1. Yehauvas xav kom cov uas teev tiam nws ua dab tsi? (Saib daim duab.)

 PEB yuav mus cuag leej twg yog tias peb xav tau kev pab? Peb paub tias peb yeej thov tau Vajtswv Yehauvas pab. Yehauvas los kuj xav kom peb thov nws pab “tsis tseg tsis tu.” (1 Thexalaunikes 5:17) Peb xav thov kom nws pab thaum twg los tau thiab thov kom nws coj peb txoj hau kev ua neej los tau. (Pajlug 3:5, 6) Yehauvas yog ib tug Vajtswv uas muaj siab dawb siab zoo heev, peb yuav thov nws pes tsawg zaus los xij peem.

2. Nyob rau hauv zaj kawm no yuav piav txog dab tsi?

² Peb ris txiaj ntsig tias Yehauvas cia peb thov nws pab. Txawm li ntawd los peb tej hauj lwm npau to ces twb ua rau peb tsis nco thov txog nws. Tej zaum peb kuj xav kom peb txawj thov Vajtswv. Nyob rau hauv phau Vajlugkub, yeej qhia ntau qhov kom peb yuav thov li cas rau li cas. Nyob rau hauv zaj kawm no peb yuav kawm txog Yexus tus yam ntxwv xwv peb thiaj lauj sij hawm los thov Yehauvas ib yam li nws. Tsis tas li ntawd, peb yuav tham txog tsib lub ntsiab kom peb thiaj li txawj thov Vajtswv.

3. Yexus paub li cas txog kev thov Vajtswv?

³ Yexus paub hais tias Yehauvas saib txoj kev uas thov Nws tseem ceeb heev. Ua ntej Yexus nqis los rau hauv ntiaj teb no, nws yeej pom nws Txiv teb cov ntseeg txheej thaum ub, tsis hais poj niam los sis txiv neej, tej lus thov huv tib si. Xws li Yexus nyob rawv ntawm nws Txiv ib sab thaum nws Txiv teb  Hanas, Daviv, Eliyas, thiab lwm tus tej lus thov. (1 Xamuyees 1:10, 11, 20; 1 Vajntxwv 19:4-6; Phau Ntawv Nkauj 32:5) Yog li ntawd, Yexus thiaj qhia kom nws cov thwj tim tso siab plhuav thov nws Txiv tsis so!​—Mathais 7:7-11.

4. Peb khaws tau li cas los ntawm Yexus tej lus thov?

⁴ Yexus tso yam ntxwv rau nws cov thwj tim xyaum kom txawj thov Yehauvas. Thaum Yexus ua Yehauvas tes hauj lwm hauv ntiaj teb no, nws yeej thov Yehauvas tsis so. Yexus khwv heev thiab tib neeg nyob puag ncig nws tas li. Yog li ntawd, nws thiaj lauj sij hawm kom tau thov Vajtswv. (Malakaus 6:31, 45, 46) Thaum tsis tau kaj ntug, nws txawm sawv ntxov tsees mus nyob ib qho thov Vajtswv. (Malakaus 1:35) Muaj ib zaug Yexus yuav tau ua ib yam tseem ceeb heev nws thiaj thov Vajtswv ib hmos kaj ntug plaws. (Lukas 6:12, 13) Ua ntej hmo Yexus tuag, nws thov Vajtswv tsis so kom pab nws ua tau raws li Vajtswv lub siab nyiam.​—Mathais 26:39, 42, 44.

5. Peb yuav xyaum Yexus li cas thaum peb thov Vajtswv?

⁵ Yexus tus yam ntxwv qhia rau peb tias txawm peb yuav khwv npaum li cas los nco ntsoov lauj sij hawm los thov Vajtswv. Peb kuj xyaum tau Yexus es sawv ntxov tsees los sis nyob ib nyuag lig zog thov Vajtswv. Yog peb ua yam li no ces yuav qhia tau rau Yehauvas tias peb ris txiaj ntsig rau txoj kev thov uas nws muab rau peb. Muaj ib tug muam npe hu ua Lees (Lynne) nco txog thaum nws kawm tau tias peb thov tau rau Vajtswv. Nws hais tias, “Thaum kuv kawm tau tias kuv thov Vajtswv thaum twg los tau, kuv thiaj saib nws tam li ib tug phooj ywg zoo thiab kuv xyaum thov nws tawm plaws hauv nruab siab tuaj.” Peb coob leej ntau tus los yeej xav tib yam li ntawd thiab. Yog li ntawd, cia peb mus kawm tsib lub ntsiab uas peb thov tau.

6. Raws li Tshwmsim 4:10, 11, Yehauvas tsim nyog tau dab tsi?

⁶ Qhuas Yehauvas. Tus tub txib Yauhas ua yog toog pom 24 tus txwj laus saum ntuj ceeb tsheej tab tom pe hawm Yehauvas. Lawv qhuas Vajtswv tias: “Koj yog tus uas muaj hwjchim, tsimnyog peb sawvdaws hwm koj thiab ua rau koj tau koob meej.” (Nyeem Tshwmsim 4:10, 11.) Cov tub txib saum ntuj kuj muaj ntau tsav ntau yam uas lawv qhuas Yehauvas txog. Lawv nrog Yehauvas nyob  saum ntuj thiab lawv yeej paub Yehauvas zoo li cas rau li cas. Lawv yeej pom Yehauvas tej yeeb yam qhuas lug los ntawm tej nws ua. Thaum lawv pom Yehauvas ua tau ib yam twg, lawv puav leej qhuas nws.​—Yauj 38:4-7.

7. Peb qhuas tau Yehauvas li cas?

⁷ Qhov uas peb qhuas tau Yehauvas yog thaum peb thov nws es qhia tias peb nyiam thiab ris txiaj ntsig rau tej nws tau ua. Thaum koj nyeem thiab kawm phau Vajlugkub, ua tib zoo soj ntsuas seb koj nyiam tej yeeb yam twg. (Yauj 37:23; Loos 11:33) Ntxiv ntawd, thov Yehauvas thiab qhia rau nws vim li cas koj ho nyiam cov yeeb yam ntawd. Peb kuj qhuas tau Yehauvas txog tej yam uas nws tau ua los mus pab peb thiab cov kwv tij nkauj muam. Nws yeej saib xyuas peb ntshis thiab tiv thaiv peb.​—1 Xamuyees 1:27; 2:1, 2.

8. Muaj ntau yam uas peb yuav tau ua Yehauvas tsaug rau yog dab tsi? (1 Thexalaunikes 5:18)

⁸ Ua Yehauvas tsaug. Muaj ntau yam uas peb yuav tau ua Yehauvas tsaug thaum thov nws. (Nyeem 1 Thexalaunikes 5:18.) Peb ua nws tsaug rau txhua yam zoo uas peb muaj rau qhov txhua yam zoo puav leej los ntawm nws los. (Yakaunpaus 1:17) Xws li peb ua nws tsaug rau lub ntiaj teb thiab txhua yam hauv lub ntiaj teb uas nws tau tsim zoo nkauj heev. Tsis tas li ntawd, peb kuj ris txiaj ntsig uas nws muab txoj sia rau peb, pub peb muaj ib tse neeg, phooj ywg kwv luag, thiab txoj kev vam kev cia siab rau yav tom hauv ntej. Ntxiv ntawd, peb kuj ua tsaug uas nws cia peb los nrog nws sib raug zoo.

9. Vim li cas peb yuav tau xyaum ris txiaj ntsig rau Yehauvas?

⁹ Peb nyob hauv lub qab ntuj uas neeg tsis ris leej twg txiaj ntsig. Feem ntau tib neeg tsuas xav tias seb lawv yuav tau dab tsi rau dab tsi tiam sis tsis nco ris txiaj ntsig rau tej yam uas lawv muaj. Yog peb muaj lawv tus cwj pwm no ces peb tej lus thov rau Vajtswv tsuas yog nug kom peb tau yam ub yam no xwb. Yuav kom peb tsis txhob muaj tus cwj pwm zoo li no, peb yuav tau xyaum thiab ua tib zoo xav seb muaj tej yam twg uas peb yuav tau ris Yehauvas txiaj ntsig rau.​—Lukas 6:45.

10. Ris Yehauvas txiaj ntsig pab tau ib tug muam thev li cas? (Saib daim duab.)

¹⁰ Peb yuav thev taus tej yam uas los raug peb yog tias peb ris Yehauvas txiaj ntsig. Nyob rau hauv Phau Tsom Faj lub 1 Hlis tim 15 xyoo 2015, muaj ib tug muam npe hu ua Khoos Xuv (Kyung-sook) muaj kheeb xawm (cancer) rau hauv ntsws. Nws hais tias: “Tus kab mob no ua rau kuv puas siab puas ntsws tag. Kuv lub neej ntshe tag li no lawm xwb, ua rau kuv ntshai kawg li.” Muaj dab tsi pab tau nws thev taus? Nws hais tias txhua hmo ua ntej nws yuav mus pw, nws mus nyob puag saum ru tsev thiab thov Vajtswv nrov nrov txog tsib yam uas nws ris txiaj ntsig rau hnub ntawd. Thaum ua li no nws lub siab thiaj nyob tus. Nws pom tias Yehauvas yeej ua tau rau Yehauvas cov tib neeg lub siab tus yees  thaum lawv raug ib yam kev sim siab twg thiab nws pom tias Yehauvas yeej foom koob hmoov ntau tshaj li tej kev sim siab uas lawv raug. Peb kuj zoo ib yam li Khoos Xuv, muaj ntau yam uas peb yuav tau ua Yehauvas tsaug rau thaum peb tab tom raug kev sim siab. Qhov uas peb qhib siab lug thov Yehauvas tias peb ris txiaj ntsig rau nws yuav pab tau peb thev taus tej uas peb raug thiab ua rau kom peb lub siab tswm.

11. Vim li cas Yexus cov thwj tim yuav tau ua siab tawv qhawv tom qab Yexus mus saum ntuj ceeb tsheej lawm?

¹¹ Thov Yehauvas pab kom muaj lub siab tawv qhawv mus tshaj tawm txoj xov zoo. Ua ntej Yexus yuav rov mus saum ntuj ceeb tsheej, nws qhia kom nws cov thwj tim nco ntsoov ua tes hauj lwm uas yog ua tim khawv txog nws “mus thoob plaws hauv lub nroog Yeluxalees, hauv lub xeev Yudas, hauv lub xeev Xamalis thiab mus txog qab ntuj kawg.” (Tes Haujlwm 1:8; Lukas 24:46-48) Tsis ntev tom qab ntawd, cov Yudais tej thawj coj txawm tuaj ntes tus tub txib Petus thiab Yauhas nkawd coj mus kom ntawm pab Xahenrees. Lawv txwv thiab hem kom cov tub txib tsis txhob mus tshaj tawm txoj xov zoo ntxiv lawm. (Tes Haujlwm 4:18, 21) Ua li Petus thiab Yauhas nkawd ua li cas xwb?

12. Raws li Tes Haujlwm 4:29, 31, cov thwj tim ua li cas xwb?

¹² Petus thiab Yauhas nkawd teb cov Yudais tej thawj coj tej lus hem tias: “Wb mloog nej lus zoo dua li wb mloog Vajtswv lus los? Nej sim xav saib, ob qho no qhov twg yuav haum Vajtswv siab dua? Tej uas wb hnov thiab wb pom lawm, wb yeej yuav qhia, wb tsis npog li.” (Tes Haujlwm 4:19, 20) Thaum Petus thiab Yauhas nkawd dim lawm, cov thwj tim tsa suab thov Yehauvas nrov nrov tias: “Thov koj pab peb cov uas yog koj cov tubtxib kom muaj lub siab tawv qhia koj Txojlus.” Yehauvas teb lawv cov lus thov.​—Nyeem Tes Haujlwm 4:29, 31.

13. Peb khaws tau Ntsias Hus tus yam ntxwv li cas?

¹³ Cov thwj tim yeej tso tau ib tug yam ntxwv zoo heev rau peb xyaum kom rau siab ntso mus qhia txoj xov zoo tab txawm tej nom tej tsw yuav txwv tsis pub peb mus qhia. Xws li muaj ib tug kwv tij npe hu ua Ntsias Hus (Jin-hyuk) raug kaw, yeeb vim yog nws tsis kam ua tsov ua rog. Nyob rau hauv tsev loj cuj, lawv kom nws mus saib xyuas lwm cov neeg raug txim uas muab kaw rau hauv qhov taub. Lawv tsis pub nws nrog leej twg sib txuas lus txog tej yam xws li qhia Vajlugkub. Nws thov Yehauvas kom nws muaj lub siab tawv qhawv thiab ua tib zoo ntsuas seb puas zoo qhia Vajlugkub. (Tes Haujlwm 5:29) Nws hais tias: “Yehauvas teb kuv tej lus thov ces kuv thiaj muaj lub siab tawv qhawv thiab muaj tswv yim qhia Vajlugkub rau ib tug neeg raug txim twg ntev li 5 feeb xwb. Thaum tsaus ntuj, kuv sau ntawv xwv tag kis kuv thiaj li muab tau rau cov neeg raug txim nyeem.” Peb yuav tau tso siab plhuav rau Yehauvas pab kom peb mus tshaj tawm tau txoj xov zoo tib yam li ntawd. Cia peb xyaum Ntsias Hus tus yam ntxwv es thov Yehauvas pab kom peb muaj lub siab tawv qhawv thiab tswv yim mus tshaj tawm.

14. Muaj dab tsi pab tau peb thaum raug teeb meem? (Phau Ntawv Nkauj 37:3, 5)

¹⁴ Thov Yehauvas pab peb thev peb tej teeb meem. Peb coob leej ntau tus yeej raug ntau yam teeb meem xws li cov uas peb hlub tau tag sim neej, lub cuab lub yig muaj kev sib cov nyom, raug kev tsim txom los sis raug lwm yam teeb meem. Txuas ntxiv ntawd, tej kab mob aws thiab tsov rog haj tseem tsub ntxiv rau tej yam uas peb raug. Cia li qhib  siab lug thov Yehauvas. Qhia rau nws txog koj tej kev txhawj xeeb ib yam li koj qhia rau ib tug phooj ywg kwv luag. Nco ntsoov tias Yehauvas “yuav pab” koj.​—Nyeem Phau Ntawv Nkauj 37:3, 5.

15. Piav seb kev thov yuav pab tau peb “thev tiag thaum [peb] raug kev nyuaj siab” li cas.

¹⁵ Thov Vajtswv tsis tseg tsis tu yuav pab peb “thev tiag thaum [peb] raug kev nyuaj siab.” (Loos 12:12) Yehauvas yeej paub tej yam uas cov teev tiam nws raug thiab “nws hnov lawv tej suab thov.” (Phau Ntawv Nkauj 145:18, 19) Muaj ib tug tho kev npe hu ua Khiatim (Kristie). Nws muaj li 29 xyoos xwb, nws cia li muaj mob hnyav heev ua rau nws puas siab puas ntsws tas. Tom qab no nws kuj hnov tias nws niam muaj ib tug mob hnyav heev uas kho tsis tau. Khiatim hais tias: “Kuv thov Yehauvas tsis tseg tsis tu kom ntxiv dag ntxiv zog rau kuv rau txhua hnub. Kuv mus kev sib txoos thiab nyob ib leeg kawm Vajlugkub raws li kuv kom tseg cia. Kev thov Vajtswv pab kuv rau lub caij muaj kev nyuaj siab ntxhov plawv. Kuv paub tias Yehauvas yeej pab kuv txhua lub sij hawm thiab qhov uas kuv paub li no ua rau kuv tuaj zog kawg li. Txawm daws tsis tau kuv tej teeb meem los Yehauvas pub kom kuv muaj lub siab tus yees.” Cia peb nco ntsoov tias Vajtswv “yeej paub tias yuav cawm cov uas hwm Vajtswv dim txojkev sim siab tau li cas.”​—2 Petus 2:9.

16. Vim li cas peb yuav tsum muaj Yehauvas pab thaum raug kev sim siab?

¹⁶ Thov Yehauvas pab thaum muaj kev sim siab. Peb yog noob txaug neeg txhaum ces peb yuav tau tswj lub siab uas pheej liab qas khiav mus ua tej yam tsis zoo. Tsis tas li ntawd, Xatas tseem tsub ntxiv kom huab yam nyuaj. Ib yam uas Xatas tsub ntxiv ntawd yog tej peb saib los sis mloog. Nws xav kom tej yam vuab tsuab uas peb pom los sis hnov ntawd txheem mus rau peb lub siab lub ntsws xwv peb thiaj mus ua kev txhaum loj.​—Malakaus 7:21-23; Yakaunpaus 1:14, 15.

17. Tom qab peb thov Vajtswv pab tag, peb yuav tau ua dab tsi? (Saib daim duab.)

 ¹⁷ Yuav kom peb tseg taus kev sim siab peb yuav tau cia Yehauvas pab peb. Yexus tau hais cov lus no thaum nws qhia seb yuav thov Vajtswv li cas: “Thov tsis txhob cia peb qaug rau tej kev sim siab tiam sis thov cawm peb dim ntawm Xatas txhais tes.” (Mathais 6:13) Yehauvas yeej tos tsis hnyu yuav pab peb tiam sis peb yuav tau taij thov nws. Tom qab peb thov Vajtswv tag lawm, peb yuav tau ua raws nkaus li tej lus uas peb thov ntawd. Tsis tas li ntawd, peb yuav tau ua npaum li peb ua tau kom tsis txhob mus nyeem los sis mloog tej tswv yim uas Xatas lub qab ntuj no qhia tshwm. (Phau Ntawv Nkauj 97:10) Peb yuav tau kawm thiab nyeem Vajlugkub kom peb thiaj xav txog tej yam dawb huv. Mus kev sib txoos thiab mus tshaj tawm txoj xov zoo yuav tiv thaiv tau peb tej kev xav. Yehauvas cog lus tias nws yuav tsis pub peb raug kev sim siab ntau tshaj li qhov uas peb nyiaj taus.​—1 Kauleethaus 10:12, 13.

18. Peb txhua tus yuav tau ua dab tsi thaum hais txog kev thov?

¹⁸ Peb ib tug dhau ib tug yuav tau kub siab lug thov Yehauvas heev tshaj li yav tag los lawm kom peb tsis txhob tso Yehauvas tseg nyob rau lub caij nyuaj siab ntxhov plawv no. Ib hnub twg, lauj sij hawm los thov Yehauvas tawm plaws hauv nruab siab tuaj. Yehauvas xav kom peb “qhia [peb] lub siab rau nws” thaum peb thov. (Phau Ntawv Nkauj 62:8) Qhuas Yehauvas thiab ua nws tsaug rau txhua yam nws tau ua rau koj. Thov kom nws pab koj muaj lub siab tawv qhawv mus tshaj tawm txoj xov zoo. Taij thov nws pab thaum koj raug teeb meem los sis muaj kev sim siab. Tsis txhob cia ib yam dab tsi los sis leej twg tav tau koj thov Yehauvas tsis tseg tsis tu. Ua li Yehauvas teb peb tej lus thov li cas? Nyob rau zaj txuas ntxiv tom ntej no mam li piav txog.