Hmo ntawd ua rau kuv pib xav txog Vajtswv tiamsis cia kuv qhia nej mentsis txog thaum kuv tseem yau seb yog vim li cas kuv thiaj xav paub xav kawm txog Vajtswv tso.

Kuv yug nyob hauv lub zos Nkej Nam (Guesnain) xyoo 1937 hauv tebchaws Fab Kis. Kuv txiv yog ib tug neeg khawb thee thiab nws qhia kuv tias kuv yuav tsum ua neeg nquag thiab ua neeg ncaj ncees. Kuv txiv pom tias luag ua tsis ncaj ncees rau cov neeg khawb thee thiab nws xav pab lawv. Nws thiaj mus koom tej koom haum uas nrhiav kev ncaj ncees rau cov neeg khawb thee. Kuv txiv kuj npau taws heev rau cov txiv plig vim lawv twb muaj nyiaj muaj txiaj los lawv tseem tuaj thov cov neeg khawb thee uas twb tsis muaj li lawv kom muab zaub mov thiab muab nyiaj rau lawv. Kuv txiv ntxub lawv heev dhau lawm ces kuv txiv yeej tsis qhia kuv txog Vajtswv li.

Kuv ib txwm tsis nyiam kev tsis ncaj ncees li kuv txiv thiab. Kuv tsis nyiam qhov uas luag saib tsis taus cov neeg txawv tebchaws hauv Fab Kis teb. Kuv nyiam ncaws pob nrog cov menyuam txawv tebchaws thiab kuv niam los twb tsis yog neeg  Fab Kis thiab. Kuv xav kom txhua haiv neeg nyob tau ua ke thiab muaj kev sib haum xeeb.

Kuv raug nom tswv yuam mus ua tub rog xyoo 1957. Kuv thiaj tau mus nyob saum roob hauv tebchaws Antsawlias li kuv hais puag ta. Thaum kuv thov Vajtswv tas ces kuv txawm pom ib tug nees luav qus, nws tsis yog ib tug yeeb ncuab li kuv ntshai mas kuv zoo siab heev. Txij hnub ntawd los kuv txawm pib xav txog kuv lub neej tias Vajtswv tsim tibneeg los ua dabtsi, nws puas hlub peb tiag, thiab puas yuav muaj ib hnub uas yuav tsis muaj tsov muaj rog li lawm.

Thaum kuv rov los tsev los xyuas kuv niam thiab kuv txiv, kuv ntsib Yehauvas ib tug Timkhawv, nws muab tau ib phau Vajlugkub Kav Tos Liv ua lus Fab Kis rau kuv. Kuv pib nyeem phau Vajlugkub no thaum kuv rov qab mus txog Antsawlias. Ib nqi Vajlugkub uas kuv nyiam heev yog Tshwmsim 21:3, 4 uas hais tias: “Vajtswv twb los nrog neeg nyob lawm. . . . Nws yuav so lawv tej kua muag huv tibsi mus. Tej kev tuag, kev ntxhov siab, kev quaj ntsuag thiab kev mob kev nkeeg yuav tsis muaj ib zaug li lawm.” * Tsis tau muaj leejtwg qhia kuv txog tej no thiab thaum ntawd kuv yeej tsis paub txog Vajtswv thiab phau Vajlugkub li ces kuv thiaj xav tias xyov puas yuav muaj li ntawd tiag.

Xyoo 1959 kuv tsis ua tub rog lawm. Thaum ntawd kuv ntsib ib tug Timkhawv hu ua Faleexua (François). Nws qhia kuv ntau yam txog phau Vajlugkub. Nws qhia kuv tias Vajtswv lub npe hu ua Yehauvas. (Khiav Dim 3:14, cov lus hauv qab taw qhia) Nws kuj qhia kuv ntxiv tias Yehauvas yuav ua kom lub ntiajteb no muaj kev ncaj ncees, nws yuav muab lub ntiajteb kho ua ib lub vaj kaj siab, thiab kom muaj tiav raws li Tshwmsim 21:3, 4 hais.

Tej nws qhia kuv no yeej txaus ntseeg thiab raug kuv siab kawg tiamsis kuj ua rau kuv chim heev rau cov txiv plig thiab xav cem lawv vim lawv tsis qhia raws li phau Vajlugkub hais. Kuv siab tsis ntev thiab xav mus tawm tsam cov neeg tsis ncaj ncees kiag tamsim ntawd ib yam li kuv txiv.

Faleexua thiab kuv cov phoojywg tshiab uas yog Yehauvas Cov Timkhawv thiaj cheem kom kuv ua siab ntev. Lawv qhia kuv tias cov Khixatia tsis phua txim rau leejtwg tiamsis mus pab kom lwm tus los paub txog Vajtswv lub Nceeg Vaj xwb. Tes haujlwm no yog tes haujlwm uas Yexus ua thiab nws sam hwm kom nws cov thwjtim ua. (Mathais 24:14; Lukas 4:43) Phau Vajlugkub hais tias: ‘Tus uas ua Vajtswv tus tubtxib yuav tsum tsis txhob nrog luag sib cav sib ceg tiamsis nws yuav tsum hlub txhua tus.’ (2 Timautes 2:24) Yog li ntawd kuv yuav tau xyaum hais lus zoo rau lwm tus txawm hais tias lawv txoj kev ntseeg txawv kuv txoj.

Kuv hloov kuv lub neej thiab ua kevcai raus dej los ua Yehauvas ib tug Timkhawv hauv ib lub rooj sib txoos xyoo 1959. Thaum ntawd kuv ntsib ib tug muam hu ua Eentsaus (Angèle) uas kuv nyiam heev ces kuv txawm pib mus koom nws lub koom txoos. Wb sib yuav xyoo 1960. Nws yog ib tug pojniam zoo heev uas Yehauvas muab rau kuv.​—Pajlug 19:14.

Kuv kawm tau ntau yam los ntawm cov kwvtij uas paub tab thiab teev tiam Yehauvas los ntev lawm. Kuv kawm tau tias peb yuav tsum txo hwjchim es ua li Pajlug 15:22 (TT ) hais no: ‘Yog muaj ntau leej taw qhia mas haujlwm thiaj yuav tiav.’ Yog peb ua li no ces txawm peb tes haujlwm yuav nyuaj npaum li cas los peb yeej yuav ua tau.

Xyoo 1964, kuv pom tias yuav tsum tau ua li nqi Vajlugkub no hais. Thaum ntawd kuv nyuam qhuav mus ua ib tug saib xyuas thaj tsam ces kuv yuav tsum mus xyuas cov koom txoos thiab txhawb cov kwvtij kom muaj kev sib raug zoo nrog Yehauvas. Kuv ua yuam kev ntau yam vim kuv muaj 27 xyoo xwb thiab kuv tsis paub dabtsi ntau. Tiamsis kuv kuj kawm tau los ntawm tej uas kuv ua yuam kev, thiab cov kwvtij uas teev tiam Yehauvas ntev los lawm muab tswvyim pab kuv.

Thaum kuv nyuam qhuav pib ua ib tug saib xyuas thaj tsam es kuv mus xyuas ib lub koom txoos nyob Paslis (Paris) muaj ib tug kwvtij los nrog kuv tham twjywm.

Nws nug kuv tias, “Lu-is, thaum tus kws kho mob mus tom ib lub tsev, yog nws mus xyuas leejtwg?”

Kuv teb tias, “Nws mus xyuas tus uas muaj mob.”

Nws hais rau kuv tias: “Yeej yog li koj hais tiamsis kuv pom tias zoo li koj pheej mus nrog cov uas twb muaj kev sib raug zoo nrog Yehauvas ua ke xwb, xws li tus kwvtij saib xyuas lub koom txoos. Peb lub koom txoos muaj cov uas qaug zog, cov uas tuaj tshiab, thiab cov uas txaj txaj muag ntau tus. Lawv yuav zoo siab heev yog koj siv sijhawm mus nrog lawv tham thiab nrog lawv noj ib pluag mov tom lawv tsev.”

Yeej tsis yoojyim rau kuv lees tias kuv ua yuam kev lawm tiamsis kuv pom hais tias tus kwvtij ntawd hlub Yehauvas cov neeg heev, kuv thiaj txo hwjchim thiab ua li nws tej lus qhuab ntuas. Kuv ua Yehauvas tsaug uas muaj tus kwvtij ntawd los pab kuv.

Xyoo 1969 thiab 1973, lawv muab kuv ua tus saib xyuas zaub mov rau 2 lub rooj sib txoos rau ntau lub tebchaws nyob hauv lub zos Kuloonpawm (Colombes). Lub rooj sib txoos xyoo 1973 muaj li 60,000 tus uas peb yuav tsum ua zaub mov rau lawv noj 5 hnub nkaus! Kuv tsis paub xyov yuav ua li cas li tiamsis kuv rov ua li Pajlug 15:22 hais es kuv  mus sab laj nrog cov kwvtij uas ua dua los lawm tham. Kuv nrog cov tua tsiaj muag, cov ua teb zaub, cov ua zaub ua mov, thiab cov uas yuav khoom noj khoom haus rau lub rooj sib txoos tham. Txoj haujlwm no yeej tsis yoojyim tiamsis peb sawvdaws kuj sib pab ua tiav lawm thiab.

Xyoo 1973, lawv caw kuv pojniam wb mus ua haujlwm hauv ceg Npe-ee nyob Fab Kis teb. Kuv thawj txoj haujlwm yeej tsis yoojyim kiag rau qhov kuv yuav tau xa peb tej ntaub ntawv Vajlugkub mus rau cov kwvtij hauv tebchaws Kamaloos (Cameroon) uas nom tswv txwv peb tes haujlwm xyoo 1970 txog 1993. Tej zaum tus kwvtij saib xyuas ceg Npe-ee pom tias kuv txhawj heev nws thiaj los ua tib zoo hais rau kuv tias: “Peb cov kwvtij nyob Kamaloos cheem tsum tej ntaub ntawv Vajlugkub no heev. Peb yuav tsum xa kom tau mus rau lawv.” Peb thiaj ua li ntawd.

Kuv mus ntsib cov txwj laus uas nyob hauv Kamaloos ob peb zaug ntawm cov tebchaws uas nyob npuab Kamaloos. Cov kwvtij no, lawv siab tawv thiab pab tawm tswvyim tias kuv yuav ua li cas kuv thiaj xa tau ntaub ntawv mus rau Kamaloos. Yehauvas yeej pab peb kawg, tau li 20 lub xyoos cov kwvtij hauv Kamaloos yeej tau txais txhua Phau Tsom Faj thiab cov ntawv Peb Tes Haujlwm Rau Vajtswv (Our Kingdom Service) txhua lub hlis.

Thaum wb nyuam qhuav pib sib tham xwb, kuv pom tias Eentsaus hlub Yehauvas heev tiamsis tom qab wb sib yuav lawm kuv mam li pom tias nws hlub Yehauvas npaum li cas tiag. Kuv nco qab tias hmo uas wb ua wb lub tshoob tag Eentsaus hais kom kuv thov Yehauvas rau wb. Nws kom kuv thov Yehauvas pab kom wb ob niam txiv ua tau haujlwm puv ntoob rau Yehauvas. Yehauvas teb wb cov lus thov wb thiaj ua tau li ntawd.

Xyoo 1973 thaum wb raug caw mus ua haujlwm hauv Npe-ee, Eentsaus pab kom kuv tso siab plhuav rau Yehauvas rau qhov thaum ntawd kuv  tseem nyiam ua tes haujlwm saib xyuas thaj tsam ces kuv pheej tseem ua xyem xyav. Eentsaus hais rau kuv tias wb twb cog lus rau Yehauvas tias wb yuav siv wb lub neej los ua haujlwm rau Nws. Yog li ntawd wb yuav tau ua li lub koom haum hais. (Henplais 13:17) Kuv yeej xav ib yam li nws xav thiab, wb thiaj li mus ua haujlwm hauv Npe-ee lawm. Eentsaus yog ib tug pojniam uas zoo thiab hlub Yehauvas heev. Nws pab tau wb ob niam txiv muaj kev sib raug zoo thiab txawj txiav txim siab zoo rau wb lub neej.

Thaum wb laus lawm los Eentsaus yeej tseem txhawb kuv kawg. Xws li wb xav mus koom tej kev kawm Vajlugkub tiamsis lawv qhia ua lus Askiv xwb ces wb yuav tau kawm lus Askiv thiab mus koom lub koom txoos Askiv. Thaum ntawd wb twb muaj li 70 tawm xyoo lawm thiab kuv tseem yog ib tug ntawm Pab Uas Saib Xyuas Ceg Npe-ee nyob Fab Kis teb ces yeej tsis yoojyim li. Tiamsis Eentsaus wb sib pab sib pab ces wb kuj ua tau lawm thiab. Nimno wb twb muaj li 80 tawm xyoo lawm los wb tseem niaj hnub npaj mus kev sib txoos ua lus Askiv thiab lus Fab Kis tibsi. Wb pab txhawb lub koom txoos thiab mus tshaj tawm npaum li wb ua tau. Thaum wb mus kawm lus Askiv, Yehauvas yeej foom koob hmoov rau wb.

Ib qho koob hmoov uas ua rau wb zoo siab heev yog xyoo 2017 wb tau mus kawm Kev Kawm Rau Pab Uas Saib Xyuas Ib Ceg Thiab Lawv Cov Pojniam nyob hauv Padawxoos, Nus Yauj (Watchtower Educational Center at Patterson, New York).

Yehauvas yeej yog tus Xibhwb uas zoo tshaj plaws. (Yaxayas 30:20) Yog li ntawd peb txhua leej txhua tus tsis hais tus laus tus hluas los puav leej tau txais kev qhuab qhia zoo tshaj plaws los ntawm Yehauvas. (2 Kevcai 4:5-8) Pajlug 9:9 hais tias, “Txhua yam uas koj hais rau tus neeg txawj ntse yuav ua rau nws muaj tswvyim ntxiv. Tej uas koj qhia rau tus neeg ncaj ncees yuav ntxiv kom nws muaj kev txawj ntse.” Kuv pom tias yeej muaj li nqi Vajlugkub no hais tiag. Cov tub hluas thiab ntxhais hluas uas mloog Yehauvas lus thiab kawm los ntawm cov kwvtij nkauj muam uas muab siab npuab Yehauvas, thaum lawv loj hlob los lawv yeej hlub Yehauvas thiab tau lub neej zoo dua.

Muaj tej thaum kuv tseem nco txog hmo uas tsaus ntuj nti ntiajteb ntsiag to uas kuv ntshai heev nyob saum roob hauv tebchaws Antsawlias 60 xyoo dhau los. Thaum ntawd kuv tsis paub hais tias kuv lub neej yuav muaj kev zoo siab npaum li no. Yehauvas thiab Eentsaus nkawd ua rau kuv muaj lub neej zoo kawg nkaus li. Kuv kuj kawm tau ntau yam los ntawm lwm tus thiab. Yog li ntawd cia peb sawvdaws rau siab ntso kawm ntawm Yehauvas thiab ntawm peb cov kwvtij nkauj muam uas paub tab thiab hlub Yehauvas.