1-2. Thaum peb thov Vajtswv, tej thaum peb kheev xav li cas?

 KOJ puas tau xav rau hauv nruab siab dua tias Yehauvas puas teb koj tej lus thov? Muaj coob leej ntau tus los kuj tau xav ib yam li ntawd thiab. Muaj ib txhia kwv tij nkauj muam yeej tau xav tias thaum lawv raug kev sim siab, xyov Vajtswv puas hnov lawv tej lus thov. Muaj qee zaug thaum peb raug kev nyuaj siab, peb tsis paub xyov Yehauvas yuav teb peb tej lus thov li cas rau li cas.

² Cia peb mam li tham txuas ntxiv seb vim li cas peb ho tso siab plhuav tias Yehauvas yuav teb nws cov tib neeg tej lus thov. (1 Yauhas 5:15) Tsis tas li ntawd, peb yuav tham txog ob lo lus nug no: Vim li cas muaj qee lub sij hawm zoo yam li Yehauvas tsis teb peb tej lus thov? Niaj hnub nim no Yehauvas teb peb tej lus thov li cas?

3. Vim li cas Yehauvas xav kom peb thov nws?

³ Nyob rau hauv phau Vajlugkub qhia tias Yehauvas hlub tshua peb heev thiab peb muaj nuj nqis rau nws kawg li. (Hakais 2:7; 1 Yauhas 4:10) Yog li ntawd, nws thiaj li xav kom peb thov nws pab peb. (1 Petus 5:6, 7) Nws xav kom peb ntseeg nws ruaj nreeg thiab thev tej kev nyuaj siab uas peb tab tom raug.

4. Ua li cas peb thiaj paub tias Yehauvas teb nws cov tib neeg tej lus thov? (Saib daim duab.)

⁴ Nyob rau hauv phau Vajlugkub, peb yeej nyeem ntau zaus tias Yehauvas teb nws cov tib neeg tej lus thov. Ib tug uas Yehauvas teb nws tej lus thov yog Vaj Ntxwv Daviv. Ib txwm hauv  Daviv lub neej, yeej muaj neeg xav ua phem txov nws txoj sia, nws thiaj li thov Yehauvas ntshis kom pab nws. Muaj ib zaug nws thov Yehauvas li no tias: “[Yehauvas], thov koj mloog kuv tej lus thov! Koj yog tus uas ncaj ncees thov koj mloog kuv tej lus thov, koj yog tus uas muaj lub siab ncaj thov koj teb kuv tej lus thov!.” (Phau Ntawv Nkauj 143:1) Yehauvas thiaj li teb Daviv tej lus thov thiab cawm nws dim. (1 Xamuyees 19:10, 18-20; 2 Xamuyees 5:17-25) Daviv thiaj li hais li no tias: “Nws nyob ze txhua tus uas thov nws.” Peb los yeej tso plhuav tau rau Yehauvas ib yam li Daviv thiab.​—Phau Ntawv Nkauj 145:18.

5. Piav seb Yehauvas puas teb cov uas teev tiam nws tej lus thov raws li lawv xav tseg. (Saib daim duab.)

⁵ Muaj tej zaum Yehauvas tsis teb peb raws li peb xav tseg. Xws li tus tub txib Povlauj thov kom Vajtswv tshem nws tus mob uas zoo yam li tus “pos chob [nws] lub cev.” Povlauj thov Vajtswv peb zaug txog qhov teeb meem no. Yehauvas yeej teb Povlauj tiam sis tsis raws li tej uas Povlauj tau xav tseg. Yehauvas tsis muab Povlauj qhov teeb meem tshem mus tiam sis Yehauvas ntxiv dag ntxiv zog kom Povlauj muaj siab teev tiam Nws.​—2 Kauleethaus 12:7-10.

6. Muaj qee lub sij hawm, vim li cas zoo li Yehauvas tsis teb peb tej lus thov?

⁶ Muaj qee lub sij hawm, Yehauvas yuav teb peb tej lus thov tsis raws li peb xav tseg. Txawm li ntawd los nco ntsoov tias Yehauvas yeej paub tias yuav pab peb li cas thiaj zoo. “Nws ua tau ib puas tsav yam ntau dua li tej uas peb thov thiab tej uas peb xav.” (Efexus 3:20) Yog li ntawd, tej zaum Yehauvas yuav teb peb tej lus thov raws li tej uas peb tsis tau xav tseg los sis ib yam twg uas peb tsis ras txog.

7. Piav seb vim li cas peb yuav tau hloov tej yam uas peb thov txog.

⁷ Peb yuav tau hloov tej yam uas peb thov txog thaum peb paub tej yam twg haum Yehauvas siab. Xws li muaj ib tug kwv tij npe hu ua Mavteem Photxinkaw (Martin Poetzinger). Tom qab nws yuav poj niam tsis tau ntev, nws raug ntes coj mus kaw rau hauv lub yeej Natxi (Nazi). Thaum thawj, nws thov Yehauvas tso nws tawm xwv nws thiaj tau saib xyuas nws tus poj niam thiab tau mus qhia txoj xov zoo. Tom qab ob lub lim tiam, nws pom tias Yehauvas tsis teb nws tej lus thov. Yog li ntawd, nws thiaj li thov Yehauvas li no tias: “Yehauvas, thov qhia kuv seb koj xav kom kuv ua dab tsi.”  Nws thiaj li xav txog tej yam uas cov kwv tij nyob hauv lub yeej raug. Muaj coob leej ntau tus yeej txhawj txog lawv poj niam thiab me nyuam tib yam nkaus. Kwv Tij Photxinkaw thiaj thov Yehauvas li no tias: “Yehauvas, ua tsaug uas koj muab tes hauj lwm tshiab no rau kuv ua. Pab kom kuv txhawb tau cov kwv tij no lub zog.” Nws nyob tau cuaj lub xyoos rau hauv lub yeej no txhawb cov kwv tij.

8. Peb yuav tau nco ntsoov li cas thaum peb thov Vajtswv?

⁸ Peb yuav tau nco ntsoov tias Yehauvas lub ntsiab yog li cas thiab nws yuav ua kom muaj li nws tau teem tseg. Ib qho ntawm Yehauvas lub ntsiab yog rhuav tshem tag nrho tej teeb meem uas tib neeg niaj hnub raug xws li cua daj cua dub, kab mob kev nkeeg, thiab kev ploj kev tuag. Yehauvas yuav siv nws lub Nceeg Vaj los kho tej no huv tib si. (Daniyees 2:44; Tshwmsim 21:3, 4) Cheem lub sij hawm ntawd tseem tsis tau txog, Yehauvas cia Xatas kav lub qab ntuj no. b (Yauhas 12:31; Tshwmsim 12:9) Yog hais tias Yehauvas kho noob neej tej teeb meem tam sim no ces tib neeg yuav xav tias Xatas kav los kuj zoo thiab. Cheem peb tseem tos kom txog thaum Yehauvas ua raws li nws tej lus cog tseg, Yehauvas yeej nrhiav nrhw kev los mus pab peb. Cia peb mus tham txuas ntxiv seb nws pab peb li cas rau li cas.

9. Piav seb Yehauvas pab peb li cas thaum peb yuav txiav txim siab ua ib yam twg.

⁹ Nws muab tswv yim rau peb. Yehauvas cog lus tias nws yuav muab tswv yim kom peb txawj txiav txim siab ua yam ub yam no. Thaum yuav txiav txim siab rau ib yam twg hauv peb lub neej, peb yuav tsum tau Yehauvas lub tswv yim los pab peb, xws li thaum peb xav yuav txij nkawm los tsis yuav. (Yakaunpaus 1:5) Cia peb mus piav txog ib tug muam ntseeg npe hu ua Paj Dawb. c Nws yeej txaus siab hlo ua ib tug tho kev ces nws txawm pom ib tug kwv tij ntseeg. Nws hais tias: “Wb ob leeg txawm sib muaj siab. Yog li ntawd, kuv yuav tau txiav txim siab seb yuav ua li cas. Kuv thiaj li thov Yehauvas tau ntev loo kom nws pab seb yuav ua li cas. Kuv paub tias Yehauvas yuav tsis txiav txim siab rau kuv tiam sis kuv xav kom nws coj kuv txoj hau kev.” Nws xam pom tias Yehauvas yeej teb nws tej lus thov thiab tsav tswv yim rau nws, yeeb vim yog nws mus tshawb nrhiav tej ntaub ntawv uas Yehauvas lub koom haum luam tawm uas teb tau tej uas nws xav paub txog. Nws kuj mloog tej lus uas nws niam tau qhia rau nws thiab. Nws tau muab tej no ua tib zoo xav ces nws thiaj txiav txim siab ua tau qhov zoo qhov yog lawm.

10. Piav seb raws li Filipis 4:13, Yehauvas tau ua dab tsi los pab cov teev tiam nws. (Saib daim duab.)

 ¹⁰ Nws ntxiv dag ntxiv zog kom peb thev taus. Zoo ib yam li Yehauvas tau pab tus tub txib Povlauj, Yehauvas yuav ntxiv dag ntxiv zog kom peb thev taus tej kev sim siab uas peb raug. (Nyeem Filipis 4:13.) Cia peb mus piav txog ib tug kwv tij hu ua Npis seb Yehauvas tau pab nws thev li cas. Thaum Npis tseem hluas, Npis lawv tsev neeg nyob rau ib lub yeej thoj nam hauv Afika (Africa). Npis hais tias: “Kuv thov Yehauvas tsis so kom Yehauvas pab kuv ua tej yam uas nws pom zoo. Yehauvas teb kuv tej lus thov, nws thiaj li pub kom kuv muaj lub siab tus, ua siab tawv mus qhia txoj xov zoo, thiab pub kom muaj tej ntaub ntawv los tsav kuv txoj kev ntseeg. Kuv nyeem txog cov kwv tij nkauj muam lub neej seb Yehauvas tau pab lawv thev li cas rau li cas mas kuj pab tau kuv tuav rawv kuv txoj kev ntseeg ib yam li ntawd.”

11-12. Yehauvas siv cov kwv tij nkauj muam ntseeg los teb peb tej lus thov li cas? (Saib daim duab.)

¹¹ Nws siv peb cov kwv tij nkauj muam ntseeg. Hmo ua ntej Yexus muab nws txoj sia theej tib neeg lub txhoj, nws thov Vajtswv heev kawg li. Nws thov Vajtswv kom tsis txhob cia luag xav tias nws yog ib tug thuam Vajtswv. Txawm Vajtswv tsis teb Yexus cov lus thov los nws kuj tso ib tug tub txib saum ntuj los txhawb Yexus lub zog. (Lukas 22:42, 43) Niaj hnub no Yehauvas kuj siv cov kwv tij nkauj muam ntseeg hu xov tooj tuaj los sis tuaj txhawb peb lub zog. Cia peb nco ntsoov siv “tej lus zoo” los mus txhawb cov ntseeg.​—Pajlug 12:25.

¹² Cia peb mus piav txog ib tug muam npe hu ua Khu. Ob peb lub lim tiam tom qab uas nws tus txiv tag sim neej lawm, Khu nyob mluas mlob hauv tsev xwb. Nws txawm quaj quaj heev, xav tau ib tug nrog nws sib txuas lus. Nws hais tias: “Kuv tsis pom qab hu leej twg, kuv thiaj li thov Yehauvas. Thaum kuv tseem quaj quaj thiab tab tom thov, kuv lub xov tooj txawm nrov leeb tuaj. Yog ib tug txwj laus uas kuv paub nws zoo hu.” Tus txwj laus no thiab nws tus poj niam nplig tau Khu siab. Khu paub hais tias Yehauvas yog tus rub nkawd ob niam txiv siab kom hu tuaj.

13. Piav seb Yehauvas tau siv cov tib neeg tsis teev tiam nws los teb peb tej lus thov li cas.

 ¹³ Nws siv cov tib neeg tsis teev tiam nws. (Pajlug 21:1) Muaj tej thaum Yehauvas siv cov tib neeg uas tsis teev tiam nws los teb nws cov tib neeg tej lus thov. Xws li nws siv Vaj Ntxwv Ataxawxes los teb Nehemis cov lus thov kom Nehemis rov tau mus txhim kho lub nroog Yeluxalees. (Nehemis 2:3-6) Niaj hnub no los Yehauvas kuj siv cov uas tsis teev tiam nws los mus pab nws cov tib neeg thaum lawv xav tau kev pab.

14. Koj khaws tau li cas los ntawm tej uas Kiab raug? (Saib daim duab.)

¹⁴ Muaj ib tug muam npe hu ua Kiab xam pom tias Yehauvas siv tus kwv tshuaj los teb nws tej lus thov. Nws tus tub muaj ntau yam mob. Thaum nkawd tus tub poob saum ib qho chaw siab siab raug nws sab heev, nkawd ob niam txiv yuav tau tso nkawd txoj hauj lwm tseg los mus tu nws. Qhov no ua rau nkawd tsis muaj nyiaj muaj txiaj siv. Kiab thiaj li hais tias nws thev tsis taus tej teeb meem nws raug no ntxiv li lawm. Nws thiaj li qhib siab lug thov Yehauvas pab. Tus kws tshuaj thiaj li nrhiav kev los mus pab nkawd ob niam txiv. Vim li ntawd, nkawd thiaj thov tau kev pab cuam ntawm nom tswv thiab nrhiav tau ib qho chaw nyob. Tom qab ntawd, Kiab thiaj hais tias: “Wb pom tias Yehauvas yeej pab wb kawg nkaus li. Nws yeej ‘teb peb tej lus thov.’”​—Phau Ntawv Nkauj 65:2.

15. Ua li cas ib tug muam ho ras tias Vajtswv twb teb nws cov lus thov lawm?

¹⁵ Vajtswv tsis ua txuj ci los teb peb tej lus thov. Tiam sis Vajtswv tsuas teb peb raws li tsim nyog xwb xwv peb thiaj muab siab npuab nws. Yog li ntawd, peb yuav tau tos seb Yehauvas yuav teb peb li cas rau li cas. Muaj ib tug muam npe hu ua Yias uas xav hais tias Yehauvas tsis teb nws tej lus thov ces nws thiaj li muab tej yam nws thov sau tseg. Tau ib nyuag ntu nws mam li rov muab nws phau ntawv los saib, nws thiaj xam pom tias Yehauvas twb teb nws tej lus thov yuav luag tas. Muaj qee yam nws thov nws twb tsis nco qab lawm tiam sis Yehauvas yeej teb huv huv rau nws. Qhov no qhia rau peb tias peb yuav tau nco ntsoov xav txog tej lus peb thov seb Yehauvas tau teb li cas lawm.​—Phau Ntawv Nkauj 66:19, 20.

16. Peb yuav tsum muaj kev ntseeg li cas thaum peb thov Vajtswv?(Henplais 11:6)

¹⁶ Peb yuav tau muaj kev ntseeg thaum peb thov Yehauvas thiab yog Yehauvas teb peb  li cas los peb yuav tau txais yuav li ntawd. (Nyeem Henplais 11:6.) Cia peb mus piav txog Vam thiab nws tus poj niam Xis. Nkawd xav mus ua hauj lwm nyob rau hauv Npe-ee. Vam hais tias: “Wb twb rau npe tau ntau ntau xyoo thiab thov Yehauvas tas zaj tas zog tias wb xav mus ua hauj lwm hauv Npe-ee tiam sis wb tsis muaj npe tawm mus ua li.” Vam thiab nws poj niam nkawd tso siab tias Yehauvas paub zoo tias yuav siv nkawd li cas rau li cas. Nkawd thiaj li kub siab lug ua ob tug tho kev mus pab rau tej cheeb tsam uas tsis muaj cov ntseeg coob pes tsawg thiab mus tsa vaj tsa tsev rau Yehauvas lub koom haum. Niaj hnub no nkawd mus saib xyuas thaj tsam. Vam thiaj hais tias: “Yehauvas tsis teb wb cov lus thov raws li wb xav tseg tiam sis nws yeej teb wb zoo tshaj li qhov uas wb xav tau.”

17-18. Raws li Phau Ntawv Nkauj 86:6, 7, peb tso siab tau li cas?

¹⁷ Nyeem Phau Ntawv Nkauj 86:6, 7. Daviv paub zoo tias Yehauvas yeej hnov nws tej lus thov thiab yeej yuav teb nws tej lus thov. Koj los yeej tso siab tau tib yam li ntawd. Cov yam ntxwv uas hais nyob rau hauv zaj kawm no pab tau peb tias Yehauvas yuav tsav tswv yim thiab pub dag zog kom peb thev taus tej uas peb raug. Tej zaum nws kuj yuav siv cov kwv tij nkauj muam los sis cov uas tsis teev tiam nws los pab peb.

¹⁸ Txawm Yehauvas tsis teb peb raws li peb xav tseg los peb yeej tso siab plhuav tias nws yeej yuav teb peb tej lus thov. Nws yuav teb peb li tsim nyog thiab lub sij hawm uas peb xav tau kev pab tshaj. Yog li ntawd rau siab ntso thov Vajtswv, ntseeg tias nws hnov koj tej lus thov, thiab tso siab plhuav tias Yehauvas yeej yuav saib xyuas koj tam sim no thiab thaum txog lub qab ntuj tshiab, nws yuav pub kom txhua tus “muaj txaus nkaus thiab txaus siab rau tej uas lawv muaj.”​—Phau Ntawv Nkauj 145:16.