1. Noob neej nyias yuav tau txiav txim siab li cas rau nyias?

 NIAJ hnub niam no tib neeg nyias yuav tau txiav txim siab rau nyias seb yuav txhawb nqa Yehauvas txoj kev kav los sis Xatas txoj kev kav. Txoj kev txiav txim siab zaum no nyias yuav tau xaiv tuaj ib tug twg tog tsis pub nyob nruab nrab. Peb txiav txim siab li cas, peb lub neej pem suab yuav mus raws li ntawd. (Mathais 25:31-33, 46) Nyob rau lub sij hawm muaj “kev txom nyem loj kawg nkaus,” nyias taus nyias yuav muaj ib lub cim tias dim los sis raug puas tsuaj.​—Tshwmsim 7:14; 14:9-11; Exekees 9:4, 6.

2. (1) Raws li Henplais 10:35-39, txhawb tias kom peb ua dab tsi? (2) Yog peb nyeem phau Tshwmsim, yuav pab tau peb li cas?

² Nyeem Henplais 10:35-39. Peb txiav txim siab tau qhov zoo lawm yog peb xaiv Yehauvas txoj kev kav. Yog li ntawd, peb yuav tau cev tes mus pab tej tug uas tseem tsis tau txiav txim siab. Peb siv tau tej lus nyob hauv phau Tshwmsim mus pab kom lawv thiaj paub tias cov tawm tsam Yehauvas txoj kev kav yuav raug li cas thiab cov xaiv tuaj Yehauvas sab yuav saws li cas. Peb tsis yog muab mus pab lwm tus xwb tiam sis peb yuav tau kawm kom peb nkag siab zoo zoo xwv thiaj li yuav tsav tau peb txoj kev ntseeg kom ruaj khov khwb kho. Txuas ntxiv ntawd, peb thiaj yuav txhawb tau lwm tus teev tiam Yehauvas kam tiag.

3. Nyob rau hauv zaj kawm no yuav piav txog dab tsi?

³ Peb yuav mus piav txog cov lus nug no nyob rau hauv zaj kawm no: Cov uas txhawb Vajtswv txoj kev kav yuav tau txais dab tsi? Ua li yuav muaj li cas rau cov uas txhawb nqa tus tsiaj liab ploog hauv phau Tshwmsim?

4. Tus tub txib Yauhas pom pawg twg nrog Yexus saum ntuj ceeb tsheej?

⁴ Nyob rau hauv tus tub txib Yauhas zaj yog toog, nws pom ob pawg uas txhawb nqa Yehauvas txoj kev kav tau txais txoj sia ntev dhawv mus ib txhis. Thawj pawg muaj 144,000 leej. (Tshwmsim 7:4) Pawg no yog saws hauv ntiaj teb mus nrog Yexus ua nom ua tswv saum ntuj ceeb tsheej. (Tshwmsim 5:9, 10; 14:3, 4) Nyob hauv zaj yog toog, Yauhas pom lawv sawv nrog Yexus saum lub Roob Xi-oos.​—Tshwmsim 14:1.

5. Yuav muaj li cas rau cov xaiv tseg uas tseem nyob hauv ntiajteb tsis ntev tom ntej no?

⁵ Txij ntua thaum cov tub txib lub sij hawm los txog tav no, muaj txhiab txhiab leej tib neeg tau xaiv mus ua cov 144,000 leej. (Lukas 12:32; Loos 8:17) Yauhas sau tseg hais tias nyob rau lub sij hawm kawg, yuav tshuav cov xaiv tseg qho leej tseem ua neej nyob hauv ntiaj teb no lawm xwb. Cov xaiv tseg uas “tseem muaj nyob” no yuav tau Yehauvas “lub homthawj” nias rau lawv ua ntej lub sij hawm muaj kev txom nyem loj kawg nkaus pib. (Tshwmsim 7:2, 3; 12:17) Nyob rau ncua sij hawm kev txom nyem loj kawg nkaus no, cov xaiv tseg uas tseem muaj nyob yuav tau mus saum ntuj kom txwm 144,000 leej. Lawv yuav nrog Yexus kav Vajtswv lub Nceeg Vaj.​—Mathais 24:31; Tshwmsim 5:9, 10.

6-7. (1) Yauhas pom pawg twg ntxiv, thiab lawv cov no yog leej twg? (2) Ua li cas cov xaiv tseg thiab cov “neeg coob coob suav tsis txheeb” ho xav paub txog Tshwmsim tshooj 7?

⁶ Tom qab Yauhas pom cov 144,000 leej, nws txawm pom cov “neeg coob coob suav tsis txheeb.” Cov neeg Yauhas pom no suav tsis tau tias muaj pes tsawg leej. (Tshwmsim 7:9, 10) Ua li lawv cov no yog leej twg? Yauhas hais tias: “Cov neeg ntawd yog cov uas twb tiv dhau tej kev tsimtxom uas loj heev los lawm. Lawv twb muab tus menyuam Yaj cov ntshav ntxhua lawv tej ris tsho thiab ntxuav lawv dawbhuv lawm.” (Tshwmsim 7:14) Cov “neeg coob coob suav tsis txheeb” uas dim lub sij hawm muaj kev txom nyem loj kawg nkaus yuav nyob kaj siab lug tso siab plhuav hauv ntiaj teb no.​—Phau Ntawv Nkauj 37:9-11, 27-29; Pajlug 2:21, 22; Tshwmsim 7:16, 17.

⁷ Txawm peb yuav mus saum ntuj ceeb tsheej los sis nyob hauv ntiaj teb no, peb yeej yuav pom Tshwmsim tshooj 7 xaus mus li cas. Nyob rau lub sij hawm no, Vajtswv cov tib neeg tsis hais pab mus saum ntuj ceeb tsheej los sis pab nyob hauv ntiaj teb yuav muaj kev zoo siab heev. Peb yuav tsis xav txog lig tias peb tuaj Yehauvas sab. Phau Tshwmsim qhia li cas ntxiv txog lub sij hawm muaj kev txom nyem loj kawg nkaus?​—Mathais 24:21.

8. Lub sij hawm muaj kev txom nyem loj kawg nkaus pib li cas thiab tej neeg feem coob yuav coj li cas?

⁸ Raws li zaj kawm tag los lawm, tej nom tswv yuav sawv tawm tsam lub nroog Npanpiloos uas loj dua ntais los sis yog kev ntseeg cuav. (Tshwmsim 17:16, 17) Thaum muaj tej no tshwm sim ces twb yog lub sij hawm muaj kev txom nyem loj kawg nkaus pib lawm. Nyob rau ncua sij hawm no, tib neeg yuav tsis los sis laub sis lug los teev tiam Yehauvas. Nyob hauv Tshwmsim tshooj 6 hais tias tib neeg yuav mus nrhiav chaw nkaum ntawm tej nom tswv thiab tej tub lag tub luam yam li lawv khiav mus nkaum rau saum tej roob. Vim cov neeg no tsis txhawb nqa Yehauvas txoj kev kav, Yehauvas suav tias lawv tawm tsam nws.​—Lukas 11:23; Tshwmsim 6:15-17.

9. Yehauvas cov tib neeg yuav txawv ntawm lwm cov tib neeg li cas nyob rau lub sij hawm muaj kev txom nyem loj kawg nkaus, thiab yuav muaj li cas rau lawv?

 ⁹ Nyob rau lub sij hawm muaj kev txom nyem loj kawg nkaus, Yehauvas cov tib neeg yuav zoo tsis thooj li lwm cov. Lawv yuav txhawb nqa Yehauvas txoj kev kav thiab tsis kam txhawb nqa “tus tsiaj.” (Tshwmsim 13:14-17) Txoj kev cov nyom zaum no yuav ua rau cov tawm tsam Yehauvas chim heev. Yog li ntawd, ib tsoom teb chaws yuav sau nthwv tuaj tawm tsam Yehauvas cov tib neeg thoob plaws ntiaj teb no. Phau Vajlugkub qhia hais tias txoj kev tawm tsam no yog Nkos hauv tebchaws Mankos tawm tsam.​—Exekees 38:14-16.

10. Raws li Tshwmsim 19:19-21, Yehauvas yuav ua li cas rau cov tuaj tawm tsam nws cov tib neeg?

¹⁰ Yehauvas yuav ua li cas rau cov tuaj tawm tsam nws cov tib neeg? Nws hais tias: “Kuv yuav chim heev.” (Exekees 38:18, 21-23) Nyob hauv Tshwmsim tshooj 19 qhia tias Yehauvas yuav txib nws tus Tub Yexus los tiv thaiv nws cov tib neeg thiab tua tej yeeb ncuab. Cov tub txib saum ntuj thiab cov 144,000 leej yuav nrog Yexus los tawm tsam. (Tshwmsim 17:14; 19:11-15) Thaum ntsuj rog no xaus, tej neeg uas tawm tsam Yehauvas yuav raug puas tsuaj puas ntsoog kom tu noob nrho.​—Nyeem Tshwmsim 19:19-21.

11. Ib yam uas tshwj xeeb kawg nkaus hauv phau Tshwmsim yog dab tsi?

¹¹ Tom qab Vajtswv cov yeeb ncuab raug puas tsuaj tag lawm, ntshe cov uas dim mas zoo siab tshaj plaws li. Thaum lub nroog Npanpiloos uas loj dua ntais raug puas tsuaj tag lawm, txhua tus uas nyob saum ntuj ceeb tsheej qw ntshoo nrooj zoo siab kawg li. (Tshwmsim 19:1-3) Tiam sis tseem tshuav ib yam muaj kev zoo siab tshaj plaws li uas yog “lub sijhawm uas tus menyuam Yaj ua tshoob.”​—Tshwmsim 19:6-9.

12. Raws li Tshwmsim 21:1, 2, thaum twg tus me nyuam Yaj rooj tshoob mam li pib?

¹² Txawm cov 144,000 leej mus txhij rau saum ntuj ceeb tsheej ua ntej Amankedoos los, rooj tshoob haj tseem tsis tau pib. (Nyeem Tshwmsim 21:1, 2) Yog li ntawd, rooj tshoob yuav pib rau thaum twg? Tus me nyuam Yaj rooj tshoob yuav pib tom qab Amankedoos uas yog muab Vajtswv cov yeeb ncuab rhuav tshem tawm mus huv tib si.​—Phau Ntawv Nkauj 45:3, 4, 13-17.

13. Thaum tus me nyuam Yaj rooj tshoob pib lawm, yuav muaj li cas?

¹³ Thaum tus me nyuam Yaj rooj tshoob pib lawm, yuav muaj li cas? Tib yam li tus nraug vauv thiab nkauj nyab sib sau ua ke, tus me nyuam Yaj rooj tshoob yuav zoo yam li ntawd. Yexus Khetos zoo yam li tus nraug vauv hos cov 144,000 leej suav tam li tus “nkauj nyab.” Txoj kev sib sau no yuav los mus ua roog nom tswv tshiab uas kav thoob plaws ntiaj teb 1,000 xyoo.​—Tshwmsim 20:6.

14-15. Raws li Tshwmsim tshooj 21, cov 144,000 leej piv txwv txog dab tsi? (Saib daim duab ntawm lub khaum.)

¹⁴ Tshwmsim tshooj 21 muab cov 144,000 leej piv rau ib lub nroog zoo zoo nkauj uas hu tias “lub nroog Yeluxalees tshiab.” (Tshwmsim 21:2, 9) Lub nroog no muaj 12 lub pob zeb los tiag lub plag tse thiab muaj “kaum ob tug tubtxib li npe sau cia rau saum tej ntu taw tiag ntawd, ib lub npe rau ib ntu taw tiag.” Ua cas Yauhas ho zoo siab ua luaj? Rau qhov nyob rau ntawm ib lub pob zeb ntawd, muaj nws lub npe sau rau ntawd.​—Tshwmsim 21:10-14; Efexus 2:20.

 ¹⁵ Lub nroog no zoo tsis thooj lwm lub nroog. Tej kev uas nyob hauv lub nroog ntawd yog muab tej tseem kub coj los vuam rau, 12 lub rooj vag yog hlaws, tej phab ntsa thiab tej plag tse yog muab tej qe zeb ci ci muaj nqis los thaiv los pua. (Tshwmsim 21:15-21) Yauhas pom tias tseem tshuav ib yam, nws thiaj hais tias: “Kuv tsis pom muaj ib lub tuamtsev nyob hauv lub nroog ntawd li, rau qhov [Yehauvas] uas yog Vajtswv tus uas muaj hwjchim loj kawg nkaus thiab tus menyuam Yaj yog lub tuamtsev ntag. Hauv lub nroog ntawd tsis muaj hnub lossis hli ci, rau qhov Vajtswv lub tshwjchim yeej ci ntsa iab tuaj rau hauv, thiab tus menyuam Yaj yog lub teeb uas ci rau sawvdaws pom kev.” (Tshwmsim 21:22, 23) Cov uas yog lub nroog Yeluxalees tshiab yuav nrog nraim Yehauvas. (Henplais 7:27; Tshwmsim 22:3, 4) Yehauvas thiab Yexus nkawv yuav yog lub tuam tsev uas nyob hauv lub nroog.

16. Thaum 1,000 xyoo ntawd, noob neej yuav tau txais tej twg?

¹⁶ Yeej zoo kawg li uas lub nroog no sawv nraim hauv cov xaiv tseg nruab siab. Tiam sis cov uas muaj feem nyob rau hauv ntiaj teb no los xav ntsoov tib yam nkaus. Thaum 1,000 xyoo, lub nroog Yeluxalees tshiab yuav faib koob hmoov ntau heev rau hauv ntiaj teb no. Yauhas pom tej koob hmoov no nchuav laub lug cuag li “tus dej cawm siav.” Nyob rau ntawm ob sab ntug, muaj tej “ntoo cawm txojsia” thiab tej nplooj “yog hauv tshuaj kuab muaj tsuas uas kho tau txhua haivneeg.” (Tshwmsim 22:1, 2) Tej tib neeg yuav pom tej yam zoo zoo no xws li txhua tus neeg yuav tsis muaj kev txaug kev txhaum, tsis muaj mob muaj nkeeg thiab tsis muaj kev ploj kev tuag.​—Tshwmsim 21:3-5.

17. Raws li Tshwmsim 20:11-13, thaum 1,000 xyoo ntawd leej twg thiaj li yuav tau txais tej koob hmoov?

¹⁷ Leej twg thiaj li yuav tau txais koob hmoov? Yog cov neeg coob coob uas suav tsis txheeb uas dim Amankedoos thiab cov me nyuam uas yug rau thaum ntiaj teb tshiab. Raws li Tshwmsim tshooj 20, cov uas tas sim neej lawm los yuav muaj hnub tau rov qab los ua neej nyob. (Nyeem Tshwmsim 20:11-13.) “Cov neeg ua phem” uas tseem tsis tau paub Yehauvas thiab “cov neeg ua zoo” uas nruam sim lawm yuav rov muaj txoj sia dua. (Tes Haujlwm 24:15; Yauhas 5:28, 29)  Yog li ntawd, tsis yog txhua leej txhua tus uas nruam sim yuav rov muaj txoj sia dua. Cov neeg uas tsis kam teev tiam Yehauvas ua ntej lawv nruam sim yuav tsis muaj hnub tau txoj sia ntxiv li lawm. Yehauvas twb cia sij hawm rau lawv hloov lawv lub neej los lawv cuaj kaum tsis hloov ces yog li ntawd lawv thiaj tsis muaj feem nyob rau hauv lub ntiaj teb tshiab.​—Mathais 25:46; 2 Thexalaunikes 1:9; Tshwmsim 17:8; 20:15.

18. Tom qab 1,000 xyoo xaus, tib neeg nyob zoo li cas lawm xwb?

¹⁸ Thaum 1,000 xyoo xaus, txhua leej txhua tus nyob hauv ntiaj teb yuav tsis muaj kev txaug kev txhaum. Txoj kev txhaum tib neeg saws ntawm Adas los yuav tsis muaj ntxiv. (Loos 5:12) Tib neeg yuav zoo tiav tag nrho tsis muaj kev txhaum li lawm.​—Tshwmsim 20:5.

19. Vim li cas ho muaj txoj kev sim zaum kawg?

¹⁹ Peb paub tias thaum Xatas sim Yexus, Yexus txoj kev ntseeg yeej ruaj khov khwb kho rau Vajtswv. Ua li thaum tib neeg tsis muaj kev txhaum lawd, tib neeg puas yuav thev dhau yog Xatas los sim? Tom qab 1,000 xyoo thaum Xatas tawm rov qab los, nyias yuav tau thev nyias kom dhau nyias tus kheej. (Tshwmsim 20:7) Cov uas peem dhau txoj kev sim zaum kawg no yuav tau txais txoj sia ntev dhawv mus ib txhis thiab yuav tau nyob ywj pheej hauv lub ntiaj teb no. (Loos 8:21) Cov uas tawm tsam yuav raug kev ploj kev tuag tib yam li Dab Ntxwg Nyoog thiab nws cov dab.​—Tshwmsim 20:8-10.

20. Koj xav li cas rau tej lus faj lem hauv phau Tshwmsim?

²⁰ Thaum koj ua tib zoo tshuaj phau Tshwmsim no tag lawd, koj xav li cas xwb? Koj puas zoo siab tias koj nyob rau lub sij hawm uas muaj tej faj lem no? Puas ua rau koj xav qhia rau txhua leej txhua tus kom los teev tiam peb tus Vajtswv? (Tshwmsim 22:17) Zaum no peb nkag siab tshab tshab txog tej yam uas yuav muaj los yav pem suab, ntshe peb yuav hais tib yam li Yauhas hais tias: “Tswv Yexus, thov koj cia li los!”​—Tshwmsim 22:20.