv tias: “Nej yog cov uas nrog nraim kuv nyob rau thaum kuv raug sim siab txom nyem.”​—Luka 22:28.

¹² Muaj ntau zaus Yexus cov tubtxib coj tsis tau li nws siab xav, tiamsis nws tsis cim ntsoov tej ntawd, nws tsuas xam pom qhov uas lawv muaj kev ntseeg xwb. (Mathai 26:40; Malakau 10:13, 14; Yauhas 6:66-69) Hmo kawg uas Yexus nrog lawv ua ke, nws hais rau lawv tias: “Kuv hu nej ua kwvluag rau qhov txhua yam uas kuv tau hnov ntawm leej Txiv kuv twb qhia rau nej paub lawm.” (Yauhas 15:15) Yexus cov kwvluag yeej txhawb tau nws zog heev. Qhov uas lawv pab Yexus ua Vajtswv tes haujlwm yeej ua rau nws zoo siab xyiv fab kawg li.​—Luka 10:17, 21.

¹³ Yexus kuj muaj dua lwm cov kwvluag uas tsis yog nws cov tubtxib thiab. Lawv yog cov pojniam txivneej uas tau pab nws tshaj tawm  txoj xov zoo lossis tau pab nws rau lwm txojkev. Ib txhia qheb tsev rau Yexus mus so noj mov. (Luka 10:38-42; Yauhas 12:1, 2) Ib txhia nrog Yexus mus rau ub rau no thiab siv lawv tej nyiaj txiag qhov txhia chaw los pab nws. (Luka 8:3) Yexus muaj phoojywg zoo rau qhov nws yog ib tug zoo phoojywg. Nws ua zoo rau lawv thiab tsis tseev kom lawv ua tshaj li lawv ua tau. Yexus yog ib tug neeg zoo tiav log, tiamsis thaum nws cov phoojywg uas yog neeg txhaum txhawb nws, nws zoo siab heev. Yexus cov phoojywg kwvluag yog cov uas pab tau nws muaj lub siab tus.

14, 15. Yuav ua li cas peb thiaj muaj tej phoojywg zoo, thiab lawv pab tau peb li cas?

¹⁴ Tej phoojywg zoo pab tau peb muab siab npuab Yehauvas. Peb yuav tsum yog ib tug zoo phoojywg peb thiaj muaj tej phoojywg zoo. (Mathai 7:12) Phau Vajlugkub txhawb kom peb siv peb lub dag zog thiab lub sijhawm mus pab lwm tus, yimhuab pab “cov uas cheem tsum” kev pab. (Efexau 4:28) Koj puas paub ib tug hauv koj lub koom txoos uas cheem tsum kev pab? Koj puas kam mus kav kiab kav khw rau tus uas mus tsis taus qhovtwg? Koj puas kam pub ib pluag rau yim uas tu pluas noj? Yog koj paub siv jw.org^® thiab JW Library^® koj puas kam pab lwm tus hauv koj lub koom txoos kom lawv paub mus tshawb nrhiav tej lus nyiaj lus kub nyob rau hauv thiab? Yog peb rau siab ntso nqes tes pab lwm tus ces peb yuav muaj kev zoo siab xyiv fab dua.​—Tubtxib Tes Haujlwm 20:35.

¹⁵ Tej phoojywg zoo txhawb tau peb lub zog thaum peb raug kev sim siab thiab pab tau peb muaj lub siab tus. Peb cov phoojywg yeej ua  siab ntev mloog peb thaum peb piav peb tej kev txhawj xeeb rau lawv. Lawv zoo ib yam li Elihu uas ua tib zoo mloog Yauj piav nws tej kev nyuaj siab. (Yauj 32:4) Peb yuav tsum tsis txhob kom lawv txiav txim siab rau peb, tiamsis thaum lawv siv tej nqe Vajlugkub los qhuab ntuas peb zoo rau peb mloog lawv hais. (Paj Lug 15:22) Tsis tas li ntawd xwb, peb yuav tau txo hwjchim cia peb cov phoojywg pab peb ib yam li Vajntxwv Davi tau txo hlo hwjchim cia nws cov phoojywg pab nws. (2 Xamuyee 17:27-29) Tej phoojywg zoo yeej yog Yehauvas pub los rau peb tiag.​—Yakaunpau 1:17.

16. Raws li Filipi 4:6, 7, yuav ua li cas peb thiaj muaj tau Vajtswv lub siab tus? Piav seb.

¹⁶ Nyeem Filipi 4:6, 7. Ua li cas Yehauvas ho hais tias peb muaj tau nws lub siab tus “rau hauv Yexus Khetos”? Rau qhov peb yuav tsum to taub Yexus Khetos tes haujlwm thiab ntseeg nws peb thiaj muaj tau Vajtswv lub siab tus. Xws li, (1) Yexus tus nqe txhiv. Vim muaj tus nqe txhiv, Vajtswv thiaj daws tau peb tej kev txhaum mus. (1 Yauhas 2:12) Qhov no yeej ua rau peb muaj kev kaj siab, puas yog? Tsis tas li ntawd xwb, (2) Yexus yog tus Vajntxwv uas kav Vajtswv lub Nceeg Vaj, nws yuav kho txhua yam kev nyuaj siab ntxhov plawv uas Xatas thiab nws lub qab ntuj tau ua los raug peb. (Yaxaya 65:17; 1 Yauhas 3:8; Qhia Tshwm 21:3, 4) Qhov no ua rau peb muaj kev vam kev cia siab. Thiab (3) txawm tes haujlwm Yexus muab rau peb ua tsis yoojyim los, nws yeej nrog nraim peb thiab txhawb kom peb ua tau tes haujlwm ntawd tiav. (Mathai 28:19, 20) Qhov no kuj pab tau peb muaj lub siab loj siab tuab! Yog peb muaj kev kaj siab, kev vam kev cia siab, thiab lub siab loj siab tuab lawd ces peb yuav muaj lub siab tus.

17. (1) Ib tug Khixatia yuav tau ua li cas nws thiaj muaj lub siab tus mus li? (2) Yexus cog lus hauv Yauhas 16:33 tias peb yeej yuav ua tau dabtsi?

¹⁷ Thaum koj raug kev sim siab hnyav, yuav ua li cas koj thiaj muaj tau lub siab tus? Yog koj xyaum Yexus ces koj yeej yuav muaj tau lub siab tus. Xyaum Yexus li no: (1) Thov Vajtswv tsis tu ncua, (2) mloog Vajtswv lus thiab kub siab lug tshaj tawm, txawm yuav nyuaj npaum li cas los xij, thiab (3) cia koj tej phoojywg kwvluag pab koj thev kev txom nyem. Yog koj ua li no ces koj yuav muaj Vajtswv txojkev siab tus. Thaum kawg koj yuav kov yeej tej kev sim siab ib yam li Yexus.​—Nyeem Yauhas 16:33.