1-2. (1) Muaj ib tug neeg sau li cas txog Yexus? (2) Hauv zaj no peb yuav tham txog dabtsi?

NIAJ HNUB NO muaj neeg coob heev hais tias lawv ntseeg Yexus tiamsis lawv ho tsis ua li nws tej lus qhia. (2 Timautes 4:3, 4) Muaj ib tug neeg sau tias txawm muaj ib tug qhia peb ib yam li Yexus niaj hnub nimno los peb yeej yuav tsis lees yuav nws thiab.

² Thaum ub muaj neeg coob tus hnov Yexus tej lus qhuab qhia thiab pom nws ua txujci tiamsis lawv yeej tsis ntseeg nws. Zaj tas los, peb tham txog 4 yam uas ua rau neeg tsis kam lees yuav Yexus ua tus Mexiyas. Hauv zaj no peb yuav tham txog 4 yam ntxiv thiab seb yog vim li cas niaj hnub no tibneeg thiaj tsis kam mloog Yehauvas Cov Timkhawv. Thiab peb yuav tham seb yuav ua li cas peb thiaj tsis tso Yehauvas tseg. Zaj no kuj yuav pab tau cov uas twb niaj hnub nrog Yehauvas Cov Timkhawv lawm tiamsis ho tsis tau xav ua ib tug Timkhawv.

3. Yexus ua li cas es ib txhia neeg thiaj tsis kam mloog nws?

³ Thaum Yexus tseem nyob hauv ntiajteb no nws nrog cov neeg nplua nuj thiab cov neeg tseem ceeb koom tsum tiamsis nws kuj siv sijhawm los nrog cov neeg txom nyem thiab cov luag saib tsis taus ua ke thiab. Tsis tas li ntawd xwb nws hlub cov uas luag hais tias yog neeg txhaum. Twb yog vim li ntawd cov neeg muab hlob thiaj tsis kam mloog Yexus thiab nug Yexus cov thwjtim tias: “Ua li cas nej nrog cov neeg sau se thiab  cov neeg txhaum noj haus ua ke?” Yexus thiaj teb lawv hais tias: “Cov neeg uas tsis muaj mob, lawv yeej tsis mus cuag kws tshuaj, tsuas yog cov neeg muaj mob thiaj mus cuag kws tshuaj xwb. Kuv tsis yog los hu cov neeg ncaj ncees, tiamsis kuv los hu cov neeg txhaum, kom lawv tso lawv tej kev txhaum tseg.”​—Lukas 5:29-32.

4. Raws li Yaxayas cov lus faj lem, yeej tsim nyog cov neeg Yudais paub li cas txog tus Mexiyas?

⁴ Vajtswv Txojlus hais li cas? Ntev ua ntej tus Mexiyas los, tus cev Vajtswv lus Yaxayas twb hais lawm tias: “Lawv saib tsis taus nws. Tsis muaj leejtwg tig saib nws. Lawv tsis quavntsej nws ib yam li nws tsis tsimtxiaj dabtsi.” (Yaxayas 53:3) Raws li zaj lus faj lem no ces yeej tsim nyog cov neeg Yudais paub lawm tias tibneeg yuav tsis quav ntsej tus Mexiyas.

5. Niaj hnub no tibneeg saib Yehauvas cov tub qhe zoo li cas?

⁵ Niaj hnub no los peb yeej pom tias cov thawj coj ntawm tej kev ntseeg yeej nyiam cov tswv cuab uas yog neeg tseem ceeb, neeg nplua nuj, lossis cov neeg txawj ntse xwb txawm hais tias cov neeg no tsis coj lawv lub neej raws li Vajtswv Txojlus. Tiamsis lawv saib tsis taus Yehauvas cov tub qhe uas rau siab ntso ua Yehauvas tes haujlwm thiab ua lub neej dawb huv vim tibneeg feem coob saib lawv tsis tseem ceeb dabtsi. Paulus thiaj hais tias Vajtswv xaiv cov neeg tsis tseem ceeb los ua nws cov tub qhe. (1 Kauleethaus 1:26-29) Tiamsis Yehauvas yeej saib lawv muaj nqis heev.

6. Peb yuav xyaum Yexus tus qauv hauv Mathais 11:25, 26 li cas?

⁶ Yuav ua li cas peb thiaj tsis poob peb txojkev ntseeg? (Nyeem Mathais 11:25, 26.) Luag tej yuav thuam tias Yehauvas cov neeg tsis tseem ceeb thiab tsis txawj ntse tiamsis tsis txhob mus mloog lawv. Nco ntsoov tias Yehauvas tsuas siv cov neeg uas txo hwjchim los ua nws tes haujlwm xwb. (1 Petus 5:5) Thiab ua zoo xav seb Yehauvas cov neeg ua tau ntau npaum li cas niaj hnub nimno.

7. Vim li cas Yexus thiaj hais tias cov Falixais yog cov neeg ncauj lus zoo siab phem thiab thaum Yexus cem lawv, lawv xav li cas xwb?

⁷ Yexus tsis ntshai rhuav cov Falixais uas ncauj lus zoo siab phem vim lawv tsis cob qhia Vajtswv cov neeg kom paub teev tiam Vajtswv. Cov Falixais qhia ib yam tiamsis lawv ho ua lawv ib yam. Lawv thuam Yexus cov thwjtim tias lawv tsis ntxuav tes raws li kevcai ces Yexus thiaj cem lawv tias ua cas lawv ho tsis saib xyuas lawv niam lawv txiv li Vajtswv Txojlus hais. (Mathais 15:1-11) Thaum Yexus cov thwjtim pom Yexus cem cov Falixais, lawv thiaj hais rau Yexus tias: “Koj tsis paub hais tias tej lus uas koj hais ntawd ua rau cov Falixais chim kawg li los?” Yexus teb lawv tias: “Txhua tsob ntoo uas tsis yog kuv Txiv tus uas nyob saum ntuj cog, yuav muab rho huv tibsi povtseg. Puam chawj lawv! Lawv yog cov thawjcoj uas coj cov digmuag; yog ib tug digmuag coj ib tug digmuag kev, ces nkawd yeej yuav poob qhov xwb.” (Mathais 15:12-14) Yexus yeej tsis ntshai qhia qhov tseeb txawm tias qhov tseeb yuav ua rau cov Falixais chim.

8. Yexus puas qhia tias txhua txojkev ntseeg qhia raws li Vajtswv lub siab nyiam?

⁸ Yexus hais tias muaj coob tus yuav taug txojkev dav uas yuav coj lawv mus raug kev puam tsuaj tiamsis txojkev nqaim uas yuav coj mus tau txojsia ib txhis tsis kawg tsuas muaj tus puav taug xwb. (Mathais 7:13, 14, TT ) Muaj ib txhia ua zoo li lawv teev tiam Vajtswv tiamsis tsis yog li ntawd. Yexus qhia tias tsis yog txhua txojkev ntseeg yuav qhia raws li Vajtswv lub siab nyiam. Yexus thiaj ceeb toom  tias: “Nej yuav tsum ceevfaj cov cev lus cuav; thaum lawv tuaj cuag nej, lawv ua txuj ua li lawv yog cov yaj, tiamsis lawv lub siab phem ib yam li hma. Thaum nej pom lawv tes haujlwm nej yuav paub.”​—Mathais 7:15-20.

9. Yexus rhuav tej kev ntseeg cuav li cas?

⁹ Vajtswv Txojlus hais li cas? Muaj lus faj lem hauv phau Vajlugkub tias tus Mexiyas yuav mob siab rau Yehauvas lub tuam tsev. (Phau Ntawv Nkauj 69:9; Yauhas 2:14-17) Twb yog vim li ntawd Yexus thiaj rhuav tej kev ntseeg cuav. Cov Falixais ntseeg tias tibneeg muaj ib tug plig uas tsis txawj tuag tiamsis Yexus hais tias thaum ib tug neeg tuag ces zoo li nws tsaug zog lawm xwb. (Yauhas 11:11) Cov Xadukais ntseeg tias cov tuag lawm yuav sawv tsis tau rov qab los tiamsis Yexus ho tsa tau nws tus phoojywg Laxalus sawv rov los. (Yauhas 11:43, 44; Tes Haujlwm 23:8) Cov Falixais ntseeg tias peb tsuas ua neej raws li peb txoj hmoo xwb tiamsis Yexus qhia tias peb muaj cuab kav xaiv tau tias peb yuav teev tiam Vajtswv los tsis teev tiam.​—Mathais 11:28.

10. Vim li cas niaj hnub no muaj coob tus thiaj tsis kam mloog tej peb qhia?

¹⁰ Niaj hnub no los peb yeej pom tias muaj coob tus tsis kam mloog peb vim peb muab phau Vajlugkub los qhia rau lawv tias lawv txojkev ntseeg tsis qhia raws li phau Vajlugkub. Xws li cov xibhwb ntawm ntau txojkev ntseeg qhia tias Vajtswv yuav rau txim rau cov neeg phem hauv ntuj tawg. Lawv siv lub tswvyim no los tswj lawv cov neeg. Tiamsis peb qhia tias Vajtswv Yehauvas hlub tibneeg heev, nws yeej tsis ua li ntawd. Cov xibhwb ntawd kuj qhia tias tibneeg muaj ib tug plig uas tsis txawj tuag tiamsis peb qhia tias Vajtswv Txojlus tsis qhia li ntawd, rau qhov yog muaj li lawv hais tiag ces Vajtswv tsis tas yuav tsa cov tuag sawv rov qab los. Thiab muaj ntau txojkev ntseeg qhia tias tibneeg tsuas los ua neej raws li lawv daim ntawv xwb tiamsis peb qhia tias peb muaj cuab kav xaiv tias peb yuav ua peb lub neej li cas thiab peb yuav teev tiam Vajtswv los tsis teev tiam. Thaum peb qhia li ntawd ua rau cov xibhwb ntawd npau taws heev.

11. Raws li Yexus cov lus hauv Yauhas 8:45-47, Vajtswv xav kom nws cov neeg ua li cas?

 ¹¹ Yuav ua li cas peb thiaj tsis poob peb txojkev ntseeg? Yog peb nyiam qhov tseeb ces peb yuav mloog Vajtswv lus. (Nyeem Yauhas 8:45-47.) Peb tsis zoo li Dab Ntxwg Nyoog es tsis yuav qhov tseeb thiab peb yuav tsis ua ib yam dabtsi uas yuav rhuav peb txojkev ntseeg. (Yauhas 8:44) Vajtswv xav kom nws cov neeg “ntxub txojkev ua phem ua qias thiab muab siab npuab qhov uas ua zoo” ib yam li Yexus.​—Loos 12:9; Henplais 1:9.

12. Vim li cas qhov uas Yexus tuag saum tus ncej ntoo thiaj ua rau cov Yudais coob tus tsis lees yuav Yexus?

¹² Muaj cov neeg Yudais coob tus tsis ntseeg Yexus thiab tsis yuav nws ua tus Mexiyas los twb yog vim nws tuag saum tus ncej ntoo li tus neeg raug txim. (2 Kevcai 21:22, 23, TT ) Twb yog vim li ntawd Paulus thiaj hais tias: ‘Peb qhia zaj uas Yexus Khetos raug ntsia rau saum tus ncej ntoo, zaj ntawd ua rau cov Yudais chim.’​—1 Kauleethaus 1:23.

13. Cov Yudais uas tsis lees yuav Yexus ua tus Mexiyas ntseeg li cas?

¹³ Yexus yeej tsis tau ua txhaum ib qho li. Nws raug iab liam thiab raug kev tsis ncaj ncees tiamsis cov neeg Yudais ib txhia tsis ntseeg li ntawd. Cov neeg uas hais Yexus rooj plaub, lawv muab hais tsuag tsuag kom tiav xwb, lawv twb tsis ua raws li cov neeg Yudais txojcai hais plaub. (Lukas 22:54; Yauhas 18:24) Lawv tsis ua zoo soj ntsuam seb tej uas luag iab liam Yexus puas muaj tiag, lawv tsuas “nrhiav lus nkaug Yexus” kom lawv thiaj tau muab Yexus tua pov tseg xwb. Thaum lawv ua tsis tau li ntawd, tus pov thawj hlob thiaj thom Yexus kom nws hais lus yuam kev lawv thiaj li phua txim tau rau nws. Tej uas lawv ua no yeej tsis raug kev raug cai lawm. (Mathais 26:59; Malakaus 14:55-64) Thiab thaum Yexus sawv rov qab los, los lawv “muab nyiaj ntau rau cov tubrog” Loos uas zov Yexus lub qhov ntxa kom lawv mus dag tias Yexus cov thwjtim tuaj nyiag nws lub cev lawm.​—Mathais 28:11-15.

14. Vajtswv Txojlus hais li cas txog tus Mexiyas?

¹⁴ Vajtswv Txojlus hais li cas? Txawm hais  tias cov neeg Yudais nyob Yexus tiam coob tus tsis xav tias tus Mexiyas yuav tsum tuag los Vajtswv Txojlus twb hais ua ntej lawm tias: “Nws txaus siab tso nws txojsia tseg, nws los nrog cov neeg txhaum nyob; nws ris sawvdaws lub txim thiab thov tus Tswv zam lawv lub txim.” (Yaxayas 53:12) Yog li ntawd, qhov uas Yexus raug tua li tus neeg muaj txim yeej tsis tsim nyog ua rau cov Yudais tsis kam lees yuav Yexus ua tus Mexiyas.

15. Yehauvas Cov Timkhawv raug iab liam li cas es ib txhia neeg thiaj tsis kam mloog lawv?

¹⁵ Niaj hnub nimno los Yehauvas Cov Timkhawv yeej raug iab liam ib yam li Yexus. Xws li xyoo 1930 txog 1950 nyob hauv tebchaws Mekas, peb yuav tsum tau mus hais ntau rooj plaub tiv thaiv peb txojkev pe hawm Vajtswv. Muaj cov neeg tu plaub ntug ib txhia tsis nyiam peb kiag li. Hos hauv lub xeev Khuas Npev tebchaws Kanada (Quebec, Canada) lub tshawj Kav Tos Liv thiab cov nom tswv sib koom tes tawm tsam peb tes haujlwm. Lawv txhom peb cov kwvtij nkauj muam coob tus mus kaw vim lawv qhia txog Vajtswv lub Nceeg Vaj rau kwvtij zej zog. Thaum cov Natxi tseem kav tebchaws Ntsaws Mes Nis, lawv coj peb cov kwvtij hluas coob tus mus tua. Niaj hnub no nyob tebchaws Lav Xias (Russia), nom tswv txwv thiab iab liam tias peb phau Vajlugkub qhia tibneeg ua phem xwb vim peb muaj Yehauvas lub npe nyob rau hauv. Lawv thiaj txhom peb cov kwvtij coob tus mus kaw thaum lawv mus qhia Vajtswv Txojlus rau lwm tus.

16. Raws li 2 Petus 2:1 hais, vim li cas peb yuav tsum tsis txhob mus mloog tej lus xaiv lus cua txog Yehauvas cov neeg?

¹⁶ Yuav ua li cas peb thiaj tsis poob peb txojkev ntseeg? Peb yuav tsum paub qhov tseeb. Thaum Yexus muab nws zaj lus qhuab qhia saum roob nws ceeb toom cov uas tuaj mloog nws tias yuav muaj neeg “dag iab hiam txhua yam lus phem” txog lawv. (Mathais 5:11, TT ) Tej lus dag ntawd yog los ntawm Xatas los, nws yog tus cob qhia cov uas tsis ntseeg Vajtswv mus iab liam thiab hais lus xaiv lus cua txog cov uas nyiam qhov tseeb. (Tshwmsim 12:9, 10) Peb yuav tsum tsis txhob mloog peb cov yeeb ncuab tej lus dag thiab tsis txhob cia lawv ua rau peb ntshai teev tiam Vajtswv lossis ua rau peb txojkev ntseeg tsis ruaj khov.​—Nyeem 2 Petus 2:1.

17. Tej uas Yexus cov tubtxib ua hmo ua ntej nws tuag yuav ua rau ib txhia neeg xav li cas?

¹⁷ Hmo ua ntej Yexus tuag nws ib tug tubtxib ntxeev siab rau nws. Ib tug tsis lees yuav nws 3 zaug, hos dua li cov ces khiav tag tso nws tseg. (Mathais 26:14-16, 47, 56, 75) Tiamsis Yexus twb paub ua ntej lawm tias yuav muaj li ntawd. (Yauhas 6:64; 13:21, 26, 38; 16:32) Muaj ib co neeg thaum lawv pom Yexus cov tubtxib ua li ntawd ces tej zaum lawv yuav tsis xav los ua Yexus ib tug thwjtim.

18. Cov lus faj lem twg muaj tiav rau lub sijhawm ua ntej Yexus tuag?

¹⁸ Vajtswv Txojlus hais li cas? Ntau pua xyoo ua ntej Yexus los hauv ntiajteb no Yehauvas twb hais lawm tias yuav muaj neeg ntxeev siab rau tus Mexiyas thiab luag yuav them 30 lub nyiaj rau tus ntawd. (Xakhaliyas 11:12, 13) Tus ntawd yuav yog Yexus ib tug phoojywg zoo. (Phau Ntawv Nkauj 41:9) Tus cev Vajtswv lus Xakhaliyas sau tias: ‘Rab ntaj, koj cia li mus tua tus tub yug yaj uas ua haujlwm rau kuv! Cia li muab nws tua kom tuag, ces cov yaj yuav tawg khiav ri sua rau ub rau no.’ (Xakhaliyas 13:7) Thaum cov uas hlub Yehauvas pom muaj tiav li no rau Yexus yuav tsis ua rau lawv plam lawv txojkev ntseeg tiamsis yuav haj yam txhawb lawv txojkev ntseeg ntxiv xwb.

19. Cov uas hlub Yehauvas paub hais tias yuav muaj li cas rau lub caij peb nyob no?

 ¹⁹ Peb yeej pom tias niaj hnub no los Yehauvas Cov Timkhawv muaj tus puav uas peb paub zoo kuj ntxeev siab rau Yehauvas lawm thiab. Tsis tas li ntawd lawv tseem mus ntxias kom lwm tus tso Yehauvas tseg. Lawv hais lus dag thiab hais lus phem txog Yehauvas Cov Timkhawv hauv ntaub ntawv xov xwm, hauv xov tooj cua, hauv TV thiab saum huab saum cua. Tiamsis cov uas hlub Yehauvas yuav tsis mloog lawv rau qhov Vajtswv Txojlus twb qhia lawm hais tias yuav muaj cov neeg ntxeev siab li ntawd.​—Mathais 24:24; 2 Petus 2:18-22.

20. Yuav ua li cas peb thiaj tsis qaug rau cov neeg uas ntxeev siab rau Yehauvas tej lus dag ntxias? (2 Timautes 4:4, 5)

²⁰ Yuav ua li cas peb thiaj tsis poob peb txojkev ntseeg? Peb yuav tsum rau siab ntso kawm Vajtswv Txojlus, thov Vajtswv tsis tu ncua, thiab ua tes haujlwm uas Yehauvas muab rau peb. (Nyeem 2 Timautes 4:4, 5.) Yog peb txojkev ntseeg ruaj khov ces peb yuav tsis txhawj thaum peb hnov luag tej hais tsis zoo txog Yehauvas Cov Timkhawv. (Yaxayas 28:16) Yog peb hlub Yehauvas, hlub peb cov kwvtij nkauj muam, thiab nyiam Vajtswv Txojlus ces peb yuav tsis mus mloog cov neeg uas ntxeev siab rau Yehauvas tej lus dag ntxias.

21. Txawm hais tias niaj hnub no muaj neeg coob tus tsis kam mloog txoj xov uas peb tshaj tawm los peb paub li cas?

²¹ Nyob rau Yexus tiam, txawm muaj cov tsis ntseeg Yexus los kuj muaj coob tus los ntseeg thiab. Xws li muaj ib tug thawj ntawm cov pov thawj thiab “muaj cov povthawj ntau leej los ntseeg Yexus.” (Tes Haujlwm 6:7; Mathais 27:57-60; Malakaus 15:43) Niaj hnub no los muaj tsheej plhom leej los ntseeg Yexus vim lawv paub qhov tseeb hauv phau Vajlugkub thiab saib qhov tseeb rau nqi. Vajtswv Txojlus hais tias: “Cov neeg uas nyiam koj txoj kevcai nyob tso siab plhuav, thiab tsis muaj ib yam dabtsi ua rau lawv dawm ntog li.”​—Phau Ntawv Nkauj 119:165.