1-2. Thaum peb lub neej hloov tsis zoo li qub lawm, ua li cas peb mam li nkag siab qho nqe Vajlugkub?

 THAUM ib khub txij nkawm twg sib sau los ua neej, yeej muaj ib tug txwj laus muab Vajtswv Txoj Lus los ntuas nkawv ua neej. Muaj ntau zaus nkawv yeej hnov cov nqe Vajlugkub no dua lawm. Tiam sis zaum no cov nqe Vajlugkub muaj nuj nqis heev rau nkawv yeeb vim yog nkawv ob leeg yuav tau coj raws li ntawd thaum sib sau los ua neej.

² Ua ntej ib khub txij nkawm twg yuav muaj me tub me nyuam, nkawv yeej hnov tej lus qhuab qhia txog tu tub tu kiv. Tiam sis thaum nkawv pib muaj me nyuam lawd, nkawv mam li nkag siab tej nqe Vajlugkub tias tseem ceeb npaum li cas. Thaum peb lub neej hloov tsis zoo li qub lawm ces qho nqe Vajlugkub yeej muaj nuj nqis dua rau peb. Yog li ntawd, cov uas teev tiam Yehauvas thiaj li nyeem Vajtswv Txoj Lus tuj taws thiab muab coj los xav “mus tas nws simneej” yam nkaus li cov Ixayees tej vaj ntxwv puag txheej thaum ub.​—2 Kevcai 17:19.

3. Nyob rau hauv zaj kawm no yuav piav txog dab tsi?

³ Cov niam txiv, nej txhua leej txhua tus muaj rab peev xwm tau los cob qhia nej cov me nyuam kom paub Yehauvas. Tiam sis tsis yog nej cob qhia lawv kom paub Yehauvas xwb, nej yuav tau qhia kom nej cov me nyuam nrog Yehauvas sib raug zoo. Nyob hauv zaj kawm no, yuav piav txog plaub lub hauv paus ntsiab lus hauv phau Vajlugkub los pab kom nej cob qhia tau nej cov me nyuam nrog Yehauvas sib raug zoo. (2 Timautes  3:16) Tsis tas li ntawd, seb cov niam txiv uas ntseeg Yehauvas ho khaws tau cov hauv paus ntsiab lus hauv phau Vajlugkub li cas.

4. Ib lub hauv paus ntsiab lus uas pab tau cov niam txiv yog li cas? (Yakaunpaus 1:5)

⁴ Thawj lub hauv paus ntsiab lus: Vam khom Yehauvas pab. Thov Yehauvas pab nej tuav tswv yim kom nej txawj cob qhia nej cov me nyuam nrog nws sib raug zoo. (Nyeem Yakaunpaus 1:5.) Yehauvas thiaj yog tus tsim nyog tsav tswv yim rau cov niam txiv vim hais tias (1) Yehauvas ib txwm muaj nyob nws yeej paub txoj kev ua niam ua txiv zoo dua, thiab (2) nws tej tswv yim puav leej tsav tau peb lub neej.​—Phau Ntawv Nkauj 36:9; Yaxayas 48:17.

5. (1) Yehauvas lub koom haum muaj dab tsi los pab cov niam txiv? (2) Raws li zaj yeeb yaj kiab, koj khaws tau li cas los ntawm Kwvtij Amaulis (Amorim) nkawv ob niam txiv cob qhia nkawv cov me nyuam?

⁵ Yehauvas muab ntau yam sau rau hauv phau Vajlugkub thiab siv nws lub koom haum tso tawm ntau yam los pab cov niam txiv cob qhia lawv cov me nyuam. (Mathais 24:45) Xws li, yav thaum ub peb muab tej zaj “Kev Pab Lub Cuab Lub Yig” no sau rau hauv phau Tsim Dheev! tiam sis niam no peb muab tso rau hauv lub vej xaij lawm. Tsis tas li ntawd, nyob rau hauv lub vej xaij jw.org/hmn muaj ntau zaj yeeb yaj kiab los pab cov niam txiv cob qhia lawv tej me nyuam txog Yehauvas. *​—Pajlug 2:4-6.

6. Muaj ib tug txiv tsev xav li cas txog tej Yehauvas lub koom haum tso tawm los pab nkawv ob niam txiv cob qhia me nyuam?

⁶ Muaj coob leej ntau tus niam txiv txaus siab heev thaum Yehauvas siv nws lub koom haum tso tawm ntau yam los pab lawv cob qhia me nyuam. Muaj ib tug txiv tsev npe hu ua Ntsaus (Joe) hais tias: “Cob qhia peb tug me nyuam kom paub Yehauvas mas yeej tsis yooj yim kiag li. Kuv poj niam wb thov Yehauvas tas zaj tas zog kom pab wb. Thaum wb xav tau kev pab wb cov me nyuam mus rau ib seem twg mas yeej muaj ib zaj kawm los sis ib zaj yeeb yaj kiab tawm raws caij raws nyoog kawg li. Wb tso siab rau Yehauvas ua tus pab wb nkaus nkaus xwb.” Raws li hais no, Ntsaus thiab nws poj niam nkawv yeej pom tias tej  zaj kawm thiab tej yeeb yaj kiab yeej pab tau nkawv cov me nyuam nrog Yehauvas sib raug zoo tiag tiag li.

7. Ua li cas ho tseem ceeb rau cov niam txiv tso yam ntxwv zoo rau tej me nyuam xyaum? (Loos 2:21)

⁷ Lub hauv paus ntsiab lus ob: Coj yam ntxwv zoo. Me nyuam pom niam txiv coj li cas, me nyuam coj li ntawd. Txawm cov niam txiv ua tsis tau txhua yam zoo los lawv yuav tau xyaum tso tej yam ntxwv zoo rau lawv cov me nyuam xyaum. (Loos 3:23; nyeem Loos 2:21.) Muaj ib leeg txiv hais txog tej me nyuam li no: “Lawv zoo li tej xwb kuab uas nqus dej. Yog peb tsis ua raws li peb hais ces lawv yeej yuav hais peb.” Yog li ntawd, yog peb xav kom peb cov me nyuam txoj kev sib raug zoo nrog Yehauvas ruaj khov ces lawv yuav tsum pom tias peb txoj kev sib raug zoo nrog Yehauvas ruaj khov tso.

8-9. Koj khaws tau li cas los ntawm Anrus thiab Emas nkawv?

⁸ Muaj ntau ntau txoj hau kev uas cov niam txiv cob qhia lawv tej me nyuam kom nrog Yehauvas sib raug zoo. Muaj ib tug kwv tij npe hu ua Anrus (Andrew) uas muaj 17 xyoo tau hais li no: “Kuv niam thiab kuv txiv nkawv qhia kom peb nco ntsoov thov Yehauvas. Txawm kuv twb thov Vajtswv tag lawm los, kuv txiv haj tseem los nrog kuv thov thiab. Kuv niam thiab kuv txiv nkawv ib txwm hais rau wb ob tug me nyuam tias: ‘Neb thov Yehauvas txhua lub sij hawm los yeej tau.’ Vim nkawv qhia li no, kuv thiaj li tsis ntshai thov Yehauvas thiab kuv xam pom tias Yehauvas suav tam li ib Leeg Txi uas hlub kuv kawg nkaus li.” Yog li ntawd cov niam txiv, nej txoj kev sib raug zoo nrog Yehauvas yeej pab tau nej cov me nyuam kom nrog Yehauvas sib raug zoo thiab.

⁹ Zaum no, cia peb ho mus tham txog ib tug ntxhais npe hu ua Emas (Emma). Thaum nws txiv muab lawv cov niam tub tso pov tseg ua ntsuag ciaj, lawv txiv haj tseem tso tag nrho tej nuj nqis rau lawv cov niam tub them. Emas hais tias: “Muaj tej thaud, kuv niam yeej tsis muaj ib npib ib xus los siv. Tiam sis kuv niam hais tias kom tso siab rau Yehauvas, nws yeej yuav saib xyuas nws cov tib neeg. Kuv yeej pom tias kuv niam yeej tos ntsoov Yehauvas yam li ntawd. Kuv niam tau hais li cas lawm, kuv niam yeej ua li ntawd.” Yog li ntawd, nyob rau hauv lub neej yuav nyuaj npaum li cas los tej niam tej txiv yeej tso tau yam ntxwv rau cov me nyuam tau xyaum.​—Kalatias 6:9.

10. Lub sij hawm twg zoo rau cov Ixayees uas yog niam thiab txiv qhia Yehauvas rau lawv tej me tub me nyuam? (2 Kevcai 6:6, 7)

¹⁰ Lub hauv paus ntsiab lus peb: Sib txuas lus nrog nej tej me nyuam tsis so. Yehauvas sam hwm rau cov Ixayees puag txheej thaum ub tias kom nco ntsoov qhia nws rau lawv tej me tub me nyuam. (Nyeem 2 Kevcai 6:6, 7.) Cov niam txiv nyob rau lub caij ntawd yeej muaj ntau lub caij nyoog thawm hnub qhia lawv cov me nyuam kom nrog Yehauvas sib raug zoo. Xws li thaum cov tub nrog leej txiv cog los sis sau qoob loo thawm hnub ua ke. Los sis tus ntxhais nrog leej niam ua maj ua ntuag, xaws tsoos tsho hnav thiab lwm yam hauj lwm ua hauv vaj hauv tsev. Thaum tej niam tej txiv thiab tej me tub me nyuam ua hauj lwm li no ua ke, lawv yeej sib txuas lus ntau yam. Muab piv txwv tias lawv tham txog Yehauvas zoo npaum li cas thiab nws pab tau lawv tsev neeg npaum li cas.

11. Lub caij lub nyoog twg zoo rau cov niam txiv niaj hnub niam no sib txuas lus nrog lawv cov me nyuam?

¹¹ Lub neej niaj hnub niam no txawv lub neej yav ntuj qub qab puag thaum ub. Muaj  ntau lub teb chaws, cov niam txiv thiab tej me nyuam yeej tsis sib pom thawm hnub vim cov niam txiv pheej mus ua hauj lwm hos tej me nyuam mus kawm ntawv. Yog li ntawd, cov niam txiv yuav tau lauj sij hawm los sib txuas lus nrog lawv tej me nyuam. (Efexus 5:15, 16; Filipis 1:10) Hnub tsev neeg pe hawm Vajtswv ua ke yog ib lub sij hawm zoo rau tej me nyuam thiab niam txiv sib txuas lus. Muaj ib tug kwv tij hluas npe hu ua Alexadaws (Alexander) hais tias: “Kuv txiv yeej npaj ntshis rau peb tsev neeg kawm Vajtswv ua ke thiab nws yeej tsis pub ib yam dab tsi los tab kaum peb rau thaum ntawd. Tom qab peb kawm tag ces peb nyob sib txuas lus ua ke.”

12. Hnub tsev neeg kawm Vajlugkub ua ke, tus coj yuav tsum nco ntsoov li cas?

¹² Hnub tsev neeg kawm Vajlugkub ua ke, tus coj yuav tau qhia li cas xwv tej me nyuam thiaj li nyiam? Siv phau ntawv nyuam qhuav tawm tshiab Nyob Kaj Siab Lug Mus Ib Txhis los qhia cov me nyuam los yeej tau. Phau ntawv no yuav pab tau kom cov niam cov txiv nrog lawv tej me nyuam sib txuas lus ua ke. Lub sij hawm no zoo rau cov niam txiv ua zoo mloog kom lawv tej me nyuam thiaj qhib siab rau lawv. Lub caij lub nyoog no tsis yog los mus ntuas thiab cem tej me nyuam. Yog tej me nyuam hais tau ib qho twg tsis raws li phau Vajlugkub los tsis txhob cem ua npau taws vog. Tsis tas li ntawd, cia li zoo siab tias nej tej me nyuam qhib siab lug los qhia rau nej seb lawv xav li cas. Yog nej paub tej nyob nraim nkoos hauv nej tej me nyuam nruab siab ces nej yuav pab tau lawv zoo dua.

13. Lub sij hawm twg zoo rau cov niam txiv pab kom lawv cov me nyuam nrog Yehauvas sib raug zoo?

¹³ Cov niam txiv yuav tau nrhiav caij nrhiav nyoog los qhia lawv cov me nyuam thawm hnub kom nrog Yehauvas sib raug zoo. Nej tsis tas yuav tos kom txog hnub nej qhia Vajlugkub rau nej cov me nyuam es mam li qhia Yehauvas rau lawv. Muaj ib leej niam uas npe hu ua Livxam (Lisa) hais tias: “Wb ob niam txiv siv tej uas Yehauvas tsim ib ncig los qhia wb cov me nyuam txog Yehauvas. Xws li thaum peb tus dev ua tej yam twg es txaus txaus luag, wb qhia rau wb cov me nyuam tias  qhov no qhia tau tias Yehauvas yog ib tug Vajtswv uas nyiam kev zoo siab thiab nws xav kom peb muaj kev zoo siab.”

14. Vim li cas zoo rau cov niam txiv pab nrog lawv cov me nyuam xaiv lawv tej npoj? (Pajlug 13:20)

¹⁴ Lub hauv paus ntsiab lus plaub: Pab nej cov me nyuam xaiv lawv tej npoj. Nyob rau hauv Vajtswv Txoj Lus qhia meej tseeb tias cov neeg peb nrog yeej txw tau peb ua qhov zoo los sis qhov phem. (Nyeem Pajlug 13:20.) Yog li ntawd cov niam txiv, nej puas paub tej neeg nej cov me nyuam nrog ua ke? Nej puas tau ntsib lawv dua thiab nrog lawv sib txuas lus ua ke? Nej yuav ua li cas thiaj pab tau nej cov me nyuam nrog cov muaj kev sib raug zoo nrog Yehauvas ua ke? (1 Kauleethaus 15:33) Tsis txhob ua siab deb, kav tsij caw tej tug muaj kev sib raug zoo nrog Yehauvas tuaj nrog nej thiab nej cov me nyuam nyob ua ub ua no.​—Phau Ntawv Nkauj 119:63.

15. Cov niam txiv ua tau li cas los pab cov me nyuam kom nrog tau tej neeg zoo ua ke?

¹⁵ Muaj ib tug txiv tsev npe hu ua Thoonis (Tony) tau hais tias nws thiab nws poj niam nkawv tau ua li cas los pab nkawv cov me nyuam kom nrog tau cov neeg zoo. Nws hais tias: “Tau ntau ntau lub xyoos dhau los lawm, kuv thiab kuv poj niam wb tau caw cov kwv tij nkauj muam, tus hlob tus yau tuaj nrog peb tsev neeg noj mov thiab kawm Vajlugkub ua ke. Thaum wb caw yam li no yog ib txoj hau kev los paub cov uas kub siab lug teev tiam Yehauvas. Wb kuj qhib tsev rau cov saib xyuas thaj tsam, cov tshaj tawm txawv teb chaws, thiab lwm cov ntseeg tuaj so. Wb cov me nyuam khaws tau ntau ntau yam los ntawm tej lawv qhia txog, tes hauj lwm uas lawv ua rau Yehauvas, thiab kub siab lug mus tshaj tawm. Tej yam lawv qhia no txhawb tau wb cov me nyuam txoj kev sib raug zoo nrog Yehauvas heev.” Yog li ntawd cov niam txiv, kav tsij kub siab lug txhawb nej cov me nyuam kom ncawg tau cov neeg zoo.

16. Yog hais tias koj tus me nyuam tsis kam teev tiam Yehauvas, koj yuav ua li cas?

¹⁶ Txawm koj ua npaum li koj ua tau los, yog koj tus me nyuam tsis kam teev tiam Yehauvas,  koj yuav ua li cas? Nco ntsoov tias tsis yog tim koj. Yehauvas yeej tso cai rau koj thiab koj tus me nyuam xaiv seb yuav teev tiam nws los tsis teev tiam. Yog koj tus me nyuam ho txiav txim siab tso Yehauvas tseg lawm, tsis txhob tag kev cia siab. Muaj ib hnub twg nyaj nws yuav rov qab los yam nkaus li zaj lus piv txwv txog tus tub loj leeb. (Lukas 15:11-19, 22-24) Tus tub hluas no ua ntau tsav ntau yam phem tiam sis tom qab no nws kuj hloov tig rov qab los. Muaj ib txhia yuav xav tias: “Zaj ntawd tsuas yog dab neeg xwb, yeej tsis muaj tseeb.” Txhob rawm maj tag kev cia siab. Muaj ib tug tub hluas npe hu ua Elis (Elie) twb rov los ib yam li ntawd lawm.

17. Elis txhawb tau koj li cas?

¹⁷ Elis piav li no txog nws niam thiab nws txiv: “Nkawv yeej ua npaum li nkawv ua tau los txhawb kuv kom nrog Yehauvas sib raug zoo thiab kom kuv nyeem phau Vajlugkub. Tiam sis thaum kuv muaj 15 xyoos, kuv tsis mloog nkawv hais li.” Yog li ntawd, Elis thiaj ua ywj siab thiab tsis mloog nws niam nws txiv hais. Tom qab nws ncaim nws niam nws txiv mus nyob dua ib qho lawm, nws txawm mus ua dog ua dig. Muaj qee lub sij hawm nws thiab nws ib tug phooj ywg kwv luag txawm tham txog Vajlugkub ua ke. Elis hais tias: “Kuv yim tham txog Yehauvas rau kuv ib tug npawg mas kuv yim xav txog Yehauvas. Tej yam uas kuv niam thiab kuv txiv nkawv qhia rau kuv txawm nthaw kaus thiab hlob zuj zus ib yam li tej nroj tsuag.” Ntev mus ntev tuaj, Elis kuj rov qab los ntseeg Yehauvas lawm. Ntshe Elis niam thiab txiv zoo siab kawg nkaus li tias nkawv cob qhia Elis thaum nws tseem yau kom nrog Yehauvas sib raug zoo.​—2 Timautes 3:14, 15.

18. Koj xav li cas thaum pom cov niam txiv uas sib zog ntsos cob qhia lawv cov me nyuam kom nrog Yehauvas sib raug zoo?

¹⁸ Yehauvas tau muab txoj kev cob qhia me tub me nyuam kom paub txog nws rau leej niam thiab leej txiv. (Phau Ntawv Nkauj 78:4-6) Peb qhuas cov niam cov txiv uas cob qhia lawv tej me tub me nyuam kawg nkaus li vim lub nra no tsis yooj yim ev. Yehauvas yeej txaus siab kawg rau cov niam cov txiv thaum lawv ua npaum li lawv ua tau los cob qhia lawv cov me nyuam kom nrog Yehauvas sib raug zoo thiab mloog nws lus.​—Efexus 6:4.