1. Phau Tshwmsim hais li cas txog Vajtswv cov tib neeg?

 PHAU ntawv Tshwmsim qhia tias Vajtswv tsa Yexus kav nws lub Nceeg Vaj saum ntuj ceeb tsheej thiab muab Xatas ntiab tawm saum ntuj ceeb tsheej lawm. (Tshwmsim 12:1-9) Cov uas nyob saum ntuj ceeb tsheej muaj kev kaj siab lug tiam sis peb cov uas nyob ntiaj teb no nyob lwj siab ntsuav rau qhov Xatas chim kawg li thiab nws tawm tsam cov uas niaj hnub teev tiam Yehauvas tsis tseg tsis tu.​—Tshwmsim 12:12, 15, 17.

2. Yuav ua li cas peb txoj kev ntseeg thiaj li yuav ruaj khov ruaj nreeg rau Yehauvas?

² Qhov uas peb paub tias yav pem suab yuav zoo li cas yuav pab tau peb kom nyob ruaj khov ruaj nreeg rau Yehauvas tab txawm Xatas yuav tawm tsam npaum li cas los xij peem. (Tshwmsim 13:10) Xws li tus tub txib Yauhas tau piav txog tej koob hmoov uas peb yuav tau txais nyob rau hauv phau Tshwmsim. Ib feem ntawm tej koob hmoov uas Vajtswv muab rau peb ntawd yog nws yuav muab nws cov yeeb ncuab rhuav tshem tawm mus. Cia peb ua zoo tshuaj phau Tshwmsim seb Vajtswv cov yeeb ncuab yog leej twg thiab yuav ua li cas rau lawv.

3. Muaj tej twg hauv phau Tshwmsim piv txwv txog Vajtswv cov yeeb ncuab?

³ Nyob hauv phau Tshwmsim, Vajtswv cov yeeb ncuab piv txwv txog ib co tsiaj. (Tshwmsim 1:1) Xws li muaj “ib tug tsiaj tawm hauv hiavtxwv tuaj. Tus tsiaj ntawd muaj kaum tus kub thiab muaj xya lub taubhau.” (Tshwmsim 13:1) Ces txawm muaj dua “ib tug tsiaj tawm hauv av los.” Tus tsiaj ntawd  hais lus ib yam li tus zaj thiab “nws ua kom hluavtaws poob saum ntuj los.” (Tshwmsim 13:11-13) Tom qab ntawd, peb txawm pom ib tug niam ntiav caij rawv “ib tug tsiaj liab ploog.” Peb tug tsiaj no piv txwv txog cov yeeb ncuab uas tawm tsam Yehauvas thiab nws txoj kev kav tau ntev niaj ntau xyoo los lawm. Yog li ntawd, peb yuav tsum nrhiav kom tau seb lawv yog leej twg tiag.​—Tshwmsim 17:1, 3.

4-5. Nyob hauv Daniyees 7:15-17, yuav pab peb nkag siab tej lus piv txwv li cas?

⁴ Ua ntej peb yuav ntes raug Vajtswv cov yeeb ncuab, peb yuav tsum nkag siab seb cov tsiaj thiab tus niam ntiav piv txwv txog leej twg. Ib qho uas yuav pab tau peb paub tseeb yog nyeem phau Vajlugkub. Tej lus piv txwv hais nyob hauv phau Tshwmsim kuj hais muaj nyob rau lwm phau ntawv hauv phau Vajlugkub thiab. Xws li Daniyees tus uas cev Vajtswv lus, ua npau suav pom “plaub tug tsiaj loj tawm hauv hiavtxwv tuaj.” (Daniyees 7:1-3) Daniyees qhia rau peb tias cov tsiaj no piv txwv txog plaub tus “vajntxwv” los sis nom. (Nyeem Daniyees 7:15-17.) Qhov uas Daniyees qhia meej meej no pab peb nkag siab cov tsiaj nyob hauv phau Tshwmsim tias lawv kuj piv txwv txog tej nom tej tsw tib yam nkaus.

⁵ Yog li ntawd, peb yuav mus tham txog cov lus piv txwv nyob hauv phau Tshwmsim seb muaj li cas tiag. Cia peb piav txog cov tsiaj ntawd ua ntu zus xwv peb thiaj paub tias lawv piv txwv txog leej twg, seb lawv yuav raug li cas, thiab peb ho khaws tau li cas los ntawm tej no.

6. Raws li Tshwmsim 13:1-4, tus tsiaj uas muaj xya lub taub hau piv txwv txog dab tsi?

⁶ Tus tsiaj uas muaj xya lub taub hau piv txwv txog dab tsi? (Nyeem Tshwmsim 13:1-4.) Tus tsiaj no zoo li tsov pom txwv tiam sis txhais taw yog taw dais, lub qhov ncauj zoo yam li tsov ntxhuav lub, thiab nws muaj kaum tus kub. Daniyees tshooj 7 piav txog plaub tug tsiaj tiam sis Tshwmsim muab plaub tug tsiaj no los ua ib tug. Tus tsiaj hais nyob hauv Tshwmsim tsis yog piv txwv txog ib roog nom tswv xwb vim Yauhas tau hais tias tus tsiaj no yuav “kav tagnrho txhua lub tebchaws, tsis hais haivneeg twg, xeem twg thiab cov neeg uas hais yam lus twg los nws kav huv tibsi.” Nws muaj hwj chim tshaj ib roog nom tswv. (Tshwmsim 13:7) Yog li ntawd, tus tsiaj no piv txwv txog ib zej tsoom nom tswv uas kav puag txheej thaum ub los txog niaj hnub niam no. *​—Tej Lus Qhia 8:9.

7. Ib lub taub hau twg ntawm tus tsiaj piv txwv txog dab tsi?

⁷ Tus tsiaj muaj xya lub taub hau. Ib lub taub hau twg piv txwv txog dab tsi? Tus tsiaj no twb hais nyob rau hauv Tshwmsim tshooj 13 lawm tiam sis yuav kom peb nkag siab tus tsiaj no zoo, peb yuav tau nyeem Tshwmsim tshooj 17. Nyob rau hauv Tshwmsim 17:10 hais tias: “Muaj tsib tug vajntxwv twb poob hwjchim lawm, tshuav ib tug tseem kav tebchaws, thiab muaj ib tug tseem tsis tau los kav tebchaws; thaum nws los nws yuav kav tebchaws ib ntus xwb.” Tag nrho cov nom tswv uas Xatas siv, muaj xya roog nom tswv yog cov muaj zog tshaj. Cov nom tswv no lawv kuj tau tswj hwm Vajtswv cov tib neeg. Thaum tus tub txib Yauhas tseem ua neej nyob, muaj tsib roog nom tswv twb dua tag lawm xws li teb chaws Iyiv, Axilias, Npanpiloos, Medes thiab Pawxias, thiab Kilis. Nyob rau Yauhas tiam, teb chaws Loos yog roog nom tswv rau. Lub teb chaws twg yuav yog roog nom tswv xya?

8. Lub taub hau xya ntawm tus tsiaj piv txwv txog lub teb chaws twg?

 ⁸ Cov lus faj lem nyob hauv phau Daniyees qhia rau peb tias lub taub hau xya ntawm tus tsiaj yog lub teb chaws twg. Roog nom tswv uas kav nyob rau “tus Tswv hnub” yog teb chaws Askiv thiab teb chaws Yunaithim Xatej (United States). (Tshwmsim 1:10) Zaum no peb nkag siab tias lub taub hau xya ntawm tus tsiaj hauv Tshwmsim 13:1-4 yog hais txog leej twg tiag.

9. Tus tsiaj uas “muaj ob tug kub zoo li menyuam yaj” piv txwv txog dab tsi?

⁹ Nyob rau hauv Tshwmsim tshooj 13 qhia tias lub taub hau xya uas yog teb chaws Askiv thiab teb chaws Yunaithim Xatej, coj cwj pwm zoo li tus tsiaj uas “muaj ob tug kub zoo li menyuam yaj tus” tiam sis “hais lus ib yam li tus zaj hais.” Tus tsiaj “ua tau tej txujci loj uas sawvdaws xav tsis thoob li thiab; nws ua kom hluavtaws poob saum ntuj los rau hauv ntiajteb no tabmeeg sawvdaws.” (Tshwmsim 13:11-15) Tshwmsim tshooj 16 thiab 19 qhia tias tus tsiaj no yog “tus cevlus cuav.” (Tshwmsim 16:13; 19:20) Daniyees los kuj hais tias teb chaws Askiv thiab teb chaws Yunaithim Xatej yuav “ua rau sawvdaws raug kev puastsuaj loj kawg nkaus.” (Daniyees 8:19, 23, 24) Ntsuj Rog Thoob Qab Ntuj Zaum Ob muaj raws nkaus li cov lus ntawd ntag. Ob lub hoob pob uas xaus ntsuj rog no ces twb yog Askiv thiab Yunaithim Xatej cov kws tshawb txuj ci koom siab txua. Vim lawv txua ob lub hoob pob no, thiaj li muaj raws nkaus li cov lus uas tau hais tias “hluavtaws poob saum ntuj los rau hauv ntiajteb no.”

10. ‘Tus mlom uas muaj yamntxwv zoo li thawj tug tsiaj’ piv txwv txog dab tsi? (Tshwmsim 13:14, 15; 17:3, 8, 11)

¹⁰ Muaj dua ib tug tsiaj ntxiv. Tus tsiaj zoo yuav luag thooj tus tsiaj uas muaj xya lub taub hau tiam sis tus tsiaj no ho liab ploog. Tus tsiaj no siav npe tias tus “mlom zoo li thawj tug tsiaj” thiab “yog ib tug vajntxwv uas yog tus yim.” * (Nyeem Tshwmsim 13:14, 15; 17:3, 8, 11.) Yauhas pom tus “vajntxwv” no tshwm los ces nws txawm ploj rov lawm. Tom qab ntawd, nws rov qab tshwm dua los. Raws li hais tas los no ces yog lub koom haum UN (United Nations) uas muaj txhua lub teb chaws txhawb nqa. Thaum nyuam qhuav tshwm mas hu ua Lis Au Neseem (League of Nations). Thaum muaj Ntsuj Rog Thoob Qab Ntuj Zaum Ob ces txawm ploj lawm. Tom qab no, mam li tshwm los ua lub koom haum UN.

11. Ob tug tsiaj yuav ua li cas thiab vim li cas peb ho tsis ntshai?

¹¹ Ob tug tsiaj dag ntxias kom tib neeg sawv tawm tsam Yehauvas thiab Yehauvas cov tib neeg. Yauhas hais tias nkawv tej lus dag no haub “txhua tus vajntxwv uas nyob hauv ntiajteb no” kom sib koom siab rau “hnub tseemceeb uas Vajtswv tus uas muaj hwjchim loj kawg nkaus teem cia lawm” uas yog Amankedoos. (Tshwmsim 16:13, 14, 16) Tsis txhob poob siab kiag li. Tib ntsais muag xwb, Vajtswv Yehauvas yuav los cawm txhua tus uas txhawb nqa nws txoj kev kav.​—Exekees 38:21-23.

12. Yuav ua li cas rau ob tug tsiaj?

¹² Yuav ua li cas rau ob tug tsiaj? Tshwmsim tshooj 19 nqe 20 qhia li no: “Luag ntes tau tus tsiaj ntawd thiab ntes tau tus cevlus cuav uas dag hais tias nws yog ib tug uas cev Vajtswv lus. (Tus cevlus cuav ntawd yog tus uas ua tej txujci tabmeeg tus tsiaj ntawd dag ntxias cov neeg uas muaj tus tsiaj ntawd lub cim nias rau lawv lawm, thiab nws ntxias cov neeg uas pe tus mlom uas muaj yam ntxwv zoo li tus tsiaj  ntawd.) Luag cia li muab tus tsiaj thiab tus cevlus cuav ntawd pov rau hauv cov nplaim taws leejfaj uas cig ntswj pesyos.” Txawm nkawv tseem sam sim kav los tsis ntev tom ntej no Vajtswv yuav muab nws ob tug yeeb ncuab no rhuav tshem mus ib txhis.

13. Cov nom tswv yuav tsub kev nyuaj siab li cas rau cov ntseeg?

¹³ Peb khaws tau li cas los ntawm tej no? Peb yuav tsum sawv khov khwb kho nyob rau Vajtswv sab thiab txhawb nqa nws txoj kev kav. (Yauhas 18:36) Yuav kom peb ua tau li no, peb yuav tau tsis txhob mus tuaj ib roog nom tswv twg tog. Yeej tsis yooj yim kiag li vim tej nom tswv yuav kom peb txhawb nqa lawv tsis hais tej peb ua los sis tej lus peb hais. Cov neeg uas zwm rau tej nom tswv yuav muaj tus tsiaj lub cim nias rau. (Tshwmsim 13:16, 17) Ib tug twg uas tau lub cim no, Yehauvas yuav tsis pom zoo rau nws thiab nws yuav tsis tau txoj sia ntev dhawv mus ib txhis. (Tshwmsim 14:9, 10; 20:4) Yog li ntawd, tseem ceeb heev uas peb yuav tau txhob mus tuaj ib roog nom tswv twg tog tab txawm lawv yuav quab yuam kom peb txhawb nqa lawv npaum li cas.

14. Raws li Tshwmsim 17:3-5, tus tub txib Yauhas pom dab tsi?

¹⁴ Tus tub txib Yauhas “xav tsis thoob li” thaum nws pom ib tug poj niam caij rawv ib tug tsiaj nyaum heev. (Tshwmsim 17:1, 2, 6) Tus poj niam no suav tam li ib tug “niamntiav” thiab hu nws tias “lub nroog Npanpiloos uas loj dua ntais.” Nws nrog “tej vajntxwv uas nyob hauv ntiajteb no” sib daj “sib dee.”​—Nyeem Tshwmsim 17:3-5.

15-16. “Lub nroog Npanpiloos uas loj dua ntais” piv txwv txog leej twg, thiab vim li cas peb ho paub li ntawd?

¹⁵ “Lub nroog Npanpiloos uas loj dua ntais” piv txwv txog leej twg? Tus poj niam no yuav ntxim tsis yog ib roog nom tswv twg vim nws nrog tej nom tswv hauv ntiaj teb no sib dee. (Tshwmsim 18:9) Qhov uas nws caij rawv tus tsiaj qhia hais tias nws xav tswj hwm tej nom tswv. Tsis tas li ntawd, nws kuj tsis yog tej tub lag tub luam uas nyob hauv lub qab ntuj uas Xatas kav no rau qhov “tej tub lag tub luam uas nyob hauv ntiajteb no” hais muaj nyob rau lwm tshooj lawm.​—Tshwmsim 18:11, 15, 16.

¹⁶ Nyob rau hauv Vajtswv Txoj Lus, lo lus “niamntiav” hais txog cov uas lawv lam lees ntawm lub ncauj tias lawv teev tiam Vajtswv tiam sis lawv ho pe dab pe mlom thiab nrog tej neeg ntiaj teb ua txij tog txij peg. (1 Xwmtxheej Vajntxwv 5:25; Yakaunpaus 4:4) Vajtswv Txoj Lus hais tias cov uas pe hawm Vajtswv ruaj nreeg mas yeej “dawb huv.” (2 Kauleethaus 11:2; Tshwmsim 14:4) Puag thaum ub, lub teb chaws Npanpiloos yog qhov chaw uas chiv dab qhuas. Yog li ntawd, tus poj niam uas yog “lub nroog Npanpiloos uas loj dua ntais” piv txwv txog txhua txoj kev ntseeg cuav.​—Tshwmsim 17:5, 18; mus saib lub vej xaij jw.org ntawm lub ntsiab “What Is Babylon the Great?” ua lus Askiv.

17. Yuav muaj li cas rau lub nroog Npanpiloos uas loj dua ntais?

¹⁷ Yuav muaj li cas rau lub nroog Npanpiloos uas loj dua ntais? Nyob rau hauv Tshwmsim 17:16, 17 hais tias: “Kaum tus kub thiab niag tsiaj uas koj pom puavleej yuav ntxub tus niamntiav ntawd. Lawv yuav txeeb txhua yam uas nws muaj huv tibsi mus thiab cia nws nyob liabqab; lawv yuav noj nws cev nqaij thiab muab hluavtaws hlawv nws povtseg. Rau qhov Vajtswv tshoov lawv lub siab kom lawv xav ua raws li Vajtswv lub siab nyiam.” Yog li ntawd, Yehauvas yuav tshoov txhua lub teb chaws kom siv tus tsiaj liab ploog uas yog lub koom haum UN los tawm tsam kev ntseeg cuav thiab muab rhuav kom puas tsuaj tas.​—Tshwmsim 18:21-24.

18. Peb yuav tau tsis txhob txhawb nqa lub nroog Npanpiloos uas loj dua ntais li cas?

 ¹⁸ Peb khaws tau li cas los ntawm tej no? Peb yuav tau tuav rawv “txoj kevcai uas Vajtswv tus uas yog peb Leej Txiv suav hais tias yog txoj uas zoo thiab tseeb.” (Yakaunpaus 1:27) Yog li ntawd, tsis txhob cia peb lub siab qaug rau tej yam uas qhia tsis tseeb, ua koob tsheej rau dab qhuas, tsis txav kom deb ntawm tej kev phem kev qias, thiab mus nrog luag raus tes ua dab ua qhua. Tiam sis cia peb rau siab ntso ceeb toom kom tib neeg kav tsij “tawm plaws hauv lub nroog ntawd mus,” Vajtswv thiaj tsis muab tus niam ntiav ntawd lub txim tsub rau lawv.​—Tshwmsim 18:4.

19. Tus “zaj loj loj liab ploog” yog leej twg?

¹⁹ Nyob hauv phau Tshwmsim kuj piav txog “ib tug zaj loj loj liab ploog.” (Tshwmsim 12:3) Tus zaj nrog Yexus thiab cov tub txib saum ntuj sib ntaus sib tua. (Tshwmsim 12:7-9) Tsis tas li ntawd, nws kuj tawm tsam Vajtswv cov tib neeg thiab nws kuj muab hwj chim rau ob tug tsiaj uas piv txwv tej nom tswv. (Tshwmsim 12:17; 13:4) Tus zaj no piv txwv txog leej twg? Nws yog “tus nab txwj nab laug thaum ub uas sawvdaws hu ua dab Ntxwgnyoog lossis hu ua Xatas.” (Tshwmsim 12:9; 20:2) Nws yog tus tswj hwm tag nrho Yehauvas cov yeeb ncuab.

20. Yuav muaj li cas rau tus zaj yav tom ntej?

²⁰ Yuav muaj li cas rau tus zaj yav tom ntej? Raws li Tshwmsim 20:1-3 qhia hais tias ib tug tub txib saum ntuj yuav muab Xatas pov rau hauv ib lub qhov tob tob uas piv txwv txog ib qho chaw muab nws kaw tseg cia. Xatas yuav “tsis tau kev los ntxias txhua haivneeg ib txhiab xyoo.” Txuas ntxiv ntawd, Xatas thiab nws cov dab yuav raug muab pov rau hauv ‘cov nplaim taws leejfaj uas cig ntswj pesyos’ uas txhais hais tias lawv yuav raug puas tsuaj mus ib txhis. (Tshwmsim 20:10) Thaum txog lub sij hawm ntawd, txhua tus yuav nyob kaj siab lug vim tsis muaj Xatas thiab nws cov dab ntxiv lawm.

21. Ua li cas peb ho txaus siab rau tej peb tau nyeem nyob hauv phau Tshwmsim?

²¹ Thaum peb nkag siab tej lus nyob rau hauv phau ntawv Tshwmsim mas txhawb tau peb siab heev. Peb kawm tau tias Yehauvas cov yeeb ncuab yog leej twg thiab yuav muaj li cas rau lawv. Yog li ntawd, “cov neeg uas nyeem phau ntawv no, cov neeg uas mloog tej lus uas Vajtswv qhia no, thiab ua raws li cov lus uas sau tseg rau hauv phau ntawv no, cov ntawd yuav tau nyob kaj siab lug.” (Tshwmsim 1:3) Thaum Vajtswv cov yeeb ncuab raug puas tsuaj tas lawm, neeg ntiaj teb yuav tau zoo nyob npaum li cas? Zaj txuas ntxiv tom ntej no mam li piav txog.