Vim li cas ua ntej Yexus tuag nws thiaj hais Daviv cov lus hauv Phau Ntawv Nkauj 22:1?

Ua ntej Yexus tuag, nws hais hauv Mathais 27:46 tias: “Kuv tus Vajtswv! Kuv tus Vajtswv! Ua li cas koj tso kuv tseg lawm?” Qhov Yexus hais no muaj tiav li Daviv cov lus hauv Phau Ntawv Nkauj 22:1. (Malakaus 15:34) Peb tsis txhob xav yuam kev tias Yexus hais li no vim nws tag kev cia siab rau Yehauvas lossis nws poob kev ntseeg lawm. Yexus yeej zoo siab hlo tuag thiab paub zoo tias yog vim li cas nws yuav tsum raug luag tua. (Mathais 16:21; 20:28) Yexus kuj paub tias lub sijhawm uas luag yuav muab nws tua no Yehauvas yuav tsis “xov laj kab” tiv thaiv nws. (Yauj 1:10, TT ) Yehauvas tsis tiv thaiv Yexus kom Yexus ua tau pov thawj tias txawm nws yuav raug kev tsim txom hnyav npaum li cas ua ntej nws tuag los nws yeej muab siab npuab rawv Yehauvas.​—Malakaus 14:35, 36.

Yog li ntawd, vim li cas Yexus ho hais cov lus hauv Phau Ntawv Nkauj 22:1? Txawm peb tsis paub tseeb tias yog vim li cas tiag los cia peb tham seb ntxim yog li cas. *

Tej zaum qhov uas Yexus hais cov lus no los twb yog nws xav qhia rau peb paub tias txawm Yehauvas tsis pab nws los nws yeej yuav tuag theej peb lub txhoj. Yexus yog neeg ib yam li peb thiab paub tias nws yuav tsum raug luag tua, xwv nws thiaj li “tuag theej sawvdaws lub txhoj.”​—Henplais 2:9.

Qhov uas Yexus hais cov lus hauv Phau Ntawv Nkauj 22:1, puas yog nws xav kom peb xav txog tag nrho cov lus hauv Phau Ntawv  Nkauj 22? Thaum ub cov neeg Yudas yeej nyiam hais thiab cim cov lus hauv Phau Ntawv Nkauj. Yog li ntawd, txawm Yexus hais ib nqi xwb los tej zaum yeej ua rau cov uas hnov nws nco txog zaj ntawv nkauj no. Yog hais tias Yexus xav li no ces tej zaum kuj yog nws txhob txwm hais kom cov neeg Yudas nco txog cov lus faj lem hauv zaj nkauj no uas sau txog tej xwm txheej uas yuav muaj tshwm sim rau lub caij nyoog uas nws yuav tuag. (Phau Ntawv Nkauj 22:7, 8, 15, 16, 18, 24) Tsis tas li ntawd xwb, Phau Ntawv Nkauj 22 qhuas Yehauvas thiab xaus lus tias Yehauvas yog tus Vajntxwv kav txhua haiv neeg hauv lub qab ntuj no.​—Phau Ntawv Nkauj 22:27-31.

Qhov uas Yexus hais Daviv cov lus no puas yog Yexus hais tias nws tsis tau ua txhaum dabtsi li? Ua ntej nws tuag, luag coj Yexus mus hais plaub thiab txiav txim tias nws txhaum vim nws hais lus saib tsis taus Vajtswv. (Mathais 26:65, 66) Lawv muab rooj plaub no hais tsuag tsuag tsis raws kev raws cai thaum twb tsaus ntuj thiab lig lig lawm. (Mathais 26:59; Malakaus 14:56-59) Thaum Yexus nug tias, “Kuv tus Vajtswv, kuv tus Vajtswv, vim li cas koj tso kuv tseg lawm?” tej zaum kuj yog nws xav kom sawvdaws paub tias nws tsis tau ua dabtsi txhaum uas tsim nyog raug lub txim tuag.

Puas yog Yexus xav qhia rau sawvdaws tias thaum Yehauvas cia Daviv, tus uas sau zaj nkauj no, raug kev txom nyem tsis yog vim Yehauvas tsis txaus siab rau nws lawm? Daviv cov lus nug no tsis txhais tias nws tsis ntseeg Vajtswv rau qhov Vajtswv yeej tseem nrog nraim thiab foom koob hmoov rau Daviv. Thiab Daviv cov lus tom qab ntawd qhia tias nws yeej tso siab tias Yehauvas yuav cawm tau nws haiv neeg. (Phau Ntawv Nkauj 22:23, 24, 27) Ib yam li ntawd, txawm Yexus uas yog “Daviv tus Tub” raug tsim txom dai saum tus ncej ntoo los tsis txhais tias Yehauvas tsis txaus siab rau Yexus.​—Mathais 21:9.

Puas yog Yexus tu siab heev rau qhov Yehauvas tsis tiv thaiv nws thiab cia nws tuag ua pov thawj tias nws yeej muab siab npuab Yehauvas tiag? Qhov uas Yehauvas cia nws tus Tub los raug kev tsim txom thiab kev tuag tsis yog Yehauvas lub hom phiaj thaum xub thawj. Twb yog tom qab Adas thiab Eva nkawd ntxeev siab rau Yehauvas, Yehauvas mam npaj kom muaj li ntawd. Yexus tsis tau ua ib qho txhaum li tiamsis nws yuav tsum los raug kev tsim txom thiab kev tuag xwv nws thiaj li teb tau Xatas tej lus iab liam thiab txhiv tau tej uas Adas ua poob lawm rov qab los. (Malakaus 8:31; 1 Petus 2:21-24) Yuav kom muaj tiav li no, Yehauvas yuav tsum txhob tiv thaiv nws tus Tub ib nyuag pliag. Zaum no yog thawj zaug uas Yehauvas ua li no rau nws tus Tub.

Puas yog Yexus xav kom nws cov thwjtim muab nws txojkev tuag coj los xav tias yog vim li cas Yehauvas thiaj cia nws tuag saum tus ncej ntoo? * Yexus paub tias qhov uas nws tuag li tus neeg txhaum saum tus ncej ntoo yuav ua rau coob tus poob kev ntseeg. (1 Kauleethaus 1:23) Tiamsis yog nws cov thwjtim paub tias yog vim li cas tiag ces lawv yeej yuav paub tias tseem ceeb npaum li cas uas nws yuav tsum tuag li ntawd. (Kalatias 3:13, 14) Thiab lawv yuav pom tias nws yog lawv tus Cawm Seej, tsis yog ib tug neeg txhaum.

Txawm yog vim li cas Yexus thiaj hais cov lus no los Yexus yeej paub tias qhov uas nws tuag saum tus ncej ntoo yog nws ua li Yehauvas lub siab nyiam. Thaum Yexus hais cov lus hauv Phau Ntawv Nkauj 22:1 tag ces nws hais tias: “Tiav lawm lauj!” (Yauhas 19:30; Lukas 22:37) Qhov uas Yehauvas tsis tiv thaiv Yexus ib pliag ntawd pab tau Yexus ua tiav raws li Yehauvas xa nws los ua hauv ntiajteb thiab kom nws ua tau tiav raws li “txhua yam uas Mauxes hais thiab tej uas cov cev Vajtswv lus sau tseg rau hauv Phau Ntawv Nkauj.”​—Lukas 24:44.